ദുബായ്∙ ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) നടപ്പിലാക്കിയ ആപ്പ് അധിഷ്ഠിത മുൻകൂർ ബുക്കിങ് മിനിബസ് സർവീസ് (ബസ് പൂളിങ്) വൻ വിജയത്തിലേക്ക്. സ്മാർട്ട് യാത്രാ സംവിധാനത്തിന്റെ ഭാഗമായി അവതരിപ്പിച്ച ഈ പദ്ധതിയിലൂടെ ഇതുവരെ യാത്ര ചെയ്തവരുടെ എണ്ണം 1,93,000 പിന്നിട്ടു. കുറഞ്ഞ ചെലവിലും സുരക്ഷിതമായും യാത്ര ചെയ്യാവുന്ന ഈ നൂതന സംവിധാനത്തിന് ദുബായിലെ താമസക്കാർക്കിടയിലും സന്ദർശകർക്കിടയിലും വലിയ സ്വീകാര്യതയാണ് ലഭിക്കുന്നത്.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

പൊതുഗതാഗത സംവിധാനം കൂടുതൽ സ്മാർട്ടും സുസ്ഥിരവുമാക്കുക എന്ന ലക്ഷ്യത്തോടെയാണ് ആർടിഎ ഈ സ്മാർട്ട് ഷെയേർഡ് ബസ് സർവീസിന് തുടക്കമിട്ടത്. ഒരേ ദിശയിലേക്ക് യാത്ര ചെയ്യുന്നവരെ ഒന്നിച്ച് ഒരു വാഹനത്തിൽ സ്മാർട്ട് ആപ്പുകൾ വഴി മുൻകൂട്ടി ബുക്ക് ചെയ്ത് യാത്ര ചെയ്യാൻ സഹായിക്കുന്നതാണ് ഈ രീതി. 2025 ഒക്ടോബറിലാണ് ഈ സർവീസ് ഏറ്റവും ഉയർന്ന പ്രതിമാസ വളർച്ച കൈവരിച്ചത്.

ആ ഒറ്റമാസത്തിൽ മാത്രം 18,000ത്തിലേറെ ആളുകളാണ് ഈ സംവിധാനം ഉപയോഗപ്പെടുത്തിയത്. താമസമേഖലകളെയും പ്രധാന വാണിജ്യ കേന്ദ്രങ്ങളെയും തമ്മിൽ ബന്ധിപ്പിക്കുന്ന ഈ മിനിബസുകൾ കൃത്യമായ റൂട്ടുകൾക്ക് പകരം യാത്രക്കാരുടെ ആവശ്യാനുസരണം റൂട്ടുകളിൽ മാറ്റം വരുത്തിയാണ് സർവീസ് നടത്തുന്നത്. ഇത് യാത്രാസമയം ലാഭിക്കുന്നതിനൊപ്പം സ്വകാര്യ വാഹനങ്ങളുടെ ഉപയോഗം കുറയ്ക്കാനും സഹായിക്കുന്നുണ്ട്.

∙ കാർബൺ പുറന്തള്ളൽ കുറയ്ക്കും; പരിസ്ഥിതി സൗഹൃദം
നഗരത്തിലെ ഗതാഗതക്കുരുക്കും കാർബൺ പുറന്തള്ളലും ഗണ്യമായി കുറയ്ക്കാൻ ഈ പദ്ധതിയിലൂടെ സാധിക്കുന്നുണ്ടെന്ന് ആർടിഎ വ്യക്തമാക്കുന്നു. പ്രധാന മെട്രോ, ബസ് സ്റ്റേഷനുകളിലേക്കുള്ള ആദ്യത്തെയും അവസാനത്തെയും മൈൽ കണക്ടിവിറ്റി (ഫസ്റ്റ് ആൻഡ് ലാസ്റ്റ് മൈൽ ജേർണി) ഉറപ്പാക്കാൻ ഈ സർവീസുകൾ വലിയ പങ്കുവഹിക്കുന്നുണ്ട്.

നിലവിൽ ദുബായിലെ പ്രധാനപ്പെട്ട പല മേഖലകളിലും ഈ മിനിബസ് സർവീസ് ലഭ്യമാണ്. നിലവിലുള്ള മൂന്ന് അംഗീകൃത പ്ലാറ്റ്‌ഫോമുകൾ വഴിയാണ് ഈ സേവനം പൊതുജനങ്ങൾക്ക് ലഭ്യമാക്കിയിട്ടുള്ളത്. ഭാവിയിൽ കൂടുതൽ ജനസാന്ദ്രതയുള്ള പ്രദേശങ്ങളിലേക്ക് കൂടി സർവീസ് വ്യാപിപ്പിക്കാനുള്ള ഒരുക്കത്തിലാണ് അധികൃതർ.

