ദുബൈ: ഈ വേനൽക്കാലത്ത് യുഎഇയിൽ നിന്നും നാട്ടിലേക്കോ മറ്റ് വിനോദസഞ്ചാര കേന്ദ്രങ്ങളിലേക്കോ യാത്ര പ്ലാൻ ചെയ്യുന്ന കുടുംബങ്ങൾക്ക് വിമാന ടിക്കറ്റ് നിരക്കിൽ വൻ തുക ലാഭിക്കാൻ അവസരം. യാത്ര ചെയ്യുന്ന തീയതികളിൽ ചെറിയ മാറ്റങ്ങൾ വരുത്തിയാൽ നാലംഗങ്ങളുള്ള ഒരു കുടുംബത്തിന് 2,000 ദിർഹത്തിലധികം (ഏകദേശം 45,000 ഇന്ത്യൻ രൂപ) ലാഭിക്കാമെന്ന് പ്രമുഖ ട്രാവൽ സെർച്ച് പ്ലാറ്റ്‌ഫോമായ ‘സ്‌കൈസ്‌കാനർ’ പുറത്തുവിട്ട ഏറ്റവും പുതിയ പഠന റിപ്പോർട്ട് വ്യക്തമാക്കുന്നു.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

യുഎഇയിലെ പ്രവാസികളിൽ 47 ശതമാനം പേരും ഈ വേനൽക്കാലത്തെ തങ്ങളുടെ അവധിക്കാല യാത്രകൾ ഇതുവരെ ബുക്ക് ചെയ്തിട്ടില്ലെന്നും ഇപ്പോഴും മികച്ച യാത്രാ ഓപ്ഷനുകൾക്കായി തിരച്ചിൽ നടത്തുകയാണെന്നും റിപ്പോർട്ടിലുണ്ട്.

ഓഗസ്റ്റ് 31 മുതൽ നിരക്കുകൾ കുത്തനെ കുറയും

പല യാത്രക്കാരും വിശ്വസിക്കുന്നത് ജൂലൈ മാസത്തിലാണ് ഏറ്റവും കുറഞ്ഞ നിരക്കിൽ വിമാന ടിക്കറ്റുകൾ ലഭ്യമാകുക എന്നാണ്. എന്നാൽ, യാഥാർത്ഥ്യം മറ്റൊന്നാണെന്ന് സ്‌കൈസ്‌കാനർ ഡാറ്റ വ്യക്തമാക്കുന്നു. സ്കൂൾ അവധികൾ അവസാനിക്കാറാകുന്ന ഓഗസ്റ്റ് 31-ന് ആരംഭിക്കുന്ന ആഴ്ചയാണ് വേനൽക്കാലത്ത് വിമാനത്തിൽ പറക്കാൻ ഏറ്റവും ചെലവ് കുറഞ്ഞ കാലയളവ്. ഈ സമയത്ത് ടിക്കറ്റ് ബുക്ക് ചെയ്യുന്നതിലൂടെ വലിയൊരു തുക ലാഭിക്കാൻ സാധിക്കും.

വിവിധ ജനപ്രിയ റൂട്ടുകളിലെ ശരാശരി നിരക്കുകളും, ഏറ്റവും കുറഞ്ഞ നിരക്ക് ലഭ്യമാകുന്ന ആഴ്ചയും താഴെ നൽകുന്നു.

ലക്ഷ്യസ്ഥാനം	ഏറ്റവും കുറഞ്ഞ നിരക്കുള്ള ആഴ്ച	കുറഞ്ഞ നിരക്ക് (AED)	ശരാശരി നിരക്ക് (AED)	ഒരു വ്യക്തിക്ക് ലഭിക്കുന്ന ലാഭം (AED	നാലംഗ കുടുംബത്തിന് ലഭിക്കുന്ന ആകെ ലാഭം (AED)
കൊച്ചി	ഓഗസ്റ്റ് 31	1,197	1,553	356	1,425
കെയ്‌റോ	ഓഗസ്റ്റ് 17	1,105	1,592	487	1,949
ടോക്കിയോ	ഓഗസ്റ്റ് 31	1,686	2,209	522	2,088
ഡെൻപസർ	ഓഗസ്റ്റ് 24	1,680	2,111	431	1,722

തീയതികളിൽ മാറ്റം വരുത്താൻ തയ്യാറാണോ?

