ദുബൈ: യുഎഇയിൽ വാടക കരാറുകളിൽ ഒപ്പിടുന്നതിന് മുൻപ് വാടകക്കാരുടെ സാമ്പത്തിക പശ്ചാത്തലം പരിശോധിക്കാനുള്ള ‘ടെനന്റ് സ്‌ക്രീനിംഗ്’ സേവനത്തിന് തുടക്കമായി. ഇത്തിഹാദ് ക്രെഡിറ്റ് ബ്യൂറോ (ECB) ഔദ്യോഗികമായി പുറത്തിറക്കിയ ഈ പുതിയ സംവിധാനം വഴി വീട്ടുടമസ്ഥർക്ക് സാധ്യതയുള്ള വാടകക്കാരുടെ ക്രെഡിറ്റ് സ്കോറുകൾ പരിശോധിക്കാൻ സാധിക്കും.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

പൂർണ്ണമായും ഡിജിറ്റലായ ഈ പ്രക്രിയ ‘യുഎഇ പാസ്’ (UAE Pass) വഴിയാണ് നിയന്ത്രിക്കപ്പെടുന്നത്. മെയ് മാസത്തിൽ പ്രഖ്യാപിച്ച ഈ സേവനം ഇപ്പോൾ ഇസിബി (ECB) മൊബൈൽ ആപ്പ് വഴി പൊതുജനങ്ങൾക്ക് ലഭ്യമാണ്.

പരിശോധന പൂർണ്ണമായും വാടകക്കാരന്റെ സമ്മതത്തോടെ മാത്രം

ഈ സേവനത്തിന്റെ ഏറ്റവും വലിയ പ്രത്യേകത സുരക്ഷയും സ്വകാര്യതയുമാണ്. വാടകക്കാരന്റെ മുൻകൂർ അനുമതിയില്ലാതെ വീട്ടുടമസ്ഥർക്ക് വിവരങ്ങൾ ലഭിക്കില്ല. വീട്ടുടമസ്ഥൻ ഇസിബി ആപ്പിൽ വാടകക്കാരന്റെ എമിറേറ്റ്സ് ഐഡി വിവരങ്ങൾ നൽകി പണമടയ്ക്കുമ്പോൾ, വാടകക്കാരന്റെ യുഎഇ പാസിലേക്ക് ഒരു നോട്ടിഫിക്കേഷൻ എത്തും.

വാടകക്കാരൻ ഈ അഭ്യർത്ഥന യുഎഇ പാസ് വഴി ഡിജിറ്റലായി അംഗീകരിച്ചാൽ മാത്രമേ ക്രെഡിറ്റ് സ്കോർ വീട്ടുടമസ്ഥന് കാണാൻ സാധിക്കൂ. വാടകക്കാരൻ ഈ അഭ്യർത്ഥന നിരസിക്കുകയോ നിശ്ചിത സമയത്തിനകം പ്രതികരിക്കാതിരിക്കുകയോ ചെയ്താൽ വിവരങ്ങൾ പങ്കിടില്ല. കൂടാതെ വീട്ടുടമസ്ഥൻ അടച്ച തുക ഓട്ടോമാറ്റിക്കായി റീഫണ്ട് ചെയ്യപ്പെടും.

വീട്ടുടമസ്ഥരേയും വാടകക്കാരേയും ഇത് എങ്ങനെ ബാധിക്കുന്നു?

വീട്ടുടമസ്ഥർക്ക് (Landlords): ഒരേ വീടിനായി ഒന്നിലധികം അപേക്ഷകർ വരുമ്പോൾ, കൃത്യമായി വാടക നൽകാൻ സാമ്പത്തിക അച്ചടക്കമുള്ള വ്യക്തിയെ തിരഞ്ഞെടുക്കാൻ ഈ ക്രെഡിറ്റ് സ്കോർ പരിശോധന സഹായിക്കും. ശമ്പള സർട്ടിഫിക്കറ്റ്, ബാങ്ക് സ്റ്റേറ്റ്‌മെന്റ് എന്നിവയ്‌ക്കൊപ്പം ഉപയോഗിക്കാവുന്ന അധിക സുരക്ഷാ മാനദണ്ഡമാണിത്.

വാടകക്കാർക്ക് (Tenants): മികച്ച ക്രെഡിറ്റ് സ്കോറുള്ള വാടകക്കാർക്ക് മുൻഗണന ലഭിക്കാൻ ഇത് സഹായിക്കും. എന്നാൽ കുറഞ്ഞ ക്രെഡിറ്റ് സ്കോറുള്ളവർക്ക് ഇത് തിരിച്ചടിയായേക്കാം. അതിനാൽ പ്രോപ്പർട്ടികൾ അന്വേഷിക്കുന്നതിന് മുൻപ് സ്വന്തം ക്രെഡിറ്റ് റിപ്പോർട്ടുകൾ പരിശോധിച്ച് കൃത്യത ഉറപ്പാക്കാൻ ഇസിബി നിർദ്ദേശിക്കുന്നു.

