ദുബായ്: യുഎഇയിൽ മഴയും ആലിപ്പഴവർഷവും തുടരുന്നു. രാജ്യത്തിന്റെ വിവിധ ഭാഗങ്ങളിൽ ഞായറാഴ്ച മഴ ലഭിച്ചതിന് പിന്നാലെ വരും ദിവസങ്ങളിലും മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ചില പ്രദേശങ്ങളിൽ ശക്തമായ മഴയ്ക്കും കാറ്റിനും സാധ്യതയുള്ളതിനാൽ താമസക്കാർ ജാഗ്രത പാലിക്കണമെന്ന് അധികൃതർ നിർദേശിച്ചു.

കിഴക്കൻ മേഖലകളിലും ചില ഉൾനാടൻ, പടിഞ്ഞാറൻ പ്രദേശങ്ങളിലും മഴ ലഭിക്കാൻ സാധ്യതയുണ്ട്. ഞായറാഴ്ച ചിലയിടങ്ങളിൽ മിതമായതോ ശക്തമായതോ ആയ മഴ ലഭിച്ചതായി റിപ്പോർട്ടുകളുണ്ട്. ദുബായിലെ മർഗം മേഖലയിൽ ആലിപ്പഴവർഷവും അനുഭവപ്പെട്ടു. മരുഭൂമിയിലെ മണൽപ്രദേശങ്ങളിൽ ആലിപ്പഴം വീണ് വെളുത്ത പുതപ്പ് വിരിച്ചതുപോലെയുള്ള കാഴ്ചകളും ശ്രദ്ധേയമായി.

വരും ദിവസങ്ങളിലും മഴയ്ക്ക് സാധ്യത

ഒക്ടോബർ 19 തിങ്കളാഴ്ചയും രാജ്യത്ത് പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും. ഉച്ചയോടെ കിഴക്കൻ മേഖലകളിൽ രൂപപ്പെടുന്ന സംവഹന മേഘങ്ങൾ ചില ഉൾനാടൻ, പടിഞ്ഞാറൻ പ്രദേശങ്ങളിലേക്ക് വ്യാപിക്കാനും മഴയ്ക്ക് കാരണമാകാനും സാധ്യതയുണ്ട്. ചൊവ്വ, ബുധൻ ദിവസങ്ങളിലും സമാനമായ കാലാവസ്ഥ തുടരാൻ സാധ്യതയുണ്ട്.

രാത്രിയിലും പുലർച്ചെയുമായി തീരദേശ, ഉൾനാടൻ മേഖലകളിൽ ഈർപ്പം വർധിക്കാനിടയുണ്ട്. ഇതോടെ ചിലയിടങ്ങളിൽ മൂടൽമഞ്ഞോ നേരിയ മഞ്ഞോ രൂപപ്പെടാനും സാധ്യതയുണ്ട്.

കാറ്റ് ശക്തമാകാം; പൊടിപടലങ്ങൾക്കും സാധ്യത

തെക്കുകിഴക്ക് ദിശയിൽനിന്ന് ആരംഭിക്കുന്ന കാറ്റ് പിന്നീട് വടക്കുപടിഞ്ഞാറൻ ദിശയിലേക്ക് മാറാൻ സാധ്യതയുണ്ട്. മണിക്കൂറിൽ 10 മുതൽ 25 കിലോമീറ്റർ വരെ വേഗത്തിൽ വീശുന്ന കാറ്റ് ചില സമയങ്ങളിൽ മണിക്കൂറിൽ 50 കിലോമീറ്റർ വരെ ശക്തി പ്രാപിച്ചേക്കാം. ശക്തമായ കാറ്റിനൊപ്പം പൊടിപടലങ്ങൾ ഉയരാനും സാധ്യതയുള്ളതിനാൽ വാഹനമോടിക്കുന്നവർ പ്രത്യേകം ശ്രദ്ധിക്കണം.

അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കുമെന്നാണ് പ്രവചനം.

വാഹനയാത്രക്കാർ ശ്രദ്ധിക്കണം

മഴയും കുറഞ്ഞ കാഴ്ചപരിധിയും അനുഭവപ്പെടുന്ന സാഹചര്യങ്ങളിൽ വാഹനമോടിക്കുമ്പോൾ കൂടുതൽ ജാഗ്രത പാലിക്കണമെന്ന് അധികൃതർ നിർദേശിച്ചു. കാഴ്ചപരിധി കുറയുമ്പോൾ ലോ-ബീം ഹെഡ്‌ലൈറ്റുകൾ ഉപയോഗിക്കണം. റോഡുകളിൽ പ്രദർശിപ്പിക്കുന്ന വേഗപരിധി നിർദേശങ്ങൾ കർശനമായി പാലിക്കുകയും വേണം.

വെള്ളക്കെട്ടുള്ള താഴ്ന്ന പ്രദേശങ്ങൾ, വാദികൾ, വെള്ളപ്പൊക്ക സാധ്യതയുള്ള മേഖലകൾ എന്നിവിടങ്ങളിലേക്ക് പോകുന്നത് ഒഴിവാക്കണം. വെള്ളം കയറിയ വാദികൾ മുറിച്ചുകടക്കാൻ ശ്രമിക്കരുതെന്നും കടൽത്തീരങ്ങളിലും മലമ്പ്രദേശങ്ങളിലും പ്രതികൂല കാലാവസ്ഥയുള്ളപ്പോൾ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി.

കാലാവസ്ഥാ സംബന്ധമായ ഔദ്യോഗിക അറിയിപ്പുകൾക്കായി ദേശീയ കാലാവസ്ഥാ നിരീക്ഷണ കേന്ദ്രത്തിന്റെ നിർദേശങ്ങൾ പിന്തുടരണമെന്നും സ്ഥിരീകരിക്കാത്ത വിവരങ്ങൾ പ്രചരിപ്പിക്കരുതെന്നും അധികൃതർ അഭ്യർഥിച്ചു.