റിപ്പോർട്ടുകൾ പ്രകാരം യുഎഇ യാത്രക്കാർ അന്താരാഷ്ട്ര വേനൽക്കാല വിമാന സർവീസുകൾക്കായി ഒരാൾക്ക് ശരാശരി 1,433 ദിർഹം വരെ ചെലവഴിക്കാൻ തയ്യാറാണ്. എന്നാൽ, 33 ശതമാനം പേർ മാത്രമാണ് തങ്ങളുടെ യാത്രാ തീയതികളിൽ മാറ്റം വരുത്താൻ തയ്യാറായിട്ടുള്ളത്. സ്കൂൾ കലണ്ടറുകളും കൃത്യമായ പ്ലാനിംഗും കാരണമാണ് പലർക്കും തീയതികൾ മാറ്റാൻ കഴിയാത്തത്.

“മികച്ച ഡീലുകൾ കണ്ടെത്താനായി യാത്രക്കാർ തങ്ങളുടെ പ്രിയപ്പെട്ട ലക്ഷ്യസ്ഥാനങ്ങൾ മാറ്റേണ്ട ആവശ്യമില്ല. പകരം, വ്യത്യസ്തമായ തീയതികളിലെ നിരക്കുകൾ പരിശോധിക്കുകയും കുറഞ്ഞ നിരക്കുള്ള ആഴ്ചകൾ തിരഞ്ഞെടുക്കുകയും ചെയ്താൽ വലിയൊരു തുക ലാഭിക്കാം. ഈ തുക താമസ സൗകര്യങ്ങൾക്കോ അവധിക്കാലത്തെ മറ്റ് ആസ്വാദനങ്ങൾക്കോ ഉപയോഗിക്കാം.” സ്കൈസ്കാനറിലെ യാത്രാവിദ​ഗ്ധനായ അയൂബ് എൽ മാമൂൺ വ്യക്തമാക്കി.

ഡിമാൻഡും സീറ്റുകളുടെ ലഭ്യതയും അനുസരിച്ച് വിമാന നിരക്കുകളിൽ എപ്പോൾ വേണമെങ്കിലും മാറ്റങ്ങൾ വരാം. അതിനാൽ ടിക്കറ്റ് ഉറപ്പിക്കുന്നതിന് മുൻപ് വിമാന നിരക്കുകൾ പതിവായി താരതമ്യം ചെയ്യാനും ഓരോ മാസത്തെയും ഓപ്ഷനുകൾ പരിശോധിക്കാനും ട്രാവൽ വിദഗ്ദ്ധർ യാത്രക്കാരോട് നിർദ്ദേശിക്കുന്നു.

യുഎഇയിൽ ‘ജയ്‌വാൻ’ കാർഡുകളുടെ വിതരണം ആരംഭിച്ചു; ഉപഭോക്താക്കളെ കാത്തിരിക്കുന്നത് വൻ ഓഫറുകളും ആനുകൂല്യങ്ങളും

അബുദബി: യുഎഇയുടെ ആദ്യത്തെ ദേശീയ പേയ്‌മെന്റ് കാർഡായ ‘ജയ്‌വാൻ’ (Jaywan) രാജ്യത്തുടനീളമുള്ള ബാങ്കുകളും ധനകാര്യ സ്ഥാപനങ്ങളും ലൈസൻസുള്ള എക്സ്ചേഞ്ച് കമ്പനികളും വഴി ഉപഭോക്താക്കൾക്ക് വിതരണം ചെയ്യാൻ തുടങ്ങി. യുഎഇ വൈസ് പ്രസിഡന്റും ഉപപ്രധാനമന്ത്രിയും സെൻട്രൽ ബാങ്ക് ഡയറക്ടർ ബോർഡ് ചെയർമാനുമായ ശൈഖ് മൻസൂർ ബിൻ സായിദ് അൽ നഹ്യാനാണ് പദ്ധതിക്ക് തുടക്കം കുറിച്ചത്.

