Kuwait Warns Dog Owners of Penalties for Violations കുവൈത്ത് സിറ്റി: നായകളെ വളർത്തുന്നതും പരിപാലിക്കുന്നതും സംബന്ധിച്ച നിയമങ്ങൾ കർശനമായി പാലിക്കണമെന്ന് കുവൈത്ത് ആഭ്യന്തര മന്ത്രാലയം ഉടമകൾക്ക് മുന്നറിയിപ്പ് നൽകി. നിയമലംഘനം നടത്തുന്നവർക്ക് ഒരു മാസം വരെ തടവോ 30 കുവൈത്ത് ദിനാറിൽ കൂടുതലുള്ള പിഴയോ അല്ലെങ്കിൽ രണ്ടും കൂടിയോ ശിക്ഷയായി ലഭിക്കാം.
നായകളെ വളർത്താൻ ഔദ്യോഗിക ലൈസൻസ് നിർബന്ധം
നായകളുടെ ഉടമസ്ഥതയ്ക്കായി ഔദ്യോഗിക ലൈസൻസ് നേടണം. കൂടാതെ, ഉടമയുടെ തിരിച്ചറിയൽ നമ്പർ രേഖപ്പെടുത്തിയ ലോഹ ടാഗ് ഘടിപ്പിച്ച കോളർ നായകൾ ധരിച്ചിരിക്കണമെന്നും നിർദേശമുണ്ട്.
അംഗീകൃത വെറ്ററിനറി കേന്ദ്രങ്ങളിൽ നായകളുടെ ആരോഗ്യപരിശോധന നടത്തുകയും പേവിഷബാധയ്‌ക്കെതിരായ നിർബന്ധിത വാക്സിനേഷൻ ഉറപ്പാക്കുകയും വേണം. വാർഷിക ബൂസ്റ്റർ ഡോസുകളും നൽകണം.
പൊതുസ്ഥലങ്ങളിൽ പ്രത്യേക നിയന്ത്രണങ്ങൾ
റോഡുകളിലും നടപ്പാതകളിലും മറ്റു പൊതുസ്ഥലങ്ങളിലും നായകളെ കൊണ്ടുപോകുമ്പോൾ ചങ്ങല ഉപയോഗിച്ച് നിയന്ത്രിക്കണം. കൂടാതെ, ആവശ്യമായിടങ്ങളിൽ വായ് മൂടാനുള്ള ഉപകരണവും (മസിൽ) ധരിപ്പിക്കണം.
നായകളിൽ പേവിഷബാധ സ്ഥിരീകരിക്കുകയോ രോഗബാധ സംശയിക്കുകയോ ചെയ്താൽ ഉടൻ വെറ്ററിനറി കേന്ദ്രത്തെ അറിയിക്കണം. രോഗബാധിതമായോ രോഗബാധ സംശയിക്കുന്നതോ ആയ മൃഗങ്ങളുടെ ജഡം തെറ്റായ രീതിയിൽ നീക്കം ചെയ്യുന്നതും നിരോധിച്ചിട്ടുണ്ട്.
പൊതുജനസുരക്ഷയും മൃഗക്ഷേമവും ലക്ഷ്യം
പൊതുജനങ്ങളുടെ സുരക്ഷ ഉറപ്പാക്കുക, മൃഗങ്ങളുടെ ക്ഷേമം സംരക്ഷിക്കുക, താമസമേഖലകളിലും പൊതുസ്ഥലങ്ങളിലും ശുചിത്വം നിലനിർത്തുക എന്നിവയാണ് മാർഗനിർദേശങ്ങളുടെ ലക്ഷ്യമെന്ന് ആഭ്യന്തര മന്ത്രാലയം വ്യക്തമാക്കി.
നായകളെ വളർത്തുന്നവർ ലൈസൻസ്, തിരിച്ചറിയൽ രേഖകൾ, ആരോഗ്യപരിശോധന, വാക്സിനേഷൻ എന്നിവയുമായി ബന്ധപ്പെട്ട എല്ലാ നിബന്ധനകളും പാലിക്കണമെന്നും മന്ത്രാലയം ആവശ്യപ്പെട്ടു.