ക്രെഡിറ്റ് കാർഡ് കുടിശ്ശികകൾ, ലോൺ തിരിച്ചടവുകൾ എന്നിവ അടിസ്ഥാനമാക്കിയാണ് യുഎഇയിൽ ക്രെഡിറ്റ് സ്കോർ നിശ്ചയിക്കുന്നത്. ബാങ്കിംഗ് ആവശ്യങ്ങൾക്ക് പുറമെ ഇപ്പോൾ വാടക വിപണിയിലേക്കും ഈ സംവിധാനം വ്യാപിപ്പിച്ചതോടെ യുഎഇ നിവാസികൾ സാമ്പത്തിക അച്ചടക്കം പാലിക്കേണ്ടത് ഇനി അത്യന്താപേക്ഷിതമാകും.

യുഎഇ വീസ നിയമത്തിൽ വൻ മാറ്റങ്ങൾ; പ്രവാസികൾക്കും സന്ദർശകർക്കും നിർണായകം, അറിയാം പ്രധാന പരിഷ്കാരങ്ങൾ

UAE July 5, 2026

അബുദാബി∙ യുഎഇ 2026-ൽ നടപ്പിലാക്കിയിരിക്കുന്നത് പ്രവാസികൾക്കും സന്ദർശകർക്കും നിക്ഷേപകർക്കും ഒരുപോലെ നിർണായകമായ ഒട്ടേറെ വീസാ പരിഷ്കാരങ്ങൾ. ഓൺ അറൈവൽ വീസ ആനുകൂല്യം കൂടുതൽ രാജ്യങ്ങളിലേക്ക് വ്യാപിപ്പിച്ചത് മുതൽ ടൂറിസ്റ്റ് വീസകൾ അതിവേഗം ലഭ്യമാക്കുന്നത് വരെയുള്ള പ്രധാന മാറ്റങ്ങൾ അറിയാം:

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

∙ ഓൺ അറൈവൽ വിസ ആനുകൂല്യം കൂടുതൽ രാജ്യങ്ങളിലേക്ക്
ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) 14 ദിവസത്തെയും 60 ദിവസത്തെയും യുഎഇ എൻട്രി വിസയ്ക്കുള്ള അർഹത ആറ് രാജ്യങ്ങളിലെ പൗരന്മാർക്ക് കൂടി വ്യാപിപ്പിച്ചു. മുൻപ് പ്രത്യേക നിബന്ധനകളോടെ ഇന്ത്യൻ പൗരന്മാർക്ക് മാത്രം ലഭ്യമായിരുന്ന ഈ ആനുകൂല്യം ഇനി മുതൽ ഇന്തോനീഷ്യ, വിയറ്റ്നാം, തായ് ലൻഡ്, ഫിലിപ്പീൻസ്, കെനിയ, ദക്ഷിണാഫ്രിക്ക എന്നീ രാജ്യങ്ങളിലെ പൗരന്മാർക്കും ലഭിക്കും. കൂടാതെ, അപേക്ഷകർക്ക് യുഎസ്, യുകെ, യൂറോപ്യൻ യൂണിയൻ രാജ്യങ്ങൾ എന്നിവയ്ക്ക് പുറമെ സിംഗപ്പൂർ, ജപ്പാൻ, ദക്ഷിണ കൊറിയ, ഓസ്‌ട്രേലിയ, ന്യൂസിലാൻഡ്, കാനഡ എന്നീ രാജ്യങ്ങളിലെ സാധുവായ റസിഡൻസി ഉണ്ടെങ്കിലും ഈ ആനുകൂല്യത്തിന് അർഹതയുണ്ടായിരിക്കും

48 മണിക്കൂറിനുള്ളിൽ ദുബായ് ടൂറിസ്റ്റ് വീസ
ദുബായ് സന്ദർശിക്കാൻ ആഗ്രഹിക്കുന്നവർക്ക് സിംഗിൾ എൻട്രി ടൂറിസ്റ്റ് വീസകൾ ഇനി മുതൽ 48 മണിക്കൂറിനുള്ളിൽ അനുവദിക്കും. അംഗീകൃത ടൂറിസം ഓഫീസുകൾ വഴിയോ ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് (ജിഡിആർഎഫ്എ) വഴിയോ അപേക്ഷിക്കുന്നവർക്കാണ് 30 മുതൽ 60 ദിവസം വരെ കാലാവധിയുള്ള ഈ വീസകൾ അതിവേഗം ലഭ്യമാകുക.

