ദുബായ്: റോഡ് സുരക്ഷയും ഗതാഗത നിയമ പാലനവും മുൻനിർത്തി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) ‘റോഡ് സേഫ്റ്റി ഫിലിം ഫെസ്റ്റിവൽ’ (Road Safety Film Festival) രണ്ടാം പതിപ്പ് പ്രഖ്യാപിച്ചു. റോഡ് അപകടങ്ങൾ കുറയ്ക്കുന്നതിനും സുരക്ഷിതമായ വാഹനമോടിക്കൽ സംസ്കാരം വളർത്തുന്നതിനുമായി സംഘടിപ്പിക്കുന്ന മത്സരത്തിൽ തിരഞ്ഞെടുക്കപ്പെടുന്ന മികച്ച ഹ്രസ്വചിത്രങ്ങൾക്ക് ആകെ 3,00,000 ദിർഹം വരെ കാഷ് പ്രൈസും ട്രോഫികളും സമ്മാനമായി നൽകും. വിവിധ വിഭാഗങ്ങളിലെ വിജയികൾക്ക് 30,000 ദിർഹം വരെയാണ് സമ്മാനം ലഭിക്കുക.

അസീസി ഡെവലപ്‌മെന്റ്സിന്റെ (Azizi Developments) സഹകരണത്തോടെയാണ് ആർ.ടി.എ ഈ മത്സരം സംഘടിപ്പിക്കുന്നത്. ആദ്യ പതിപ്പിൽ നൂറിലധികം സർഗ്ഗാത്മക ഹ്രസ്വചിത്രങ്ങൾ ലഭിച്ചതിന്റെ വിജയത്തിന് തുടർച്ചയായാണ് രണ്ടാം പതിപ്പ് നടക്കുന്നത്.

ആർക്കൊക്കെ പങ്കെടുക്കാം? വ്യക്തികൾ, സർവ്വകലാശാലാ വിദ്യാർത്ഥികൾ, സർക്കാർ-സ്വകാര്യ സ്ഥാപനങ്ങൾ, പൊതുജനങ്ങൾ എന്നിവർക്കെല്ലാം മത്സരത്തിൽ പങ്കെടുക്കാൻ അവസരമുണ്ട്.

പ്രധാന വിഷയങ്ങൾ (Categories):

പെട്ടെന്നുള്ള ലെയ്ൻ മാറ്റം കൊണ്ടുള്ള അപകടങ്ങൾ (Sudden Swerving)
ശ്രദ്ധതിരിഞ്ഞുള്ള വാഹനമോടിക്കൽ (Distracted Driving)
ഇ-സ്കൂട്ടറുകളും സൈക്കിളുകളും ഉപയോഗിക്കുമ്പോഴുള്ള ശ്രദ്ധയില്ലായ്മ

മത്സര നിബന്ധനകൾ:

ബോധവൽക്കരണ ചിത്രങ്ങളുടെ ദൈർഘ്യം കുറഞ്ഞത് 1 മിനിറ്റും പരമാവധി 3 മിനിറ്റും ആയിരിക്കണം.
ആനിമേഷൻ, ഡോക്യുമെന്ററി, ലൈവ്-ആക്ഷൻ, എ.ഐ (AI) സാങ്കേതികവിദ്യ എന്നിവ ഉപയോഗിച്ച് നിർമ്മിച്ച ചിത്രങ്ങൾ സമർപ്പിക്കാം.
ചിത്രങ്ങൾ അറബിക് അല്ലെങ്കിൽ ഇംഗ്ലീഷ് ഭാഷയിലായിരിക്കണം (അല്ലെങ്കിൽ ഈ ഭാഷകളിൽ സബ്‌ടൈറ്റിലുകൾ ഉണ്ടായിരിക്കണം).

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

അപേക്ഷിക്കേണ്ടവിധം: 2026 ഓഗസ്റ്റ് 24 മുതൽ നവംബർ 22 വരെ ആർ.ടി.എയുടെ ഔദ്യോഗിക വെബ്‌സൈറ്റ് (www.rta.ae/roadsafetyfilmfestival) വഴി അപേക്ഷ സമർപ്പിക്കാവുന്നതാണ്. ലഭിക്കുന്ന അപേക്ഷകളിൽ നിന്നും വിലയിരുത്തലുകൾക്ക് ശേഷം ഡിസംബർ പകുതിയോടെ അന്തിമ ഫലം പ്രഖ്യാപിക്കും. 2027 ജനുവരിയിലായിരിക്കും സമ്മാനദാനം നടക്കുക.

