സമീപകാലത്ത് യുഎഇ ക്രിക്കറ്റ് ലോകത്ത് കൈവരിച്ച വളർച്ച അവിശ്വസനീയമാണ്. യുഎഇ ഭരണാധികാരികളും ക്രിക്കറ്റ് ബോർഡും നൽകിയ മികച്ച പിന്തുണയും കളിക്കളത്തിൽ താരങ്ങളുടെ മികച്ച പ്രകടനവും ഈ മുന്നേറ്റത്തിൽ വലിയ പങ്കുവഹിക്കുന്നുണ്ട്. അത്തരത്തിൽ യുഎഇ ക്രിക്കറ്റ് ടീമിൽ ശ്രദ്ധേയനായ താരമാണ് ഇന്ത്യയിൽ ജനിച്ച 20-കാരനായ ഓൾറൗണ്ടർ അയാൻ അഫ്സൽ ഖാൻ. മുംബൈയിലെ ചെംബൂരിൽ ജനിച്ച അയാൻ, ചെറുപ്പകാലത്താണ് കുടുംബത്തോടൊപ്പം യുഎഇയിലേക്ക് കുടിയേറുന്നത്.

“ഞാൻ വളർന്നത് യുഎഇയിലാണ്, ഈ നാട് എനിക്ക് സ്വന്തം വീട് പോലെയായി മാറി. വിദ്യാഭ്യാസം തുടരുന്നതിനൊപ്പം തന്നെ ക്രിക്കറ്റിൽ മികച്ചൊരു കരിയർ പടുത്തുയർത്താനുള്ള അവസരവും യുഎഇ എനിക്ക് നൽകി,” അയാൻ ഗൾഫ് ന്യൂസിന് നൽകിയ അഭിമുഖത്തിൽ പ്രതികരിച്ചു. കുടുംബത്തിന് മികച്ചൊരു ഭാവി തേടിയാണ് അയാന്റെ മാതാപിതാക്കൾ യുഎഇയിലേക്ക് മാറിയത്. എന്നാൽ ആ പ്രവാസം പിന്നീട് അയാന്റെ ജീവിതത്തിലെയും ക്രിക്കറ്റിലെയും വലിയ വഴിത്തിരിവായി മാറുകയായിരുന്നു.

അന്താരാഷ്ട്ര ക്രിക്കറ്റ് കളിക്കുക എന്നത് മാത്രമല്ല അയാന്റെ ലക്ഷ്യം. യുഎഇക്കായി വലിയ ടൂർണമെന്റുകൾ ജയിക്കുക, ലോകത്തിലെ പ്രമുഖ ടി20 ലീഗുകളിൽ സാന്നിധ്യമറിയിക്കുക, വരും തലമുറയ്ക്ക് പ്രചോദനമാകുന്ന ഒരു കരിയർ പടുത്തുയർത്തുക എന്നിവയാണ് ഈ യുവതാരത്തിന്റെ പ്രധാന ആഗ്രഹങ്ങൾ.

ഇന്ത്യൻ ക്രിക്കറ്റും ഇതിഹാസ താരങ്ങളും അയാന്റെ വളർച്ചയിൽ വലിയ സ്വാധീനം ചെലുത്തിയിട്ടുണ്ട്. ഇന്ത്യൻ ഓൾറൗണ്ടർ ഹാർദിക് പാണ്ഡ്യയാണ് അയാന്റെ റോൾ മോഡൽ. “ഹാർദിക് പാണ്ഡ്യയുടെ ആത്മവിശ്വാസവും പോരാട്ടവീര്യവും ഒരു ഓൾറൗണ്ടർ എന്ന നിലയിലുള്ള മികവുമാണ് എന്നെ ആകർഷിച്ചത്. ബാറ്റ് കൊണ്ടും ബോൾ കൊണ്ടും കളിയുടെ ഗതി മാറ്റാൻ അദ്ദേഹത്തിന് സാധിക്കും. സമ്മർദ്ദ നിമിഷങ്ങളിൽ അദ്ദേഹം കളി കൈകാര്യം ചെയ്യുന്ന രീതി എനിക്ക് ഏറെ ഇഷ്ടമാണ്,” അയാൻ വെളിപ്പെടുത്തി.

