UAE Raises Minimum Jail Term to 15 Years അബുദാബി: ഇരയുടെ കുടുംബം ഖിസാസ് (പ്രതികാര ശിക്ഷ) ഒഴിവാക്കിയാലും കൊലക്കേസുകളിൽ കുറ്റക്കാരാകുന്നവർക്ക് 15 മുതൽ 20 വർഷം വരെ തടവുശിക്ഷ ലഭിക്കുന്ന തരത്തിൽ യുഎഇ നിയമത്തിൽ ഭേദഗതി. നിലവിലുണ്ടായിരുന്ന ഏഴ് മുതൽ 15 വർഷം വരെയുള്ള തടവുശിക്ഷയാണ് 15 മുതൽ 20 വർഷം വരെയായി ഉയർത്തിയതെന്ന് ഖലീജ് ടൈംസ് റിപ്പോർട്ട് ചെയ്തു. 2026 ഒക്ടോബർ 8-ന് പ്രഖ്യാപിച്ച കുറ്റകൃത്യങ്ങളും ശിക്ഷകളും സംബന്ധിച്ച നിയമഭേദഗതിയിലാണ് മാറ്റം.
കുറഞ്ഞ ശിക്ഷ ഏഴ് വർഷത്തിൽനിന്ന് 15 വർഷമായി
യുഎഇയിലെ കുറ്റകൃത്യങ്ങളും ശിക്ഷകളും സംബന്ധിച്ച നിയമത്തിലെ ആർട്ടിക്കിൾ 384(3) ആണ് ഭേദഗതി ചെയ്തത്. ഇരയുടെ നിയമപരമായ അവകാശികളായ കുടുംബാംഗങ്ങൾ നിയമനടപടികൾക്കിടയിലോ ശിക്ഷ നടപ്പാക്കുന്നതിന് മുമ്പോ ഖിസാസ് ഒഴിവാക്കിയാൽ പുതിയ ശിക്ഷാനിരക്ക് ബാധകമാകും.
പുതിയ വ്യവസ്ഥപ്രകാരം കുറഞ്ഞ തടവുശിക്ഷ ഏഴ് വർഷത്തിൽനിന്ന് 15 വർഷമായി ഉയർന്നു. പരമാവധി ശിക്ഷ 15 വർഷത്തിൽനിന്ന് 20 വർഷമായും വർധിച്ചു. കേസിന്റെ സാഹചര്യങ്ങളും ബാധകമായ നിയമവ്യവസ്ഥകളും പരിഗണിച്ചായിരിക്കും കോടതി ശിക്ഷ നിശ്ചയിക്കുക.
കുടുംബം മാപ്പുനൽകിയാലും കുറ്റബാധ്യത അവസാനിക്കില്ല
ഇരയുടെ കുടുംബം ഖിസാസ് ഒഴിവാക്കുന്നത് കുറ്റവിമുക്തിയല്ലെന്ന് നിയമവിദഗ്ധർ വിശദീകരിക്കുന്നു. കുടുംബം പ്രതികാരശിക്ഷയ്ക്കുള്ള അവകാശം ഉപേക്ഷിച്ചാലും കുറ്റക്കാരന്റെ ക്രിമിനൽ ഉത്തരവാദിത്തം നിലനിൽക്കും. ഗുരുതരമായ കുറ്റകൃത്യങ്ങൾ തടയുന്നതിനും സമൂഹത്തിന്റെ സുരക്ഷ ഉറപ്പാക്കുന്നതിനുമാണ് ശിക്ഷ ശക്തമാക്കിയിരിക്കുന്നത്.
ഖിസാസ് ഒഴിവാക്കിയെന്ന കാരണത്താൽ മറ്റൊരു കുറ്റവുമായി ബന്ധപ്പെട്ട വധശിക്ഷാ സാധ്യത എല്ലാ സാഹചര്യങ്ങളിലും സ്വമേധയാ ഇല്ലാതാകില്ലെന്നും നിയമവിദഗ്ധൻ വ്യക്തമാക്കിയതായി റിപ്പോർട്ടിൽ പറയുന്നു.
ആത്മഹത്യാശ്രമവുമായി ബന്ധപ്പെട്ട നിയമത്തിലും മാറ്റം
നിയമഭേദഗതിയിൽ ആത്മഹത്യാശ്രമത്തെ കുറ്റകരമല്ലാതാക്കുന്ന വ്യവസ്ഥയും ഉൾപ്പെടുത്തിയിട്ടുണ്ട്. ശിക്ഷയ്ക്ക് പകരം പ്രതിരോധം, ചികിത്സ, പരിചരണം എന്നിവയ്ക്ക് പ്രാധാന്യം നൽകുന്നതാണ് പുതിയ സമീപനം.
അതേസമയം, ആത്മഹത്യയ്ക്ക് പ്രേരിപ്പിക്കുകയോ സഹായിക്കുകയോ ചെയ്യുന്നവർക്കുള്ള ശിക്ഷ കുറ്റത്തിന്റെ ഫലത്തെ അടിസ്ഥാനമാക്കി നിശ്ചയിക്കും. അത്തരം പ്രവൃത്തികൾ മരണത്തിൽ കലാശിച്ചാൽ അഞ്ച് മുതൽ ഏഴ് വർഷം വരെ തടവുശിക്ഷ ലഭിക്കാമെന്നും റിപ്പോർട്ട് വ്യക്തമാക്കുന്നു.