പ്രോപ്പർട്ടി നിക്ഷേപകർക്കുള്ള രണ്ട് വർഷത്തെ വീസ നിയമം പരിഷ്കരിച്ചു
റിയൽ എസ്റ്റേറ്റ് നിക്ഷേപകർക്ക് രണ്ട് വർഷത്തെ വീസ അനുവദിക്കുന്നതിനുള്ള നിബന്ധനകളിൽ ദുബായ് അധികൃതർ മാറ്റം വരുത്തി. മുൻപുണ്ടായിരുന്ന 7,50,000 ദിർഹത്തിന്റെ കുറഞ്ഞ വസ്തു മൂല്യം എന്ന നിബന്ധന വ്യക്തിഗത നിക്ഷേപകർക്ക് ഒഴിവാക്കി. എന്നാൽ അപേക്ഷകൻ വസ്തുവിന്റെ പൂർണ ഉടമയായിരിക്കണം. അതേസമയം, ഒന്നിലേറെ ആളുകളുടെ സംയുക്ത ഉടമസ്ഥതയിലുള്ള വസ്തുവാണെങ്കിൽ, വീസയ്ക്ക് അർഹത നേടാൻ ഓരോ നിക്ഷേപകന്റെയും വിഹിതത്തിന് കുറഞ്ഞത് 4,00,000 ദിർഹം മൂല്യമുണ്ടായിരിക്കണം.

ഓവർസ്റ്റേ പിഴ ഒഴിവാക്കിയവർക്ക് താൽക്കാലിക ഇളവ്
വ്യോമപാതകൾ അടച്ചതും വിമാന സർവീസുകൾ തടസ്സപ്പെട്ടതും കാരണം വീസ കാലാവധി കഴിഞ്ഞിട്ടും പിഴയിൽ നിന്ന് താൽക്കാലിക ഇളവ് ലഭിച്ചിരുന്ന സന്ദർശകർക്ക് ഐസിപി 30 ദിവസത്തെ ഗ്രേസ് പിരീഡ് അനുവദിച്ചു. അടിയന്തര സാഹചര്യങ്ങൾ മാറിയതിനാൽ, ഇളവ് ലഭിച്ചവർ ജൂലൈ 9-നകം വീസ നിയമവിധേയമാക്കുകയോ യുഎഇ വിട്ടുപോവുകയോ ചെയ്യണം.

സ്മാർട്ട് മെഡിക്കൽ വീസ വരുന്നു
ദുബായിലേക്ക് ചികിത്സയ്ക്കായി എത്തുന്ന രാജ്യാന്തര രോഗികൾക്കായി ‘സ്മാർട്ട് മെഡിക്കൽ വീസ’ സംവിധാനം വികസിപ്പിക്കുന്നു. ദുബായ് ഹെൽത്ത് അതോറിറ്റിയും ജിഡിആർഎഫ്എയും ഒപ്പുവച്ച ധാരണാപത്രം അനുസരിച്ച്, രോഗികൾ ദുബായിൽ എത്തുന്നതിന് മുൻപുള്ള വീസ നടപടികൾ മുതൽ ചികിത്സയും തുടർപരിചരണവും വരെയുള്ള സേവനങ്ങൾ ഡിജിറ്റലായി സംയോജിപ്പിക്കും.

എബോള ബാധിത രാജ്യങ്ങളിൽ നിന്നുള്ള വീസകൾക്ക് താൽക്കാലിക വിലക്ക്
എബോള വൈറസ് വ്യാപനം തടയുന്നതിനുള്ള മുൻകരുതലിന്റെ ഭാഗമായി കോംഗോ, ഉഗാണ്ട, ദക്ഷിണ സുഡാൻ എന്നീ രാജ്യങ്ങളിലെ പൗരന്മാർക്ക് പുതിയ വീസകൾ നൽകുന്നത് താൽക്കാലികമായി നിർത്തിവച്ചു. നാഷണൽ എമർജൻസി ക്രൈസിസ് ആൻഡ് ഡിസാസ്റ്റേഴ്സ് മാനേജ്‌മെന്റ് അതോറിറ്റിയും ഐസിപിയും സംയുക്തമായാണ് ജൂൺ 6 മുതൽ ഈ നിയന്ത്രണം ഏർപ്പെടുത്തിയത്. ആരോഗ്യ സാഹചര്യങ്ങൾ വിലയിരുത്തി മാത്രമായിരിക്കും ഇതിൽ തുടർന്നുള്ള തീരുമാനം.