UAE 5 billion dollar investment India അബുദാബി: ഇന്ത്യൻ പ്രധാനമന്ത്രി നരേന്ദ്ര മോദിയുടെ യുഎഇ സന്ദർശനം ഇരുരാജ്യങ്ങളും തമ്മിലുള്ള ചരിത്രപരമായ നയതന്ത്ര-സാമ്പത്തിക ബന്ധം കൂടുതൽ ശക്തമാക്കി. “നിങ്ങളുടെ രണ്ടാമത്തെ വീടായ യുഎഇയിലേക്ക് സ്വാഗതം” എന്ന് പറഞ്ഞുകൊണ്ട് യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ നേരിട്ടെത്തി പ്രധാനമന്ത്രിയെ സ്വീകരിച്ചു. യുഎഇ തന്റെ രണ്ടാം വീടാണെന്നും യുഎഇ പ്രസിഡന്റ് തന്റെ പ്രിയപ്പെട്ട സഹോദരനാണെന്നും മോദിയും വ്യക്തമാക്കി.

സന്ദർശനത്തിലെ പ്രധാന പ്രഖ്യാപനങ്ങളും വൻകിട കരാറുകളും:

• ഊർജ്ജ സുരക്ഷാ കരാർ: ഇന്ത്യയുടെ ഊർജ്ജ സുരക്ഷ ഉറപ്പാക്കുന്നതിനായി മൂന്ന് കോടി ബാരൽ പെട്രോളിയം ഇന്ത്യയിൽ സംഭരിക്കാൻ യുഎഇയുടെ അഡ്നോക് (ADNOC) കമ്പനിയുമായി ധാരണയായി. ദീർഘകാല എൽപിജി, എൽഎൻജി വിതരണത്തിനും തന്ത്രപ്രധാന സഹകരണമുണ്ടാകും. ഒപെക് (OPEC) വിട്ട ശേഷമുള്ള യുഎഇയുടെ എണ്ണ കയറ്റുമതിയിൽ ഇന്ത്യ സുപ്രധാന പങ്കാളിയാകും.
• വമ്പൻ സാമ്പത്തിക നിക്ഷേപം: എമിറേറ്റ്‌സ് എൻബിഡി ബാങ്ക്, അബുദാബി ഇൻവെസ്റ്റ്‌മെന്റ് അതോറിറ്റി എന്നിവ വഴി 500 കോടി ഡോളർ (ഏകദേശം 41,000 കോടിയിലധികം രൂപ) യുഎഇ ഇന്ത്യയിൽ നിക്ഷേപിക്കും.
• വ്യവസായ-പ്രതിരോധ സഹകരണം: പ്രതിരോധ മേഖലയിൽ സാങ്കേതിക വിദ്യയും കണ്ടെത്തലുകളും പരസ്പരം കൈമാറും. ഗുജറാത്തിലെ വടിനാറിൽ കപ്പൽ അറ്റകുറ്റപ്പണിക്കായി ‘ഷിപ്പ് റിപ്പയർ ക്ലസ്റ്റർ’ സ്ഥാപിക്കുന്നതിനും കൊച്ചിൻ ഷിപ്പ്‌യാർഡുമായി ചേർന്നുള്ള നിർമ്മാണ പ്രവർത്തനങ്ങൾക്കും ധാരണാപത്രത്തിൽ ഒപ്പുവെച്ചു.
• മേഖലയിലെ സുരക്ഷ: പശ്ചിമേഷ്യൻ സംഘർഷങ്ങളിൽ യുഎഇക്ക് പരമാധികാരവും സുരക്ഷയും ഉറപ്പാക്കാൻ ഇന്ത്യ ഒപ്പമുണ്ടാകുമെന്ന് പ്രധാനമന്ത്രി ഉറപ്പുനൽകി. ആഗോള വ്യാപാര പാതയായ ഹോർമുസ് കടലിടുക്ക് തടസ്സമില്ലാതെ തുറന്നുനൽകേണ്ടത് അത്യാവശ്യമാണെന്നും അദ്ദേഹം ഓർമ്മിപ്പിച്ചു.

ഏതാനും മണിക്കൂറുകൾ മാത്രം നീണ്ടുനിന്ന സന്ദർശനത്തിനൊടുവിൽ യുഎഇ പ്രസിഡന്റിനെ മോദി ഇന്ത്യയിലേക്ക് ക്ഷണിക്കുകയും ചെയ്തു.