മറ്റ് പല യുവ ക്രിക്കറ്റർമാരെയും പോലെ ഐപിഎല്ലിൽ കളിക്കുക എന്നതും അയാന്റെ വലിയൊരു സ്വപ്നമാണ്. റോയൽ ചലഞ്ചേഴ്സ് ബെംഗളൂരു (ആർസിബി) ടീമിനായി ഭാവിയിൽ ജേഴ്സിയണിയണമെന്നാണ് അദ്ദേഹത്തിന്റെ ആഗ്രഹം. ചെറുപ്പത്തിൽ ഇന്ത്യൻ ദേശീയ ടീമിനായി കളിക്കണം എന്നാഗ്രഹിച്ചിരുന്നെങ്കിലും യുഎഇയിലെ ജീവിതവും അവസരങ്ങളും അദ്ദേഹത്തിന്റെ ലക്ഷ്യത്തെ മാറ്റിമറിച്ചു. ഇപ്പോൾ യുഎഇ ദേശീയ ടീമിനായി സർവ്വതും നൽകാനാണ് താൻ ആഗ്രഹിക്കുന്നതെന്ന് അയാൻ വ്യക്തമാക്കുന്നു.

ഇതിനോടകം തന്നെ അന്താരാഷ്ട്ര തലത്തിൽ ശ്രദ്ധേയമായ പല നേട്ടങ്ങളും അയാൻ സ്വന്തമാക്കിയിട്ടുണ്ട്. ന്യൂസിലാൻഡിനെതിരായ മത്സരത്തിൽ പ്ലെയർ ഓഫ് ദി മാച്ച് പുരസ്കാരം നേടിയത് അദ്ദേഹത്തിന്റെ കരിയറിലെ വലിയ നിമിഷങ്ങളിലൊന്നാണ്. കൂടാതെ, വെറും 16-ാം വയസ്സിൽ ഐസിസി പുരുഷ ടി20 ലോകകപ്പിൽ കളിക്കുന്ന ഏറ്റവും പ്രായം കുറഞ്ഞ താരമെന്ന ചരിത്ര റെക്കോർഡും അയാൻ സ്വന്തമാക്കി. രാജ്യത്തിനായി കളിക്കുമ്പോൾ വലിയ ഉത്തരവാദിത്തവും ആവേശവുമാണ് അനുഭവപ്പെട്ടതെന്ന് താരം ഓർത്തെടുക്കുന്നു.

വളർച്ചയുടെ പാതയിൽ കളിയിലെ ഫോമില്ലായ്മയും ടീമിലെ സ്ഥാനത്തെക്കുറിച്ചുള്ള ആശങ്കകളും അടങ്ങിയ പ്രതിസന്ധി ഘട്ടങ്ങളെയും അയാന് നേരിടേണ്ടി വന്നിട്ടുണ്ട്. എന്നാൽ അത്തരം തിരിച്ചടികൾ തന്നിലെ ക്രിക്കറ്ററെ കൂടുതൽ പക്വതയുള്ളവനാക്കാൻ സഹായിച്ചുവെന്നാണ് അയാൻ വിശ്വസിക്കുന്നത്. ക്ഷമയോടെ കഠിനാധ്വാനം ചെയ്യാനും സ്വന്തം കഴിവുകളിൽ വിശ്വസിക്കാനും ആ അനുഭവങ്ങൾ പഠിപ്പിച്ചു.

വ്യക്തിഗത മികവിനേക്കാൾ ടീം വർക്കിലാണ് യുഎഇ വിശ്വസിക്കുന്നതെന്ന് അയാൻ പറയുന്നു. പരിചയസമ്പന്നരും യുവതാരങ്ങളും അടങ്ങുന്ന സമീകൃതമായ ഒരു ടീമാണ് യുഎഇയുടേത്. സമീപകാലത്ത് എസിസി പ്രീമിയർ കപ്പ് ഫൈനലിൽ നേപ്പാളിനോട് പരാജയപ്പെട്ടെങ്കിലും തളരാതെ മുന്നോട്ടുപോകാനാണ് ടീമിന്റെ തീരുമാനം. ഇന്ത്യയിൽ ജനിച്ച്, യുഎഇയിൽ വളർന്ന്, ഇന്ന് പ്രവാസി നാടിന്റെ അഭിമാനമായി മാറിയ അയാൻ അഫ്സൽ ഖാൻ യുഎഇക്കായി വലിയ കിരീടങ്ങൾ നേടുക എന്ന ഒരൊറ്റ ലക്ഷ്യത്തോടെ തന്റെ പ്രയാണം തുടരുകയാണ്.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

