Global Village ദുബെെ ഗ്ലോബൽ വില്ലേജിന് ഇന്ന് തിരശ്ശീല വീഴും
Dubai Global Village
ദുബെെ: വിനോദസഞ്ചാരികളുടെ പ്രധാന ആകർഷണ കേന്ദ്രങ്ങളിലൊന്നായ ഗ്ലോബൽ വില്ലേജിന്റെ 27 -ാം സീസണിന് ഇന്ന് തിരശ്ശീല വീഴും.
വ്യത്യസ്തമായ 27 പവിലിയനുകളാണ് ഈ പതിപ്പിലുണ്ടായിരുന്നത്. മനോഹരമായ കാഴ്ചകൾ കാണാനും ത്രസിപ്പിക്കുന്ന റൈഡുകൾ ആസ്വദിക്കാനും വൈവിധ്യമാർന്ന വിനോദ പരിപാടികളിലേർപ്പെടാനും ലക്ഷക്കണക്കിനാളുകളാണ് വൈകുന്നേരങ്ങളിൽ ഇവിടേക്കെത്തിയത്.
സന്ദർശകർക്ക് നവ്യാനുഭവം പകരുന്നതായിരുന്നു ഹാപ്പിനെസ്സ് ഗേറ്റ്, റോഡ് ഓഫ് ഏഷ്യ, ബിഗ് ബലൂൺ സവാരി, ഹൗസ് ഓഫ് ഫിയർ, ഡിഗേഴ്സ് ലാബ് എന്നിവയെല്ലാം. വ്യത്യസ്ത രുചികളും സ്റ്റേജ് ഷോകളും ഷോപ്പിങ്ങുമെല്ലാം മുൻവർഷങ്ങളിലെ പോലെ ഇത്തവണയും ആഗോള ഗ്രാമത്തിന്റെ മാറ്റുകൂട്ടി. അതിഥികളെ വരവേത്ക്കാനായി 3500-ലേറെ ഷോപ്പിങ് കേന്ദ്രങ്ങളും 250-ൽപരം ഭക്ഷണശാലകളും കഫ്റ്റീരിയകളും ഇവിടെ നിറഞ്ഞുനിന്നു. ക്രിസ്മസ്, പുതുവർഷം, റംസാൻ, ചെറിയപെരുന്നാൾ തുടങ്ങിയ പ്രധാന ആഘോഷദിവസങ്ങളിൽ അത്യുഗ്രൻ കരിമരുന്ന് പ്രയോഗങ്ങൾ ഉൾപ്പെടെ ഗംഭീര പരിപാടികൾക്കാണ് ഗ്ലോബൽ വില്ലേജ് സാക്ഷ്യംവഹിച്ചത്. സന്ദർശകരിൽ ഗതാഗത അവബോധം വളർത്താനായി ഒട്ടേറെ കാമ്പയിനുകളും സംഘടിപ്പിച്ചിരുന്നു.
വിദ്യാർഥികൾക്കായി സ്കോളർഷിപ്പുകൾ നൽകിയും മത്സരങ്ങൾ നടത്തിയും കുട്ടികളുടെയും ഇഷ്ടവിനോദ കേന്ദ്രങ്ങളിലൊന്നായി. വ്യത്യസ്ത രാജ്യങ്ങളുടെ രുചിവൈവിധ്യങ്ങളും സംസ്കാരവും പാരമ്പര്യവുമെല്ലാം അടുത്തറിയാനും മനസ്സിലാക്കാനുമുള്ള അവസരമാണ് എല്ലാവർഷവും വിസ്മയ ഗ്രാമം സമ്മാനിക്കുന്നത്. ലോകത്തെ ഒരു ഗ്രാമത്തിലേക്ക് ചുരുക്കിക്കൊണ്ട് വിനോദത്തിന്റെയും ആഘോഷത്തിന്റെയും അവസാനവാക്കാവുകയാണ് ആഗോളഗ്രാമമായ ദുബായ് ഗ്ലോബൽ വില്ലേജ്.
യുഎഇയിലെ വിവരങ്ങളെല്ലാം വിരല്ത്തുമ്പിലെത്താന് ഈ ഗ്രൂപ്പിൽ അംഗമാവുക