ഡിജിറ്റൽ മാധ്യമങ്ങൾക്കും സോഷ്യൽ മീഡിയയ്ക്കും മുൻതൂക്കമുള്ള ഈ കാലഘട്ടത്തിൽ സർഗ്ഗാത്മകമായ കാഴ്ചകളിലൂടെ ജനങ്ങളിൽ ഗതാഗത ബോധവൽക്കരണം എത്തിക്കാനാണ് ആർ.ടി.എ ലക്ഷ്യമിടുന്നത്.

വിൻഡ്ഷീൽഡ് തുടയ്ക്കുന്നതിനെച്ചൊല്ലി തർക്കം: പെട്രോൾ പമ്പ് ജീവനക്കാരനെ മർദിച്ച രണ്ടുപേർക്ക് 50,000 ദിർഹം വീതം പിഴ; ശിക്ഷ അതേ പമ്പിൽ സാമൂഹിക സേവനവും

അൽ ഐൻ: ഡ്യൂട്ടിക്കിടെ പെട്രോൾ പമ്പ് ജീവനക്കാരനെ ക്രൂരമായി മർദിച്ച കേസിൽ രണ്ടുപേരെ കുറ്റക്കാരായി കണ്ടെത്തി അൽ ഐൻ മിസ്‌ഡെമനർ കോടതി. പ്രതികൾക്ക് 50,000 ദിർഹം (ഏകദേശം 11.4 ലക്ഷത്തിലധികം ഇന്ത്യൻ രൂപ) വീതം പിഴ ചുമത്തിയ കോടതി, അക്രമം നടന്ന അതേ പെട്രോൾ പമ്പിൽ രണ്ടുമാസത്തെ സാമൂഹിക സേവനം (Community Service) ചെയ്യാനും ഉത്തരവിട്ടു.

വാഹനത്തിന്റെ വിൻഡ്ഷീൽഡ് (മുന്നിലെ ഗ്ലാസ്) വൃത്തിയാക്കുന്നതിനെച്ചൊല്ലിയുണ്ടായ തർക്കമാണ് അക്രമത്തിൽ കലാശിച്ചത്. വാഹനം ഓടിച്ചിരുന്ന ഒന്നാം പ്രതി, ജീവനക്കാരനോട് ഗ്ലാസ് തുടച്ചുനൽകാൻ ആവശ്യപ്പെടുകയായിരുന്നു. എന്നാൽ പമ്പിൽ തിരക്കുള്ളതിനാൽ അല്പസമയം കാത്തിരിക്കണമെന്ന് ജീവനക്കാരൻ പറഞ്ഞു. തുടർന്നുണ്ടായ തർക്കം മർദനത്തിലേക്ക് വഴിവെക്കുകയും ജീവനക്കാരന് പരിക്കേൽക്കുകയുമായിരുന്നു.

സംഭവത്തിന്റെ സിസിടിവി ദൃശ്യങ്ങൾ, പ്രതികളുടെ കുറ്റസമ്മതം, സാക്ഷിമൊഴികൾ, പരിക്കേറ്റ ജീവനക്കാരന്റെ മെഡിക്കൽ റിപ്പോർട്ട് എന്നിവയുടെ അടിസ്ഥാനത്തിലാണ് കോടതി വിധി പ്രസ്താവിച്ചത്. പൊതുസേവനത്തിൽ ഏർപ്പെട്ടിരിക്കുന്ന ജീവനക്കാരെ ജോലി തടസ്സപ്പെടുത്തുകയോ അക്രമിക്കുകയോ ചെയ്യുന്നത് യുഎഇ കുറ്റകൃത്യ നിയമപ്രകാരം ഗുരുതരമായ കുറ്റമാണെന്ന് കോടതി ഓർമ്മിപ്പിച്ചു.

തർക്കങ്ങൾ ഉണ്ടാകുമ്പോൾ നിയമപരമായ വഴികൾ സ്വീകരിക്കുന്നതാണ് നിയമനടപടികളിൽ നിന്ന് ഒഴിവാകാൻ നല്ലതെന്നും അൽ ഐൻ കോടതി വ്യക്തമാക്കി.