കുവൈറ്റ് സിറ്റി: അൽ-അബ്ദാലി റോഡിൽ തൊഴിലാളികൾ സഞ്ചരിച്ച ബസ് അപകടത്തിൽപ്പെട്ട് 22 പേർക്ക് പരിക്കേറ്റു. പരിക്കേറ്റവരിൽ ചിലർക്ക് വിവിധ തരത്തിലുള്ള ഒടിവുകൾ സംഭവിച്ചതായാണ് റിപ്പോർട്ട്.
അപകടത്തെക്കുറിച്ച് ഇന്നലെ രാവിലെയാണ് കുവൈത്ത് ആഭ്യന്തര മന്ത്രാലയത്തിന്റെ ഓപ്പറേഷൻസ് റൂമിൽ വിവരം ലഭിച്ചത്. തുടർന്ന് പൊലീസ് പട്രോൾ സംഘങ്ങളും ട്രാഫിക് ഉദ്യോഗസ്ഥരും അടിയന്തര മെഡിക്കൽ സംഘങ്ങളും സ്ഥലത്തെത്തി.
അപകടത്തിൽ ബസ് തകർന്ന നിലയിലും തൊഴിലാളികൾക്ക് പരിക്കേറ്റ നിലയിലുമാണ് കണ്ടെത്തിയത്. അൽ-അബ്ദാലി റോഡിലെ മൺതിട്ടയിലും ലോഹ വേലിയിലും ഇടിച്ചാണ് ബസ് അപകടത്തിൽപ്പെട്ടത്.
പരിക്കേറ്റ 22 തൊഴിലാളികളെയും ആംബുലൻസുകളിൽ അൽ-ജഹ്റ ആശുപത്രിയിലേക്ക് മാറ്റി. ഇവരിൽ ഭൂരിഭാഗം പേരെയും മെഡിക്കൽ നിരീക്ഷണത്തിൽ പ്രവേശിപ്പിച്ചു. എന്നാൽ മൂന്ന് തൊഴിലാളികളുടെ നില ഗുരുതരമായതിനാൽ ആശുപത്രിയിൽ പ്രവേശിപ്പിച്ച് ചികിത്സ നൽകേണ്ടിവന്നു.
അപകടത്തെ തുടർന്ന് പ്രദേശത്തെ ഗതാഗതം നിയന്ത്രിക്കുന്നതിനും സ്ഥിതിഗതികൾ നിയന്ത്രണവിധേയമാക്കുന്നതിനുമായി ട്രാഫിക്, രക്ഷാപ്രവർത്തക സംഘങ്ങൾ സ്ഥലത്ത് പ്രവർത്തിച്ചു. പദ്ധതിയുടെ മാനേജരും സംഭവസ്ഥലത്ത് എത്തിയിരുന്നു.
അപകടത്തിന്റെ യഥാർഥ സാഹചര്യവും കാരണവും കണ്ടെത്തുന്നതിനായി അധികൃതർ അന്വേഷണം ആരംഭിച്ചിട്ടുണ്ട്.
കുവൈത്തിൽ കുടുംബവീടുകൾക്ക് പുതിയ നിയമ സംരക്ഷണം; ലേലത്തിൽ നിന്ന് സംരക്ഷിക്കാൻ കോടതിക്ക് അധികാരം
Kuwait Drisya Staff Editor — October 8, 2026·0 Comment
Kuwait Introduces New Legal Protection for Family Homes കുവൈത്ത് സിറ്റി: കുടുംബവീടുകളുടെ ഉടമസ്ഥാവകാശ വിഭജനവും പൊതുലേലവും മൂലം കുടുംബങ്ങൾ നേരിടുന്ന പ്രതിസന്ധി ഒഴിവാക്കുന്നതിനായി കുവൈത്ത് സിവിൽ കോഡിലെ ആർട്ടിക്കിൾ 830 ഭേദഗതി ചെയ്യാനുള്ള കരട് നിയമത്തിന് മന്ത്രിസഭ അംഗീകാരം നൽകി. കുടുംബത്തിന്റെയും താമസസ്ഥലത്തിന്റെയും സ്ഥിരത സംരക്ഷിക്കുന്നതിനൊപ്പം സഹഉടമകളുടെ സാമ്പത്തിക അവകാശങ്ങളും സംരക്ഷിക്കുകയാണ് ഭേദഗതിയുടെ ലക്ഷ്യമെന്ന് നീതിന്യായ മന്ത്രി കൗൺസിലർ നാസർ യൂസഫ് അൽ-സുമൈത് വ്യക്തമാക്കി.
