ന്യൂഡൽഹി: രാജ്യത്ത് പാസ്‌പോർട്ട് അപേക്ഷാ ഫീസുകൾ കുത്തനെ കൂട്ടി കേന്ദ്ര സർക്കാർ. 1980-ലെ പാസ്‌പോർട്ട് നിയമങ്ങളിൽ ഭേദഗതി വരുത്തിക്കൊണ്ട് വിദേശകാര്യ മന്ത്രാലയം (MEA) പുറപ്പെടുവിച്ച പുതിയ വിജ്ഞാപന പ്രകാരം ജൂലൈ 1 മുതൽ പുതുക്കിയ നിരക്കുകൾ പ്രാബല്യത്തിൽ വരും. പുതിയ പാസ്‌പോർട്ടുകൾ, പുനർവിതരണം (Re-issue), തത്കാൽ അപേക്ഷകൾ, നഷ്ടപ്പെട്ടതോ കേടുവന്നതോ ആയ പാസ്‌പോർട്ടുകൾക്ക് പകരമുള്ള ഡ്യൂപ്ലിക്കേറ്റ് പാസ്‌പോർട്ടുകൾ എന്നിവയ്‌ക്കെല്ലാം ഇനി മുതൽ കൂടുതൽ തുക നൽകേണ്ടി വരും.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

‘പാസ്‌പോർട്ട് (ഭേദഗതി) നിയമങ്ങൾ, 2026’ എന്ന പേരിലുള്ള പുതിയ പരിഷ്‌കാരം ജൂൺ 20-നാണ് സർക്കാർ വിജ്ഞാപനം ചെയ്തത്. നിലവിലുള്ള ഫീസ് ഘടനയ്ക്ക് പകരമായി ഭേദഗതി വരുത്തിയ പുതിയ ഷെഡ്യൂളും വിദേശകാര്യ മന്ത്രാലയം പ്രസിദ്ധീകരിച്ചിട്ടുണ്ട്.

പുതുക്കിയ നിരക്കുകൾ ഒറ്റനോട്ടത്തിൽ

1. സാധാരണ പാസ്‌പോർട്ട് (36 പേജ്)

സാധാരണ അപേക്ഷ: 2,500 രൂപ

തത്കാൽ അപേക്ഷ: 5,000 രൂപ

2. ജംബോ പാസ്‌പോർട്ട് (60 പേജ് – Frequent Travelers)

സാധാരണ അപേക്ഷ: 3,500 രൂപ

തത്കാൽ അപേക്ഷ: 6,000 രൂപ

3. നഷ്ടപ്പെടുകയോ കേടുപാടുകൾ വരികയോ ചെയ്ത പാസ്‌പോർട്ടുകൾ (Duplicate – 36 പേജ്)

സാധാരണ പ്രക്രിയ: 5,000 രൂപ

തത്കാൽ പദ്ധതി: 7,500 രൂപ

4. നഷ്ടപ്പെട്ട/കേടുവന്ന പാസ്‌പോർട്ട് (60 പേജ്)

സാധാരണ പ്രക്രിയ: 6,000 രൂപ

തത്കാൽ പ്രോസസ്സിംഗ്: 8,500 രൂപ

5. പ്രായപൂർത്തിയാകാത്തവരുടെ നഷ്ടപ്പെട്ട/കേടുവന്ന പാസ്‌പോർട്ട് (36 പേജ്)

സാധാരണ വിഭാഗം: 4,250 രൂപ

തത്കാൽ വിഭാഗം: 6,750 രൂപ

പിസിസി, സറണ്ടർ സർട്ടിഫിക്കറ്റ് നിരക്കുകളും വർദ്ധിച്ചു

പാസ്‌പോർട്ടുമായി ബന്ധപ്പെട്ട മറ്റ് അനുബന്ധ സേവനങ്ങളുടെ നിരക്കുകളിലും വർദ്ധനവുണ്ട്. പോലീസ് ക്ലിയറൻസ് സർട്ടിഫിക്കറ്റ് (PCC), സറണ്ടർ സർട്ടിഫിക്കറ്റ്, ഗ്ലോബൽ എൻട്രി പ്രോഗ്രാം വെരിഫിക്കേഷൻ, മറ്റ് പലവക സർട്ടിഫിക്കറ്റുകൾ എന്നിവയ്ക്ക് ഇന്ത്യയ്ക്കകത്ത് ഇനി മുതൽ 750 രൂപയായിരിക്കും ഫീസ്. തിരിച്ചറിയൽ സർട്ടിഫിക്കറ്റ് (Identity Certificate) ലഭിക്കുന്നതിനുള്ള ഫീസ് 1,000 രൂപയായും നിശ്ചയിച്ചു.

വിദേശത്തുള്ള ഇന്ത്യൻ എംബസികൾ/കോൺസുലേറ്റുകൾ വഴി നൽകുന്ന അടിയന്തിര സർട്ടിഫിക്കറ്റുകൾക്ക് 15 യുഎസ് ഡോളറും, തിരിച്ചറിയൽ സർട്ടിഫിക്കറ്റുകൾക്ക് 50 യുഎസ് ഡോളറും ഈടാക്കും. ഈ വിഭാഗങ്ങൾക്ക് തത്കാൽ സേവനങ്ങൾ ലഭ്യമാകില്ല.

