Court Ruling Deals Blow to Bank അബുദാബി: ക്രെഡിറ്റ് കാർഡിൽ ഈടാക്കിയ പലിശയ്ക്കും ഫീസിനും ഉപഭോക്താവിന്റെ സമ്മതം തെളിയിക്കുന്ന രേഖകൾ ഹാജരാക്കാനാകാത്ത ബാങ്കിന് തിരിച്ചടിയായി കോടതി വിധി. ഉപഭോക്താവിന് 92,854 ദിർഹം (ഏകദേശം 21 ലക്ഷം രൂപ) തിരികെ നൽകാനും ക്രെഡിറ്റ് കാർഡ് അക്കൗണ്ട് അടയ്ക്കാനും കുടിശ്ശികയില്ലെന്ന സർട്ടിഫിക്കറ്റ് നൽകാനും അബുദാബി കോടതി ഉത്തരവിട്ടു.

തിരികെ നൽകേണ്ട തുകയ്ക്ക് കേസ് ഫയൽ ചെയ്ത തീയതി മുതൽ പണം നൽകുന്നതുവരെ പ്രതിവർഷം മൂന്ന് ശതമാനം പലിശയും കോടതി അനുവദിച്ചു. എന്നാൽ ഈ പലിശയുടെ ആകെ തുക തിരിച്ചുനൽകേണ്ട മുഖ്യ തുകയെ കവിയരുതെന്നും കോടതി വ്യക്തമാക്കി.

2013-ൽ ആരംഭിച്ച ക്രെഡിറ്റ് കാർഡ് ഇടപാട്

2013-ൽ ബാങ്കിൽനിന്ന് ധനസഹായത്തിന് അപേക്ഷിച്ചപ്പോഴാണ് ഉപഭോക്താവിന് 50,000 ദിർഹം ക്രെഡിറ്റ് പരിധിയുള്ള കാർഡ് ലഭിച്ചത്. കാർഡുമായി ബന്ധപ്പെട്ട കുടിശ്ശിക മുഴുവൻ അടച്ചതിനു പുറമേ അധിക തുകയും നൽകിയിട്ടും ബാങ്ക് വീണ്ടും പണം ആവശ്യപ്പെടുകയായിരുന്നുവെന്ന് ഉപഭോക്താവ് കോടതിയെ അറിയിച്ചു.

തുടർന്ന് അക്കൗണ്ടിലെ ഇടപാടുകൾ പരിശോധിക്കാൻ കോടതി ബാങ്കിങ് വിദഗ്ധനെ നിയോഗിച്ചു. എന്നാൽ ക്രെഡിറ്റ് കാർഡ് അപേക്ഷയുടെ യഥാർഥ രേഖകളും പലിശനിരക്കും ഫീസും സംബന്ധിച്ച കരാർ രേഖകളും ബാങ്കിന് ഹാജരാക്കാനായില്ല. രേഖകൾ സൂക്ഷിച്ചിരുന്ന സ്ഥലത്തുണ്ടായ തീപിടിത്തത്തിൽ അവ നഷ്ടപ്പെട്ടെന്നായിരുന്നു ബാങ്കിന്റെ വിശദീകരണം.

പരിശോധനയിൽ കണ്ടെത്തിയത് എന്ത്?

ബാങ്ക് നൽകിയ അക്കൗണ്ട് സ്റ്റേറ്റ്‌മെന്റുകൾ പരിശോധിച്ച വിദഗ്ധൻ, കരാർ പ്രകാരം ഈടാക്കാൻ സമ്മതിച്ചുവെന്ന് തെളിയിക്കാനാകാത്ത ഫീസുകളും കൂട്ടുപലിശയും കണക്കിൽനിന്ന് ഒഴിവാക്കി. പകരം നിയമപരമായ ലളിതപലിശ അടിസ്ഥാനമാക്കി അക്കൗണ്ട് വീണ്ടും കണക്കാക്കി.

പരിശോധനയിലെ പ്രധാന കണക്കുകൾ:

• ആകെ പിൻവലിച്ച തുക: 14,03,000 ദിർഹത്തിലധികം.
• ഉപഭോക്താവ് തിരിച്ചടച്ച തുക: 16,05,000 ദിർഹത്തിലധികം.
• ഉപഭോക്താവിന് തിരികെ ലഭിക്കേണ്ട തുക: 92,854 ദിർഹം.

വിദഗ്ധന്റെ റിപ്പോർട്ട് അക്കൗണ്ട് സ്റ്റേറ്റ്‌മെന്റുകളെ അടിസ്ഥാനമാക്കിയുള്ളതാണെന്നും ബാങ്കിന് അതിലെ കണ്ടെത്തലുകൾ തെറ്റാണെന്ന് തെളിയിക്കാനായില്ലെന്നും കോടതി വിലയിരുത്തി.

ബാങ്കിന് കോടതി നൽകിയ നിർദേശങ്ങൾ

വിദഗ്ധന്റെ റിപ്പോർട്ട് അംഗീകരിച്ച കോടതി, ഉപഭോക്താവിന് 92,854 ദിർഹം തിരികെ നൽകാൻ ബാങ്കിനോട് നിർദേശിച്ചു. കൂടാതെ, തുകയ്ക്ക് ബാധകമായ പലിശ നൽകാനും ക്രെഡിറ്റ് കാർഡുമായി ബന്ധപ്പെട്ട കുടിശ്ശികയിൽനിന്ന് ഉപഭോക്താവിനെ ഒഴിവാക്കാനും അക്കൗണ്ട് അടയ്ക്കാനും ബാധ്യതയില്ലെന്ന സർട്ടിഫിക്കറ്റ് നൽകാനും ഉത്തരവിട്ടു.

കോടതിച്ചെലവുകളും 200 ദിർഹം നിയമച്ചെലവും ബാങ്ക് വഹിക്കണം. ഉപഭോക്താവ് ഉന്നയിച്ച മറ്റ് ചില ആവശ്യങ്ങൾ കോടതി തള്ളുകയും ചെയ്തു. ക്രെഡിറ്റ് കാർഡ് ഇടപാടുകളിൽ ഈടാക്കുന്ന പലിശയും ഫീസും സംബന്ധിച്ച കരാർ രേഖകൾ സൂക്ഷിക്കേണ്ടതിന്റെയും സാമ്പത്തിക ഇടപാടുകളിൽ വ്യക്തമായ രേഖകൾ ഉണ്ടായിരിക്കേണ്ടതിന്റെയും പ്രാധാന്യം ഈ കേസിലൂടെ വ്യക്തമാകുന്നു.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക