Kuwait to Digitize Social Services കുവൈത്ത് സിറ്റി: രാജ്യത്തിന്റെ 2035 വികസന കാഴ്ചപ്പാടിന്റെ ഭാഗമായി സാമൂഹിക സേവനങ്ങൾ ഡിജിറ്റലാക്കുന്നതിനും ക്ഷേമപദ്ധതികൾ കൂടുതൽ കാര്യക്ഷമമാക്കുന്നതിനുമുള്ള പ്രവർത്തനങ്ങൾ ശക്തമാക്കി കുവൈത്ത് സാമൂഹികകാര്യ മന്ത്രാലയം. സിവിൽ സൊസൈറ്റി സംഘടനകളുമായുള്ള സഹകരണം വർധിപ്പിക്കുക, യുവാക്കൾക്കും സന്നദ്ധപ്രവർത്തകർക്കും കൂടുതൽ അവസരങ്ങൾ ഒരുക്കുക, കുടുംബങ്ങളെ സാമ്പത്തികമായി സ്വയംപര്യാപ്തരാക്കുക എന്നിവയ്ക്കും മന്ത്രാലയം മുൻഗണന നൽകുന്നു.
മന്ത്രാലയത്തിന്റെ 2035 വികസന തന്ത്രം ഏഴ് പ്രധാന മേഖലകളെ കേന്ദ്രീകരിച്ചാണ് നടപ്പാക്കുന്നത്. സേവനങ്ങളുടെ നിലവാരം ഉയർത്തുന്നതിനുള്ള മികച്ച പ്രവർത്തനരീതികൾ സ്വീകരിക്കുക, നിയമപരവും ഉപദേശപരവുമായ സംവിധാനങ്ങൾ ശക്തിപ്പെടുത്തുക, സിവിൽ സൊസൈറ്റി സംഘടനകളുമായി സഹകരിക്കുക, യുവജനങ്ങളുടെയും സന്നദ്ധപ്രവർത്തകരുടെയും നേതൃത്വത്തിലുള്ള സാമൂഹിക ക്ഷേമ പദ്ധതികൾ പ്രോത്സാഹിപ്പിക്കുക എന്നിവ ഇതിൽ ഉൾപ്പെടുന്നു.
സാമൂഹിക സേവനങ്ങളും വിവിധ മേഖലകളിലെ പ്രവർത്തനങ്ങളും ഡിജിറ്റലാക്കുന്നത് പദ്ധതിയുടെ പ്രധാന ലക്ഷ്യങ്ങളിലൊന്നാണ്. സേവനങ്ങൾ ഓട്ടോമേറ്റ് ചെയ്യുന്നതിലൂടെ നടപടിക്രമങ്ങൾ ലളിതമാക്കാനും ജനങ്ങൾക്ക് ആവശ്യമായ സേവനങ്ങൾ വേഗത്തിൽ ലഭ്യമാക്കാനും കഴിയുമെന്നാണ് പ്രതീക്ഷ.
ഡിജിറ്റൽ സംവിധാനങ്ങൾ വിപുലീകരിക്കുന്നത് ഭരണനിർവഹണത്തിൽ സുതാര്യതയും നീതിയും ഉറപ്പാക്കുന്നതിനും അഴിമതിക്കുള്ള സാധ്യതകൾ കുറയ്ക്കുന്നതിനും സഹായിക്കുമെന്ന് അധികൃതർ വിലയിരുത്തുന്നു. പൗരന്മാരുടെ ആവശ്യങ്ങൾ സമയബന്ധിതമായി നിറവേറ്റുന്നതിനും സുസ്ഥിര ഭരണസംവിധാനം വളർത്തുന്നതിനും ഈ മാറ്റങ്ങൾ പ്രയോജനപ്പെടും.
സാമൂഹിക ക്ഷേമപദ്ധതികളുടെ സമീപനത്തിൽ മാറ്റം വരുത്താനും മന്ത്രാലയം ലക്ഷ്യമിടുന്നു. പരമ്പരാഗതമായി സാമ്പത്തിക സഹായങ്ങളെ ആശ്രയിക്കുന്ന രീതിയിൽനിന്ന് വ്യക്തികളെയും കുടുംബങ്ങളെയും തൊഴിൽപരമായും സാമ്പത്തികമായും ശാക്തീകരിക്കുന്ന സംവിധാനത്തിലേക്ക് മാറുകയാണ് ലക്ഷ്യം.
ഇതിനായി പരിശീലനവും യോഗ്യതാ വികസനവും വഴി വ്യക്തികൾക്ക് തൊഴിൽവിപണിയിലേക്ക് പ്രവേശിക്കാനുള്ള അവസരങ്ങൾ വർധിപ്പിക്കും. ഇതിലൂടെ കൂടുതൽ പേർക്ക് സാമ്പത്തിക സ്വാതന്ത്ര്യം കൈവരിക്കാനും ദീർഘകാലാടിസ്ഥാനത്തിൽ രാജ്യത്തിന്റെ പൊതുചെലവിലെ സമ്മർദം കുറയ്ക്കാനും സാധിക്കുമെന്നാണ് പ്രതീക്ഷ.
സാമൂഹിക സംഘടനകളുടെ പങ്കാളിത്തം ശക്തിപ്പെടുത്തുന്നതിനൊപ്പം യുവജനങ്ങളുടെ നേതൃത്വത്തിലുള്ള പദ്ധതികൾക്കും സന്നദ്ധപ്രവർത്തനങ്ങൾക്കും പിന്തുണ നൽകും. സമൂഹത്തിലെ വിവിധ വിഭാഗങ്ങൾ തമ്മിലുള്ള സഹകരണം വർധിപ്പിച്ച് സാമൂഹിക ഐക്യം ഉറപ്പാക്കാനും തന്ത്രം ലക്ഷ്യമിടുന്നു.
സംയുക്ത സംരംഭങ്ങൾ വർധിപ്പിക്കുകയും ഭക്ഷ്യസുരക്ഷ മെച്ചപ്പെടുത്തുകയും ചെയ്യുന്നതും വികസന പദ്ധതിയുടെ ഭാഗമാണ്. ഡിജിറ്റൽ സേവനങ്ങൾ, തൊഴിൽപരമായ ശാക്തീകരണം, സാമൂഹിക പങ്കാളിത്തം എന്നിവ ഏകോപിപ്പിച്ച് കൂടുതൽ കാര്യക്ഷമവും സുസ്ഥിരവുമായ ക്ഷേമസംവിധാനം രൂപപ്പെടുത്താനാണ് കുവൈത്ത് ലക്ഷ്യമിടുന്നത്.
