Qatar weather warning ദോഹ: ഖത്തറിന്റെ തീരപ്രദേശങ്ങളിലും കടലിലും ശക്തമായ കാറ്റിനും ഉയർന്ന തിരമാലകൾക്കും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ഇന്ന് രാത്രി മുതൽ വ്യാഴാഴ്ച രാവിലെ 6 മണിവരെ ഈ സാഹചര്യങ്ങൾ തുടരാനാണ് സാധ്യത.തീരപ്രദേശങ്ങളിൽ വടക്കുപടിഞ്ഞാറൻ ദിശയിൽ നിന്ന് മണിക്കൂറിൽ 5 മുതൽ 15 നോട്ട് വരെ വേഗത്തിൽ കാറ്റ് വീശും. ചില സമയങ്ങളിൽ കാറ്റിന്റെ വേഗത 25 നോട്ട് വരെ ഉയരാൻ സാധ്യതയുണ്ടെന്ന് അധികൃതർ അറിയിച്ചു.

കടലിൽ കാറ്റിന്റെ വേഗത 10 മുതൽ 20 നോട്ട് വരെയായിരിക്കുമെന്നും ചില സമയങ്ങളിൽ ഇത് 27 നോട്ട് വരെ ശക്തമാകാമെന്നും മുന്നറിയിപ്പിൽ പറയുന്നു.തീരത്ത് തിരമാലകളുടെ ഉയരം സാധാരണയായി 2 മുതൽ 4 അടി വരെയായിരിക്കും. ചില സ്ഥലങ്ങളിൽ ഇത് 5 അടി വരെ ഉയരാൻ സാധ്യതയുണ്ട്. കടലിൽ തിരമാലകൾ 3 മുതൽ 6 അടി വരെയും ചില സമയങ്ങളിൽ 8 അടി വരെയും ഉയരാമെന്നും കാലാവസ്ഥാ വകുപ്പ് വ്യക്തമാക്കി.

തീരത്തും കടലിലും ദൃശ്യപരത 5 മുതൽ 10 കിലോമീറ്റർ വരെയായിരിക്കും. ദോഹയിൽ ഇന്ന് രാത്രിയിലെ ഏറ്റവും കുറഞ്ഞ താപനില 33 ഡിഗ്രി സെൽഷ്യസായി രേഖപ്പെടുത്തുമെന്നാണ് പ്രവചനം.അതേസമയം, വിവിധ തീരപ്രദേശങ്ങളിലെ വേലിയേറ്റ സമയങ്ങളും കാലാവസ്ഥാ വകുപ്പ് പുറത്തുവിട്ടിട്ടുണ്ട്. മത്സ്യത്തൊഴിലാളികളും ബോട്ടുടമകളും കടലിൽ പോകുന്നവരും ഏറ്റവും പുതിയ കാലാവസ്ഥാ മുന്നറിയിപ്പുകൾ ശ്രദ്ധിച്ച് ആവശ്യമായ മുൻകരുതലുകൾ സ്വീകരിക്കണമെന്ന് അധികൃതർ നിർദേശിച്ചു.

നാളെ പുലർച്ചെ 4:50-നാണ് സൂര്യോദയം പ്രതീക്ഷിക്കുന്നത്.

അമിതവേഗവും ക്രമരഹിത പാർക്കിങ്ങും; ഡെലിവറി ബൈക്കുകൾക്കെതിരെ ഖത്തറിൽ വ്യാപക പരാതി

Qatar Greeshma Staff Editor — July 8, 2026 · 0 Comment

Qatar delivery bike traffic violations ദോഹ: രാജ്യത്ത് ഡെലിവറി സേവനങ്ങൾ വ്യാപകമായതോടെ ചില ഡെലിവറി മോട്ടോർസൈക്കിൾ ഡ്രൈവർമാരുടെ നിയമലംഘനങ്ങൾ വർധിക്കുന്നതായി പൗരന്മാർ. അശ്രദ്ധമായ ഡ്രൈവിങ്ങും ക്രമരഹിതമായ പാർക്കിങ്ങും ഗതാഗതക്കുരുക്കിനും അപകടസാധ്യതയ്ക്കും കാരണമാകുന്നതായി അവർ ചൂണ്ടിക്കാട്ടി.