സുരക്ഷാ ആശങ്കകൾ നീങ്ങുന്നു; യുഎഇയിലേക്കുള്ള വിമാന സർവീസുകൾ പുനരാരംഭിച്ച് എയർലൈനുകൾ

UAE drisya — September 19, 2026·0 Comment

Airlines Resume Flights to the UAE ദുബൈ∙ മേഖലയിൽ നിലനിന്നിരുന്ന സുരക്ഷാ ആശങ്കകളെ തുടർന്ന് താൽക്കാലികമായി നിർത്തിവച്ച യുഎഇയിലേക്കുള്ള വിമാന സർവീസുകൾ അന്താരാഷ്ട്ര എയർലൈനുകൾ ഘട്ടംഘട്ടമായി പുനരാരംഭിക്കുന്നു. യുഎഇയിലേക്കുള്ള യാത്രാ മുന്നറിയിപ്പുകൾ ചില രാജ്യങ്ങൾ ഇപ്പോഴും നിലനിർത്തിയിട്ടുണ്ടെങ്കിലും, ഒക്ടോബർ, നവംബർ മാസങ്ങളിലായി നിരവധി വിമാനക്കമ്പനികൾ സർവീസ് പുനഃസ്ഥാപിക്കാനുള്ള നടപടികൾ ആരംഭിച്ചിട്ടുണ്ട്.

APPLY NOW FOR THE LATEST VACANCIES

ബജറ്റ് എയർലൈനായ വിസ് എയർ ഒക്ടോബർ 25 മുതൽ ദുബൈയിലേക്കും ഒക്ടോബർ 27 മുതൽ അബൂദബിയിലേക്കുമുള്ള സർവീസുകൾ പുനരാരംഭിക്കുമെന്ന് അറിയിച്ചിട്ടുണ്ട്. ബ്രിട്ടീഷ് എയർവേസ് നവംബർ 4 മുതൽ ദുബൈയിലേക്ക് പ്രതിദിന സർവീസ് നടത്തുന്നതിനുള്ള ബുക്കിങ് ആരംഭിച്ചിട്ടുണ്ട്. ടർക്കിഷ് എയർലൈൻസ് ദുബൈയിലേക്കും അബൂദബിയിലേക്കുമുള്ള സർവീസുകൾ ഇതിനകം പുനരാരംഭിച്ചിട്ടുണ്ട്.

അതേസമയം, ചില വിമാനക്കമ്പനികൾ സർവീസ് നിർത്തിവച്ച കാലയളവ് നീട്ടിയിട്ടുണ്ട്. എയർ ഫ്രാൻസ് ഒക്ടോബർ 13 വരെ ദുബൈ സർവീസുകൾ നിർത്തിവച്ചിരുന്നു. ലുഫ്ത്താൻസ, കെഎൽഎം, സിംഗപ്പൂർ എയർലൈൻസ്, ഐടിഎ എയർവേസ്, എയർബാൾട്ടിക് എന്നീ കമ്പനികൾ ഒക്ടോബർ 24 വരെ ദുബൈയിലേക്കുള്ള സർവീസുകൾ നിർത്തിവച്ചിരിക്കുകയാണ്.

ഫിലിപ്പൈൻ എയർലൈൻസ് ഒക്ടോബർ 2 വരെയും എയർ അസ്താന സെപ്റ്റംബർ 30 വരെയും സർവീസുകൾ റദ്ദാക്കിയിട്ടുണ്ട്. ഈ തീയതികൾക്ക് ശേഷം സർവീസുകൾ പുനരാരംഭിക്കുന്ന കാര്യത്തിൽ സ്ഥിതിഗതികൾ വിലയിരുത്തിയ ശേഷമായിരിക്കും കമ്പനികൾ തീരുമാനമെടുക്കുക.

ചില പ്രധാന അന്താരാഷ്ട്ര വിമാനക്കമ്പനികൾ യുഎഇ സർവീസുകൾ പുനരാരംഭിക്കുന്നതിനുള്ള സമയക്രമം കൂടുതൽ ദീർഘിപ്പിച്ചിട്ടുണ്ട്. ബ്രിട്ടീഷ് എയർവേസിന്റെ അബൂദബി സർവീസ് 2027-28 ശൈത്യകാലത്തേക്കാണ് മാറ്റിയിരിക്കുന്നത്. എയർ കാനഡ 2027 ജനുവരി പകുതി വരെയും വിർജിൻ അറ്റ്ലാന്റിക് 2027 ഒക്ടോബർ വരെയും ദുബൈയിലേക്കുള്ള സർവീസുകൾ റദ്ദാക്കിയിട്ടുണ്ട്.

