Kuwait Sahel app labour complaints കുവൈത്ത് സിറ്റി: തൊഴിൽ മേഖലയിലെ നിയമലംഘനങ്ങൾ അധികൃതരുടെ ശ്രദ്ധയിൽപ്പെടുത്താൻ കുവൈത്തിൽ പുതിയ സൗകര്യം. പബ്ലിക് അതോറിറ്റി ഫോർ മാൻപവർ (PAM) ആണ് സർക്കാർ ഏകീകൃത സേവന ആപ്പായ ‘സഹേൽ’ വഴി പരാതി നൽകാനുള്ള സംവിധാനം ആരംഭിച്ചത്.

‘ബല്ലിഗ്നി’ എന്ന പുതിയ ഫീച്ചറിലൂടെയാണ് സ്വദേശികൾക്കും പ്രവാസികൾക്കും തൊഴിൽ നിയമലംഘനങ്ങൾ നേരിട്ട് റിപ്പോർട്ട് ചെയ്യാൻ കഴിയുക. തൊഴിലാളികളുടെ അവകാശങ്ങളും സുരക്ഷയും ഉറപ്പാക്കുന്നതിനും തൊഴിൽ മേഖലയിലെ നിയമലംഘനങ്ങൾ കുറയ്ക്കുന്നതിനുമാണ് പുതിയ സംവിധാനം ലക്ഷ്യമിടുന്നത്.

സഹേൽ ആപ്പ് വഴി റിപ്പോർട്ട് ചെയ്യാവുന്ന 8 നിയമലംഘനങ്ങൾ

1. ഗാർഹിക തൊഴിലാളി റിക്രൂട്ട്‌മെന്റിലെ ക്രമക്കേടുകൾ
അംഗീകൃത നിയമങ്ങളും മാനദണ്ഡങ്ങളും പാലിക്കാതെ മാൻപവർ ഏജൻസികൾ നടത്തുന്ന പ്രവർത്തനങ്ങൾ റിപ്പോർട്ട് ചെയ്യാം.

2. അമിത ഫീസ് ഈടാക്കൽ
കരാറോ ആവശ്യമായ രസീതുകളോ നൽകാതെ തൊഴിലാളികളിൽ നിന്ന് അധിക തുക ഈടാക്കുന്ന സംഭവങ്ങൾ റിപ്പോർട്ട് ചെയ്യാം.

3. അനുമതിയില്ലാതെ ജോലി ചെയ്യൽ
വിസാ നിയമങ്ങൾ ലംഘിച്ച് മറ്റൊരു സ്പോൺസറുടെ കീഴിലോ ആവശ്യമായ അനുമതിയില്ലാതെയോ ജോലി ചെയ്യുന്നതും റിപ്പോർട്ട് ചെയ്യാം.

4. സുരക്ഷാ നിയമലംഘനങ്ങൾ
നിർമാണ മേഖല ഉൾപ്പെടെയുള്ള തൊഴിലിടങ്ങളിൽ തൊഴിലാളികളുടെ സുരക്ഷയ്ക്ക് ഭീഷണിയാകുന്ന രീതിയിൽ സുരക്ഷാ മാനദണ്ഡങ്ങൾ പാലിക്കാത്ത സംഭവങ്ങൾ അറിയിക്കാം.

5. ശാരീരിക അതിക്രമം
തൊഴിലാളികൾക്കെതിരായ ശാരീരിക പീഡനങ്ങളും ചൂഷണങ്ങളും റിപ്പോർട്ട് ചെയ്യാനുള്ള സൗകര്യമുണ്ട്.

6. നിയമവിരുദ്ധമായ തൊഴിൽ ചുമതലകൾ
നിയമം അനുവദിക്കാത്തതോ പ്രത്യേക നിയന്ത്രണങ്ങൾക്ക് വിധേയമായതോ ആയ ജോലികൾ ജീവനക്കാരെ നിർബന്ധിച്ച് ചെയ്യിപ്പിക്കുന്ന സംഭവങ്ങളും റിപ്പോർട്ട് ചെയ്യാം.

7. ബാലവേല
18 വയസ്സിന് താഴെയുള്ള കുട്ടികളെ നിയമവിരുദ്ധമായി ജോലിക്ക് നിയോഗിക്കുന്ന സംഭവങ്ങൾ അധികൃതരെ അറിയിക്കാം.

8. ഉച്ചവിശ്രമ നിയമലംഘനം
വേനൽക്കാലത്ത് രാവിലെ 11 മുതൽ വൈകിട്ട് 4 വരെ പുറംജോലികൾക്ക് ഏർപ്പെടുത്തിയ വിലക്ക് ലംഘിച്ച് തൊഴിലാളികളെ ജോലി ചെയ്യിപ്പിക്കുന്നതും റിപ്പോർട്ട് ചെയ്യാം.

പരാതി നൽകുന്നത് എങ്ങനെ?

സഹേൽ ആപ്പ് വഴി പരാതി നൽകാൻ ഏതാനും ഘട്ടങ്ങൾ മാത്രമാണ് വേണ്ടത്.

• ആദ്യം സ്മാർട്ട്ഫോണിൽ സഹേൽ ആപ്പ് തുറക്കുക.
• ‘ബല്ലിഗ്നി’ എന്ന വിഭാഗം തിരഞ്ഞെടുക്കുക.
• റിപ്പോർട്ട് ചെയ്യേണ്ട നിയമലംഘനത്തിന്റെ വിഭാഗം തിരഞ്ഞെടുക്കുക.
• സംഭവം നടന്ന സ്ഥലവും ആവശ്യമായ മറ്റ് വിവരങ്ങളും നൽകുക.
• തെളിവായി ലഭ്യമായ ഫോട്ടോകൾ അപ്‌ലോഡ് ചെയ്യുക.
• തുടർന്ന് പരാതി Submit ചെയ്യുക.
• പരാതി സമർപ്പിച്ച ശേഷം ലഭിക്കുന്ന റഫറൻസ് നമ്പർ ഉപയോഗിച്ച് തുടർനടപടികൾ നിരീക്ഷിക്കാം.

തൊഴിൽ മേഖലയിലെ നിയമലംഘനങ്ങൾ തടയുന്നതിൽ പൊതുജനങ്ങളുടെ പങ്കാളിത്തം പ്രധാനമാണെന്ന് പബ്ലിക് അതോറിറ്റി ഫോർ മാൻപവർ വ്യക്തമാക്കി. പുതിയ സംവിധാനത്തിലൂടെ നിയമലംഘനങ്ങൾ വേഗത്തിൽ അധികൃതരുടെ ശ്രദ്ധയിൽപ്പെടുത്താനും തൊഴിലാളികളുടെ അവകാശങ്ങളും സുരക്ഷയും കൂടുതൽ ശക്തമായി സംരക്ഷിക്കാനും സാധിക്കുമെന്നാണ് പ്രതീക്ഷിക്കുന്നത്.

കുവൈറ്റിലെ പുതിയ തൊഴിൽ അവസരങ്ങൾ അറിയാൻ ഇവിടെ ക്ലിക്ക് ചെയ്യൂ