ഡെലിവറി കമ്പനികൾ സമൂഹത്തിന് നൽകുന്ന സേവനം വിലപ്പെട്ടതാണെങ്കിലും ട്രാഫിക് നിയമങ്ങൾ പാലിക്കേണ്ടത് എല്ലാവരുടെയും ഉത്തരവാദിത്തമാണെന്ന് പൗരന്മാർ വ്യക്തമാക്കി. നിയമങ്ങൾ ലംഘിക്കുന്നവർക്കെതിരെ ആഭ്യന്തര മന്ത്രാലയത്തിന്റെ ട്രാഫിക് വിഭാഗം കൂടുതൽ പരിശോധനയും കർശന നടപടിയും സ്വീകരിക്കണമെന്നും അവർ ആവശ്യപ്പെട്ടു.

മോട്ടോർസൈക്കിളുകൾ നിശ്ചിത പാതയിലൂടെ മാത്രമേ സഞ്ചരിക്കാവൂ എന്ന നിർദേശം ആഭ്യന്തര മന്ത്രാലയം നേരത്തെ നൽകിയിരുന്നെങ്കിലും ചില ഡ്രൈവർമാർ ഇപ്പോഴും അത് പാലിക്കുന്നില്ലെന്നാണ് പരാതി. വാഹനങ്ങൾക്കിടയിലൂടെ അപകടകരമായി സഞ്ചരിക്കൽ, ഇരുവശത്തുകൂടിയും വാഹനങ്ങളെ മറികടക്കൽ, പെട്ടെന്ന് പാത മാറൽ തുടങ്ങിയ പ്രവണതകൾ അപകട സാധ്യത വർധിപ്പിക്കുന്നതായി പൗരന്മാർ പറഞ്ഞു.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

പാർക്കിങ് പ്രശ്നവും രൂക്ഷം

ഡെലിവറി ബൈക്കുകൾ റെസ്റ്റോറന്റുകൾക്കും വ്യാപാര സ്ഥാപനങ്ങൾക്കും മുന്നിലെ പാർക്കിങ് സ്ഥലങ്ങൾ കൈയേറുന്നതും വലിയ പ്രശ്നമായി മാറിയിട്ടുണ്ട്. പ്രത്യേകിച്ച് തിരക്കേറിയ സമയങ്ങളിൽ ഇത് മറ്റ് വാഹനങ്ങൾക്ക് പാർക്കിങ് കണ്ടെത്തുന്നത് ബുദ്ധിമുട്ടാക്കുന്നുവെന്ന് അവർ ചൂണ്ടിക്കാട്ടി.

ചില ഷോപ്പിങ് മാളുകളിൽ ഡെലിവറി ബൈക്കുകൾക്കായി പ്രത്യേക പാർക്കിങ് സംവിധാനം ഒരുക്കിയിട്ടുണ്ടെന്നും ഇത് വിജയകരമാണെന്നും വിവിധ വ്യാപാര മേഖലകളിലും ഇത്തരം സംവിധാനം നടപ്പാക്കണമെന്ന് ആവശ്യപ്പെട്ടു.

അമിതവേഗവും അപകടകരമായ ഡ്രൈവിങ്ങും

കുറഞ്ഞ സമയത്തിനുള്ളിൽ കൂടുതൽ ഓർഡറുകൾ വിതരണം ചെയ്യാനുള്ള ശ്രമമാണ് ചില ഡ്രൈവർമാരെ അമിതവേഗത്തിലും അപകടകരമായ രീതിയിലും വാഹനമോടിക്കാൻ പ്രേരിപ്പിക്കുന്നതെന്ന് പൗരന്മാർ അഭിപ്രായപ്പെട്ടു. പെട്ടെന്ന് പാതമാറ്റൽ, വാഹനങ്ങളെ അപകടകരമായി മറികടക്കൽ, ചിലപ്പോൾ നടപ്പാതകളിലൂടെ പോലും സഞ്ചരിക്കൽ തുടങ്ങിയ പ്രവൃത്തികൾ റോഡ് സുരക്ഷയ്ക്ക് വലിയ ഭീഷണിയാണെന്നും അവർ പറഞ്ഞു.

ബോധവൽക്കരണവും പരിശോധനയും ശക്തമാക്കണം

ട്രാഫിക് നിയമങ്ങൾ പാലിക്കേണ്ടത് എല്ലാ റോഡ് ഉപയോക്താക്കളുടെയും ഉത്തരവാദിത്തമാണെന്ന് പൗരന്മാർ ഓർമ്മിപ്പിച്ചു. നിയമലംഘനങ്ങൾ തടയാൻ ട്രാഫിക് പരിശോധനകൾ ശക്തമാക്കുകയും ഡെലിവറി കമ്പനികൾ ഡ്രൈവർമാർക്ക് റോഡ് സുരക്ഷയെക്കുറിച്ച് കൂടുതൽ പരിശീലനവും ബോധവൽക്കരണവും നൽകുകയും വേണമെന്ന് അവർ ആവശ്യപ്പെട്ടു.

