Doha car accident compensation ദോഹ: വാഹനാപകടത്തിൽ ഗുരുതരമായി പരിക്കേറ്റ വിദേശ സന്ദർശകന് 5 ലക്ഷം ഖത്തർ റിയാൽ നഷ്ടപരിഹാരം നൽകണമെന്ന കീഴ്‌ക്കോടതി വിധി അപ്പീൽ കോടതി ശരിവച്ചു. നട്ടെല്ലിന് ഒടിവ്, വിരൽ ഭാഗികമായി മുറിച്ചുമാറ്റേണ്ടിവന്നത്, ഒരു ചെവിയുടെ കർണപടലത്തിന് പരിക്കേറ്റ് കേൾവിശക്തി നഷ്ടപ്പെട്ടത് തുടങ്ങിയ ഗുരുതര പരിക്കുകൾക്കാണ് നഷ്ടപരിഹാരം.
വാർഷിക അവധിക്കായി ദോഹയിലെത്തിയ സന്ദർശകനാണ് അപകടത്തിൽപ്പെട്ടത്. ഒരു കമ്പനിയുടെ ഉടമസ്ഥതയിലുള്ള ലിമോസിനിൽ യാത്ര ചെയ്യുന്നതിനിടെയാണ് അപകടമുണ്ടായത്. ഡ്രൈവറുടെ അശ്രദ്ധയും ഡ്രൈവിങ്ങിലെ പിഴവുമാണ് അപകടത്തിന് കാരണമായതെന്ന് കോടതി കണ്ടെത്തി.
അപകടത്തെ തുടർന്ന് സന്ദർശകന് നട്ടെല്ലിന് ഗുരുതരമായ പരിക്കുകളും ഇടതുകൈയിലെ ഒരു വിരലിന്റെ ഭാഗികമായ ഛേദവും ഒരു ചെവിയിൽ കേൾവിശക്തി നഷ്ടപ്പെടുന്നതും ഉൾപ്പെടെയുള്ള ആരോഗ്യപ്രശ്നങ്ങൾ നേരിടേണ്ടിവന്നു. രാജ്യത്തിനകത്തും പുറത്തുമായി ചികിത്സയ്ക്കായി വലിയ തുക ചെലവഴിക്കേണ്ടിവന്നതായും അപകടത്തെ തുടർന്ന് ജോലി ചെയ്യാൻ കഴിയാതെ വരുമാന നഷ്ടമുണ്ടായതായും പരാതിക്കാരൻ കോടതിയെ അറിയിച്ചു.
അപകടത്തിന് കാരണക്കാരനായ ലിമോസിൻ ഡ്രൈവർക്കെതിരെ നേരത്തെ ക്രിമിനൽ കേസ് രജിസ്റ്റർ ചെയ്തിരുന്നു. ഡ്രൈവർ കുറ്റക്കാരനാണെന്ന് കണ്ടെത്തിയുള്ള ക്രിമിനൽ വിധിക്കെതിരെ അദ്ദേഹം അപ്പീൽ നൽകിയിരുന്നില്ല. ഇതിന്റെ അടിസ്ഥാനത്തിൽ അപകടത്തിൽ സംഭവിച്ച നാശനഷ്ടങ്ങൾക്ക് ഡ്രൈവറുടെ ഉത്തരവാദിത്തം സ്ഥാപിക്കപ്പെട്ടതായി കോടതി വിലയിരുത്തി.
തുടർന്ന് പരിക്കേറ്റ സന്ദർശകൻ ഡ്രൈവർക്കും അദ്ദേഹം ജോലി ചെയ്യുന്ന കമ്പനിക്കും വാഹനത്തിന്റെ ഇൻഷുറൻസ് കമ്പനിക്കുമെതിരെ നിക്ഷേപ, വ്യാപാര കോടതിയിൽ നഷ്ടപരിഹാര കേസ് ഫയൽ ചെയ്തു. ആകെ 30 ലക്ഷം റിയാൽ ഭൗതികവും ധാർമ്മികവുമായ നഷ്ടപരിഹാരമായി നൽകണമെന്നായിരുന്നു പ്രധാന ആവശ്യം.
