Qatar food safety warning

Qatar food safety warning ദോഹ: ടെലിഫോൺ വഴി വ്യക്തികൾ വിൽക്കുകയോ വിപണനം ചെയ്യുകയോ ചെയ്യുന്ന ഭക്ഷ്യവസ്തുക്കൾ വാങ്ങുന്നതിനെതിരെ ഖത്തർ പൊതുജനാരോഗ്യ മന്ത്രാലയം മുന്നറിയിപ്പ് നൽകി. ഇത്തരം ഉൽപ്പന്നങ്ങൾ അംഗീകൃത പരിശോധനകൾക്കും നിയന്ത്രണങ്ങൾക്കും വിധേയമാകണമെന്നില്ലെന്നും ഇത് ഭക്ഷ്യസുരക്ഷയ്ക്കും പൊതുജനാരോഗ്യത്തിനും ഭീഷണിയാകാമെന്നും മന്ത്രാലയം വ്യക്തമാക്കി.

ഭക്ഷ്യവസ്തുക്കൾ വാങ്ങുമ്പോൾ ഔദ്യോഗികമായി ലൈസൻസ് ലഭിച്ച കടകളെയും സ്ഥാപനങ്ങളെയും മാത്രം ആശ്രയിക്കണമെന്ന് മന്ത്രാലയം ജനങ്ങളോട് ആവശ്യപ്പെട്ടു. ഭക്ഷണത്തിന്റെ ഗുണനിലവാരവും സുരക്ഷയും ഉറപ്പാക്കാനും കുടുംബാംഗങ്ങളുടെ ആരോഗ്യം സംരക്ഷിക്കാനും വിശ്വസനീയമായ ഉറവിടങ്ങളിൽനിന്ന് ഭക്ഷ്യവസ്തുക്കൾ വാങ്ങേണ്ടത് പ്രധാനമാണെന്നും മന്ത്രാലയം ചൂണ്ടിക്കാട്ടി.

വേനൽക്കാലത്ത് ഭക്ഷ്യസുരക്ഷ ഉറപ്പാക്കുന്നതിനായി നടത്തുന്ന ബോധവൽക്കരണ പ്രവർത്തനങ്ങളുടെ ഭാഗമായാണ് മന്ത്രാലയത്തിന്റെ മുന്നറിയിപ്പ്. ഭക്ഷണം വാങ്ങുന്നതുമുതൽ സൂക്ഷിക്കുന്നതും ഉപയോഗിക്കുന്നതും വരെയുള്ള ഓരോ ഘട്ടത്തിലും ജാഗ്രത പാലിക്കണമെന്നും അധികൃതർ നിർദേശിച്ചു.

ഭക്ഷണം കഴിക്കുമ്പോൾ ശ്രദ്ധിക്കേണ്ട കാര്യങ്ങൾ

ഭക്ഷണം കഴിക്കാൻ റസ്റ്റോറന്റുകൾ തിരഞ്ഞെടുക്കുമ്പോൾ ശുചിത്വത്തിന് പ്രാധാന്യം നൽകുക.
ഭക്ഷണം വിളമ്പുന്ന സ്ഥലവും പാത്രങ്ങളും വൃത്തിയുള്ളതാണെന്ന് ഉറപ്പാക്കുക.
ഭക്ഷണത്തിന്റെ നിറത്തിലോ മണത്തിലോ രുചിയിലോ അസ്വാഭാവികമായ മാറ്റം കണ്ടാൽ അത് കഴിക്കരുത്.
ശരിയായ രീതിയിൽ സൂക്ഷിക്കാത്ത ഭക്ഷണങ്ങൾ ഒഴിവാക്കുക.
ഭക്ഷണത്തിന്റെ സുരക്ഷയെക്കുറിച്ച് സംശയമുണ്ടെങ്കിൽ അത് ഉപയോഗിക്കരുത്.

ഭക്ഷ്യവിഷബാധയുടെ ലക്ഷണങ്ങളുണ്ടായാൽ എന്തുചെയ്യണം?

ഭക്ഷണം കഴിച്ചതിനുശേഷം ഛർദി, വയറിളക്കം, വയറുവേദന തുടങ്ങിയ ലക്ഷണങ്ങൾ ഉണ്ടായാൽ വൈദ്യസഹായം തേടണമെന്ന് മന്ത്രാലയം നിർദേശിച്ചു. വിഷബാധയ്ക്ക് കാരണമായ ഭക്ഷണം തിരിച്ചറിയാൻ സഹായിക്കുന്നതിനായി ശേഷിക്കുന്ന ഭക്ഷണം സൂക്ഷിക്കാനും അധികൃതർ നിർദേശിച്ചിട്ടുണ്ട്.

ഭക്ഷ്യസുരക്ഷാ ലംഘനങ്ങൾ അറിയിക്കാം

ഭക്ഷ്യസുരക്ഷാ നിയമങ്ങളുടെ ലംഘനങ്ങൾ ശ്രദ്ധയിൽപ്പെട്ടാൽ 16000 എന്ന നമ്പറിൽ വിളിച്ച് അധികൃതരെ അറിയിക്കാം. ഇത്തരം പരാതികൾ ഭക്ഷ്യസുരക്ഷാ പരിശോധനകൾ ശക്തിപ്പെടുത്തുന്നതിനും പൊതുജനാരോഗ്യം സംരക്ഷിക്കുന്നതിനും സഹായിക്കുമെന്ന് മന്ത്രാലയം വ്യക്തമാക്കി.

സുരക്ഷിതമായ ഭക്ഷണം തിരഞ്ഞെടുക്കുന്നതിൽ ഓരോ വ്യക്തിക്കും ഉത്തരവാദിത്തമുണ്ടെന്നും അംഗീകൃത സ്ഥാപനങ്ങളിൽനിന്ന് മാത്രം ഭക്ഷ്യവസ്തുക്കൾ വാങ്ങി സ്വന്തം ആരോഗ്യവും കുടുംബത്തിന്റെ ആരോഗ്യവും സംരക്ഷിക്കണമെന്നും മന്ത്രാലയം ഓർമിപ്പിച്ചു.