കുടുംബത്തിന്റെ ഏക താമസസ്ഥലമായ വീട് വിഭജിച്ച് പൊതുലേലത്തിൽ വിൽക്കേണ്ട സാഹചര്യമുണ്ടാകുകയും, വിൽപ്പനയ്ക്ക് ശേഷം ലഭിക്കുന്ന തുക ഉപയോഗിച്ച് പകരം അനുയോജ്യമായ വീട് വാങ്ങാൻ കഴിയാത്ത അവസ്ഥയുണ്ടാകുകയും ചെയ്താൽ ഉടമസ്ഥാവകാശം താൽക്കാലികമായി തുടരാൻ കോടതി ഉത്തരവിടാൻ പുതിയ ഭേദഗതി അനുവദിക്കും. ബന്ധപ്പെട്ട വ്യക്തിയുടെ കുടുംബ, സാമൂഹിക, സാമ്പത്തിക സാഹചര്യങ്ങളും കോടതി പരിഗണിക്കും.
അതേസമയം, ഈ സംരക്ഷണം സ്ഥിരമല്ല. ഏക താമസസ്ഥലം എന്നതോ പകരം വീട് വാങ്ങാനുള്ള സാമ്പത്തിക ശേഷിയില്ലെന്നതോ ഉൾപ്പെടെയുള്ള വ്യവസ്ഥകളിൽ ഏതെങ്കിലും പിന്നീട് ബാധകമല്ലാതായാൽ, സഹഉടമയ്ക്ക് സംരക്ഷണം അവസാനിപ്പിക്കണമെന്ന് കോടതിയോട് ആവശ്യപ്പെടാം.
വിഭജനക്കേസ് കോടതിയിൽ പരിഗണനയിലിരിക്കെ, വീട് വിൽക്കാതെ തന്നെ വിഭജനം ആവശ്യപ്പെട്ട സഹഉടമയുടെ ഓഹരി ഏറ്റെടുക്കാനും മറ്റ് സഹഉടമകൾക്ക് അവസരം നൽകും. കോടതിയുടെ നിയോഗപ്രകാരം വിദഗ്ധൻ നിശ്ചയിക്കുന്ന മൂല്യത്തിന് ഓഹരി വാങ്ങാം. ഇതുവഴി ഓഹരി വിൽക്കാൻ ആവശ്യപ്പെട്ട വ്യക്തിക്ക് ന്യായമായ തുക ലഭിക്കുകയും കുടുംബവീട് പൊതുലേലത്തിൽ പോകുന്നത് ഒഴിവാക്കുകയും ചെയ്യാം.
കുടുംബസ്ഥിരത ശക്തിപ്പെടുത്തുന്നതിന്റെ ഭാഗമായി വിവാഹത്തിന് മുമ്പുള്ള നിർബന്ധിത പരിശീലന പരിപാടിയും പുതിയ നിയമഭേദഗതിയിൽ ഉൾപ്പെടുത്തിയിട്ടുണ്ട്. വിവാഹകരാർ ഔദ്യോഗികമായി രേഖപ്പെടുത്തുന്നതിന് മുമ്പ് ഭാവി ദമ്പതികൾ ഈ പരിപാടി പൂർത്തിയാക്കണം. വിവാഹജീവിതത്തിലെ അവകാശങ്ങളും ഉത്തരവാദിത്തങ്ങളും സംബന്ധിച്ച ബോധവൽക്കരണമാണ് പരിപാടിയുടെ ലക്ഷ്യം.
അതുപോലെ, വിവാഹമോചനം അല്ലെങ്കിൽ ഖുലഅ് രേഖപ്പെടുത്തുന്നതിന് മുമ്പ് കുടുംബ തർക്കപരിഹാര കേന്ദ്രത്തിലേക്ക് കേസ് റഫർ ചെയ്ത് അനുരഞ്ജനത്തിന് അവസരം നൽകാനും ഭേദഗതി വ്യവസ്ഥ ചെയ്യുന്നു. അന്തിമ കോടതി വിധികൾക്കും നിയമപരമായി അനുരഞ്ജനം സാധ്യമല്ലാത്ത ചില വ്യക്തിനിയമ കേസുകൾക്കും ഇളവ് ഉണ്ടായിരിക്കും.
നോട്ടറൈസേഷൻ നടപടികളിൽ ഡിജിറ്റൽ സംവിധാനവും കൊണ്ടുവരും. ഇലക്ട്രോണിക് സംവിധാനം, വീഡിയോ കോൺഫറൻസിങ് എന്നിവ വഴി നോട്ടറൈസേഷൻ നടത്താൻ അവസരം നൽകുന്നതോടൊപ്പം, വ്യക്തികളുടെ തിരിച്ചറിയലും നടപടികളുടെ നിയമസാധുതയും ഉറപ്പാക്കുന്നതിനുള്ള സുരക്ഷാ മാനദണ്ഡങ്ങളും ഏർപ്പെടുത്തും. പുതിയ ഭേദഗതി ഔദ്യോഗികമായി പ്രസിദ്ധീകരിച്ചതിന് ആറ് മാസത്തിന് ശേഷം പ്രാബല്യത്തിൽ വരും.
