ദുബായ്: യുഎഇയിൽ ഇന്ധനവില കുതിച്ചുയർന്നതോടെ ജനങ്ങളുടെ ഷോപ്പിങ് രീതികളിലും മാറ്റം. വലിയ സൂപ്പർമാർക്കറ്റുകളിൽ പോയി മാസത്തേക്കുള്ള സാധനങ്ങൾ ഒന്നിച്ച് വാങ്ങുന്ന രീതിക്കു പകരം, വീടിനടുത്തുള്ള കടകളിൽ നിന്ന് ആവശ്യമായ സാധനങ്ങൾ മാത്രം വാങ്ങാനാണ് പലരും ഇപ്പോൾ താൽപ്പര്യപ്പെടുന്നത്. യാത്രാച്ചെലവ് കുറയ്ക്കുന്നതിനായി ഓൺലൈൻ ഡെലിവറി സേവനങ്ങളെ ആശ്രയിക്കുന്നവരുടെ എണ്ണത്തിലും വർധനവുണ്ട്.
ഒക്ടോബറിൽ യുഎഇയിലെ പെട്രോൾ വിലയിൽ ഏകദേശം 16 ശതമാനം വരെ വർധനവുണ്ടായതോടെയാണ് ഉപഭോക്താക്കളുടെ ചെലവഴിക്കൽ രീതികളിൽ മാറ്റം പ്രകടമായത്. സൂപ്പർ 98 പെട്രോളിന് ലിറ്ററിന് 4.40 ദിർഹവും സ്പെഷ്യൽ 95 പെട്രോളിന് 4.28 ദിർഹവുമാണ് നിലവിലെ വില. ഇ-പ്ലസ് 91 പെട്രോളിന് 4.21 ദിർഹവും ഡീസലിന് 4.80 ദിർഹവുമാണ് ലിറ്ററിന് നൽകേണ്ടത്.
വലിയ ഷോപ്പിങ്ങിന് പകരം അടുത്തുള്ള കടകൾ
ഇന്ധനവില ഉയർന്നതോടെ ദൂരെയുള്ള ഹൈപ്പർമാർക്കറ്റുകളിലേക്കും ഷോപ്പിങ് മാളുകളിലേക്കുമുള്ള യാത്രകൾ പരമാവധി ഒഴിവാക്കുകയാണ് ചില ഉപഭോക്താക്കൾ. പകരം വീടിനടുത്തുള്ള കടകളിൽ നിന്ന് ആവശ്യമായ സാധനങ്ങൾ ചെറിയ അളവിൽ വാങ്ങുന്ന രീതിയിലേക്ക് മാറുകയാണ്.
ചോയ്ത്ത്‌റാംസ്, ആദിൽ, അൽ മായ തുടങ്ങിയ പ്രമുഖ റീട്ടെയിൽ സ്ഥാപനങ്ങളും ഉപഭോക്താക്കളുടെ ഈ മാറ്റം ശ്രദ്ധയിൽപ്പെടുത്തിയിട്ടുണ്ട്. സാധനങ്ങൾ വാങ്ങുമ്പോൾ വില താരതമ്യം ചെയ്യുന്നതിനും ഓഫറുകൾ പ്രയോജനപ്പെടുത്തുന്നതിനും ആളുകൾ കൂടുതൽ പ്രാധാന്യം നൽകുന്നുണ്ടെന്നാണ് റീട്ടെയിൽ മേഖലയിലെ നിരീക്ഷണം.
അത്യാവശ്യ സാധനങ്ങൾക്ക് മുൻഗണന
വീട്ടുചെലവ് നിയന്ത്രിക്കുന്നതിന്റെ ഭാഗമായി ആവശ്യമായ സാധനങ്ങൾക്ക് മുൻഗണന നൽകുകയാണ് പല കുടുംബങ്ങളും. അനാവശ്യ വാങ്ങലുകൾ ഒഴിവാക്കുകയും വിലക്കുറവുള്ള ഉൽപ്പന്നങ്ങളും ഓഫറുകളും തിരഞ്ഞെടുക്കുകയും ചെയ്യുന്നു. വലിയ അളവിൽ സാധനങ്ങൾ വാങ്ങുന്നതിനുപകരം ചെറിയ അളവിൽ കൂടുതൽ തവണ വാങ്ങുന്ന രീതിയും ചിലയിടങ്ങളിൽ കാണുന്നുണ്ട്.
ഓൺലൈൻ ഡെലിവറിയിലേക്കും തിരിയുന്നു
വാഹനമെടുത്ത് കടകളിലേക്ക് പോകുമ്പോഴുള്ള ഇന്ധനച്ചെലവ് ഒഴിവാക്കാൻ ഓൺലൈൻ ആപ്പുകൾ വഴി സാധനങ്ങൾ ഓർഡർ ചെയ്യുന്നതിനും ചിലർ മുൻഗണന നൽകുന്നു. അതേസമയം, ഇന്ധനവില വർധനവ് ഉൽപ്പന്നങ്ങളുടെ ഗതാഗത-വിതരണ ചെലവുകളെയും ബാധിക്കുന്നുണ്ട്.
ഈ അധിക ചെലവ് ഉപഭോക്താക്കളിലേക്ക് പൂർണമായി കൈമാറാതിരിക്കാനുള്ള ശ്രമത്തിലാണ് റീട്ടെയിൽ സ്ഥാപനങ്ങൾ. എന്നിരുന്നാലും, ഇന്ധനവിലയിലെ വർധനവ് കുടുംബങ്ങളുടെ പ്രതിമാസ ബജറ്റിലും ഷോപ്പിങ് തീരുമാനങ്ങളിലും സ്വാധീനം ചെലുത്തുന്നുവെന്നാണ് റിപ്പോർട്ട്.
