Qatar midterm exam schedule ഖത്തർ: മിഡ്‌ടേം പരീക്ഷാ കാലയളവിൽ പൊതുവിദ്യാലയങ്ങളിലെ സമയക്രമം സംബന്ധിച്ച് പുതിയ നിർദേശങ്ങൾ പുറപ്പെടുവിച്ച് ഖത്തർ വിദ്യാഭ്യാസ, ഉന്നത വിദ്യാഭ്യാസ മന്ത്രാലയം. ക്ലാസ് പിരീഡുകൾ, പരീക്ഷാ നടത്തിപ്പ്, വിദ്യാർഥികളുടെ മടക്കസമയം, ജീവനക്കാരുടെ ജോലി സമയം എന്നിവ ക്രമീകരിച്ചാണ് മന്ത്രാലയം സ്കൂൾ പ്രിൻസിപ്പൽമാർക്ക് സർക്കുലർ അയച്ചത്.

പരീക്ഷാ ദിവസങ്ങളിൽ നാല് പിരീഡുകൾ

മിഡ്‌ടേം പരീക്ഷാ ദിവസങ്ങളിൽ ആകെ നാല് പിരീഡുകളായിരിക്കും ഉണ്ടാകുക. ഇതിൽ രണ്ടാമത്തെയും മൂന്നാമത്തെയും പിരീഡുകൾ പരീക്ഷകൾക്കായി നീക്കിവയ്ക്കും. ശേഷിക്കുന്ന പിരീഡുകൾ പതിവ് സമയക്രമം അനുസരിച്ച് നടത്തും.

വിദ്യാർഥികളുടെ മൂല്യനിർണയവും ഫലപ്രഖ്യാപനവും കൃത്യമായി പൂർത്തിയാക്കുന്നതിന് ഗ്രേഡുകൾ പരിശോധിക്കുന്നതിനും രേഖപ്പെടുത്തുന്നതിനുമുള്ള നടപടിക്രമങ്ങൾ പാലിക്കണമെന്നും മന്ത്രാലയം നിർദേശിച്ചു. ഇതിനായി ബന്ധപ്പെട്ട സംവിധാനങ്ങൾ തുറക്കുന്നതിനും അടയ്ക്കുന്നതിനുമുള്ള സമയക്രമം കർശനമായി പാലിക്കണം.

നാലാം പിരീഡ് കഴിഞ്ഞാൽ വിദ്യാർഥികൾക്ക് മടക്കം

നാലാം പിരീഡ് അവസാനിച്ച ഉടൻ വിദ്യാർഥികളെ വീടുകളിലേക്ക് മടക്കണം. വിദ്യാർഥികളെ സ്കൂളിൽ സ്വീകരിക്കുന്ന സമയവും ഇടവേളകളുടെ സമയക്രമവും കൃത്യമായി പാലിക്കണമെന്നും സർക്കുലറിൽ വ്യക്തമാക്കിയിട്ടുണ്ട്.

ജീവനക്കാർക്ക് നേരത്തേ മടങ്ങാം

സ്കൂൾ ജീവനക്കാർക്ക് ഔദ്യോഗിക ജോലി സമയം അവസാനിക്കുന്നതിന് രണ്ട് മണിക്കൂർ മുമ്പ് മടങ്ങാൻ മന്ത്രാലയം അനുമതി നൽകിയിട്ടുണ്ട്. എന്നാൽ സർക്കുലറിൽ നിർദേശിച്ചിട്ടുള്ള മടക്കസമയം വനിതാ ജീവനക്കാർക്ക് അനുവദിച്ചിരിക്കുന്ന മുലയൂട്ടൽ സമയവുമായി കൂട്ടിച്ചേർക്കാൻ പാടില്ല.

അനുമതിയും നേരത്തെയുള്ള മടക്കവും ഉൾപ്പെടെയുള്ള ഇളവുകളുടെ ആകെ ദൈർഘ്യം ഒരു ദിവസം മൂന്ന് മണിക്കൂറിൽ കവിയരുതെന്നും മന്ത്രാലയം വ്യക്തമാക്കി.

മാനവവിഭവശേഷി ചട്ടങ്ങൾ പാലിച്ചുകൊണ്ട് സ്കൂളുകളുടെ പ്രവർത്തനവും പഠനപ്രക്രിയയും സുഗമമായി മുന്നോട്ടുകൊണ്ടുപോകാൻ എല്ലാ സ്കൂൾ അധികൃതരും സർക്കുലറിലെ നിർദേശങ്ങൾ പാലിക്കണമെന്നും മന്ത്രാലയം ആവശ്യപ്പെട്ടു.

ഖത്തറിലെ കൂടുതൽ തൊഴിൽ ഒഴിവുകൾ അറിയാൻ ലിങ്ക് ക്ലിക്ക് ചെയ്യുക