Kuwait Accidents കുവൈറ്റ് സിറ്റി: കുവൈത്തിലെ സാൽവയിലും മുത്ലയിലും ഉണ്ടായ വെവ്വേറെ വാഹനാപകടങ്ങളിൽ എട്ട് വയസ്സുകാരനായ കുട്ടിയും മോട്ടോർ സൈക്കിൾ യാത്രികനായ യുവാവും മരിച്ചു. സാൽവയിൽ നടന്ന അപകടവുമായി ബന്ധപ്പെട്ട് മുപ്പതുകാരനായ കുവൈറ്റ് പൗരനെ സുരക്ഷാ സേന കസ്റ്റഡിയിലെടുത്തു.
സാൽവയിലെ ഒരു ആന്തരിക തെരുവിൽ വെച്ചാണ് കുട്ടിയെ വാഹനം ഇടിച്ചത്. വിവരം ലഭിച്ചയുടൻ സുരക്ഷാ ഉദ്യോഗസ്ഥരും മെഡിക്കൽ എമർജൻസി ടീമും സ്ഥലത്തെത്തിയെങ്കിലും ഗുരുതരമായി പരിക്കേറ്റ കുട്ടി സംഭവസ്ഥലത്തുതന്നെ മരണപ്പെടുകയായിരുന്നു. വാഹനം മിതമായ വേഗതയിലായിരുന്നുവെന്നും കുട്ടി പെട്ടെന്ന് വാഹനത്തിന് മുന്നിലേക്ക് കടന്നപ്പോൾ കൂട്ടിയിടി ഒഴിവാക്കാൻ ശ്രമിച്ചെങ്കിലും അപകടം തടയാൻ കഴിഞ്ഞില്ലെന്നുമാണ് ഡ്രൈവർ നൽകിയ വിശദീകരണം. ഡ്രൈവർക്കെതിരെ നിയമനടപടികൾ പുരോഗമിക്കുകയാണ്.
മറ്റൊരു സംഭവത്തിൽ, മുത്ല പ്രദേശത്ത് കറുത്ത ജർമ്മൻ നിർമ്മിത മോട്ടോർ സൈക്കിൾ മറിഞ്ഞാണ് 1993-ൽ ജനിച്ച യുവാവ് കൊല്ലപ്പെട്ടത്. അപകടത്തിൽ ഗുരുതരമായി പരിക്കേറ്റ യുവാവിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ പോലീസും സുരക്ഷാ വിഭാഗവും അന്വേഷണം ആരംഭിച്ചിട്ടുണ്ട്.
