UAE Lucky Day Lottery Winner;ഷാർജ: യുഎഇയിലെ ലക്കി ഡേ ലോട്ടറി നറുക്കെടുപ്പിൽ ഇന്ത്യക്കാരന് ലഭിച്ചത് ഏകദേശം 13 കോടി രൂപയുടെ വമ്പൻ സമ്മാനം. ഷാർജയിൽ താമസിക്കുന്ന 59കാരനായ കിഷോറിനാണ് 50 ലക്ഷം ദിർഹം (ഏകദേശം 12.94 കോടി രൂപ) സമ്മാനമായി ലഭിച്ചത്. വെറും 50 ദിർഹം (ഏകദേശം 1,294 രൂപ) ചെലവഴിച്ചെടുത്ത ടിക്കറ്റിലൂടെയാണ് കിഷോറിനെ ഭാഗ്യം തേടിയെത്തിയത്.

ഈസി പിക്ക് തിരഞ്ഞെടുത്തു; ഭാഗ്യം തുണച്ചു

ഒക്ടോബർ മൂന്നിന് നടന്ന ലക്കി ഡേ നറുക്കെടുപ്പിലാണ് കിഷോർ രണ്ടാം സമ്മാനം സ്വന്തമാക്കിയത്. സ്വന്തമായി നമ്പറുകൾ തിരഞ്ഞെടുക്കുന്നതിന് പകരം ലോട്ടറിയിലെ ‘ഈസി പിക്ക്’ സംവിധാനമാണ് അദ്ദേഹം ഉപയോഗിച്ചത്. നറുക്കെടുപ്പിൽ ‘ഡേയ്‌സ്’ വിഭാഗത്തിലെ ആറ് നമ്പറുകളും കൃത്യമായി ഒത്തുവന്നതോടെയാണ് 50 ലക്ഷം ദിർഹത്തിന്റെ സമ്മാനത്തിന് അർഹനായത്.

4, 5, 12, 14, 17, 18 എന്നിവയായിരുന്നു വിജയിച്ച നമ്പറുകൾ. ലക്കി നമ്പർ 10 ആയിരുന്നു.

വിജയവാർത്ത ആദ്യം വിശ്വസിക്കാനായില്ല

വിജയികളുടെ പട്ടികയിൽ സ്വന്തം പേര് കണ്ടപ്പോൾ ആദ്യം വിശ്വസിക്കാനായില്ലെന്ന് കിഷോർ പറഞ്ഞു. പിന്നീട് ലോട്ടറി അക്കൗണ്ട് പരിശോധിച്ചപ്പോഴാണ് സമ്മാനം ലഭിച്ച വിവരം സ്ഥിരീകരിച്ചത്. യുഎഇ ലോട്ടറിയുടെ ഔദ്യോഗിക പ്ലാറ്റ്‌ഫോം വഴിയാണ് അദ്ദേഹം ടിക്കറ്റ് വാങ്ങിയത്.

78 കോടി രൂപയുടെ ഒന്നാം സമ്മാനം ഇനിയും ബാക്കി

ലക്കി ഡേ ലോട്ടറിയിൽ ഒന്നാം സമ്മാനമായി ലഭിക്കുന്നത് 3 കോടി ദിർഹമാണ്. ഏകദേശം 78 കോടി രൂപയ്ക്ക് തുല്യമായ ഈ വമ്പൻ സമ്മാനം സ്വന്തമാക്കാൻ ‘ഡേയ്‌സ്’ വിഭാഗത്തിലെ ആറ് നമ്പറുകൾക്കൊപ്പം ലക്കി മന്ത് നമ്പറും ഒത്തുവരണം.

എല്ലാ ബുധനാഴ്ചയും ശനിയാഴ്ചയും രാത്രി 9.30നാണ് ലക്കി ഡേ നറുക്കെടുപ്പ് നടക്കുന്നത്. കിഷോറിന് രണ്ടാം സമ്മാനം ലഭിച്ചതോടെ യുഎഇയിലെ പ്രവാസികൾക്കിടയിൽ ലോട്ടറി വീണ്ടും വാർത്തകളിൽ ഇടംപിടിച്ചിരിക്കുകയാണ്.

പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