Qatar CPD requirements for nurses and pharmacists ദോഹ: ഖത്തറിൽ ലൈസൻസുള്ള നഴ്‌സുമാർ, ഫാർമസിസ്റ്റുകൾ, മറ്റ് ആരോഗ്യ മേഖലാ പ്രൊഫഷണലുകൾ എന്നിവർക്കുള്ള ദേശീയ തുടർച്ചയായ പ്രൊഫഷണൽ വികസന (CPD) പദ്ധതിയുടെ നിബന്ധനകളിൽ മാറ്റം വരുത്തി. ഖത്തർ പൊതുജനാരോഗ്യ മന്ത്രാലയത്തിന് കീഴിലെ ഹെൽത്ത്‌കെയർ പ്രൊഫഷനൽ ലൈസൻസിങ് വിഭാഗമാണ് പുതിയ നിർദേശങ്ങൾ പുറത്തിറക്കിയത്.

2026 ഒക്ടോബർ 1 മുതൽ പുതിയ CPD നിബന്ധനകൾ ബാധകമാകും. പ്രൊഫഷണൽ ലൈസൻസ് നിലനിർത്തുന്നതിന് നഴ്‌സുമാർ, ഫാർമസിസ്റ്റുകൾ, മറ്റ് അനുബന്ധ ആരോഗ്യപ്രവർത്തകർ എന്നിവർ നിശ്ചിത CPD പോയിന്റുകൾ നേടുകയും രേഖപ്പെടുത്തുകയും വേണം.

രണ്ട് വർഷത്തിൽ 40 CPD പോയിന്റ്

പുതിയ നിയമപ്രകാരം രണ്ട് വർഷം നീളുന്ന ഒരു CPD സൈക്കിളിൽ കുറഞ്ഞത് 40 CPD പോയിന്റ് നേടണം.

അതേസമയം, ഓരോ വർഷവും കുറഞ്ഞത് 20 CPD പോയിന്റ് വീതം നേടുകയും രേഖപ്പെടുത്തുകയും വേണം.

വിഭാഗം തിരിച്ചുള്ള പോയിന്റും വേണം

രണ്ട് വർഷത്തെ CPD സൈക്കിളിൽ കുറഞ്ഞത് 20 പോയിന്റ് കാറ്റഗറി 1-ൽ നിന്ന് നേടണം.

ശേഷിക്കുന്ന 20 പോയിന്റ് കാറ്റഗറി 2, കാറ്റഗറി 3 എന്നിവയിൽ ഏതെങ്കിലും രീതിയിൽ നേടാം. അതായത്, കാറ്റഗറി 2, 3 എന്നിവയിൽ നിന്നുള്ള പോയിന്റുകൾ ആവശ്യാനുസരണം സംയോജിപ്പിച്ച് പൂർത്തിയാക്കാം.

ലൈസൻസ് നിലനിർത്തുന്നതിനുള്ള CPD ആവശ്യകതകൾ പാലിക്കുന്നതിനായി ആരോഗ്യപ്രവർത്തകർ അവരുടെ പ്രൊഫഷണൽ വികസന പ്രവർത്തനങ്ങൾ മുൻകൂട്ടി ആസൂത്രണം ചെയ്ത് പൂർത്തിയാക്കണമെന്ന് അധികൃതർ നിർദേശിച്ചു.

ഡോക്ടർമാർക്കും ഡെന്റിസ്റ്റുകൾക്കും മാറ്റമില്ല

അതേസമയം, ഡോക്ടർമാർക്കും ഡെന്റിസ്റ്റുകൾക്കും ബാധകമായ ദേശീയ CPD നിബന്ധനകളിൽ മാറ്റമൊന്നും വരുത്തിയിട്ടില്ല. നിലവിലുള്ള ആവശ്യകതകൾ തന്നെ തുടരും.

പുതുക്കിയ CPD നിബന്ധനകളും നയങ്ങളും നടപടിക്രമങ്ങളും ആരോഗ്യപ്രവർത്തകർക്ക് അവരുടെ ePortfolio അക്കൗണ്ടുകളിലൂടെയും ഹെൽത്ത്‌കെയർ പ്രൊഫഷനൽ ലൈസൻസിങ് വിഭാഗത്തിന്റെ വെബ്സൈറ്റിലെ ‘Health Practitioner Resources’ വിഭാഗത്തിലൂടെയും പരിശോധിക്കാം.

കൂടുതൽ വിവരങ്ങൾക്കായി ബന്ധപ്പെട്ട വിഭാഗവുമായി [email protected] എന്ന ഇ-മെയിൽ വിലാസത്തിലോ +974 44070331 എന്ന ഫോൺ നമ്പറിലോ ബന്ധപ്പെടാം

ഖത്തറിലെ കൂടുതൽ തൊഴിൽ ഒഴിവുകൾ അറിയാൻ ലിങ്ക് ക്ലിക്ക് ചെയ്യുക