ദുബൈ: യുഎഇയിൽ ആത്മഹത്യാശ്രമം കുറ്റകരമല്ലാതാക്കി നിയമത്തിൽ സുപ്രധാന ഭേദഗതി. ഫെഡറൽ ഡിക്രി നിയമത്തിലാണ് പുതിയ മാറ്റം കൊണ്ടുവന്നത്. മാനസികാരോഗ്യ സംരക്ഷണത്തിനും ആത്മഹത്യാ പ്രതിരോധത്തിനും സമയബന്ധിതമായ ചികിത്സയ്ക്കും കൂടുതൽ പ്രാധാന്യം നൽകുന്നതിന്റെ ഭാഗമായാണ് നിയമഭേദഗതിയെന്നാണ് അധികൃതർ വ്യക്തമാക്കുന്നത്.

പുതിയ നിയമം പ്രാബല്യത്തിൽ വന്നതോടെ ആത്മഹത്യയ്ക്ക് ശ്രമിക്കുന്ന വ്യക്തിക്കെതിരെ ക്രിമിനൽ നടപടികളോ പ്രോസിക്യൂഷനോ ഉണ്ടാകില്ല. നിയമനടപടികൾ ഭയന്ന് മാനസികാരോഗ്യ സഹായം തേടുന്നതിൽ നിന്ന് ആളുകൾ പിന്മാറുന്നത് ഒഴിവാക്കുകയും അടിയന്തര വൈദ്യസഹായം ഉറപ്പാക്കുകയുമാണ് ഇതിലൂടെ ലക്ഷ്യമിടുന്നത്.

മറ്റൊരാളെ പ്രേരിപ്പിച്ചാൽ കടുത്ത നടപടി

ആത്മഹത്യാശ്രമം കുറ്റകരമല്ലാതാക്കിയെങ്കിലും മറ്റൊരാളെ ആത്മഹത്യയ്ക്ക് പ്രേരിപ്പിക്കുകയോ സഹായിക്കുകയോ ചെയ്യുന്നവർക്കെതിരെ കർശന ശിക്ഷയാണ് നിയമത്തിൽ വ്യവസ്ഥ ചെയ്തിരിക്കുന്നത്.

പ്രേരണയെ തുടർന്ന് ഒരാൾ ആത്മഹത്യയ്ക്ക് ശ്രമിച്ചെങ്കിലും ഗുരുതരമായ പ്രത്യാഘാതങ്ങൾ ഉണ്ടാകാത്ത സാഹചര്യത്തിൽ തടങ്കലോ പിഴയോ രണ്ടും കൂടിയോ ലഭിക്കാം. ശ്രമത്തെ തുടർന്ന് സ്ഥിരമായ വൈകല്യമോ ഗുരുതര രോഗമോ ഉണ്ടായാൽ 3 മുതൽ 5 വർഷം വരെ തടവും പിഴയും ലഭിക്കും.

കുട്ടികളെ പ്രേരിപ്പിച്ചാൽ കൂടുതൽ ഗുരുതരം

18 വയസ്സിന് താഴെയുള്ള കുട്ടികളെയോ ചിന്താശേഷിയിലും ധാരണാശേഷിയിലും പരിമിതിയുള്ള വ്യക്തികളെയോ ആത്മഹത്യയ്ക്ക് പ്രേരിപ്പിക്കുകയോ സഹായിക്കുകയോ ചെയ്യുന്നത് ഗുരുതര കുറ്റമായാണ് കണക്കാക്കുന്നത്. ഇത്തരം കേസുകളിൽ മനഃപൂർവമായ കൊലപാതകത്തിനോ കൊലപാതകശ്രമത്തിനോ ലഭിക്കുന്ന ശിക്ഷയ്ക്ക് തുല്യമായ ശിക്ഷ നേരിടേണ്ടിവരും.

ആത്മഹത്യാ പ്രേരണക്കുറ്റത്തിന് ശിക്ഷിക്കപ്പെടുന്ന വിദേശ പൗരന്മാരെ യുഎഇയിൽ നിന്ന് നാടുകടത്താനും നിയമത്തിൽ വ്യവസ്ഥയുണ്ട്.