ഡെലിവറി സേവനങ്ങളുടെ വളർച്ചയ്‌ക്കൊപ്പം റോഡ് സുരക്ഷയും പൊതുജനങ്ങളുടെ സൗകര്യവും ഉറപ്പാക്കാൻ അധികൃതരും കമ്പനികളും ചേർന്ന് കൂടുതൽ ഫലപ്രദമായ നടപടികൾ സ്വീകരിക്കണമെന്നാണ് പൊതുവായ ആവശ്യം.

 വേനൽ യാത്ര പ്ലാൻ ചെയ്യുന്നവർക്ക് സന്തോഷവാർത്ത; ഖത്തർ എയർവേയ്‌സിൽ വമ്പൻ ഡിസ്കൗണ്ട്

Qatar Greeshma Staff Editor — July 7, 2026 · 0 Comment

Qatar Airways summer sale ദോഹ: യാത്രക്കാർക്കായി പുതിയ വേനൽക്കാല ഓഫറുമായി ഖത്തർ എയർവേയ്‌സ്. ഇക്കണോമി ക്ലാസ് ടിക്കറ്റുകൾക്ക് 20 ശതമാനം വരെ കിഴിവും, PCQA26 എന്ന പ്രൊമോ കോഡ് ഉപയോഗിച്ച് ബുക്ക് ചെയ്യുന്നവർക്ക് 2,000 Avios റിവാർഡ് പോയിന്റ് വരെ നേടാനുള്ള അവസരവും കമ്പനി പ്രഖ്യാപിച്ചു. വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

ഈ ഓഫറിന്റെ ബുക്കിംഗ് കാലാവധി 2026 ജൂലൈ 5 മുതൽ 11 വരെയാണ്. ഓഫർ പ്രകാരമുള്ള യാത്ര 2026 ജൂലൈ 11 മുതൽ സെപ്റ്റംബർ 30 വരെ നടത്താം.ദോഹയിൽ നിന്ന് ഖത്തർ എയർവേയ്‌സിന്റെ വിവിധ അന്താരാഷ്ട്ര സർവീസുകൾക്കാണ് ഓഫർ ബാധകം. എന്നാൽ ബെയ്റൂട്ടിലേക്കുള്ള മിഡിൽ ഈസ്റ്റ് എയർലൈൻസ് സർവീസുകളും അമ്മാനിലേക്കുള്ള റോയൽ ജോർദാനിയൻ സർവീസുകളും ഈ ഓഫറിൽ ഉൾപ്പെടുന്നില്ല.

ഈ ആനുകൂല്യം ഇക്കണോമി ക്ലാസ് റിട്ടേൺ ടിക്കറ്റുകൾക്ക് മാത്രമാണ് ലഭിക്കുക. സീറ്റുകളുടെ ലഭ്യതയെ ആശ്രയിച്ചായിരിക്കും ബുക്കിംഗ് അനുവദിക്കുക.ചില റൂട്ടുകളിൽ 2026 ഓഗസ്റ്റ് 16 മുതൽ സെപ്റ്റംബർ 5 വരെ, ഒക്ടോബർ 30, 31, കൂടാതെ 2027 ജനുവരി 8 മുതൽ 10 വരെ യാത്രാ നിയന്ത്രണ തീയതികളും കമ്പനി പ്രഖ്യാപിച്ചിട്ടുണ്ട്.

കിഴിവ് അടിസ്ഥാന ടിക്കറ്റ് നിരക്കിന് (Base Fare) മാത്രമേ ബാധകമാകൂ. നികുതികൾ, സേവന നിരക്കുകൾ, മറ്റ് ഫീസുകൾ എന്നിവയ്ക്ക് ഇളവ് ലഭിക്കില്ല.ടിക്കറ്റ് മറ്റൊരാൾക്ക് കൈമാറാനോ മറ്റ് എയർലൈനുകളിൽ ഉപയോഗിക്കാനോ കഴിയില്ല. യാത്രാ തീയതി മാറ്റം, റദ്ദാക്കൽ, നോ-ഷോ എന്നിവയ്ക്ക് ബുക്കിംഗ് സമയത്തെ ടിക്കറ്റ് നിബന്ധനകൾ അനുസരിച്ചുള്ള ചാർജുകൾ ബാധകമായിരിക്കും.ഓഫർ മുൻകൂർ അറിയിപ്പില്ലാതെ അവസാനിപ്പിക്കാനോ മാറ്റങ്ങൾ വരുത്താനോ ഖത്തർ എയർവേയ്‌സിന് അവകാശമുണ്ടെന്നും കമ്പനി അറിയിച്ചു.

