Kuwait rain driving safety കുവൈത്ത് സിറ്റി: മഴക്കാലത്ത് വാഹനമോടിക്കുന്നവർ കൂടുതൽ ജാഗ്രത പാലിക്കണമെന്ന് കുവൈത്ത് ജനറൽ ട്രാഫിക് വകുപ്പ് മുന്നറിയിപ്പ് നൽകി. മഴയുള്ളപ്പോൾ വാഹനം ഓടിക്കുമ്പോൾ ഹസാർഡ് ലൈറ്റുകൾ ഉപയോഗിക്കുന്നത് ഒഴിവാക്കണമെന്നും അധികൃതർ നിർദേശിച്ചു. ഹസാർഡ് ലൈറ്റുകൾ പ്രവർത്തിപ്പിക്കുന്നത് ടേൺ സിഗ്നലുകൾ തിരിച്ചറിയാൻ ബുദ്ധിമുട്ടുണ്ടാക്കുകയും മറ്റ് വാഹനങ്ങളിലെ ഡ്രൈവർമാരെ ആശയക്കുഴപ്പത്തിലാക്കുകയും ചെയ്യാം.
കുവൈത്ത് സിറ്റിയിലേക്കുള്ള പ്രധാന റോഡുകളിൽ രാവിലെ തിരക്കേറിയ സമയങ്ങളിൽ ഗതാഗതക്കുരുക്ക് രൂക്ഷമാണെന്ന് ഓപ്പറേഷൻസ് ആൻഡ് ട്രാഫിക് മേഖലയിലെ ഗതാഗത ബോധവൽക്കരണ വകുപ്പ് അസിസ്റ്റന്റ് ഡയറക്ടർ ലെഫ്റ്റനന്റ് കേണൽ അബ്ദുല്ല ബു ഹസ്സൻ പറഞ്ഞു. വിവിധ റോഡുകളിൽ അറ്റകുറ്റപ്പണികൾ നടക്കുന്നതാണ് ഗതാഗതക്കുരുക്ക് വർധിക്കാൻ കാരണമായത്.
ഫോർത്ത് റിംഗ് റോഡിലെ അറ്റകുറ്റപ്പണികൾ ഫിഫ്ത്ത് റിംഗ് റോഡിലും ഗതാഗതക്കുരുക്ക് വർധിപ്പിച്ചിട്ടുണ്ട്. ഇതോടെ നിരവധി വാഹനമോടിക്കുന്നവർ ഫിഫ്ത്ത് റിംഗ് റോഡ് ബദൽ പാതയായി ഉപയോഗിക്കുന്നതായും അദ്ദേഹം വിശദീകരിച്ചു.
കുവൈത്ത് ടിവിയുടെ ഗുഡ് മോർണിംഗ് കുവൈത്ത് പരിപാടിയിൽ സംസാരിക്കവെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്. ആഭ്യന്തര മന്ത്രാലയത്തിന്റെ ഔദ്യോഗിക വെബ്‌സൈറ്റുകളിൽ പ്രസിദ്ധീകരിക്കുന്ന ട്രാഫിക് അറിയിപ്പുകളും ഗതാഗത അപ്‌ഡേറ്റുകളും പരിശോധിച്ച് യാത്രയ്ക്ക് അനുയോജ്യമായ ബദൽ റൂട്ടുകൾ തിരഞ്ഞെടുക്കണമെന്ന് അദ്ദേഹം വാഹനമോടിക്കുന്നവരോട് അഭ്യർത്ഥിച്ചു. പ്രത്യേകിച്ച് രാവിലെ കുവൈത്ത് സിറ്റിയിലേക്ക് യാത്ര ചെയ്യുന്നവർ ഇക്കാര്യം ശ്രദ്ധിക്കണം.
മഴക്കാലത്ത് വാഹനമോടിക്കുമ്പോൾ ശ്രദ്ധിക്കേണ്ട കാര്യങ്ങൾ
ശൈത്യകാലവും മഴയും ആരംഭിക്കുന്ന സാഹചര്യത്തിൽ വാഹനങ്ങളുടെ സുരക്ഷ ഉറപ്പാക്കണമെന്നും ട്രാഫിക് വകുപ്പ് നിർദേശിച്ചു. ടയറുകളുടെ അവസ്ഥ പരിശോധിക്കുക, വിൻഡ്‌ഷീൽഡ് വൈപ്പറുകൾ ശരിയായി പ്രവർത്തിക്കുന്നുണ്ടെന്ന് ഉറപ്പാക്കുക, കാഴ്ച മങ്ങുന്നത് ഒഴിവാക്കാൻ ഡീഫോഗറുകൾ ഉപയോഗിക്കുക തുടങ്ങിയ കാര്യങ്ങളിൽ ശ്രദ്ധിക്കണം.
നനഞ്ഞ റോഡുകളിൽ വാഹനമോടിക്കുമ്പോൾ വേഗം കുറയ്ക്കുകയും മുന്നിലുള്ള വാഹനവുമായി സുരക്ഷിതമായ അകലം പാലിക്കുകയും വേണം. അപകടസാധ്യത കുറയ്ക്കാൻ യാത്രയിലുടനീളം ജാഗ്രത പുലർത്തണമെന്നും അധികൃതർ ഓർമിപ്പിച്ചു.