ജീവൻ രക്ഷിച്ചാൽ ശിക്ഷയിൽ ഇളവ്

മറ്റൊരാളെ ആത്മഹത്യയ്ക്ക് പ്രേരിപ്പിച്ച വ്യക്തി പിന്നീട് സ്വമേധയാ ഇടപെട്ട് മരണം സംഭവിക്കുന്നതിന് മുമ്പ് ആ വ്യക്തിയുടെ ജീവൻ വിജയകരമായി രക്ഷിച്ചാൽ, ചില സാഹചര്യങ്ങളിൽ കോടതിക്ക് ശിക്ഷയിൽ നിന്ന് ഒഴിവാക്കാൻ അധികാരമുണ്ട്. എന്നാൽ ഇടപെടലിനിടെ ഇരയ്ക്ക് സ്ഥിരമായ വൈകല്യമോ ഗുരുതരമായ പരുക്കോ സംഭവിച്ചാൽ ഈ ഇളവ് ബാധകമല്ല.

അതേസമയം, ഗുരുതരമായ ക്രിമിനൽ കേസുകളിൽ ഇരയുടെ കുടുംബമോ അനന്തരാവകാശികളോ ‘ഖിസാസ്’ (പ്രതികാര അവകാശം) ഒഴിവാക്കിയാൽ, കുറ്റവാളിക്ക് 15 മുതൽ 20 വർഷം വരെ തടവ് ശിക്ഷ ലഭിക്കുന്ന വ്യവസ്ഥയും ഭേദഗതിയിൽ ഉൾപ്പെടുത്തിയിട്ടുണ്ട്.

ജനങ്ങളുടെ ജീവനും അന്തസ്സും സംരക്ഷിക്കുന്നതിനൊപ്പം നിയമവാഴ്ചയും സാമൂഹിക സുരക്ഷയും ശക്തിപ്പെടുത്തുകയാണ് പുതിയ നിയമഭേദഗതിയുടെ ലക്ഷ്യമെന്ന് യുഎഇ ഭരണകൂടം വ്യക്തമാക്കി.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

വീണ്ടും യുദ്ധം! ബസിനുള്ളിൽ വെന്ത് മരിച്ച് 33 പേർ; കൊടും ക്രൂരത!

UAE October 8, 2026

കിഴക്കൻ യുക്രെയ്നിൽ യാത്രാബസുകൾക്ക് നേരെയുണ്ടായ ആക്രമണത്തിൽ 33 പേർ കൊല്ലപ്പെട്ടതായി റിപ്പോർട്ട്. എട്ട് പേർക്ക് പരിക്കേറ്റു. ക്രാമാറ്റോർസ്ക് നഗരത്തിൽ സാധാരണക്കാർ സഞ്ചരിച്ചിരുന്ന രണ്ട് സിറ്റി ബസുകൾക്ക് നേരെയാണ് ആക്രമണമുണ്ടായത്.

ആക്രമണത്തിൽ ബസുകൾ പൂർണമായും കത്തിയമർന്നു. ബസിനുള്ളിലുണ്ടായിരുന്ന യാത്രക്കാർക്ക് രക്ഷപ്പെടാൻ പോലും കഴിയാത്ത സാഹചര്യമാണ് ഉണ്ടായതെന്നാണ് റിപ്പോർട്ടുകൾ. തീപിടിത്തത്തിൽ നിരവധി പേർ വെന്തുമരിച്ചതായാണ് വിവരം.

സാധാരണക്കാർ സഞ്ചരിച്ചിരുന്ന ബസുകളെ ലക്ഷ്യമിട്ടാണ് ആക്രമണം നടന്നതെന്ന് യുക്രെയ്ൻ അധികൃതർ ആരോപിച്ചു. റഷ്യൻ സൈന്യം ബോധപൂർവം സാധാരണ ജനങ്ങളെ ലക്ഷ്യമിടുകയാണെന്നും അധികൃതർ ആരോപണമുന്നയിച്ചു.

ആക്രമണത്തിന്റെ പശ്ചാത്തലത്തിൽ സംഭവത്തിൽ കൂടുതൽ അന്വേഷണം ആവശ്യപ്പെട്ട് യുക്രെയ്ൻ അധികൃതർ രംഗത്തെത്തിയിട്ടുണ്ട്. യുദ്ധമേഖലയിൽ സാധാരണക്കാരുടെ സുരക്ഷ വീണ്ടും ആശങ്കയിലാക്കുന്നതാണ് ക്രാമാറ്റോർസ്കിലെ സംഭവം.