Kuwait drug cases September കുവൈത്ത് സിറ്റി: മയക്കുമരുന്നിനെതിരെ ശക്തമായ നടപടികളുമായി കുവൈത്ത് അധികൃതർ. സെപ്റ്റംബർ മാസത്തിൽ മയക്കുമരുന്നുമായി ബന്ധപ്പെട്ട കേസുകളിൽ 194 പ്രവാസികളെ നാടുകടത്തിയതായി റിപ്പോർട്ട്.
സെപ്റ്റംബർ 1 മുതൽ 30 വരെയുള്ള കണക്കുകൾ പ്രകാരം ജനറൽ ഡയറക്ടറേറ്റ് ഓഫ് ഡ്രഗ് കൺട്രോൾ 160 മയക്കുമരുന്ന് കേസുകളാണ് രജിസ്റ്റർ ചെയ്തത്. ഈ കേസുകളിലായി 205 പേർ പ്രതികളായിട്ടുണ്ട്.
മയക്കുമരുന്ന് ഇറക്കുമതി, കടത്ത്, ഉപയോഗം തുടങ്ങിയ കുറ്റങ്ങളുമായി ബന്ധപ്പെട്ട 141 കേസുകളിൽ 189 പേർ ഉൾപ്പെട്ടിരുന്നു. കൂടാതെ, 15 മയക്കുമരുന്ന് മിസ്ഡിമീനർ കേസുകളിലായി 16 പേർക്കെതിരെയും നടപടി സ്വീകരിച്ചു.
വൻതോതിൽ മയക്കുമരുന്ന് പിടികൂടി
അധികൃതർ നടത്തിയ പരിശോധനകളിൽ വൻതോതിൽ മയക്കുമരുന്നുകളും പിടിച്ചെടുത്തു. ഏകദേശം 7.25 ലക്ഷം സൈക്കോട്രോപിക് ഗുളികകൾ, 244.62 കിലോഗ്രാം ക്രിസ്റ്റൽ മെത്ത്, 14.495 കിലോഗ്രാം ഹാഷിഷ്, 5.159 കിലോഗ്രാം ഹെറോയിൻ, 305 ഗ്രാം കൊക്കെയ്ൻ എന്നിവയാണ് പിടിച്ചെടുത്തത്.
ഇതിന് പുറമെ ലിറിക്ക പൗഡർ, മരിജുവാന, വിവിധ കെമിക്കൽ ഡ്രഗുകൾ എന്നിവയും പരിശോധനകളിൽ കണ്ടെത്തി.
52 പരാതികളും പരിശോധിച്ചു
മയക്കുമരുന്ന് ഉപയോഗവുമായി ബന്ധപ്പെട്ട 52 പരാതികളും സെപ്റ്റംബർ മാസത്തിൽ അധികൃതർ കൈകാര്യം ചെയ്തു. ലഹരിക്കേസുകളുമായി ബന്ധപ്പെട്ട അന്വേഷണത്തിനിടെ നിരവധി ആയുധങ്ങളും പിടിച്ചെടുത്തതായി റിപ്പോർട്ടിൽ പറയുന്നു.
ഷോട്ട്ഗൺ, കലാഷ്നിക്കോവ് റൈഫിൾ, നാല് പിസ്റ്റളുകൾ, എയർ റൈഫിൾ എന്നിവയും പിടിച്ചെടുത്തവയിൽ ഉൾപ്പെടുന്നു.
മയക്കുമരുന്ന് കടത്ത്, വിൽപ്പന, ഉപയോഗം എന്നിവ തടയുന്നതിനായി കുവൈത്ത് അധികൃതർ പരിശോധനകളും നിയമനടപടികളും ശക്തമായി തുടരുന്നതിനിടെയാണ് സെപ്റ്റംബർ മാസത്തെ കണക്കുകൾ പുറത്തുവന്നത്.
