Reckless Driver Jailed in Kuwait കുവൈത്ത് സിറ്റി: അപകടകരമായ രീതിയിൽ വാഹനമോടിക്കുകയും അധികൃതരിൽനിന്ന് രക്ഷപ്പെടാൻ വാഹനം ജഹ്റയിലെ കുതിരലായത്തിൽ ഒളിപ്പിക്കുകയും ചെയ്ത ഡ്രൈവറെ കുവൈത്ത് ജനറൽ ട്രാഫിക് ഡിപ്പാർട്ട്‌മെന്റ് അറസ്റ്റ് ചെയ്തു. ഇയാളെ സെൻട്രൽ ജയിലിലേക്ക് അയച്ചതായും നിയമലംഘനത്തിന് ഉപയോഗിച്ച വാഹനം പിടിച്ചെടുത്ത് പൊളിച്ചുനീക്കിയതായും അധികൃതർ അറിയിച്ചു.
അപകടകരവും അശ്രദ്ധവുമായ ഡ്രൈവിങ് നടത്തുന്ന ഒരാളെക്കുറിച്ച് ഓപ്പറേഷൻസ് റൂമിൽ ലഭിച്ച പരാതിയെ തുടർന്നാണ് നടപടി. ജനറൽ ട്രാഫിക് ഡിപ്പാർട്ട്‌മെന്റിന് കീഴിലുള്ള സെക്യൂരിറ്റി കൺട്രോൾ വിഭാഗത്തിലെ പട്രോളിങ് സംഘം ജഹ്റയിലെ കുതിരലായങ്ങൾ കേന്ദ്രീകരിച്ച് പരിശോധന നടത്തി. ഇതിനിടെ സംശയാസ്പദമായ വാഹനം ഒരു കുതിരലായത്തിനുള്ളിൽ ഒളിപ്പിച്ച നിലയിൽ കണ്ടെത്തുകയായിരുന്നു.
തുടർന്ന് പബ്ലിക് അതോറിറ്റി ഫോർ യൂത്ത് ആൻഡ് സ്‌പോർട്‌സുമായി ഏകോപനം നടത്തി അധികൃതർ വാഹനം പിടിച്ചെടുത്തു. അന്വേഷണത്തിനൊടുവിൽ ഡ്രൈവറുടെ വ്യക്തിവിവരങ്ങൾ കണ്ടെത്തുകയും ഇയാളെ അറസ്റ്റ് ചെയ്യുകയും ചെയ്തു. ചോദ്യം ചെയ്യലിൽ തനിക്കെതിരായ നിയമലംഘനങ്ങൾ ഡ്രൈവർ സമ്മതിച്ചതായി അധികൃതർ വ്യക്തമാക്കി.
കുവൈത്ത് ട്രാഫിക് നിയമത്തിലെ ആർട്ടിക്കിൾ 33 ബിസ് പ്രകാരമാണ് വാഹനം പിടിച്ചെടുത്ത് പൊളിച്ചുനീക്കിയത്. റോഡിൽ മറ്റുള്ളവരുടെ ജീവൻ അപകടത്തിലാക്കുന്ന രീതിയിൽ വാഹനമോടിക്കുന്നവർക്കെതിരെ കർശന നിയമനടപടികൾ സ്വീകരിക്കുമെന്ന് ജനറൽ ട്രാഫിക് ഡിപ്പാർട്ട്‌മെന്റ് മുന്നറിയിപ്പ് നൽകി.
റോഡ് സുരക്ഷയെ ബാധിക്കുന്ന നിയമലംഘനങ്ങൾ കണ്ടെത്തുന്നതിനായി നിരീക്ഷണവും പരിശോധനാ നടപടികളും തുടരുമെന്നും അധികൃതർ അറിയിച്ചു. പൊതുജനങ്ങളുടെ സുരക്ഷയ്ക്ക് ഭീഷണിയാകുന്ന ഡ്രൈവിങ് പെരുമാറ്റങ്ങൾക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്നും ട്രാഫിക് വിഭാഗം വ്യക്തമാക്കി.
