ദുബായ്: യുഎഇയിലെ പ്രമുഖ ടെലികോം സേവനദാതാക്കളായ എതിസലാത്ത് 50-ാം വാർഷികാഘോഷത്തിന്റെ ഭാഗമായി ഉപഭോക്താക്കൾക്ക് സൗജന്യ മൊബൈൽ ഡാറ്റ പ്രഖ്യാപിച്ചു. കമ്പനിക്കൊപ്പമുള്ള ഓരോ വർഷത്തെ സേവനത്തിനും 1 ജിബി വീതം സൗജന്യ ഡാറ്റയാണ് സാധാരണ ഉപഭോക്താക്കൾക്ക് ലഭിക്കുക. ഈ സൗജന്യ ഡാറ്റ ഒക്ടോബർ 13 വരെ ലഭ്യമാകും.

എമിറാത്തി പ്ലാനിലുള്ള ഉപഭോക്താക്കൾക്ക് കൂടുതൽ ആനുകൂല്യമുണ്ട്. കമ്പനിയുടെ സേവനം ഉപയോഗിച്ച ഓരോ വർഷത്തിനും 10 ജിബി വീതം സൗജന്യ ഡാറ്റയാണ് ഇവർക്ക് ലഭിക്കുക. സൗജന്യമായി ലഭിക്കുന്ന ഡാറ്റയ്ക്ക് ഒരാഴ്ചത്തെ വാലിഡിറ്റിയാണുള്ളത്.

50 ജിബി ഡാറ്റ വെറും 200 ദിർഹത്തിന്

വാർഷികാഘോഷത്തിന്റെ ഭാഗമായി നിരവധി പ്രത്യേക പാക്കേജുകളും എതിസലാത്ത് അവതരിപ്പിച്ചിട്ടുണ്ട്. ഇതിൽ ശ്രദ്ധേയമായത് 10 ജിബി ഡാറ്റാ പാക്കേജിന് പകരം ഒറ്റത്തവണയായി 50 ജിബി ഡാറ്റ ലഭിക്കുന്ന ഓഫറാണ്. 30 ദിവസത്തെ വാലിഡിറ്റിയുള്ള ഈ പാക്കേജിന് 200 ദിർഹമാണ് നിരക്ക്.

തിരഞ്ഞെടുത്ത ഉപകരണങ്ങൾക്കും ആക്സസറികൾക്കും 90 ശതമാനം വരെ വിലക്കുറവും കമ്പനി പ്രഖ്യാപിച്ചിട്ടുണ്ട്. പോസ്റ്റ്‌പെയ്ഡ് ഉപഭോക്താക്കൾക്ക് ചില പ്ലാനുകളിൽ അഞ്ചിരട്ടി വരെ ഡാറ്റ ലഭിക്കുന്ന ആനുകൂല്യങ്ങളും ഉൾപ്പെടുന്നു.

റോമിങ് ഉപഭോക്താക്കൾക്കും നേട്ടം

റോമിങ് പാക്കേജുകളിലും പ്രത്യേക ആനുകൂല്യങ്ങളുണ്ട്. പ്രതിവാര ബെസ്റ്റ് സെല്ലർ റോമിങ് കോംബോയിൽ സാധാരണ 2.5 ജിബിക്ക് പകരം 5 ജിബി ഡാറ്റയും 500 റോമിങ് മിനിറ്റുകളും ലഭിക്കും. ഈ ഓഫർ ലഭിക്കാൻ പാക്കേജ് ഒക്ടോബർ 9നോ അതിന് മുമ്പോ ആക്ടിവേറ്റ് ചെയ്യണം. ഒക്ടോബർ 10 മുതൽ പുതിയ പർച്ചേസുകൾ സാധാരണ ഡാറ്റാ പരിധിയിലേക്ക് മടങ്ങും.

1976ൽ Emirates Telecommunications Corporation എന്ന പേരിൽ ആരംഭിച്ച എതിസലാത്ത് ഈ വർഷമാണ് 50 വർഷം പൂർത്തിയാക്കുന്നത്. 1995ൽ യുഎഇയിൽ ഇന്റർനെറ്റ് സേവനം അവതരിപ്പിച്ചതും മേഖലയിലെ ആദ്യകാല ടെലികോം മുന്നേറ്റങ്ങളിൽ ഒന്നായിരുന്നു.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക