Dubai Shared Housing Law 2026;ദുബായ്: ഷെയറിങ് താമസത്തിന് പുതിയ നിയമങ്ങളും കർശന നിയന്ത്രണങ്ങളും ഏർപ്പെടുത്തിയതോടെ യുഎഇയിലെ പ്രവാസികൾ ജാഗ്രത പാലിക്കണം. അനധികൃതമായി ഷെയറിങ് താമസസൗകര്യങ്ങൾ ഒരുക്കുന്നവർക്കും നിയമങ്ങൾ ലംഘിക്കുന്നവർക്കും 10 ലക്ഷം ദിർഹം (ഏകദേശം 2.3 കോടി രൂപ) വരെ പിഴ ചുമത്താം. താമസസൗകര്യം വാടകയ്ക്ക് എടുക്കുന്നതിന് മുമ്പ് ആവശ്യമായ അനുമതികളും കരാർ വ്യവസ്ഥകളും പരിശോധിക്കണമെന്ന് അധികൃതർ വ്യക്തമാക്കുന്നു.

ദുബായിൽ ഷെയേർഡ് ഹൗസിങ്ങിന്റെ നടത്തിപ്പും താമസവും നിയന്ത്രിക്കുന്നതിനായി കൊണ്ടുവന്ന നിയമം 2026 ഓഗസ്റ്റ് 26 മുതൽ പ്രാബല്യത്തിലുണ്ട്. കെട്ടിട ഉടമകൾ, വാടകക്കാർ, താമസസൗകര്യം നിയന്ത്രിക്കുന്ന സ്ഥാപനങ്ങൾ എന്നിവർക്കെല്ലാം പുതിയ നിയമം ബാധകമാണ്.

നിയമപരമായ അനുമതി നിർബന്ധം

ദുബായ് ഭരണകൂടത്തിന്റെ മുൻകൂർ അനുമതിയില്ലാതെ കെട്ടിടങ്ങളോ വില്ലകളോ ഷെയറിങ് താമസത്തിനായി ഉപയോഗിക്കാൻ പാടില്ല. താമസസൗകര്യം വാടകയ്ക്ക് എടുക്കുന്നവർ കെട്ടിട ഉടമയ്ക്കോ അംഗീകൃത സ്ഥാപനത്തിനോ സാധുവായ പെർമിറ്റ് ഉണ്ടെന്ന് ഉറപ്പാക്കണം.

അനുവദനീയമായ താമസക്കാരുടെ എണ്ണവും കെട്ടിടത്തിന്റെ വിസ്തീർണവും സുരക്ഷാ മാനദണ്ഡങ്ങളും പാലിച്ചിരിക്കണം. അനുവദിച്ചതിലും കൂടുതൽ ആളുകളെ താമസിപ്പിക്കുന്നതും നിയമലംഘനമായി കണക്കാക്കാം.

കുടുംബങ്ങളും ബാച്ചിലേഴ്സും ഒരുമിച്ച് താമസിക്കരുത്

പുതിയ ചട്ടപ്രകാരം, ഷെയറിങ് താമസത്തിനായി മാറ്റിവെച്ച ഒരു റെസിഡൻഷ്യൽ യൂണിറ്റ് കുടുംബങ്ങൾക്കോ വ്യക്തികൾക്കോ മാത്രമായി നിശ്ചയിക്കണം. ഒരേ യൂണിറ്റിൽ കുടുംബങ്ങളെയും വ്യക്തികളെയും കൂട്ടിക്കലർത്തി താമസിപ്പിക്കാൻ അനുവാദമില്ല.

ഷെയറിങ് താമസസൗകര്യങ്ങൾ അനുവദിച്ചിട്ടുള്ള മേഖലകളിൽ മാത്രമേ ഇത്തരം താമസം ഒരുക്കാൻ കഴിയൂ. ഷെയറിങ് താമസത്തിനായി ഉപയോഗിക്കുന്ന കെട്ടിടങ്ങളും വില്ലകളും നിശ്ചിത ആസൂത്രണ, നിർമാണ, ആരോഗ്യ, സുരക്ഷാ മാനദണ്ഡങ്ങൾ പാലിച്ചിരിക്കണം.

