Qatar weather forecast : ദോഹ: ഖത്തറിൽ വെള്ളിയാഴ്ചയും ശനിയാഴ്ചയും ചില പ്രദേശങ്ങളിൽ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് സ്പെഷ്യലിസ്റ്റും കാലാവസ്ഥാ പ്രവചകനുമായ സഖർ അൽ സുവൈദി അറിയിച്ചു. വെള്ളിയാഴ്ച പകൽ ചില മേഖലകളിൽ ഇടിമിന്നലോടു കൂടിയ മഴയ്ക്കും സാധ്യതയുണ്ട്.

ഖത്തർ ടിവിക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. രാജ്യത്തിന്റെ വിവിധ ഭാഗങ്ങളിൽ അടുത്തിടെ ചിതറിയ രീതിയിൽ മഴ ലഭിച്ചിരുന്നു. പ്രധാനമായും മധ്യമേഖലകളിലാണ് മഴ കേന്ദ്രീകരിച്ചത്. ഉച്ചയോടെ ആരംഭിച്ച മഴ വൈകുന്നേരം അഞ്ച് മണിവരെ തുടർന്നു. ദോഹ നഗരത്തിന്റെ ചില ഭാഗങ്ങളിലും നേരിയ മഴ ലഭിച്ചു.

ഏറ്റവും പുതിയ കാലാവസ്ഥാ വിവരങ്ങൾ പ്രകാരം വെള്ളിയാഴ്ചയും ശനിയാഴ്ചയും പ്രാദേശികമായി മഴമേഘങ്ങൾ രൂപപ്പെടാൻ സാധ്യതയുണ്ട്. വെള്ളിയാഴ്ച ചില പ്രദേശങ്ങളിൽ ഇടിമിന്നലോടു കൂടിയ മഴ ലഭിച്ചേക്കാം.

ഒക്ടോബറിന്റെ രണ്ടാം പകുതി കാലാവസ്ഥാ മാറ്റങ്ങളുടെ ഘട്ടമാണെന്നും ഈ സമയത്ത് മഴ ലഭിക്കുന്നത് സാധാരണമാണെന്നും അൽ സുവൈദി വിശദീകരിച്ചു. വരും ദിവസങ്ങളിൽ കാലാവസ്ഥ ക്രമേണ കൂടുതൽ മിതമാകുമെന്നും അദ്ദേഹം പറഞ്ഞു.

ശനിയാഴ്ച കടലിൽ മുന്നറിയിപ്പ്

നിലവിൽ കടൽ ശാന്തമാണെന്നും വെള്ളിയാഴ്ച സമുദ്ര മുന്നറിയിപ്പുകളൊന്നും പ്രതീക്ഷിക്കുന്നില്ലെന്നും അദ്ദേഹം അറിയിച്ചു. എന്നാൽ ശനിയാഴ്ച ശക്തമായ കാറ്റിനും ഉയർന്ന തിരമാലകൾക്കും സാധ്യതയുള്ളതിനാൽ കടൽ മുന്നറിയിപ്പുകൾ പുറപ്പെടുവിച്ചേക്കും.

തിരമാലകളുടെ ഉയരം സാധാരണയായി രണ്ട് മുതൽ അഞ്ച് അടി വരെയാകാമെന്നും ചില സമയങ്ങളിൽ എട്ട് അടി വരെ ഉയരാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.

കടൽയാത്രക്കാർ ഏറ്റവും പുതിയ കാലാവസ്ഥാ മുന്നറിയിപ്പുകൾ ശ്രദ്ധിക്കണമെന്നും മുന്നറിയിപ്പ് നിലനിൽക്കുന്ന സമയത്ത് കടലിലെ പ്രവർത്തനങ്ങൾ ഒഴിവാക്കണമെന്നും അദ്ദേഹം നിർദേശിച്ചു.