UAE Set to Introduce Major Changes to Governmentദുബൈ: സർക്കാർ സേവനങ്ങൾ നൽകുന്ന രീതിയിൽ യുഎഇ ഇതുവരെ പ്രഖ്യാപിച്ചതിൽ വച്ച് ഏറ്റവും വലിയ മാറ്റത്തിന് ഒരുങ്ങുന്നതായി വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം അറിയിച്ചു. അടുത്ത മാസം നടക്കുന്ന പ്രധാന ചടങ്ങിലൂടെയായിരിക്കും പുതിയ മാറ്റങ്ങളുടെ പ്രഖ്യാപനം.

സർക്കാർ ഡിജിറ്റൽ സേവനങ്ങളിലെ ഉപഭോക്തൃ സംതൃപ്തിയിൽ യുഎഇ ഒന്നാം സ്ഥാനത്തെത്തിയ പശ്ചാത്തലത്തിലാണ് പുതിയ പ്രഖ്യാപനം വരുന്നത്. ബിസിജി നടത്തിയ അന്താരാഷ്ട്ര സർവേ പ്രകാരം, സ്വകാര്യ മേഖലയിലെ ഡിജിറ്റൽ സേവനങ്ങളേക്കാൾ യുഎഇ സർക്കാർ സേവനങ്ങൾ മികച്ചതാണെന്ന് 75 ശതമാനത്തിലധികം പേർ അഭിപ്രായപ്പെട്ടു.

സർക്കാർ സേവനങ്ങളുടെ വേഗതയും കാര്യക്ഷമതയും വർധിപ്പിക്കുന്നതിനായി കൃത്രിമബുദ്ധി (AI) സാങ്കേതികവിദ്യകൾ വ്യാപകമായി ഉപയോഗിക്കാനാണ് യുഎഇയുടെ നീക്കം. അടുത്ത രണ്ട് വർഷത്തിനുള്ളിൽ സർക്കാർ സേവനങ്ങളുടെ പകുതിയോളം AI ഏജന്റുമാർ വഴി ലഭ്യമാക്കുമെന്ന് നേരത്തെ പ്രഖ്യാപിച്ചിരുന്നു.

സേവനങ്ങൾ കൂടുതൽ ലളിതമാക്കുന്നതിന്റെ ഭാഗമായി ഉപഭോക്താക്കളിൽ നിന്ന് ഒരേ വിവരങ്ങൾ ആവർത്തിച്ച് ആവശ്യപ്പെടാതിരിക്കുക, അപേക്ഷയുടെ ഓരോ ഘട്ടത്തിലും കൃത്യമായ വിവരങ്ങൾ നൽകുക, സ്വകാര്യതയും സുരക്ഷയും ഉറപ്പാക്കുക തുടങ്ങിയ നടപടികളും ഉൾപ്പെടുത്തിയിട്ടുണ്ട്.

നടപടിക്രമങ്ങളുടെ എണ്ണം കുറച്ച് പൊതുജനങ്ങൾക്ക് സർക്കാർ സേവനങ്ങൾ കൂടുതൽ എളുപ്പത്തിലും വേഗത്തിലും ലഭ്യമാക്കുന്നതിനുള്ള AI സംവിധാനങ്ങൾ വിവിധ സർക്കാർ സ്ഥാപനങ്ങൾ പരിശോധിച്ചുവരികയാണ്. അടുത്ത മാസത്തെ പ്രഖ്യാപനത്തോടെ യുഎഇയിലെ പൊതുജന സേവന മേഖലയിൽ വലിയ മാറ്റങ്ങൾ ഉണ്ടാകുമെന്നാണ് പ്രതീക്ഷ.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക