Kuwait to Demolish 263 Illegal Buildings : കുവൈത്ത് സിറ്റി: അനധികൃത കെട്ടിട നിർമാണങ്ങൾക്കും കെട്ടിടനിയമ ലംഘനങ്ങൾക്കുമെതിരെ നടപടി ശക്തമാക്കി കുവൈത്ത് മുൻസിപ്പാലിറ്റി. ജലീബ് അൽ ഷുയൂഖ് മേഖലയിൽ നിയമവിരുദ്ധ കെട്ടിടങ്ങൾ പൊളിച്ചുനീക്കുന്നതിനുള്ള പദ്ധതിയുടെ ആദ്യഘട്ടം ആരംഭിച്ചു. ആദ്യ ബാച്ചിൽ 263 കെട്ടിടങ്ങളാണ് പൊളിച്ചുനീക്കുന്നത്.

അധികൃതരുടെ മുന്നറിയിപ്പുകൾ അവഗണിക്കുകയും നിയമലംഘനങ്ങൾ സ്വയം തിരുത്താൻ തയ്യാറാകാതിരിക്കുകയും ചെയ്ത കെട്ടിടങ്ങൾക്കെതിരെയാണ് നടപടി. ഔദ്യോഗിക ഗസറ്റ് വിജ്ഞാപനവും ആവശ്യമായ നിയമനടപടികളും പൂർത്തിയാക്കിയ ശേഷമാണ് പൊളിച്ചുനീക്കൽ ആരംഭിച്ചത്.

മേഖലയിലെ നിയമവിരുദ്ധ കെട്ടിടങ്ങൾ നീക്കം ചെയ്യുന്നതിനായി മൂന്ന് ഘട്ടങ്ങളിലായുള്ള പദ്ധതിയാണ് മുൻസിപ്പാലിറ്റി തയ്യാറാക്കിയിരിക്കുന്നത്.

രണ്ടാം ഘട്ടത്തിൽ 494 കെട്ടിടങ്ങൾ

ആദ്യഘട്ടത്തിൽ 263 കെട്ടിടങ്ങൾ പൊളിച്ചുനീക്കുന്നതിനുള്ള നടപടികൾ ആരംഭിച്ചിട്ടുണ്ട്. രണ്ടാംഘട്ടത്തിൽ 494 കെട്ടിടങ്ങൾ ഉൾപ്പെടുന്ന ബാച്ചിന്റെ പൊളിച്ചുനീക്കൽ മൂന്ന് ആഴ്ചയ്ക്കുള്ളിൽ ആരംഭിക്കുമെന്നാണ് റിപ്പോർട്ട്. കുവൈത്ത് മുൻസിപ്പാലിറ്റി ഡയറക്ടർ ജനറലിന്റെ അന്തിമ അനുമതി ലഭിച്ചശേഷമായിരിക്കും നടപടികൾ തുടങ്ങുക.

മൂന്നാംഘട്ടത്തിൽ കൂടുതൽ കെട്ടിടങ്ങളെ പട്ടികയിൽ ഉൾപ്പെടുത്തും. ഇതിനായി പൊതുമരാമത്ത് മന്ത്രാലയത്തിൽനിന്നുള്ള സാങ്കേതിക റിപ്പോർട്ടുകളും വിശദാംശങ്ങളും ലഭിക്കേണ്ടതുണ്ട്.

പൊളിച്ചുനീക്കൽ ചെലവ് ഉടമകളിൽനിന്ന് ഈടാക്കും

നിയമലംഘനം നടത്തിയ കെട്ടിടങ്ങൾ പൊളിക്കുന്നതിനും അവശിഷ്ടങ്ങൾ നീക്കം ചെയ്യുന്നതിനുമുള്ള ചെലവ് ബന്ധപ്പെട്ട കെട്ടിട ഉടമകളിൽനിന്ന് ഈടാക്കുമെന്ന് അധികൃതർ വ്യക്തമാക്കി.

കെട്ടിടത്തിന്റെ വിസ്തീർണം, നിലകളുടെ എണ്ണം, പൊളിച്ചുനീക്കാൻ ഉപയോഗിക്കുന്ന യന്ത്രങ്ങൾ, അവശിഷ്ടങ്ങൾ കൊണ്ടുപോകുന്നതിനുള്ള ഗതാഗതച്ചെലവ് എന്നിവ കണക്കാക്കിയായിരിക്കും തുക നിശ്ചയിക്കുക.

ജലീബ് അൽ ഷുയൂഖ് മേഖലയിലെ അനധികൃത കെട്ടിട നിർമാണങ്ങളും താമസവുമായി ബന്ധപ്പെട്ട നിയമലംഘനങ്ങളും നിയന്ത്രിക്കുകയാണ് നടപടിയുടെ ലക്ഷ്യമെന്ന് റിപ്പോർട്ടിൽ പറയുന്നു.