ഒരാൾക്ക് കുറഞ്ഞത് അഞ്ച് ചതുരശ്ര മീറ്റർ സ്ഥലം

താമസക്കാരുടെ സൗകര്യവും സുരക്ഷയും ഉറപ്പാക്കുന്നതിനായി മുറികളുടെ വലുപ്പത്തിലും നിയന്ത്രണങ്ങളുണ്ട്.

• ഒരു കിടപ്പുമുറിയിൽ ഓരോ താമസക്കാരനും കുറഞ്ഞത് അഞ്ച് ചതുരശ്ര മീറ്റർ സ്ഥലം ലഭിക്കണം.
• ഓരോ നാല് താമസക്കാർക്കും ഒരു പൂർണ ബാത്ത്റൂം സൗകര്യം ഉണ്ടായിരിക്കണം.
• കുടുംബങ്ങൾക്കായുള്ള ഷെയറിങ് താമസത്തിൽ ഓരോ കുടുംബത്തിനും പ്രത്യേക കിടപ്പുമുറിയും സ്വന്തം ബാത്ത്റൂമും വേണം.
• താമസക്കാരുടെ എണ്ണത്തിന് ആനുപാതികമായി അടുക്കള, അലക്കുസൗകര്യം, മറ്റ് അടിസ്ഥാന സൗകര്യങ്ങൾ എന്നിവ ഒരുക്കണം.

വാടകക്കാർ ശ്രദ്ധിക്കേണ്ട പ്രധാന കാര്യങ്ങൾ

ഷെയറിങ് താമസത്തിന് കരാറിൽ ഏർപ്പെടുന്നതിന് മുമ്പ് വാടകക്കാർ ചില കാര്യങ്ങൾ നിർബന്ധമായും പരിശോധിക്കണം.

1. പെർമിറ്റ് പരിശോധിക്കുക: കെട്ടിടം ഷെയറിങ് താമസത്തിനായി ഉപയോഗിക്കാൻ ഔദ്യോഗിക അനുമതിയുണ്ടെന്ന് ഉറപ്പാക്കുക.

2. വാടകക്കരാർ രജിസ്റ്റർ ചെയ്തിട്ടുണ്ടെന്ന് ഉറപ്പാക്കുക: താമസക്കാരുടെ വിവരങ്ങളും വാടകക്കരാറും ദുബായ് ലാൻഡ് ഡിപ്പാർട്ട്‌മെന്റിന്റെ ബന്ധപ്പെട്ട രജിസ്ട്രേഷൻ സംവിധാനത്തിൽ രേഖപ്പെടുത്തിയിട്ടുണ്ടെന്ന് പരിശോധിക്കുക.

3. വാടകയും മറ്റ് ചെലവുകളും വ്യക്തമാക്കുക: വാടക, വൈദ്യുതി, വെള്ളം തുടങ്ങിയ ചെലവുകൾ ആരാണ് വഹിക്കേണ്ടതെന്ന് കരാറിൽ വ്യക്തമായി രേഖപ്പെടുത്തണം.

4. താമസക്കാരുടെ എണ്ണം പരിശോധിക്കുക: കെട്ടിടത്തിൽ അനുവദനീയമായതിലും കൂടുതൽ ആളുകൾ താമസിക്കുന്നില്ലെന്ന് ഉറപ്പാക്കണം.

5. സുരക്ഷാ സൗകര്യങ്ങൾ ഉറപ്പാക്കുക: ശുചിത്വം, അഗ്നിസുരക്ഷ, വൈദ്യുതിസുരക്ഷ, മറ്റ് അടിസ്ഥാന സൗകര്യങ്ങൾ എന്നിവ പരിശോധിക്കണം.

