ദുബൈ: യുഎഇയിൽ വരാനിരിക്കുന്ന ശൈത്യകാല ഫ്ലൂ സീസൺ മുന്നിൽ കണ്ട് ആരോഗ്യ-പ്രതിരോധ മന്ത്രാലയം (MOHAP) 2026-2027 വർഷത്തേക്കുള്ള സീസണൽ ഇൻഫ്ലുവൻസ ബോധവൽക്കരണ പ്രചാരണം ആരംഭിച്ചു. “സ്വയം സംരക്ഷിക്കുക… നിങ്ങളുടെ സമൂഹത്തെ സംരക്ഷിക്കുക” എന്ന പ്രമേയത്തിലാണ് കാമ്പയിൻ സംഘടിപ്പിക്കുന്നത്. ആറുമാസവും അതിൽ കൂടുതലും പ്രായമുള്ള മുഴുവൻ താമസക്കാരോടും ഫ്ലൂ വാക്സിൻ സ്വീകരിക്കാൻ അധികൃതർ നിർദ്ദേശിക്കുന്നു.

സീസണൽ ഫ്ലൂ അണുബാധ തടയുന്നതിനും ന്യുമോണിയ, ആസ്ത്മ തുടങ്ങിയ രോഗസങ്കീർണതകൾ ഒഴിവാക്കുന്നതിനും പ്രതിവർഷമുള്ള ഫ്ലൂ വാക്സിനേഷൻ ഏറെ അത്യാവശ്യമാണെന്ന് ആരോഗ്യ വിദഗ്ധർ ചൂണ്ടിക്കാണിക്കുന്നു. വാക്സിൻ സ്വീകരിച്ച് ഏകദേശം രണ്ടാഴ്ചയ്ക്കുള്ളിൽ ശരീരത്തിൽ ആവശ്യമായ ആന്റിബോഡികൾ രൂപപ്പെടും. ശരത്കാല-ശീതകാല മാസങ്ങളിൽ ഫ്ലൂ വ്യാപിക്കുന്നത് തടയാൻ സെപ്റ്റംബർ, ഒക്ടോബർ മാസങ്ങളാണ് വാക്സിനേഷന് ഏറ്റവും അനുയോജ്യം.

6 മാസം മുതൽ 5 വയസ്സ് വരെയുള്ള കുട്ടികൾ, 65 വയസ്സിന് മുകളിലുള്ള മുതിർന്ന പൗരന്മാർ, ഗർഭിണികൾ, പ്രമേഹവും ഹൃദ്രോഗവും ഉൾപ്പെടെയുള്ള വിട്ടുമാറാത്ത രോഗങ്ങളുള്ളവർ, ആരോഗ്യ പ്രവർത്തകർ എന്നിവർ നിർബന്ധമായും വാക്സിൻ സ്വീകരിക്കണമെന്ന് അധികൃതർ വ്യക്തമാക്കി. ആറുമാസത്തിൽ താഴെയുള്ള കുഞ്ഞുങ്ങൾക്ക് വാക്സിൻ നൽകാനാകാത്തതിനാൽ അവരുടെ മാതാപിതാക്കളും പരിചാരകരും വാക്സിനേഷൻ പൂർത്തിയാക്കണമെന്ന് ഡോക്ടർമാർ ഉപദേശിക്കുന്നു.

ദുബൈ ഹെൽത്ത് അതോറിറ്റിയുടെ പ്രാഥമിക ആരോഗ്യ കേന്ദ്രങ്ങൾ വഴി കുറഞ്ഞ നിരക്കിൽ വാക്സിൻ ലഭ്യമാണ്. ഇതിനായി DHA ആപ്പ് വഴിയോ dha.gov.ae എന്ന ഔദ്യോഗിക വെബ്‌സൈറ്റ് വഴിയോ യുഎഇ പാസ് (UAE Pass) ഉപയോഗിച്ച് അപ്പോയിന്റ്മെന്റ് ബുക്ക് ചെയ്യാം. പ്രാഥമിക ആരോഗ്യ കേന്ദ്രങ്ങളിൽ ഫ്ലൂ വാക്സിനേഷനായി 50 ദിർഹം + വാറ്റ് (VAT) ആണ് നിരക്ക്.

മുൻകൂട്ടി അപ്പോയിന്റ്മെന്റ് എടുക്കാതെ വാക്ക്-ഇൻ (Walk-in) സേവനം ആഗ്രഹിക്കുന്നവർക്ക് ഡിഎച്ച്എ അംഗീകൃത ‘സ്മാർട്ട് സലീം’ കേന്ദ്രങ്ങൾ തിരഞ്ഞെടുക്കാവുന്നതാണ്. smartsalem.ae എന്ന വെബ്‌സൈറ്റ് വഴി ഓൺലൈനായി 150 ദിർഹം അടച്ച് ബുക്കിംഗ് പൂർത്തിയാക്കിയ ശേഷം സൗകര്യപ്രദമായ സമയത്ത് സ്മാർട്ട് സലീം കേന്ദ്രങ്ങളിലെത്തി വാക്സിൻ സ്വീകരിക്കാവുന്നതാണ്.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

