Dubai Gold Price Today:ദുബായ്: ഇന്നലെയുണ്ടായ കനത്ത ഇടിവിന് പിന്നാലെ ദുബായിൽ സ്വർണ്ണവിലയിൽ വീണ്ടും മുന്നേറ്റം. ആഗോള വിപണിയിലും സ്വർണ്ണവില ഉയർന്നതോടെ യുഎഇയിലെ സ്വർണ്ണവിലയിൽ വർധന രേഖപ്പെടുത്തി. എന്നാൽ 24 കാരറ്റ് സ്വർണ്ണത്തിന്റെ വില ഗ്രാമിന് 500 ദിർഹത്തിന് താഴെയാണ് തുടരുന്നത്. ധൻതേരാസും ദീപാവലിയും അടുത്തിരിക്കെ വിലയിലുണ്ടായ മാറ്റം സ്വർണ്ണം വാങ്ങാനൊരുങ്ങുന്ന ഇന്ത്യൻ ഉപഭോക്താക്കൾക്ക് നിർണായകമാണ്.
ദുബായ് ജ്വല്ലറി ഗ്രൂപ്പിന്റെ വിവരങ്ങൾ പ്രകാരം, വ്യാഴാഴ്ച രാവിലെ വിപണി തുറന്നപ്പോൾ 24 കാരറ്റ് സ്വർണ്ണത്തിന് ഗ്രാമിന് 499.75 ദിർഹമായിരുന്നു വില. ബുധനാഴ്ച വിപണി അവസാനിക്കുമ്പോൾ ഇത് 492.75 ദിർഹമായിരുന്നു. ഒറ്റ ദിവസംകൊണ്ട് ഗ്രാമിന് ഏഴ് ദിർഹത്തിന്റെ വർധനയാണ് രേഖപ്പെടുത്തിയത്.
വിവിധ കാരറ്റുകളിലെ ഇന്നത്തെ സ്വർണ്ണവില
വ്യാഴാഴ്ച രാവിലെ രേഖപ്പെടുത്തിയ നിരക്കുകൾ പ്രകാരം:
- 24 കാരറ്റ്: ഗ്രാമിന് 499.75 ദിർഹം
- 22 കാരറ്റ്: ഗ്രാമിന് 462.75 ദിർഹം
- 21 കാരറ്റ്: ഗ്രാമിന് 443.50 ദിർഹം
- 18 കാരറ്റ്: ഗ്രാമിന് 380.25 ദിർഹം
ആഗോള വിപണിയിലും വില ഉയർന്നു
ബുധനാഴ്ച ഒരു ശതമാനത്തിലധികം ഇടിവ് രേഖപ്പെടുത്തിയതിന് പിന്നാലെയാണ് ആഗോള വിപണിയിൽ സ്വർണ്ണവില തിരിച്ചുകയറിയത്. സ്പോട്ട് ഗോൾഡ് വില 1.4 ശതമാനം ഉയർന്ന് ഔൺസിന് 4,144 ഡോളറിലെത്തി. വെള്ളിവിലയും 0.4 ശതമാനം വർധിച്ച് ഔൺസിന് 205.70 ഡോളറായി.
ദീപാവലി വാങ്ങലുകൾക്ക് ആശ്വാസമാകുമോ?
ധൻതേരാസും ദീപാവലിയും അടുത്തിരിക്കെ സ്വർണ്ണവിപണിയിലെ ഓരോ മാറ്റവും യുഎഇയിലെ ഇന്ത്യൻ ഉപഭോക്താക്കൾ ശ്രദ്ധയോടെയാണ് നിരീക്ഷിക്കുന്നത്. ഉത്സവകാലത്ത് സ്വർണ്ണനാണയങ്ങളും ആഭരണങ്ങളും വാങ്ങുന്നത് പതിവായതിനാൽ വിലയിലെ ഏറ്റക്കുറച്ചിലുകൾ വാങ്ങൽ തീരുമാനങ്ങളെയും സ്വാധീനിക്കും.
എന്നാൽ സ്വർണ്ണവിലയിൽ ഇന്ന് മുന്നേറ്റമുണ്ടായെങ്കിലും ഗ്രാമിന് 500 ദിർഹത്തിന് താഴെ തുടരുന്നത് ഉപഭോക്താക്കൾക്ക് ആശ്വാസകരമാണ്. വരും ദിവസങ്ങളിൽ വില വീണ്ടും ഉയരുമോ അതോ കുറയുമോ എന്നറിയാൻ വിപണിയുടെ അടുത്ത നീക്കങ്ങൾക്കായി കാത്തിരിക്കുകയാണ് സ്വർണ്ണം വാങ്ങാനൊരുങ്ങുന്ന പ്രവാസികൾ.