6. വാടകയ്ക്ക് നൽകുന്നയാളുടെ അധികാരം ഉറപ്പാക്കുക: കെട്ടിട ഉടമയ്ക്കോ അംഗീകൃത സ്ഥാപനത്തിനോ മാത്രമേ നിയമപ്രകാരം ഷെയറിങ് താമസസൗകര്യം വാടകയ്ക്ക് നൽകാൻ കഴിയൂ. സാധാരണ വാടകക്കാർക്ക് സ്വന്തം നിലയിൽ മറ്റുള്ളവർക്ക് മുറികളോ താമസസൗകര്യമോ വീണ്ടും വാടകയ്ക്ക് നൽകാൻ അനുവാദമില്ല.

നിയമം ലംഘിച്ചാൽ 10 ലക്ഷം ദിർഹം വരെ പിഴ

പുതിയ നിയമപ്രകാരം, നിയമലംഘനങ്ങൾക്ക് 500 ദിർഹം മുതൽ അഞ്ച് ലക്ഷം ദിർഹം വരെ പിഴ ചുമത്താം. ഒരു വർഷത്തിനുള്ളിൽ അതേ നിയമലംഘനം ആവർത്തിച്ചാൽ പിഴ ഇരട്ടിയാക്കാം. ഇത്തരത്തിൽ പരമാവധി പിഴ 10 ലക്ഷം ദിർഹം വരെയാകാം.

നിയമലംഘനത്തിന്റെ സ്വഭാവമനുസരിച്ച് പെർമിറ്റ് റദ്ദാക്കൽ, സ്ഥാപനത്തിന്റെ പ്രവർത്തനം താൽക്കാലികമായി നിർത്തിവയ്ക്കൽ, മറ്റ് നടപടികൾ എന്നിവയും ഉണ്ടായേക്കാം. നിയമവിരുദ്ധമായ താമസസൗകര്യങ്ങൾ ഒഴിപ്പിക്കപ്പെടുന്നതിനും സാധ്യതയുണ്ട്.

നിലവിലുള്ള താമസസൗകര്യങ്ങൾക്ക് ഒരു വർഷത്തെ സാവകാശം

പുതിയ നിയമം പ്രാബല്യത്തിൽ വന്നതോടെ നിലവിൽ ഷെയറിങ് താമസത്തിനായി ഉപയോഗിക്കുന്ന കെട്ടിടങ്ങളും വില്ലകളും പുതിയ ചട്ടങ്ങൾക്കനുസരിച്ച് ക്രമീകരിക്കാൻ ഉടമകൾക്കും സ്ഥാപനങ്ങൾക്കും ഒരു വർഷത്തെ സാവകാശം നൽകിയിട്ടുണ്ട്. നിയമത്തിലെ വ്യവസ്ഥകൾ പ്രകാരം, ഈ കാലയളവിൽ ആവശ്യമായ അനുമതികളും മാനദണ്ഡങ്ങളും പാലിക്കണം.

പ്രവാസികൾക്ക് താങ്ങാനാവുന്ന നിരക്കിൽ താമസസൗകര്യം കണ്ടെത്തേണ്ടത് പ്രധാനമാണെങ്കിലും, നിയമപരമായ അനുമതികളില്ലാത്ത ഇടങ്ങളിൽ താമസിക്കുന്നത് സാമ്പത്തിക നഷ്ടത്തിനും മറ്റ് ബുദ്ധിമുട്ടുകൾക്കും കാരണമാകാം. അതിനാൽ ഷെയറിങ് താമസം തിരഞ്ഞെടുക്കുമ്പോൾ കുറഞ്ഞ വാടക മാത്രം പരിഗണിക്കാതെ, കെട്ടിടത്തിന്റെ നിയമസാധുതയും സുരക്ഷയും ഉറപ്പാക്കേണ്ടത് അത്യാവശ്യമാണ്.

യുഎഇയിലെ വാർത്തകളും പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