Dubai Road Closure: യുഎഇയിൽ ഇത്തിഹാദ് റെയിൽ പദ്ധതിയുടെ നിർമാണപ്രവർത്തനങ്ങളുമായി ബന്ധപ്പെട്ട് ദുബായിലേക്കുള്ള റോഡിൽ താൽക്കാലിക നിയന്ത്രണം ഏർപ്പെടുത്തി. ഒക്ടോബർ 20 മുതൽ 27 വരെ ഒരാഴ്ചയാണ് നിയന്ത്രണം. അർധരാത്രി 12 മുതൽ പുലർച്ചെ 4 വരെ മലൈഹ റോഡിൽ നിന്ന് ദുബായിലേക്ക് (എമിറേറ്റ്സ് റോഡ്) പ്രവേശിക്കുന്ന എക്സിറ്റാണ് അടച്ചിടുന്നത്. ഇതുവഴി യാത്ര ചെയ്യുന്ന വാഹനയാത്രക്കാർ യാത്ര മുൻകൂട്ടി ആസൂത്രണം ചെയ്യണമെന്ന് അധികൃതർ അറിയിച്ചു.
പുലർച്ചെ നാലു മണിക്കൂർ നിയന്ത്രണം
ഇത്തിഹാദ് റെയിലിന്റെ അടിസ്ഥാന സൗകര്യ വികസന പ്രവർത്തനങ്ങളുടെ ഭാഗമായാണ് റോഡിൽ താൽക്കാലിക നിയന്ത്രണം ഏർപ്പെടുത്തിയിരിക്കുന്നത്. ദിവസവും അർധരാത്രി 12 മുതൽ പുലർച്ചെ 4 വരെയാണ് നിയന്ത്രണം ബാധകമാകുക. ഒരാഴ്ച നീളുന്ന പ്രവൃത്തികൾക്കിടെ യാത്രക്കാർ ബദൽ റോഡുകൾ ഉപയോഗിക്കുകയോ നിയന്ത്രണമില്ലാത്ത സമയങ്ങളിൽ യാത്ര ക്രമീകരിക്കുകയോ ചെയ്യണം.
യുഎഇയിലെ റെയിൽ യാത്രയ്ക്ക് കൂടുതൽ സൗകര്യങ്ങൾ
യുഎഇയുടെ ദേശീയ യാത്രാ റെയിൽ ശൃംഖലയായ ഇത്തിഹാദ് റെയിലിന്റെ യാത്രാ സർവീസുകൾക്ക് സെപ്റ്റംബർ 30-നാണ് തുടക്കമായത്. ദുബായിലെ അൽ യലായിസ് സ്റ്റേഷനിൽ നിന്ന് അബുദാബിയിലെ മുഹമ്മദ് ബിൻ സായിദ് സിറ്റി സ്റ്റേഷനിലേക്കുള്ള യാത്ര ഉൾപ്പെടെ പുതിയ റെയിൽ സർവീസുകൾ യാത്രക്കാർക്ക് പ്രയോജനപ്പെടുന്നുണ്ട്.
ദുബായിലെ ജുമൈറ ഗോൾഫ് എസ്റ്റേറ്റ്സ് മെട്രോ സ്റ്റേഷനെയും അൽ യലായിസ് റെയിൽവേ സ്റ്റേഷനെയും ബന്ധിപ്പിക്കുന്ന പുതിയ എയർകണ്ടീഷൻഡ് നടപ്പാലവും ഒക്ടോബർ 15-ന് തുറന്നിരുന്നു. മെട്രോയിൽ എത്തുന്നവർക്ക് റെയിൽവേ സ്റ്റേഷനിലേക്ക് കൂടുതൽ സൗകര്യപ്രദമായി യാത്ര ചെയ്യാൻ ഇതിലൂടെ സാധിക്കും.
റോഡ് നിയന്ത്രണം നിലനിൽക്കുന്ന സമയത്ത് യാത്രക്കാർ ഗതാഗത നിർദേശങ്ങളും വഴികാട്ടി ബോർഡുകളും ശ്രദ്ധിക്കണം.