വീഡിയോ കണ്ടിട്ട് വിശ്വസിക്കല്ലേ… എഐ പറയും ഇത് ശരിയാണോ പണിയാണോ!”; വ്യാജ വീഡിയോകൾക്ക് പണി കൊടുക്കാൻ ദുബൈയിൽ ആദ്യ എഐ മോഡൽ

UAE nazia — September 16, 2026 · 0

ദുബൈ: വ്യാജ ഡീപ്ഫേക്ക് വീഡിയോകൾ തിരിച്ചറിയാൻ അത്യാധുനിക ആർട്ടിഫിഷ്യൽ ഇന്റലിജൻസ് (AI) മോഡലുമായി ദുബൈ. ദുബൈ ഇലക്ട്രോണിക് സെക്യൂരിറ്റി സെന്റർ (DESC) വികസിപ്പിച്ച ‘SARAAB’ എന്ന് പേരിട്ടിരിക്കുന്ന ഈ സാങ്കേതികവിദ്യ, മേഖലയിലെ ഒരു സർക്കാർ സ്ഥാപനം വികസിപ്പിക്കുന്ന ആദ്യത്തെ എഐ മോഡലാണ്. 91 ശതമാനം കൃത്യത അവകാശപ്പെടുന്ന ഈ സംവിധാനം ഈ വർഷം അവസാനത്തോടെ പുറത്തിറങ്ങും

വീഡിയോകളിലെ കൃത്രിമത്വം വളരെ എളുപ്പത്തിൽ കണ്ടെത്താൻ ഹീറ്റ് മാപ്പ് (Heat Map) സാങ്കേതികവിദ്യയാണ് SARAAB ഉപയോഗിക്കുന്നത്. വീഡിയോകൾ പൂർണ്ണമായി സ്കാൻ ചെയ്ത്, വ്യാജമായി മാറ്റിയ മുഖഭാഗങ്ങൾ ഇത് വേർതിരിച്ചു കാണിക്കും. രണ്ടു മിനിറ്റ് ദൈർഘ്യമുള്ള ഒരു വീഡിയോയിലെ അവസാന 30 സെക്കൻഡ് മാത്രമാണ് വ്യാജമെങ്കിൽ പോലും, അത് വിശകലനം ചെയ്ത് കൃത്യമായി കണ്ടെത്താൻ ഈ എഐ മോഡലിന് സാധിക്കുമെന്ന് DESC വ്യക്തമാക്കുന്നു.

എക്സ്പോ സിറ്റിയിലെ ദുബൈ എക്സിബിഷൻ സെന്ററിൽ നടക്കുന്ന ‘ഗിസെക് ഗ്ലോബൽ’ (GISEC Global) സൈബർ സുരക്ഷാ പ്രദർശനത്തിന്റെ ആദ്യ ദിനത്തിലാണ് ഡിഇഎസ്സി ഈ നിർണ്ണായക പ്രഖ്യാപനം നടത്തിയത്. ലോകത്തിലെ തന്നെ ഏറ്റവും ഉയർന്ന കൃത്യത നിരക്കുള്ള ഡീപ്ഫേക്ക് ഡിറ്റക്ഷൻ മോഡലുകളിൽ ഒന്നാണ് ഇതെന്നും ഡിഇഎസ്സി സീനിയർ എഐ എക്സിക്യൂട്ടീവ് ഹസ്സൻ മജീദ് അൽഖസ്രാജി പറഞ്ഞു.

പ്രമുഖ ഓപ്പൺ സോഴ്‌സ് പ്ലാറ്റ്‌ഫോമായ ‘ഹഗ്ഗിംഗ് ഫേസ്’ (Hugging Face) വഴിയായിരിക്കും SARAAB ലഭ്യമാക്കുക. ഓപ്പൺ സോഴ്‌സ് പ്ലാറ്റ്‌ഫോം ആയതിനാൽ തന്നെ ഉപയോക്താക്കൾക്കും സാങ്കേതിക വിദഗ്ദ്ധർക്കും ഇതിന്റെ സോഴ്‌സ് കോഡ് പരിശോധിച്ച് ആവശ്യാനുസരണം മാറ്റങ്ങൾ വരുത്താനും കൂടുതൽ മെച്ചപ്പെടുത്താനും സാധിക്കുമെന്നത് ഇതിന്റെ പ്രാധാന്യം വർദ്ധിപ്പിക്കുന്നു.

ഡിജിറ്റൽ ലോകത്ത് അതിവേഗം വർദ്ധിച്ചുവരുന്ന സൈബർ ഭീഷണികൾക്കും വ്യാജ പ്രചാരണങ്ങൾക്കും തടയിടാൻ ഈ പുതിയ പരീക്ഷണത്തിലൂടെ ദുബൈയ്ക്ക് സാധിക്കും. അറബ് മേഖലയിലെ സാങ്കേതിക പുരോഗതിയിലും സൈബർ സുരക്ഷയിലും സുപ്രധാന നാഴികക്കല്ലായാണ് വിദഗ്ദ്ധർ ഈ ചുവടുവെപ്പിനെ കാണുന്നത്.