Kuwait Transfers 8703 Teachers Mid-Semester കുവൈത്ത് സിറ്റി: അധ്യയനവർഷം ആരംഭിച്ച് ഏകദേശം ഒരു മാസം പിന്നിടുന്നതിനിടെ കുവൈത്തിലെ പൊതുവിദ്യാലയങ്ങളിൽ 8,703 അധ്യാപകരെയും വിദ്യാഭ്യാസ മേൽനോട്ട ഉദ്യോഗസ്ഥരെയും സ്ഥലംമാറ്റി. വിദ്യാഭ്യാസ മന്ത്രി ജലാൽ അൽ-തബ്തബായിയുടെ നിർദേശപ്രകാരമാണ് സ്ഥലംമാറ്റ ഉത്തരവുകൾ പുറപ്പെടുവിച്ചത്. ഇതിൽ വിവിധ വിഷയങ്ങളിലെ 8,310 അധ്യാപകരും 393 വിദ്യാഭ്യാസ മേൽനോട്ട ജീവനക്കാരും ഉൾപ്പെടുന്നു.
സ്കൂളുകളിലെ അധ്യാപക വിതരണത്തിലെ അസന്തുലിതാവസ്ഥ പരിഹരിക്കുക, അധ്യാപകരുടെ ജോലിഭാരം കൂടുതൽ നീതിപൂർവമായി ക്രമീകരിക്കുക, ലഭ്യമായ മനുഷ്യവിഭവശേഷി കാര്യക്ഷമമായി വിനിയോഗിക്കുക എന്നിവയാണ് നടപടിയുടെ ലക്ഷ്യമെന്ന് വിദ്യാഭ്യാസ മന്ത്രാലയം വ്യക്തമാക്കി. സ്കൂളുകളിലെ യഥാർഥ ആവശ്യകത, ക്ലാസുകളുടെയും വിദ്യാർഥികളുടെയും എണ്ണം, അധ്യാപകരുടെ ജോലിഭാരം എന്നിവ വിലയിരുത്തിയ ശേഷമാണ് സ്ഥലംമാറ്റം നടപ്പാക്കിയതെന്നും മന്ത്രാലയം അറിയിച്ചു.
എന്നാൽ അധ്യയനവർഷം ആരംഭിച്ച് ഒരു മാസം പിന്നിട്ട ശേഷമുള്ള സ്ഥലംമാറ്റത്തിന്റെ സമയക്രമത്തിനെതിരെ അധ്യാപകരിൽ ഒരു വിഭാഗം രംഗത്തെത്തി. വിദ്യാർഥികൾ നിലവിലെ അധ്യാപകരുമായി പൊരുത്തപ്പെട്ടുകഴിഞ്ഞ സാഹചര്യത്തിൽ അധ്യാപകരെ മാറ്റുന്നത് പഠനത്തെ ബാധിക്കുമെന്നാണ് വിമർശനം. അധ്യയനവർഷം തുടങ്ങുന്നതിന് മുമ്പ് സ്ഥലംമാറ്റം നടപ്പാക്കേണ്ടിയിരുന്നുവെന്നും ചിലർ അഭിപ്രായപ്പെട്ടു.
മന്ത്രാലയത്തിന്റെ കണക്കനുസരിച്ച് അധ്യാപകരുടെ പഴയ സ്കൂളിനും പുതിയ സ്കൂളിനുമിടയിലെ ശരാശരി ദൂരം 11.2 കിലോമീറ്ററാണ്. എന്നാൽ ചില അധ്യാപകർക്ക് ഇതിലും കൂടുതൽ ദൂരത്തേക്കാണ് സ്ഥലംമാറ്റം ലഭിച്ചത്. ഒരു കിൻഡർഗാർട്ടൻ അധ്യാപികയെ ഫഹദ് അൽ-അഹമ്മദിൽ നിന്ന് ഉം അൽ-ഹൈമാനിലേക്ക് 20 കിലോമീറ്ററിലധികം ദൂരത്തേക്ക് മാറ്റിയതായി റിപ്പോർട്ടിൽ പറയുന്നു. മറ്റൊരു അധ്യാപികയെ സബാഹ് അൽ-അഹമ്മദിൽ നിന്ന് വഫ്രയിലേക്ക് 28 കിലോമീറ്ററിലധികം ദൂരത്തേക്കും മാറ്റി.
സ്ഥലംമാറ്റ ഉത്തരവുകളിൽ പ്രതിഷേധിച്ച് ചില അധ്യാപകർ വിദ്യാഭ്യാസ മന്ത്രാലയത്തിലെത്തി. കുടുംബ ഉത്തരവാദിത്തങ്ങൾ, യാത്രാദൂരം, വിദ്യാർഥികളുമായുള്ള നിലവിലെ പഠനക്രമം എന്നിവയെ സ്ഥലംമാറ്റം ബാധിക്കുന്നതായി അധ്യാപകർ ചൂണ്ടിക്കാട്ടി.
അതേസമയം, ഒക്ടോബർ 7 മുതൽ 9 വരെ സ്ഥലംമാറ്റത്തിനെതിരെ ഓൺലൈനായി അപ്പീൽ നൽകാൻ മന്ത്രാലയം അവസരം നൽകിയിട്ടുണ്ട്. ഒക്ടോബർ 6ന് പുറപ്പെടുവിച്ച സ്ഥലംമാറ്റ ഉത്തരവുകൾ ബാധിച്ച ജീവനക്കാർക്ക് അപ്പീൽ നൽകാനും അപേക്ഷയുടെ നില ഓൺലൈനായി പരിശോധിക്കാനും കഴിയും. പുതിയ സ്കൂളുകളിൽ മൂന്ന് പ്രവൃത്തി ദിവസത്തിനുള്ളിൽ ജോലിയിൽ പ്രവേശിക്കണമെന്നും മന്ത്രാലയം അറിയിച്ചു.
