Phone Scam: Two Arrested in Dubai ദുബായിൽ ഔദ്യോഗിക, അന്താരാഷ്ട്ര സ്ഥാപനങ്ങളിലെ ജീവനക്കാരെന്ന് വ്യാജമായി പരിചയപ്പെടുത്തി ഫോൺ തട്ടിപ്പ് നടത്തിയെന്നാരോപിച്ച് രണ്ട് പേരെ ദുബായ് പൊലീസ് അറസ്റ്റ് ചെയ്തു. നിരവധി താമസക്കാരെ ലക്ഷ്യമിട്ട തട്ടിപ്പിൽ 11,877,532 ദിർഹം നഷ്ടപ്പെട്ടതായി പൊലീസ് അറിയിച്ചു.
വിദേശരാജ്യങ്ങളിലെ നിയമ കേസുകളുമായി ഇരകളുടെ പേരുകൾ ബന്ധപ്പെട്ടു കിടക്കുന്നതായി പ്രതികൾ ഫോൺ ചെയ്ത് ഭീഷണിപ്പെടുത്തുകയായിരുന്നു. കേസിൽ നിന്ന് ഒഴിവാകുന്നതിനും പണം പരിശോധിക്കുന്നതിനുമെന്ന പേരിൽ ബാങ്ക് അക്കൗണ്ടുകളിൽനിന്ന് വിദേശ അക്കൗണ്ടുകളിലേക്ക് പണം കൈമാറാൻ ആവശ്യപ്പെട്ടു. ചില ഇരകളോട് നേരത്തെ നൽകിയ തുക മതിയായില്ലെന്ന് പറഞ്ഞ് സ്വർണാഭരണങ്ങൾ വിൽക്കാനും പണം കൈമാറാനും ആവശ്യപ്പെട്ടതായി അന്വേഷണത്തിൽ കണ്ടെത്തി.
തട്ടിപ്പിനിരയായവരോട് ഹോട്ടൽ മുറികൾ ബുക്ക് ചെയ്യാനും കുടുംബാംഗങ്ങളുമായും സുഹൃത്തുക്കളുമായും ബന്ധപ്പെടാതിരിക്കാനും പ്രതികൾ നിർദേശിച്ചിരുന്നതായും പൊലീസ് പറഞ്ഞു. ഇരകളിൽ മാനസിക സമ്മർദം സൃഷ്ടിച്ച് തട്ടിപ്പ് തുടരുകയായിരുന്നു ലക്ഷ്യം.
പരാതികൾ ലഭിച്ചതിനെ തുടർന്ന് ദുബായ് പൊലീസിന്റെ ആന്റി-ഫ്രോഡ് സെന്റർ പ്രത്യേക അന്വേഷണസംഘം രൂപീകരിച്ച് പണമിടപാടുകൾ പിന്തുടർന്നു. തുടർന്ന് ഇരകളുമായി നേരിട്ട് ബന്ധപ്പെട്ടിരുന്ന രണ്ട് പേരെ തിരിച്ചറിഞ്ഞ് അറസ്റ്റ് ചെയ്തു. പ്രതികളുടെ മൊബൈൽ ഫോണുകളിൽ ഇരകളുടെ വിവരങ്ങളും തട്ടിപ്പുമായി ബന്ധപ്പെട്ട സന്ദേശങ്ങളും കണ്ടെത്തിയതായി പൊലീസ് അറിയിച്ചു.
സംശയാസ്പദമായ ഫോൺ കോളുകളോടും സന്ദേശങ്ങളോടും ജാഗ്രത പാലിക്കണമെന്ന് ദുബായ് പൊലീസ് മുന്നറിയിപ്പ് നൽകി. ബാങ്ക് വിവരങ്ങളോ വ്യക്തിഗത വിവരങ്ങളോ കൈമാറരുതെന്നും ഔദ്യോഗിക ചാനലുകളിലൂടെ വിവരങ്ങൾ സ്ഥിരീകരിച്ച ശേഷമേ നടപടിയെടുക്കാവൂ എന്നും പൊലീസ് നിർദേശിച്ചു. സംശയാസ്പദമായ തട്ടിപ്പുകൾ e-Crime പ്ലാറ്റ്‌ഫോം വഴിയോ 901 എന്ന നമ്പറിലൂടെയോ റിപ്പോർട്ട് ചെയ്യാനും പൊലീസ് ആവശ്യപ്പെട്ടു.