വരും മാസങ്ങളിൽ കൂടുതൽ സ്ഥാപനങ്ങൾ വഴി ഘട്ടം ഘട്ടമായി കാർഡുകൾ പൂർണ്ണതോതിൽ വിപണിയിലെത്തിക്കാനാണ് സാമ്പത്തിക മന്ത്രാലയത്തിന്റെ തീരുമാനം. യുഎഇ സെൻട്രൽ ബാങ്ക് ഗവർണർ ഉൾപ്പെടെയുള്ള മുതിർന്ന ഉദ്യോഗസ്ഥരുടെ സാന്നിധ്യത്തിലായിരുന്നു പ്രഖ്യാപനം.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

ഡിജിറ്റൽ യുഗത്തിലെ നാഴികക്കല്ല്

രാജ്യത്തിന്റെ പേയ്‌മെന്റ് അടിസ്ഥാന സൗകര്യങ്ങൾ കൂടുതൽ കാര്യക്ഷമവും സുരക്ഷിതവുമാക്കുക എന്ന ലക്ഷ്യത്തോടെയാണ് ജയ്‌വാൻ കാർഡുകൾ അവതരിപ്പിച്ചിരിക്കുന്നത്. ദേശീയ സാമ്പത്തിക മുൻഗണനകളുമായി പൊരുത്തപ്പെടുന്ന ഈ പേയ്‌മെന്റ് സംവിധാനം, യുഎഇയുടെ ഡിജിറ്റൽ പരിവർത്തന യാത്രയിലെ ഒരു നിർണായക നാഴികക്കല്ലായാണ് വിലയിരുത്തപ്പെടുന്നത്

കാർഡിന്റെ പ്രധാന സവിശേഷതകളും ആനുകൂല്യങ്ങളും

എല്ലായിടത്തും സ്വീകാര്യത: കടകളിലെ പോയിന്റ്-ഓഫ്-സെയിൽ (POS) ടെർമിനലുകൾ, ഇ-കോമേഴ്‌സ് പ്ലാറ്റ്‌ഫോമുകൾ, എടിഎമ്മുകൾ, ഡിജിറ്റൽ വാലറ്റുകൾ എന്നിവയിലെല്ലാം ജയ്‌വാൻ കാർഡുകൾ സ്വീകരിക്കും.

സ്മാർട്ട് ഫീച്ചറുകൾ: കോൺടാക്റ്റ്‌ലെസ് പേയ്‌മെന്റുകൾ, ഓൺലൈൻ പർച്ചേസുകൾ, പണം പിൻവലിക്കലുകൾ എന്നിവ വളരെ സുരക്ഷിതമായി ഈ കാർഡ് വഴി നടത്താം.

ആഭ്യന്തര-അന്തർദേശീയ ഉപയോഗം: പ്രാദേശിക പേയ്‌മെന്റുകൾക്ക് പുറമേ, നിശ്ചിത മാനദണ്ഡങ്ങൾക്കും നിയന്ത്രണങ്ങൾക്കും വിധേയമായി വിദേശ രാജ്യങ്ങളിലും ഈ കാർഡുകൾ ഉപയോഗിക്കാൻ സാധിക്കും.

തകർപ്പൻ ഓഫറുകൾ: യാത്ര, ഷോപ്പിംഗ്, ഹോസ്പിറ്റാലിറ്റി, ലൈഫ്‌സ്റ്റൈൽ എന്നീ മേഖലകളിലെ പ്രമുഖ ബ്രാൻഡുകളുമായി സഹകരിച്ച് ആകർഷകമായ ഓഫറുകളും പ്രത്യേക ആനുകൂല്യങ്ങളുമാണ് കാർഡ് ഉടമകൾക്കായി ഒരുക്കിയിരിക്കുന്നത്.

സുരക്ഷിതവും സംയോജിതവുമായ ഒരു ഡിജിറ്റൽ പേയ്‌മെന്റ് അനുഭവം നൽകുന്നതിലൂടെ ഉപഭോക്താക്കൾക്ക് കൂടുതൽ ആത്മവിശ്വാസത്തോടെ സാമ്പത്തിക ഇടപാടുകൾ നടത്താൻ ജയ്‌വാൻ വഴിയൊരുക്കുമെന്നാണ് വിപണിയിലെ പ്രതീക്ഷ.