പഞ്ചസാര കൂടുംതോറും നികുതിയും കൂടും; ഖത്തറിൽ പുതിയ നിയമം നിലവിൽ വന്നു

Qatar Greeshma Staff Editor — July 7, 2026 · 0 Comment

Qatar sugar tax ദോഹ: പഞ്ചസാരയുടെ അളവിനെ അടിസ്ഥാനമാക്കി മധുരമുള്ള പാനീയങ്ങൾക്ക് പുതിയ സെലക്ടീവ് എക്സൈസ് നികുതി സംവിധാനം ഖത്തറിൽ തിങ്കളാഴ്ച, 2026 ജൂലൈ 6 മുതൽ പ്രാബല്യത്തിൽ വന്നു.പാനീയങ്ങളാക്കി ഉപയോഗിക്കാവുന്ന കോൺസെൻട്രേറ്റുകൾ, പൊടികൾ, സത്തുകൾ, മറ്റ് സമാന ഉൽപ്പന്നങ്ങൾ എന്നിവ ഉൾപ്പെടെ പഞ്ചസാരയോ മധുരപലഹാരങ്ങളോ അടങ്ങിയ എല്ലാ ഉൽപ്പന്നങ്ങളും പുതിയ നിയമത്തിന്റെ പരിധിയിൽ വരും.

ആരോഗ്യകരമായ ഭക്ഷണശീലങ്ങൾ പ്രോത്സാഹിപ്പിക്കാനും ഉപഭോക്താക്കളെ കുറഞ്ഞ പഞ്ചസാരയുള്ള ഉൽപ്പന്നങ്ങൾ തിരഞ്ഞെടുക്കാൻ പ്രേരിപ്പിക്കാനുമാണ് പുതിയ നികുതി സംവിധാനത്തിന്റെ ലക്ഷ്യം.

ജനറൽ അതോറിറ്റി ഫോർ ടാക്സ് വ്യക്തമാക്കിയതനുസരിച്ച്, ഓരോ 100 മില്ലി ലിറ്ററിലും അടങ്ങിയിരിക്കുന്ന പഞ്ചസാരയുടെ അളവാണ് നികുതി കണക്കാക്കുന്നതിനുള്ള മാനദണ്ഡം. പഞ്ചസാരയുടെ അളവ് കൂടുന്നതനുസരിച്ച് നികുതിയും വർധിക്കും. പഞ്ചസാര കുറവാണെങ്കിൽ നികുതിയും കുറയും.

പുതിയ നികുതി നിരക്കുകൾ

• 100 മില്ലിക്ക് 8 ഗ്രാം അല്ലെങ്കിൽ അതിൽ കൂടുതൽ പഞ്ചസാര ഉള്ള പാനീയങ്ങൾക്ക് ലിറ്ററിന് 1.06 ഖത്തർ റിയാൽ നികുതി.
• 100 മില്ലിക്ക് 5 മുതൽ 7.99 ഗ്രാം വരെ പഞ്ചസാര ഉള്ള പാനീയങ്ങൾക്ക് ലിറ്ററിന് 0.77 ഖത്തർ റിയാൽ നികുതി.
• 100 മില്ലിക്ക് 5 ഗ്രാമിൽ താഴെ പഞ്ചസാര ഉള്ള പാനീയങ്ങൾക്ക് നികുതിയില്ല.
• കൃത്രിമ മധുരപദാർഥങ്ങൾ (Artificial Sweeteners) ഉപയോഗിച്ചുള്ള ഉൽപ്പന്നങ്ങൾക്കും നിലവിൽ നികുതി ബാധകമല്ല.

ഉയർന്ന പഞ്ചസാര അടങ്ങിയ പാനീയങ്ങളുടെ ഉപയോഗം കുറയ്ക്കുകയും നിർമ്മാതാക്കളെ ഉൽപ്പന്നങ്ങളിലെ പഞ്ചസാരയുടെ അളവ് കുറയ്ക്കാൻ പ്രോത്സാഹിപ്പിക്കുകയും ചെയ്യുന്നതിനൊപ്പം പൊതുജനാരോഗ്യം മെച്ചപ്പെടുത്തുകയുമാണ് ഈ നടപടിയിലൂടെ ഖത്തർ ലക്ഷ്യമിടുന്നത്.