അന്താരാഷ്ട്ര എയർലൈനുകളുടെ തിരിച്ചുവരവ് പൂർണതോതിൽ എത്തിയിട്ടില്ലെങ്കിലും യുഎഇ ആസ്ഥാനമായ എമിറേറ്റ്സും ഫ്ലൈദുബായിയും ഉൾപ്പെടെയുള്ള വിമാനക്കമ്പനികൾ സർവീസുകൾ വേഗത്തിൽ പുനഃസ്ഥാപിക്കുന്നുണ്ട്.

ദുബൈ വിമാനത്താവളത്തിലെ വിമാന സർവീസ് ശേഷി നിലവിൽ 84 ശതമാനവും യാത്രക്കാരുടെ എണ്ണം 78 ശതമാനവും വീണ്ടെടുത്തതായാണ് അധികൃതർ വ്യക്തമാക്കുന്നത്. ശൈത്യകാലത്ത് കൂടുതൽ വിമാന സർവീസുകൾ തിരിച്ചെത്തുന്നതോടെ വിമാനത്താവളത്തിലെ പ്രവർത്തനങ്ങൾ കൂടുതൽ സാധാരണ നിലയിലാകുമെന്നാണ് ദുബൈ എയർപോർട്ട്സ് അധികൃതരുടെ പ്രതീക്ഷ.

Enhanced Safety for School Bus Journeys സ്കൂൾ ബസ് യാത്രയ്ക്ക് കൂടുതൽ സുരക്ഷ; അത്യാധുനിക സാങ്കേതിക വിദ്യയുമായി ഷാർജ പൊലീസ്

UAE drisya — September 19, 2026 · 0 Comment

Enhanced Safety for School Bus Journeys ഷാർജ∙ സ്കൂൾ വിദ്യാർഥികളുടെ സുരക്ഷിതമായ യാത്ര ഉറപ്പാക്കുന്നതിനായി അത്യാധുനിക സാങ്കേതിക സംവിധാനങ്ങൾ ശക്തമാക്കി ഷാർജ പൊലീസ്. സ്കൂൾ ബസുകളിൽ സ്ഥാപിച്ചിരിക്കുന്ന എമർജൻസി ബട്ടൺ ഒരുതവണ അമർത്തിയാൽ ബസിന്റെ കൃത്യമായ സ്ഥാനം, വാഹനവുമായി ബന്ധപ്പെട്ട വിവരങ്ങൾ, അടിയന്തര സാഹചര്യത്തിന്റെ സ്വഭാവം തുടങ്ങിയ വിവരങ്ങൾ തത്സമയം പൊലീസ് കൺട്രോൾ റൂമിൽ ലഭിക്കുന്ന സംവിധാനമാണ് നിലവിലുള്ളത്.

ഷാർജ പൊലീസിന്റെ ‘അമാൻ യാ ബിലാദി’ റേഡിയോ പരിപാടിയിലൂടെയാണ് അധികൃതർ സ്കൂൾ ബസ് സുരക്ഷയ്ക്കായി നടപ്പാക്കുന്ന സംവിധാനത്തിന്റെ വിശദാംശങ്ങൾ വ്യക്തമാക്കിയത്.

ഷാർജ പ്രൈവറ്റ് എജ്യുക്കേഷൻ അതോറിറ്റിയുടെ ‘നിങ്ങളുടെ മക്കൾ സുരക്ഷിതരാണ്’ പദ്ധതിയുടെ ഭാഗമായാണ് ‘മഅ്മൻ’ എന്ന ഡിജിറ്റൽ സുരക്ഷാ പ്ലാറ്റ്‌ഫോം 2019ൽ ആരംഭിച്ചത്. സ്കൂൾ ബസ് അപകടത്തിൽപ്പെടുകയോ തകരാറിലാകുകയോ ചെയ്യുമ്പോഴും വിദ്യാർഥികൾക്കോ ജീവനക്കാർക്കോ അടിയന്തര വൈദ്യസഹായം ആവശ്യമായി വരുമ്പോഴും ഈ സംവിധാനം പ്രയോജനപ്പെടുത്താം.

