KPC Revises Employment Terms കുവൈത്ത് സിറ്റി: കുവൈത്ത് പൗരത്വം റദ്ദാക്കപ്പെട്ടവരുടെ തൊഴിൽ നിലയിലും നിയമന വ്യവസ്ഥകളിലും മാറ്റം വരുത്താൻ കുവൈത്ത് പെട്രോളിയം കോർപ്പറേഷനും (KPC) അനുബന്ധ സ്ഥാപനങ്ങളും നടപടി സ്വീകരിച്ചു. ഇതുസംബന്ധിച്ച് കെപിസി ചീഫ് എക്സിക്യൂട്ടീവ് ഓഫീസർ ഔദ്യോഗിക നിർദേശം പുറപ്പെടുവിച്ചതായി അറബ് ടൈംസ് റിപ്പോർട്ട് ചെയ്തു.
കാബിനറ്റ് സെക്രട്ടറി ജനറൽ എണ്ണമന്ത്രിക്ക് അയച്ച കത്തിന്റെ അടിസ്ഥാനത്തിലാണ് നടപടി. പൗരത്വം പിൻവലിക്കപ്പെട്ടവരുടെ ആനുകൂല്യങ്ങളുമായി ബന്ധപ്പെട്ട് കാബിനറ്റ് തീരുമാനം നമ്പർ 1188-ൽ നിർദേശിച്ച വ്യവസ്ഥകളാണ് ഇതിന് അടിസ്ഥാനമാക്കിയിരിക്കുന്നത്. പുതിയ നിർദേശപ്രകാരം, പൗരത്വം റദ്ദാക്കപ്പെട്ട ജീവനക്കാർക്ക് പൊതുമേഖലയിലോ സ്വകാര്യ മേഖലയിലോ ഉള്ള കരാർ വ്യവസ്ഥകളിലൂടെ നിലവിലെ ജോലി തുടരാൻ സാധിക്കും. എന്നാൽ ഇവർക്ക് നേതൃത്വപരമായ പദവികളിലോ മാനേജീരിയൽ തസ്തികകളിലോ തുടരാൻ അനുമതിയുണ്ടാകില്ല.
ബാധിതരായ ജീവനക്കാരെ കുവൈത്ത് പൗരന്മാർക്കുള്ള തൊഴിൽ വിഭാഗത്തിൽനിന്ന് മാറ്റി, വിദേശ ജീവനക്കാർക്കായി നിശ്ചയിച്ചിട്ടുള്ള സ്ഥിരമായ പ്രതിഫലത്തോടുകൂടിയ കരാർ വ്യവസ്ഥകൾക്ക് കീഴിൽ പുനർവർഗീകരിക്കണമെന്നാണ് നിർദേശം. പുതിയ കരാർ വ്യവസ്ഥകൾ പൗരത്വം റദ്ദാക്കിക്കൊണ്ടുള്ള ഉത്തരവ് പുറപ്പെടുവിച്ചതിന്റെ തൊട്ടടുത്ത ദിവസം മുതൽ മുൻകാല പ്രാബല്യത്തോടെ ബാധകമാക്കും. ഇതിലൂടെ ബന്ധപ്പെട്ട ജീവനക്കാരുടെ തൊഴിൽ നിലയും പ്രതിഫല വ്യവസ്ഥകളും പുതുക്കി ക്രമീകരിക്കുകയാണ് ലക്ഷ്യം.
കാബിനറ്റ് തീരുമാനത്തിൽ പരാമർശിച്ചിട്ടുള്ള വിവിധ വിഭാഗങ്ങളിലുള്ളവർക്കാണ് ഈ വ്യവസ്ഥകൾ ബാധകമാകുന്നത്. ആർട്ടിക്കിൾ 13-ലെ നാലാം ഖണ്ഡപ്രകാരം പൗരത്വം പിൻവലിക്കപ്പെട്ടവരിൽ ആർട്ടിക്കിൾ 8 പ്രകാരമുള്ള കേസുകൾ, ശ്രദ്ധേയമായ നേട്ടങ്ങൾ കൈവരിച്ചവരായി പരിഗണിക്കപ്പെട്ടവർ, 1965-ലെ സെൻസസിൽ ഉൾപ്പെട്ടവർ, കുവൈത്തി മാതാക്കളുടെ മക്കൾ തുടങ്ങിയ വിഭാഗങ്ങളും ഇതിൽ ഉൾപ്പെടുന്നു. കെപിസിയുടെയും അനുബന്ധ സ്ഥാപനങ്ങളുടെയും തൊഴിൽ ക്രമീകരണങ്ങളിൽ ഈ നിർദേശം മാറ്റങ്ങൾ കൊണ്ടുവരുമെന്നാണ് റിപ്പോർട്ട്.