ഓൺലൈനിൽ സാധനങ്ങൾ വാങ്ങുന്നുണ്ടോ? സ്വകാര്യ വിവരങ്ങൾ സംരക്ഷിക്കാൻ ഖത്തർ മന്ത്രാലയത്തിന്റെ മൂന്ന് മുന്നറിയിപ്പ്

Qatar Greeshma Staff Editor — July 6, 2026 · 0 Comment

Qatar Ministry online shopping ദോഹ: ഓൺലൈൻ ഷോപ്പിംഗ് നടത്തുന്നവർ വ്യക്തിഗത വിവരങ്ങളും ബാങ്ക് വിവരങ്ങളും സുരക്ഷിതമായി സൂക്ഷിക്കണമെന്ന് ഖത്തറിലെ വാണിജ്യ-വ്യവസായ മന്ത്രാലയം വീണ്ടും മുന്നറിയിപ്പ് നൽകി. പ്രത്യേകിച്ച് ക്രെഡിറ്റ് കാർഡ് വിവരങ്ങൾ ദുരുപയോഗം ചെയ്യപ്പെടാതിരിക്കാൻ ജാഗ്രത പാലിക്കണമെന്ന് മന്ത്രാലയം അറിയിച്ചു.

തിങ്കളാഴ്ച ‘എക്‌സ്’ (X) പ്ലാറ്റ്‌ഫോമിലൂടെ പുറത്തിറക്കിയ ബോധവത്കരണ വീഡിയോയിലാണ് ഓൺലൈൻ വാങ്ങലുകൾ നടത്തുമ്പോൾ ശ്രദ്ധിക്കേണ്ട പ്രധാന നിർദേശങ്ങൾ മന്ത്രാലയം പങ്കുവെച്ചത്.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

മന്ത്രാലയം നൽകിയ പ്രധാന നിർദേശങ്ങൾ:

• വിശ്വസനീയമായ വെബ്‌സൈറ്റുകളിൽ നിന്ന് മാത്രം സാധനങ്ങൾ വാങ്ങുക. വെബ്‌സൈറ്റിൽ വ്യക്തമായ ബന്ധപ്പെടാനുള്ള വിവരങ്ങൾ ലഭ്യമാണോയെന്ന് ഉറപ്പാക്കണം.
• സുരക്ഷിതമായ പേയ്‌മെന്റ് മാർഗങ്ങൾ ഉപയോഗിക്കുക. വിശ്വസനീയമല്ലാത്ത ലിങ്കുകളിലൂടെയോ സന്ദേശങ്ങളിലൂടെയോ ബാങ്ക് അക്കൗണ്ട് വിവരങ്ങളോ കാർഡ് വിവരങ്ങളോ പങ്കിടരുത്.
• വാങ്ങലിന്റെ തെളിവുകൾ സൂക്ഷിക്കുക. ഇൻവോയ്സ്, രസീത്, അല്ലെങ്കിൽ ഓർഡർ സ്ഥിരീകരണ സന്ദേശം എന്നിവ ഭാവിയിലെ ആവശ്യങ്ങൾക്കായി സുരക്ഷിതമായി സൂക്ഷിക്കണമെന്ന് മന്ത്രാലയം നിർദേശിച്ചു.

ഓൺലൈൻ തട്ടിപ്പുകൾ വർധിച്ചുവരുന്ന സാഹചര്യത്തിൽ ഉപഭോക്താക്കൾ കൂടുതൽ ജാഗ്രത പാലിക്കണമെന്നും സംശയാസ്പദമായ വെബ്‌സൈറ്റുകളിലൂടെയോ ലിങ്കുകളിലൂടെയോ പണമിടപാടുകൾ നടത്തുന്നത് ഒഴിവാക്കണമെന്നും മന്ത്രാലയം ഓർമ്മിപ്പിച്ചു.

തുറസ്സായ സ്ഥലങ്ങളിലെ ഉച്ചസമയ ജോലി നിരോധനം: ലംഘനങ്ങൾ റിപ്പോർട്ട് ചെയ്യാൻ തൊഴിൽ മന്ത്രാലയത്തിന്റെ നിർദ്ദേശം; ഹോട്ട്‌ലൈൻ നമ്പർ ലഭ്യമാക്കി

