Qatar Food Safety Action: ദോഹ: ഭക്ഷ്യസുരക്ഷാ നിയമങ്ങൾ ലംഘിച്ചതിനെ തുടർന്ന് ഖത്തറിലെ അൽ വക്രയിൽ നാല് ഭക്ഷ്യ സ്ഥാപനങ്ങൾക്കെതിരെ നടപടി. ഒരു ബേക്കറി, പ്രശസ്തമായ അറബിക് റെസ്റ്റോറന്റ്, സൂപ്പർമാർക്കറ്റ്, മാവ് മിൽ എന്നിവയാണ് അൽ വക്ര മുനിസിപ്പാലിറ്റി അടച്ചുപൂട്ടിയത്.

മനുഷ്യ ഭക്ഷ്യ നിയന്ത്രണവുമായി ബന്ധപ്പെട്ട നിയമങ്ങൾ ലംഘിച്ചതിനെ തുടർന്നാണ് നടപടി സ്വീകരിച്ചത്. 1990ലെ എട്ടാം നമ്പർ നിയമവും 2014ലെ നാലാം നമ്പർ നിയമത്തിലെ ഭേദഗതികളും അടിസ്ഥാനമാക്കിയാണ് ഭരണപരമായ തീരുമാനങ്ങൾ പുറപ്പെടുവിച്ചത്.

വൃത്തിഹീനമായ സാഹചര്യങ്ങളിൽ ഭക്ഷണം തയ്യാറാക്കിയതായി കണ്ടെത്തിയതിനെ തുടർന്ന് ഒരു പ്രശസ്ത അറബിക് ബേക്കറിയും റെസ്റ്റോറന്റും ഏഴ് ദിവസത്തേക്ക് ഭാഗികമായി അടച്ചുപൂട്ടി.

അതേസമയം, വൃത്തിഹീനമായ സാഹചര്യങ്ങളിൽ ഭക്ഷണം തയ്യാറാക്കിയതായി കണ്ടെത്തിയ ഒരു മാവ് മിൽ ഏഴ് ദിവസത്തേക്ക് പൂർണമായും അടച്ചുപൂട്ടി. കാലാവധി കഴിഞ്ഞ ഭക്ഷ്യവസ്തുക്കൾ കണ്ടെത്തിയതിനെ തുടർന്നാണ് ഒരു സൂപ്പർമാർക്കറ്റ് 10 ദിവസത്തേക്ക് പൂർണമായി അടച്ചത്.

ഭക്ഷ്യസുരക്ഷാ നിയമം ലംഘിച്ചാൽ നടപടി

ഭക്ഷണം കേടായതോ ഉപയോഗിക്കാൻ അനുയോജ്യമല്ലാത്തതോ ആകാൻ ഇടയാക്കുന്ന രീതിയിൽ തയ്യാറാക്കുകയോ സംസ്കരിക്കുകയോ സൂക്ഷിക്കുകയോ ചെയ്യുന്നത് നിയമലംഘനമാണ്. പ്രത്യേകിച്ച് വൃത്തിഹീനമായ സാഹചര്യങ്ങളിലോ ആരോഗ്യത്തിന് ഹാനികരമായ രീതികളിലോ ഭക്ഷണം കൈകാര്യം ചെയ്യുന്നത് ഗുരുതരമായ ലംഘനമായി കണക്കാക്കപ്പെടുന്നു.

അടച്ചുപൂട്ടൽ നടപടിയുടെ ചെലവും ബന്ധപ്പെട്ട നിയമലംഘനത്തിന് ഉത്തരവാദിയായ സ്ഥാപനമോ വ്യക്തിയോ വഹിക്കണം.

ലംഘനത്തിന്റെ സ്വഭാവവും ഗുരുതരതയും പരിഗണിച്ചാണ് മുനിസിപ്പൽ അധികൃതർ അടച്ചുപൂട്ടൽ കാലാവധി നിശ്ചയിക്കുന്നത്. ഒരു തവണ അടച്ചുപൂട്ടുന്ന കാലയളവ് 60 ദിവസത്തിൽ കൂടാൻ പാടില്ല. നിയമലംഘനം ആവർത്തിച്ചാൽ വീണ്ടും അടച്ചുപൂട്ടൽ നടപടി സ്വീകരിക്കാനും വ്യവസ്ഥയുണ്ട്.

അടച്ചിട്ട സ്ഥാപനങ്ങൾ തുറക്കാൻ പാടില്ല

അടച്ചുപൂട്ടൽ കാലയളവിൽ ബന്ധപ്പെട്ട സ്ഥാപനങ്ങൾ വീണ്ടും തുറന്ന് പ്രവർത്തിക്കാനോ അറ്റകുറ്റപ്പണികൾ നടത്താനോ അനുവാദമില്ല. അധികൃതരുടെ അനുമതിയില്ലാതെ അടച്ച സ്ഥാപനം തുറക്കുകയോ പ്രവർത്തനം തുടരുകയോ ചെയ്താൽ ക്രിമിനൽ ഉത്തരവാദിത്തം ഉൾപ്പെടെയുള്ള നിയമനടപടികൾ നേരിടേണ്ടിവരും.

ഖത്തറിൽ ഭക്ഷ്യസുരക്ഷ ഉറപ്പാക്കുന്നതിന്റെ ഭാഗമായി മുനിസിപ്പാലിറ്റി അധികൃതർ ഭക്ഷ്യ സ്ഥാപനങ്ങളിൽ പരിശോധനകൾ ശക്തമാക്കിയിട്ടുണ്ട്. ഭക്ഷ്യസുരക്ഷാ മാനദണ്ഡങ്ങൾ പാലിക്കാത്ത സ്ഥാപനങ്ങൾക്കെതിരെ നിയമാനുസൃതമായ നടപടികൾ തുടരുമെന്നും അധികൃതർ വ്യക്തമാക്കി.