22 Indians rescued in UAE:ദുബായ്: യുഎഇ തീരത്ത് ഇന്ത്യക്കാർ ജോലി ചെയ്തിരുന്ന എണ്ണക്കപ്പലിന് തീപിടിച്ചതിനെത്തുടർന്ന് 22 ഇന്ത്യൻ ജീവനക്കാരെയും സുരക്ഷിതമായി രക്ഷപ്പെടുത്തി. റാസൽഖൈമ തീരത്തിന് സമീപം എംടി ജെം നമ്പർ 2 (MT GEM No. 2) എന്ന കപ്പലിലാണ് സംഭവം. യുഎഇ നാഷനൽ ഗാർഡിന്റെ കോസ്റ്റ് ഗാർഡ് വിഭാഗമാണ് രക്ഷാപ്രവർത്തനം നടത്തിയത്. കപ്പലിലുണ്ടായിരുന്ന എല്ലാവരും സുരക്ഷിതരാണെന്ന് ദുബായിലെ ഇന്ത്യൻ കോൺസുലേറ്റ് അറിയിച്ചു.
കപ്പലിൽ തീപിടിത്തമുണ്ടായതായി ജീവനക്കാരിൽനിന്ന് വിവരം ലഭിച്ചതിനെത്തുടർന്ന് യുഎഇ കോസ്റ്റ് ഗാർഡ് അടിയന്തര രക്ഷാപ്രവർത്തനം ആരംഭിക്കുകയായിരുന്നു. ഉടൻതന്നെ സ്ഥലത്തെത്തിയ രക്ഷാസംഘം കപ്പലിലുണ്ടായിരുന്ന 22 പേരെയും സുരക്ഷിതമായി കരയിലെത്തിച്ചു.
രക്ഷപ്പെടുത്തിയവർക്ക് പ്രാഥമിക ചികിത്സ നൽകിയശേഷം ബന്ധപ്പെട്ട അധികൃതർക്ക് കൈമാറി. എല്ലാവരുടെയും ആരോഗ്യനില തൃപ്തികരമാണെന്നാണ് യുഎഇ നാഷനൽ ഗാർഡ് അറിയിച്ചത്.
സംഭവത്തെത്തുടർന്ന് ഇന്ത്യൻ കോൺസുലേറ്റ് യുഎഇ അധികൃതരുമായി ബന്ധപ്പെട്ട് ആവശ്യമായ സഹായങ്ങൾ ഉറപ്പാക്കിയിട്ടുണ്ട്. ഇന്ത്യൻ ജീവനക്കാരുടെ സുരക്ഷയും ക്ഷേമവും നിരീക്ഷിച്ചുവരികയാണെന്നും കോൺസുലേറ്റ് വ്യക്തമാക്കി.
സമുദ്രഗതാഗത മേഖലയിൽ സുരക്ഷാ ആശങ്കകൾ നിലനിൽക്കുന്ന സാഹചര്യത്തിലാണ് ഈ സംഭവം. കപ്പലിലുണ്ടായ തീപിടിത്തത്തിന്റെ പശ്ചാത്തലത്തിൽ സമയബന്ധിതമായി നടത്തിയ രക്ഷാപ്രവർത്തനം 22 ഇന്ത്യൻ ജീവനക്കാരുടെയും ജീവൻ സുരക്ഷിതമാക്കാൻ സഹായിച്ചു.