Gulf Greeshma Staff Editor — July 6, 2026 · 0 Comment

Report outdoor work ban violation 2026 തൊഴിൽ സുരക്ഷയും ആരോഗ്യ മാനദണ്ഡങ്ങളും ലംഘിക്കുന്നതും ഉച്ചസമയത്തെ നിർബന്ധിത ജോലി നിരോധനം പാലിക്കാത്തതും ശ്രദ്ധയിൽപ്പെട്ടാൽ ഔദ്യോഗിക മാർഗ്ഗങ്ങളിലൂടെ ഉടനടി റിപ്പോർട്ട് ചെയ്യണമെന്ന് തൊഴിൽ മന്ത്രാലയം പൊതുജനങ്ങളോട് ആവശ്യപ്പെട്ടു. നിങ്ങളുടെ ഓരോ റിപ്പോർട്ടും ഒരു ജീവൻ സംരക്ഷിക്കുന്നതിനും സുരക്ഷിതമായ തൊഴിൽ അന്തരീക്ഷം ഉറപ്പാക്കുന്നതിനും കാരണമായേക്കാമെന്ന് മന്ത്രാലയം തങ്ങളുടെ ഔദ്യോഗിക ‘X’ (ട്വിറ്റർ) അക്കൗണ്ട് വഴി വ്യക്തമാക്കി.

അതിശക്തമായ വേനൽച്ചൂടിൽ നിന്നും തൊഴിലാളികളുടെ സുരക്ഷ ഉറപ്പാക്കുന്നതിനായി ജൂൺ 1 മുതൽ സെപ്റ്റംബർ 15 വരെയുള്ള കാലയളവിൽ തുറസ്സായ സ്ഥലങ്ങളിൽ ജോലി ചെയ്യുന്നതിന് കടുത്ത നിയന്ത്രണമുണ്ട്. ഈ ദിവസങ്ങളിൽ രാവിലെ 10:00 മണി മുതൽ ഉച്ചകഴിഞ്ഞ് 3:30 വരെയാണ് നേരിട്ട് വെയിൽ ഏൽക്കുന്ന രീതിയിലുള്ള ജോലികൾക്ക് നിരോധനം ഏർപ്പെടുത്തിയിട്ടുള്ളത്.

തൊഴിൽ സുരക്ഷാ നിയമങ്ങളുടെ ലംഘനങ്ങളോ ഉച്ചസമയ ജോലി നിരോധനം ലംഘിക്കുന്നതോ ശ്രദ്ധയിൽപ്പെട്ടാൽ പൊതുജനങ്ങൾക്ക് അത് റിപ്പോർട്ട് ചെയ്യാനായി മന്ത്രാലയം പ്രത്യേക ഹോട്ട്‌ലൈൻ സജ്ജീകരിച്ചിട്ടുണ്ട്. 40488264 എന്ന ടെലിഫോൺ നമ്പറിൽ വിളിച്ച് ലംഘനങ്ങൾ അധികൃതരെ അറിയിക്കാവുന്നതാണ്. ഓരോ ചെറിയ റിപ്പോർട്ടും തൊഴിലാളികളുടെ സുരക്ഷ ഉറപ്പാക്കുന്നതിൽ വലിയ മാറ്റമുണ്ടാക്കുമെന്നും അധികൃതർ കൂട്ടിച്ചേർത്തു.

രാവിലെ സീറ്റ് കിട്ടിയില്ലേ? ഖത്തറിൽ ഇനി സായാഹ്ന ക്ലാസുകളിലും പഠിക്കാം

Qatar Greeshma Staff Editor — July 5, 2026 · 0 Comment

Qatar Evening Classes ദോഹ: കൂടുതൽ വിദ്യാർത്ഥികൾക്ക് പഠന അവസരം ഒരുക്കുന്നതിനായി ഖത്തർ വിദ്യാഭ്യാസ, ഉന്നത വിദ്യാഭ്യാസ മന്ത്രാലയം സായാഹ്ന ക്ലാസുകൾ നടത്തുന്ന സ്വകാര്യ സ്കൂളുകളുടെയും ശാഖകളുടെയും എണ്ണം 37 ആയി വർധിപ്പിച്ചു.ഇന്ത്യൻ, ബ്രിട്ടീഷ്, ദേശീയ നിലവാരം, സിറിയൻ, ഈജിപ്ഷ്യൻ തുടങ്ങി വിവിധ പാഠ്യപദ്ധതികളിലുള്ള സ്കൂളുകളിലാണ് സായാഹ്ന ക്ലാസുകൾ ആരംഭിച്ചിരിക്കുന്നത്. വിദ്യാർത്ഥികളുടെ വർധിച്ചുവരുന്ന ആവശ്യവും കുടുംബങ്ങൾക്ക് കൂടുതൽ സൗകര്യപ്രദമായ വിദ്യാഭ്യാസ സംവിധാനവും ലക്ഷ്യമിട്ടാണ് നടപടി.