ജീവൻ പോലും അപകടത്തിലാകാം;പ്രവാസികൾ ചെയ്യുന്ന വലിയ തെറ്റ്, ഡോക്‌ടർമാർ മുന്നറിയിപ്പ് നൽകുന്നു

UAE June 30, 2026

അബുദാബി: ഓരോ തവണ നാട്ടിൽ വരുമ്പോഴും ധാരാളം സമ്മാനങ്ങളുമായി എത്തുന്നവരാണ് പ്രവാസികൾ. പ്രത്യേകിച്ച് കുട്ടികളുള്ളവരാണെങ്കിൽ അവർക്കായി കളിപ്പാട്ടങ്ങളും കൊണ്ടുവരാറുണ്ട്. എന്നാൽ, നിങ്ങൾ സന്തോഷത്തോടെ കൊണ്ടുവരുന്ന സമ്മാനങ്ങൾ അവർക്ക് ദോഷമായാലോ? കളിപ്പാട്ടങ്ങൾക്കിടയിൽ ഒളിഞ്ഞിരിക്കുന്ന ചില ആപത്തുകളെക്കുറിച്ചാണ് പറഞ്ഞുവരുന്നത്. അടുത്തിടെ ഷാർജയിൽ താമസിക്കുന്ന അഞ്ച് വയസുകാരന്റെ കുടലിൽ കാന്തങ്ങളടങ്ങിയ 52 മുത്തുകൾ കണ്ടെടുത്തിരുന്നു. തുടർന്ന് കുട്ടിയെ അടിയന്തര ശസ്‌ത്രക്രിയയ്‌ക്ക് വിധേയനാക്കി.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

നിലവിൽ കുട്ടി സുഖം പ്രാപിച്ചെങ്കിലും ഇത്തരം കളിപ്പാട്ടങ്ങൾ വലിയ അപകടമുണ്ടാക്കുമെന്നാണ് ഈ സംഭവം ഓർമപ്പെടുത്തുന്നത്. ഇത്തരം കളിപ്പാട്ടങ്ങൾ യുഎഇയിലും മറ്റ് രാജ്യങ്ങളിലും വിപണിയിൽ സജീവമാണ്. എന്നാൽ, ഈ ചെറിയ കാന്തങ്ങൾ കുട്ടികൾ വിഴുങ്ങിയാലുണ്ടാകുന്ന അപകടങ്ങളെക്കുറിച്ച് പല മാതാപിതാക്കൾക്കും അറിയില്ല. നാണയങ്ങളോ മറ്റ് വസ്‌തുക്കളോ വിഴുങ്ങുന്നതിൽ നിന്ന് വ്യത്യസ്‌തമായി ആന്തരികമായി ഗുരുതര പരിക്കുണ്ടാകാൻ ഇവ കാരണമാകുന്നു.

ബിൽഡിംഗ് കിറ്റുകൾ, കാന്തങ്ങളടങ്ങിയ ബോളുകൾ, മുത്തുകൾ തുടങ്ങി നിരവധി കളിപ്പാട്ടങ്ങൾ വിപണിയിൽ ലഭ്യമാണ്. ഇതിൽ പലതിലും ശക്തിയേറിയ നിയോഡൈമിയം കാന്തങ്ങൾ അടങ്ങിയിട്ടുണ്ട്. ഇവ തീരെ ചെറുതും ആകർഷകവുമായതിനാൽ കുട്ടികൾ വിഴുങ്ങാനുള്ള സാദ്ധ്യത വളരെ കൂടുതലാണ്. കുട്ടികൾ ഒന്നിലധികം കാന്തങ്ങൾ വിഴുങ്ങിയാൽ അവ കുടലിന്റെ വിവിധ ഭാഗങ്ങളിലായി പരസ്‌പരം ആകർഷിക്കും. ഇതോടെ രക്തപ്രവാഹം തടസപ്പെടും. ആന്തരികമായി മുറിവുണ്ടാകാനും കാരണമാകും. ഇത് മൂലം കുടലിൽ ദ്വാരങ്ങളുണ്ടാകാനും അണുബാധയുണ്ടാകാനും മരണം പോലും സംഭവിച്ചേക്കാനും സാദ്ധ്യതയുണ്ട്.

ഒന്നോ രണ്ടോ കാന്തങ്ങൾ പോലും വളരെ അപകടം വിളിച്ചുവരുത്തുമെന്നാണ് ഡോക്‌ടർമാർ പറയുന്നത്. ലക്ഷണങ്ങൾ ഉടൻ പ്രത്യക്ഷപ്പെടില്ല എന്നതാണ് ഇതിന്റെ ഏറ്റവും വലിയ വെല്ലുവിളി. അതിനാൽ, ഇത്തരം കളിപ്പാട്ടങ്ങൾ കുട്ടികൾക്ക് വാങ്ങിക്കൊടുക്കാതിരിക്കുന്നതാണ് ഉത്തമം.