Dubai Municipality Uses AI to Ensure Cosmetics Safety ദുബായ്: സൗന്ദര്യവർധക വസ്തുക്കളുടെയും വ്യക്തിഗത പരിചരണ ഉൽപന്നങ്ങളുടെയും സുരക്ഷ ഉറപ്പാക്കാൻ ആർട്ടിഫിഷ്യൽ ഇന്റലിജൻസ് (AI) സംവിധാനങ്ങൾ ഉപയോഗിക്കാനൊരുങ്ങി ദുബായ് മുനിസിപ്പാലിറ്റി. ഉൽപന്നങ്ങൾ വിപണിയിലെത്തുന്നതിന് മുമ്പും ശേഷവും സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനാണ് പുതിയ സാങ്കേതിക സംവിധാനങ്ങൾ ഉപയോഗിക്കുന്നത്.
ഉൽപന്ന രജിസ്ട്രേഷൻ, പരിശോധന, ഇറക്കുമതി നടപടികൾ, വിപണി നിരീക്ഷണം എന്നിവ കൂടുതൽ വേഗത്തിലും കൃത്യതയിലും നടത്താൻ എഐ അധിഷ്ഠിത സംവിധാനങ്ങൾ സഹായിക്കും. ദുബായ് വേൾഡ് ട്രേഡ് സെന്ററിൽ നടക്കുന്ന Beautyworld Dubai 2026ലാണ് മുനിസിപ്പാലിറ്റി പുതിയ സംവിധാനങ്ങൾ അവതരിപ്പിച്ചത്.
ദുബായ് മുനിസിപ്പാലിറ്റിയുടെ Montaji ഉൽപന്ന രജിസ്ട്രേഷൻ സംവിധാനത്തിൽ ആറ് ലക്ഷത്തിലേറെ ഉൽപന്നങ്ങളുണ്ട്. വിപണിയിലെത്തുന്ന സൗന്ദര്യവർധക വസ്തുക്കളിൽ അപകടകരമായ രാസവസ്തുക്കൾ അടങ്ങിയിട്ടുണ്ടോ എന്ന് ദുബായ് സെൻട്രൽ ലബോറട്ടറിയുടെ പരിശോധനകളിലൂടെ കണ്ടെത്തും. നിലവാരമില്ലാത്തതും സുരക്ഷാ മാനദണ്ഡങ്ങൾ പാലിക്കാത്തതുമായ ഉൽപന്നങ്ങൾ കണ്ടെത്തി വിപണിയിൽനിന്ന് നീക്കം ചെയ്യുന്നതിനും ഈ സംവിധാനം സഹായിക്കും.
കോസ്മെറ്റിക്സ്, വ്യക്തിഗത പരിചരണ ഉൽപന്നങ്ങൾ, പെർഫ്യൂമുകൾ എന്നിവയിൽ ഹാനികരമായ ഘടകങ്ങൾ കണ്ടെത്തുന്നതിനായി ലബോറട്ടറിയിൽ വിവിധ രാസ, മൈക്രോബയോളജിക്കൽ പരിശോധനകൾ നടത്തുന്നു. അലർജിക്ക് കാരണമാകുന്ന ഘടകങ്ങൾ, വിഷാംശമുള്ള ലോഹങ്ങൾ, ഫോർമാൽഡിഹൈഡ് പോലുള്ള നിയന്ത്രിത രാസവസ്തുക്കൾ എന്നിവയും പരിശോധിക്കുന്നുണ്ട്.
സലൂണുകളുടെയും ബ്യൂട്ടി സെന്ററുകളുടെയും സുരക്ഷയും ഗുണനിലവാരവും മെച്ചപ്പെടുത്തുന്നതിനായി Model Salon Initiative ഉൾപ്പെടെയുള്ള പദ്ധതികളും ദുബായ് മുനിസിപ്പാലിറ്റി നടപ്പാക്കുന്നുണ്ട്. ഉപഭോക്തൃ സുരക്ഷ ഉറപ്പാക്കുന്നതിനൊപ്പം സൗന്ദര്യവർധക മേഖലയിലെ സ്ഥാപനങ്ങൾക്ക് കൂടുതൽ കാര്യക്ഷമമായ ഡിജിറ്റൽ സേവനങ്ങൾ നൽകുകയുമാണ് ലക്ഷ്യം.