സായാഹ്ന ക്ലാസുകൾ നടത്തുന്ന സ്കൂളുകളിലെ പഠന നിലവാരം രാവിലെ പ്രവർത്തിക്കുന്ന സ്കൂളുകളുടേതിന് സമാനമായിരിക്കുമെന്ന് മന്ത്രാലയം വ്യക്തമാക്കി. ഒരേ പാഠ്യപദ്ധതിയും വിദ്യാഭ്യാസ നിലവാരവും മേൽനോട്ട സംവിധാനവും ഇവിടെയും തുടരും.സ്വകാര്യ സ്കൂളുകളുടെയും കിന്റർഗാർട്ടനുകളുടെയും വകുപ്പ് സ്കൂളുകളുടെ പ്രവർത്തനം നിരീക്ഷിക്കുകയും പാഠ്യപദ്ധതി, അധ്യാപന നിലവാരം, നിർബന്ധിത വിഷയങ്ങളുടെ പഠനം എന്നിവ വിലയിരുത്തുകയും ചെയ്യും. അറബിക് ഭാഷ, ഇസ്ലാമിക വിദ്യാഭ്യാസം, ഖത്തർ ചരിത്രം എന്നീ നിർബന്ധിത വിഷയങ്ങൾ എല്ലാ സായാഹ്ന സ്കൂളുകളിലും പഠിപ്പിക്കുന്നുണ്ടെന്ന് ഉറപ്പാക്കുമെന്നും മന്ത്രാലയം അറിയിച്ചു.

അതേസമയം, സാമ്പത്തികമായി പിന്നാക്കം നിൽക്കുന്ന കുടുംബങ്ങളെ സഹായിക്കുന്നതിനായി സ്വകാര്യ സ്കൂളുകളുമായി ചേർന്ന് സാമൂഹിക ഉത്തരവാദിത്ത പദ്ധതിയും തുടരുന്നുണ്ട്. ഇതിന്റെ ഭാഗമായി അർഹരായ വിദ്യാർത്ഥികൾക്ക് സൗജന്യമായോ കുറഞ്ഞ ഫീസിലോ പഠിക്കാനുള്ള അവസരവും ചില സ്കൂളുകളിൽ പൂർണമായും സൗജന്യ സായാഹ്ന വിദ്യാഭ്യാസ പദ്ധതികളും ലഭ്യമാക്കും.

ഒരു സ്കൂളിൽ സായാഹ്ന ക്ലാസ് ആരംഭിക്കാൻ, രാവിലെ ക്ലാസുകൾ പൂർണ ശേഷിയിലെത്തുകയും പ്രവേശനത്തിന് ആവശ്യക്കാർ കൂടുതലായിരിക്കണമെന്നും മന്ത്രാലയം വ്യക്തമാക്കി. വിദ്യാർത്ഥികളുടെ വർധിച്ചുവരുന്ന ആവശ്യങ്ങൾ പരിഗണിച്ചാണ് സായാഹ്ന വിദ്യാഭ്യാസ സംവിധാനം കൂടുതൽ വ്യാപിപ്പിക്കുന്നത്.

ഖത്തർ സമുദ്ര ഗതാഗതം പൂർണമായി പുനരാരംഭിച്ചു; മത്സ്യബന്ധന, സെയിലിംഗ് ബോട്ടുകൾക്കുള്ള നിയന്ത്രണവും പിൻവലിച്ചു

Qatar Greeshma Staff Editor — July 5, 2026 · 0 Comment

Qatar maritime operations ദോഹ: ഖത്തർ രാജ്യത്തെ സമുദ്ര ഗതാഗത പ്രവർത്തനങ്ങൾ പൂർണമായി പുനരാരംഭിച്ചതായി ഗതാഗത മന്ത്രാലയം അറിയിച്ചു. പുതിയ തീരുമാനം ഉടൻ പ്രാബല്യത്തിൽ വരുമെന്നും മന്ത്രാലയം എക്‌സ് (X) പ്ലാറ്റ്‌ഫോമിലൂടെ വ്യക്തമാക്കി.

ഇതോടെ ജൂൺ 29 മുതൽ നിലവിലുണ്ടായിരുന്ന സെയിലിംഗ് ബോട്ടുകൾക്കും മത്സ്യബന്ധന ബോട്ടുകൾക്കും ഏർപ്പെടുത്തിയ താൽക്കാലിക നിയന്ത്രണവും പിൻവലിച്ചു. വാണിജ്യ കപ്പലുകൾക്ക് നേരത്തെ തന്നെ സർവീസ് തുടരാൻ അനുമതി നൽകിയിരുന്നെങ്കിലും ചെറുകിട ബോട്ടുകളുടെ സർവീസ് താൽക്കാലികമായി നിർത്തിവച്ചിരുന്നു.