പരാതിക്കാരന്റെ നിയമ പ്രതിനിധിയായ അഭിഭാഷക നൂറ സർഹാൻ കോടതിയിൽ നിയമപരമായ മെമ്മോറാണ്ടം സമർപ്പിച്ചു. അപകടത്തിൽ സംഭവിച്ച ശാരീരികവും മാനസികവുമായ ബുദ്ധിമുട്ടുകൾ, ചികിത്സാ ചെലവുകൾ, ജോലി ചെയ്യാൻ കഴിയാത്തതിനെ തുടർന്നുണ്ടായ വരുമാന നഷ്ടം എന്നിവ പരിഗണിച്ച് നഷ്ടപരിഹാരം നൽകണമെന്ന് അവർ ആവശ്യപ്പെട്ടു.
കേസ് പരിഗണിച്ച പ്രഥമദൃഷ്ട്യാ കോടതി ഡ്രൈവർ, കമ്പനി, ഇൻഷുറൻസ് സ്ഥാപനം എന്നിവർ ചേർന്ന് 5 ലക്ഷം റിയാൽ നഷ്ടപരിഹാരം നൽകണമെന്ന് വിധിച്ചു. കേസിന്റെ ചെലവുകളും വഹിക്കണമെന്നും കോടതി ഉത്തരവിട്ടു.
എന്നാൽ വിധിക്കെതിരെ ഇൻഷുറൻസ് കമ്പനി അപ്പീൽ കോടതിയെ സമീപിച്ചു. പരിക്കേറ്റ വ്യക്തിയും നഷ്ടപരിഹാര തുക 30 ലക്ഷമായി ഉയർത്തണമെന്നാവശ്യപ്പെട്ട് അപ്പീൽ നൽകിയിരുന്നു.
കേസ് പരിഗണിച്ച അപ്പീൽ കോടതി കീഴ്‌ക്കോടതിയുടെ വിധി ശരിവയ്ക്കുകയായിരുന്നു.
ഡ്രൈവറുടെ അശ്രദ്ധ, ജാഗ്രതക്കുറവ്, ഗതാഗത നിയമങ്ങളും ചട്ടങ്ങളും പാലിക്കാത്തത്, വാഹനങ്ങൾക്കിടയിൽ ആവശ്യമായ സുരക്ഷിത അകലം പാലിക്കാത്തത് എന്നിവയാണ് അപകടത്തിന് കാരണമായതെന്ന് കോടതി വിലയിരുത്തി. അശ്രദ്ധ, നാശനഷ്ടം, ഇവ തമ്മിലുള്ള കാര്യകാരണബന്ധം എന്നിവ തെളിയിക്കപ്പെട്ടതിനാൽ നഷ്ടപരിഹാരം നൽകാനുള്ള നിയമപരമായ ബാധ്യതയുടെ ഘടകങ്ങൾ പൂർണമായും നിലനിൽക്കുന്നുണ്ടെന്നും കോടതി വ്യക്തമാക്കി.
നഷ്ടപരിഹാരം നിശ്ചയിക്കുമ്പോൾ പരിക്കേറ്റ വ്യക്തിക്ക് സംഭവിച്ച ഭൗതികവും ധാർമ്മികവുമായ നഷ്ടത്തിന്റെ സ്വഭാവം മാത്രമല്ല, വ്യക്തിയുടെ പ്രായം, സാമൂഹിക സാഹചര്യം, ആരോഗ്യനില തുടങ്ങിയ വ്യക്തിഗത സാഹചര്യങ്ങളും പരിഗണിക്കാമെന്ന് കോടതി ചൂണ്ടിക്കാട്ടി.
ഗുരുതരമായ പരിക്കുകൾ, ചികിത്സാ ചെലവുകൾ, ജോലി ചെയ്യാൻ കഴിയാത്തതിനെ തുടർന്നുള്ള വരുമാന നഷ്ടം, അപകടത്തെ തുടർന്നുണ്ടായ മാനസികവും ധാർമ്മികവുമായ ബുദ്ധിമുട്ടുകൾ എന്നിവ പരിഗണിച്ചാണ് 5 ലക്ഷം റിയാൽ നഷ്ടപരിഹാരം അനുവദിച്ചിരിക്കുന്നത്.