APPLY NOW FOR THE LATEST VACANCIES

ഇത്തരം സാഹചര്യങ്ങളിൽ ബസിലെ സൂപ്പർവൈസർ സ്മാർട് ബോർഡ് സംവിധാനവുമായി ബന്ധിപ്പിച്ച ടാബ്‌ലെറ്റിലെ എമർജൻസി ബട്ടൺ അമർത്തിയാൽ മതി. വിവരങ്ങൾ ഉടൻ തന്നെ പൊലീസ് കൺട്രോൾ റൂമിൽ എത്തും. തുടർന്ന് ബന്ധപ്പെട്ട ജീവനക്കാരുമായി ആശയവിനിമയം നടത്തി സാഹചര്യം വിലയിരുത്തുകയും ആവശ്യമായ അടിയന്തര സേവനങ്ങൾ സ്ഥലത്തെത്തിക്കുകയും ചെയ്യും. ആവശ്യാനുസരണം ആംബുലൻസും പൊലീസ് പട്രോൾ വാഹനങ്ങളും സംഭവസ്ഥലത്തേക്ക് അയയ്ക്കും.

അടിയന്തര സാഹചര്യങ്ങൾ കൈകാര്യം ചെയ്യുന്നതിന് പുറമെ, വിദ്യാർഥികളുടെ ദൈനംദിന സ്കൂൾ ബസ് യാത്ര നിരീക്ഷിക്കാനും ‘മഅ്മൻ’ പ്ലാറ്റ്‌ഫോം സഹായിക്കുന്നു. മൊബൈൽ ആപ്പ് വഴി രക്ഷിതാക്കൾക്ക് സ്കൂൾ ബസിന്റെ തത്സമയ സഞ്ചാരപാത നിരീക്ഷിക്കാം. കുട്ടി ബസിൽ കയറിയ സമയവും ഇറങ്ങിയ സമയവും അറിയാനും ഇതിലൂടെ സാധിക്കും.

കുട്ടികളുടെ സുരക്ഷ കൂടുതൽ ഉറപ്പാക്കുന്നതിനായി സ്കൂൾ ബസുകളിൽ ക്യാമറകൾ ഉൾപ്പെടെയുള്ള വിവിധ സുരക്ഷാ ഉപകരണങ്ങളും സ്ഥാപിച്ചിട്ടുണ്ട്. ബസ് യാത്രയ്ക്കിടെ ഉണ്ടാകാവുന്ന അടിയന്തര സാഹചര്യങ്ങൾ വേഗത്തിൽ തിരിച്ചറിയാനും ആവശ്യമായ ഇടപെടൽ നടത്താനും ഈ സംവിധാനങ്ങൾ സഹായിക്കും.

അതേസമയം, സാങ്കേതിക സംവിധാനങ്ങൾക്കൊപ്പം ഡ്രൈവർമാരുടെയും ബസ് സൂപ്പർവൈസർമാരുടെയും പരിശീലനത്തിനും പ്രാധാന്യം നൽകുന്നുണ്ടെന്ന് അധികൃതർ വ്യക്തമാക്കി. പുതിയ അധ്യയന വർഷം ആരംഭിക്കുന്നതിന് മുൻപ് ആവശ്യമായ പരിശീലനം ഇവർക്ക് നൽകുന്നുണ്ട്. അടിയന്തര സാഹചര്യങ്ങൾ തിരിച്ചറിയാനും സുരക്ഷാ നടപടികൾ സ്വീകരിക്കാനും ജീവനക്കാരെ സജ്ജരാക്കുന്നതാണ് പരിശീലനത്തിന്റെ പ്രധാന ലക്ഷ്യം.

സ്കൂൾ ബസ് യാത്രയ്ക്കിടെ എന്തെങ്കിലും സുരക്ഷാ വീഴ്ച ശ്രദ്ധയിൽപ്പെട്ടാൽ യാത്രക്കാരോ രക്ഷിതാക്കളോ വാഹനം സ്വയം തടയാൻ ശ്രമിക്കരുതെന്നും അധികൃതർ നിർദേശിച്ചു. പകരം, സുരക്ഷാ പ്രശ്നം ശ്രദ്ധയിൽപ്പെട്ടാൽ ഉടൻ 901 എന്ന ഷാർജ പൊലീസ് നമ്പറിൽ വിവരം അറിയിക്കണമെന്നും അധികൃതർ അഭ്യർഥിച്ചു.