സമുദ്ര യാത്രകൾ നടത്തുന്ന എല്ലാ കപ്പൽ ഓപ്പറേറ്റർമാരും ഉപയോക്താക്കളും നിലവിലുള്ള സമുദ്ര സുരക്ഷാ ചട്ടങ്ങളും നിർദേശങ്ങളും കർശനമായി പാലിക്കണമെന്ന് ഗതാഗത മന്ത്രാലയം അഭ്യർഥിച്ചു.

ജൂൺ 29-ന് നിയന്ത്രണം ഏർപ്പെടുത്തിയതിന്റെ കാരണം സർക്കാർ ഔദ്യോഗികമായി വ്യക്തമാക്കിയിരുന്നില്ല. എന്നാൽ മേഖലയിലെ സൈനിക സംഘർഷങ്ങളുടെ പശ്ചാത്തലത്തിൽ സുരക്ഷാ മുൻകരുതലിന്റെ ഭാഗമായാണ് നടപടി സ്വീകരിച്ചതെന്നാണ് റിപ്പോർട്ടുകൾ. നിലവിലെ സാഹചര്യത്തിൽ സുരക്ഷാ വിലയിരുത്തലിന് ശേഷമാണ് എല്ലാ സമുദ്ര ഗതാഗത പ്രവർത്തനങ്ങളും വീണ്ടും സാധാരണ നിലയിലാക്കിയത്.

ഖത്തറിൽ സ്വകാര്യ വാഹനങ്ങൾ വാണിജ്യ ആവശ്യങ്ങൾക്ക് ഉപയോഗിച്ചാൽ കർശന നടപടി; ആഭ്യന്തര മന്ത്രാലയത്തിന്റെ മുന്നറിയിപ്പ്

Qatar Greeshma Staff Editor — July 5, 2026 · 0 Comment

Qatar private vehicle commercial use : ദോഹ: സ്വകാര്യ വാഹനങ്ങൾ വാണിജ്യ ആവശ്യങ്ങൾക്ക് ഉപയോഗിക്കുന്നത് ഗതാഗത നിയമ ലംഘനമാണെന്നും അത്തരത്തിലുള്ള വാഹനങ്ങളുടെ ഉടമകൾക്കെതിരെ നിയമനടപടി സ്വീകരിക്കുമെന്നും ഖത്തർ ആഭ്യന്തര മന്ത്രാലയം മുന്നറിയിപ്പ് നൽകി.എക്‌സ് (X) പ്ലാറ്റ്‌ഫോമിലെ ഔദ്യോഗിക അക്കൗണ്ടിലൂടെയാണ് മന്ത്രാലയം ഇക്കാര്യം അറിയിച്ചത്.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

ട്രാഫിക് നിയമത്തിലെ ആർട്ടിക്കിൾ 57 (ക്ലോസ് 5) പ്രകാരം, ഒരു വാഹനത്തിന് നൽകിയിരിക്കുന്ന ഓപ്പറേറ്റിംഗ് ലൈസൻസിൽ വ്യക്തമാക്കിയിരിക്കുന്ന ആവശ്യത്തിന് പുറമെ മറ്റേതെങ്കിലും ആവശ്യത്തിനായി വാഹനം ഉപയോഗിക്കാനോ ഉപയോഗിക്കാൻ അനുവദിക്കാനോ പാടില്ലെന്ന് മന്ത്രാലയം വ്യക്തമാക്കി.ഈ നിയമം ലംഘിക്കുന്നവർക്ക് കർശന ശിക്ഷയാണ് നിയമത്തിൽ വ്യവസ്ഥ ചെയ്തിരിക്കുന്നത്. ആർട്ടിക്കിൾ 94 പ്രകാരം, ഒരു മാസത്തിൽ കുറയാത്തതും മൂന്ന് വർഷം വരെ നീളുന്നതുമായ തടവുശിക്ഷയോ, 10,000 മുതൽ 50,000 ഖത്തർ റിയാൽ വരെ പിഴയോ, അല്ലെങ്കിൽ ഈ രണ്ട് ശിക്ഷകളിൽ ഏതെങ്കിലും ഒന്നോ ലഭിക്കാം.

സ്വകാര്യ വാഹനങ്ങൾ നിയമവിരുദ്ധമായി വാണിജ്യ ആവശ്യങ്ങൾക്ക് ഉപയോഗിക്കാതിരിക്കാനും ട്രാഫിക് നിയമങ്ങൾ കർശനമായി പാലിക്കാനും ആഭ്യന്തര മന്ത്രാലയം വാഹന ഉടമകളോട് അഭ്യർഥിച്ചു.