Kuwait Fire Force Shuts 27 Facilities in Jahra കുവൈത്ത് സിറ്റി: അഗ്നിസുരക്ഷാ മാനദണ്ഡങ്ങൾ പാലിക്കാത്തതിനെ തുടർന്ന് കുവൈത്തിലെ അൽ ജഹ്റ ഗവർണറേറ്റിൽ 27 സ്ഥാപനങ്ങൾ ഭരണപരമായി അടച്ചുപൂട്ടി. സുരക്ഷാ ചട്ടങ്ങൾ പാലിക്കാത്ത 61 സ്ഥാപനങ്ങൾക്ക് നോട്ടീസും മുന്നറിയിപ്പും നൽകിയതായി കുവൈത്ത് ജനറൽ ഫയർ ഫോഴ്സ് അറിയിച്ചു. ഒക്ടോബർ 11 ഞായറാഴ്ച രാവിലെ നടത്തിയ പരിശോധനാ ക്യാമ്പയിനിലാണ് നടപടി.
കെട്ടിടങ്ങളിലും വിവിധ സ്ഥാപനങ്ങളിലും അഗ്നിബാധ തടയുന്നതിനും സുരക്ഷ ഉറപ്പാക്കുന്നതിനുമായി നിശ്ചയിച്ചിട്ടുള്ള മാനദണ്ഡങ്ങൾ പാലിക്കുന്നുണ്ടോയെന്ന് പരിശോധിക്കുന്നതിന്റെ ഭാഗമായാണ് ക്യാമ്പയിൻ നടത്തിയത്. സുരക്ഷാ ചട്ടങ്ങൾ ലംഘിക്കുന്ന സ്ഥാപനങ്ങൾ കണ്ടെത്തി ആവശ്യമായ നടപടികൾ സ്വീകരിക്കുകയായിരുന്നു പരിശോധനയുടെ ലക്ഷ്യം.
അഗ്നിസുരക്ഷാ സംവിധാനങ്ങളുമായി ബന്ധപ്പെട്ട വ്യവസ്ഥകൾ പാലിക്കാത്ത 27 സ്ഥാപനങ്ങൾക്കാണ് അടച്ചുപൂട്ടൽ നടപടി നേരിടേണ്ടിവന്നത്. ഇതിനു പുറമേ, നിയമങ്ങളും സുരക്ഷാ നിർദേശങ്ങളും പാലിക്കുന്നതിൽ വീഴ്ച വരുത്തിയ 61 സ്ഥാപനങ്ങൾക്ക് നോട്ടീസും മുന്നറിയിപ്പും നൽകി.
കെട്ടിടങ്ങളിലും സ്ഥാപനങ്ങളിലും അഗ്നിബാധ തടയുന്നതിനുള്ള സംവിധാനങ്ങൾ ഉറപ്പാക്കുകയും പൊതുജനങ്ങളുടെ സുരക്ഷ സംരക്ഷിക്കുകയും ചെയ്യുന്നതിന്റെ ഭാഗമായി പരിശോധനകൾ തുടരുന്നതായാണ് റിപ്പോർട്ട്.
