Kuwait Captagon seizure : കുവൈത്ത് സിറ്റി, ഒക്ടോബർ 20, 2026: കുവൈത്തിലേക്ക് കടത്താൻ ശ്രമിച്ച മൂന്ന് ലക്ഷം ക്യാപ്റ്റഗൺ ലഹരിഗുളികകൾ സുരക്ഷാസേന പിടിച്ചെടുത്തു. പിടിച്ചെടുത്ത ലഹരിമരുന്നിന് വിപണിയിൽ 15 ലക്ഷത്തിലധികം കുവൈത്ത് ദിനാർ വിലവരുമെന്ന് അധികൃതർ അറിയിച്ചു.
ആഭ്യന്തര മന്ത്രാലയത്തിന് കീഴിലുള്ള ജനറൽ ഡിപ്പാർട്ട്‌മെന്റ് ഫോർ ഡ്രഗ് കൺട്രോളാണ് വൻ ലഹരിക്കടത്ത് കണ്ടെത്തിയത്. ഒന്നാം ഉപപ്രധാനമന്ത്രിയും പ്രതിരോധ-ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് സൗദ് അൽ സബാഹിന്റെ നേരിട്ടുള്ള മേൽനോട്ടത്തിലായിരുന്നു നടപടി.
കബദ് മേഖലയെ കേന്ദ്രീകരിച്ച് നടത്തിയ രഹസ്യാന്വേഷണത്തിനും നിരീക്ഷണത്തിനും പിന്നാലെയാണ് ലഹരിമരുന്ന് കടത്തുകയായിരുന്ന ട്രക്ക് കണ്ടെത്തിയത്. സംഭവവുമായി ബന്ധപ്പെട്ട് ട്രക്ക് ഓടിച്ചിരുന്ന തുർക്കി പൗരനെ സുരക്ഷാസേന അറസ്റ്റ് ചെയ്തു.
ട്രക്കിന്റെ സ്പെയർ ടയറിനുള്ളിൽ പ്രത്യേക ഇൻസുലേറ്റിംഗ് വസ്തുക്കൾ ഉപയോഗിച്ച് അതീവ രഹസ്യമായാണ് ഗുളികകൾ ഒളിപ്പിച്ചിരുന്നത്. സാധാരണ പരിശോധനയിൽ കണ്ടെത്താൻ പ്രയാസമുള്ള രീതിയിലായിരുന്നു ലഹരിമരുന്ന് സൂക്ഷിച്ചിരുന്നത്. തുടർന്ന് കട്ടറുകളും മറ്റ് ഉപകരണങ്ങളും ഉപയോഗിച്ച് ടയർ മുറിച്ചുമാറ്റിയാണ് ഉദ്യോഗസ്ഥർ ഗുളികകൾ പുറത്തെടുത്തത്.
അയൽരാജ്യത്തുനിന്ന് കുവൈത്തിലേക്ക് ലഹരിമരുന്ന് എത്തിക്കാൻ തനിക്ക് നിർദേശം ലഭിച്ചിരുന്നതായി ചോദ്യം ചെയ്യലിൽ പ്രതി സമ്മതിച്ചതായാണ് റിപ്പോർട്ട്. താൻ ഓടിച്ചിരുന്ന ട്രക്കിന്റെ പെർമിറ്റ് ഉപയോഗിച്ച് രാജ്യത്തേക്ക് പ്രവേശിക്കാനായിരുന്നു നിർദേശമെന്നും ഇയാൾ മൊഴി നൽകിയതായി അധികൃതർ അറിയിച്ചു.
കേസുമായി ബന്ധപ്പെട്ട വിവരങ്ങൾ പ്രതി എത്തിയ രാജ്യത്തെ മയക്കുമരുന്ന് വിരുദ്ധ ഏജൻസികളുമായി കുവൈത്ത് അധികൃതർ പങ്കുവെച്ചിട്ടുണ്ട്. തുടർ നിയമനടപടികൾക്കായി പ്രതിയെയും പിടിച്ചെടുത്ത ലഹരിഗുളികകളെയും ബന്ധപ്പെട്ട പ്രോസിക്യൂഷന് കൈമാറി.
രാജ്യത്തെ മയക്കുമരുന്ന് കടത്ത് ശൃംഖലകൾക്കെതിരെ ശക്തമായ നടപടി തുടരുമെന്ന് ആഭ്യന്തര മന്ത്രി ഷെയ്ഖ് ഫഹദ് യൂസഫ് സൗദ് അൽ സബാഹ് വ്യക്തമാക്കി. എല്ലാത്തരം കള്ളക്കടത്തുകളും വിട്ടുവീഴ്ചയില്ലാതെ തടയുമെന്നും ലഹരിയുടെ ഭീഷണിയിൽനിന്ന് സമൂഹത്തെ സംരക്ഷിക്കുന്നത് രാജ്യത്തിന്റെ പ്രധാന സുരക്ഷാ മുൻഗണനയാണെന്നും അദ്ദേഹം അറിയിച്ചു.
കുവൈത്തിലേക്ക് ലഹരിമരുന്ന് കടത്താൻ ശ്രമിക്കുന്നവർക്കെതിരെ കർശന നടപടി സ്വീകരിക്കുമെന്നും അധികൃതർ മുന്നറിയിപ്പ് നൽകി.