ഫീസ് ഘടനയിൽ മാറ്റം വരുത്തിയെങ്കിലും പാസ്‌പോർട്ടുകളുടെ കാലാവധി നിബന്ധനകളിൽ മാറ്റമില്ല. മുതിർന്നവർക്ക് നൽകുന്ന പാസ്‌പോർട്ടുകൾക്ക് 10 വർഷത്തെ സാധുത തുടരും. പ്രായപൂർത്തിയാകാത്തവർക്ക് 5 വർഷത്തേക്കോ അല്ലെങ്കിൽ അവർക്ക് 18 വയസ്സ് തികയുന്നത് വരെയോ (ഏതാണോ ആദ്യം വരുന്നത്) ആയിരിക്കും പാസ്‌പോർട്ട് കാലാവധി. പുതിയ നിരക്കുകൾ ജൂലൈ 1 മുതൽ നടപ്പിലാകുന്നതിനാൽ, നിലവിൽ പാസ്‌പോർട്ട് പുതുക്കാനോ പുതിയതിന് അപേക്ഷിക്കാനോ ഉള്ളവർക്ക് ജൂൺ 30 അർദ്ധരാത്രി വരെ പഴയ നിരക്കിൽ ഫീസ് അടച്ച് അപേക്ഷിക്കാവുന്നതാണ്.

പ്രവാസികൾക്ക് ആശ്വാസം; ഇനി ഒരു ദിവസം അധിക അവധി, തൊഴിൽ സമയവും വെട്ടിച്ചുരുക്കി

UAE June 26, 2026

ദുബായ്: വേനൽക്കാലം കടുത്തതോടെ ജീവനക്കാർക്ക് ആശ്വാസമായി തൊഴിൽസമയത്തിൽ മാറ്റംവരുത്തി ദുബായിലെ സർക്കാർ സ്ഥാപനങ്ങൾ. ജൂൺ 29 മുതൽ സെപ്‌തംബർ പത്ത് വരെയാണ് വേനൽക്കാല ഇളവുകൾ അനുവദിച്ചിരിക്കുന്നത്. ജീവനക്കാരെ രണ്ട് ഗ്രൂപ്പുകളായി തിരിച്ച് അതിൽ ആദ്യ ഗ്രൂപ്പിന് തിങ്കൾ മുതൽ വ്യാഴം വരെ പ്രതിദിനം ഏഴ് മണിക്കൂറും വെള്ളിയാഴ്‌ച നാലര മണിക്കൂറും ജോലി ചെയ്യണം. രണ്ടാമത്തെ ഗ്രൂപ്പിന് തിങ്കൾ മുതൽ വ്യാഴം വരെ പ്രതിദിനം എട്ട് മണിക്കൂർ ജോലി ചെയ്യണം. ഇവർക്ക് വെള്ളിയാഴ്‌ച അവധിയായിരിക്കും.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

ദുബായിലെ മിക്ക സർക്കാർ ജീവനക്കാർക്കും ശനി, ഞായർ ദിവസങ്ങൾ അവധിയാണ്. ഇനി വെള്ളിയാഴ്‌ച കൂടി അവധി ലഭിക്കുന്നത് ഇവർക്ക് ഏറെ സന്തോഷം നൽകുന്ന കാര്യമാണ്. ഓരോ സ്ഥാപനങ്ങളിലെയും ജീവനക്കാർക്ക് അവരുടെ ജോലിയുടെ സ്വഭാവം അനുസരിച്ച് വേനൽക്കാലത്ത് നൽകിയ ഇളവ് പ്രയോജനപ്പെടുത്താവുന്നതാണ്.

2024ലാണ് ആദ്യമായി സർക്കാർ ജീവനക്കാർക്ക് വേനൽക്കാലത്ത് തൊഴിൽ ഇളവുകൾ നൽകിത്തുടങ്ങിയത്. ജീവനക്കാരുടെ ആവശ്യങ്ങൾ പഠിച്ച ശേഷമാണ് ദുബായ് ഗവൺമെന്റ് ഹ്യൂമൻ റിസോഴ്‌സ് ഡിപ്പാർട്ട്‌മെന്റ് ഇത്തരമൊരു തീരുമാനമെടുത്തത്. ജീവനക്കാർക്ക് പിന്തുണ നൽകുക, അവരുടെ സേവനം മെച്ചപ്പെടുത്തുക എന്നിവയായിരുന്നു ലക്ഷ്യങ്ങൾ. വേനൽക്കാലത്ത് കുടുംബത്തോടൊപ്പം കൂടുതൽ സമയം ചെലവഴിക്കാമെന്ന സന്തോഷത്തിലാണ് ജീവനക്കാർ.

അതേസമയം, ജൂൺ 15നും സെപ്‌തംബർ 15നും ഇടയിൽ യുഎഇയിലുടനീളം ഉച്ചയ്‌ക്ക് 12.30 മുതൽ വൈകിട്ട് മൂന്ന് മണിവരെ നേരിട്ട് സൂര്യപ്രകാശം ഏൽക്കുന്ന തുറസായ സ്ഥലങ്ങളിൽ ജോലി ചെയ്യുന്നത് നിരോധിച്ചിരിക്കുകയാണ്. നിയമം ലംഘിക്കുന്നതായി കണ്ടാൽ കമ്പനികൾ ഒരു തൊഴിലാളിക്ക് 5,000 ദിർഹം വീതം പിഴയടക്കേണ്ടി വരും. കൂടുതൽപേരെക്കൊണ്ട് തൊഴിലെടുപ്പിച്ചാൽ പരമാവധി 50,000 ദിർഹം വരെ പിഴ ചുമത്തും. പൊതുജനങ്ങൾക്ക് 600590000 എന്ന നമ്പറിലോ മൊഹ്‌റയുടെ കോൾ സെന്റർ വഴിയോ മന്ത്രിലായത്തിന്റെ വെബ്‌സൈറ്റ് വഴിയോ ഇത്തരം നിയമലംഘനങ്ങൾ റിപ്പോർട്ട് ചെയ്യാം.