വിമാന യാത്രയിൽ ആകാശത്ത് പകച്ച് യാത്രക്കാർ; ബോധംകെട്ട യുവാവിന് ദൈവദൂതയായി മലയാളി നഴ്‌സ്

UAE Nazia Staff Editor — May 16, 2026 · 0 Comment

UAE nurse rescue collapsed passenger മേയ് 12-ന് ദുബായിൽ നിന്ന് തിരുച്ചിറപ്പള്ളിയിലേക്ക് പുറപ്പെട്ട എയർ ഇന്ത്യ എക്സ്പ്രസ് വിമാനം ടേക്ക് ഓഫ് ചെയ്ത് 20 മിനിറ്റിനകം കാബിനിൽ പരിഭ്രാന്തി പരന്നു. വിമാനത്തിലുണ്ടായിരുന്ന 32 വയസ്സുകാരനായ യാത്രക്കാരൻ പെട്ടെന്ന് കുഴഞ്ഞുവീഴുകയും അബോധാവസ്ഥയിലാകുകയും ചെയ്തു. യാത്രക്കാർ എന്തുചെയ്യണമെന്നറിയാതെ പകച്ചുനിന്ന നിമിഷത്തിൽ, റസൽഖൈമ ഹോസ്പിറ്റലിലെ നഴ്‌സായ അഖിലാവിയൻ നീലകണ്ഠൻ സഹായവുമായി മുന്നോട്ടുവരികയായിരുന്നു. വിമാനത്തിൽ മെഡിക്കൽ പ്രൊഫഷണലുകളുടെ സഹായം തേടിക്കൊണ്ട് കാബിൻ ക്രൂ അനൗൺസ്‌മെന്റ് നടത്തിയ ഉടൻ വിമാനത്തിന്റെ പിൻസീറ്റിലിരിക്കുകയായിരുന്ന അഖിലാവിയൻ രോഗിയുടെ അടുത്തേക്ക് എത്തി. യുവാവിന് ശ്വാസമുണ്ടായിരുന്നെങ്കിലും വിളിച്ചാൽ പ്രതികരിക്കുന്നുണ്ടായിരുന്നില്ല. തുടർന്ന് വിറയലും അപസ്മാരത്തിന്റേത് പോലുള്ള ലക്ഷണങ്ങളും കാണിക്കാൻ തുടങ്ങി. യാത്രക്കാർ പരിഭ്രാന്തിയിലായപ്പോഴും തികഞ്ഞ ആത്മവിശ്വാസത്തോടെ അഖിലാവിയൻ പ്രാഥമിക ശുശ്രൂഷകൾ നൽകി. പിന്നീട് വിമാനത്തിലുണ്ടായിരുന്ന മറ്റൊരു ഡോക്ടറും ഇവർക്കൊപ്പം ചേർന്നു. കൂടുതൽ സ്ഥലസൗകര്യത്തിനായി രോഗിയെ വിമാനത്തിന്റെ മുൻഭാഗത്തേക്ക് മാറ്റി.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

വിമാനത്തിൽ ലഭ്യമായ പരിമിതമായ മെഡിക്കൽ കിറ്റ് ഉപയോഗിച്ച് ഡോക്ടറുടെ നിർദ്ദേശപ്രകാരം അഖിലാവിയൻ ഐവി (IV) ലൈൻ നൽകുകയും പൾസും ബിപിയും നിരന്തരം നിരീക്ഷിക്കുകയും ചെയ്തു. രക്തത്തിലെ ഗ്ലൂക്കോസ് നില കുറഞ്ഞതാകാം കാരണമെന്ന് സംശയിച്ചെങ്കിലും വിമാനത്തിൽ ഗ്ലൂക്കോമീറ്റർ ഉണ്ടായിരുന്നില്ല. തുടർന്ന് ഇലക്ട്രോലൈറ്റുകളും ഐവി ഫ്ലൂയിഡുകളും നൽകി രണ്ട് മണിക്കൂർ നീണ്ട പരിശ്രമത്തിനൊടുവിലാണ് യുവാവിന്റെ നില സുരക്ഷിതമാക്കിയത്. തന്റെ കരിയറിലെ ആദ്യത്തെ അവധിക്കാലം ആഘോഷിക്കാൻ നാട്ടിലേക്ക് മടങ്ങുകയായിരുന്ന അഖിലാവിയന്റെ ജീവിതത്തിലെ രണ്ടാമത്തെ മാത്രം വിമാനയാത്രയായിരുന്നു ഇത്. യുവാവ് ബോധം വീണ്ടെടുത്ത ശേഷം അഖിലാവിയൻ അടുത്തെത്തി സുഖവിവരങ്ങൾ അന്വേഷിച്ചപ്പോൾ, “ഇപ്പോൾ കുഴപ്പമില്ല സഹോദരീ” എന്ന് അദ്ദേഹം മറുപടി നൽകി. വിമാനമിറങ്ങിയ ഉടൻ തന്നെ വിമാനത്താവളത്തിൽ കാത്തുനിന്ന അടിയന്തര മെഡിക്കൽ സംഘത്തിന് യുവാവിനെ കൈമാറി. വിമാനത്തിലുണ്ടായിരുന്ന യാത്രക്കാരന് കൃത്യസമയത്ത് മികച്ച പരിചരണം നൽകിയതിന് എയർ ഇന്ത്യ ക്രൂ അഖിലാവിയന് കൈപ്പടയിൽ എഴുതിയ നന്ദിപത്രവും സമ്മാനിച്ചു.

യുഎഇയിൽ ബസും ട്രക്കും കൂട്ടിയിടിച്ച് മരണം;19 പേർക്ക് പരിക്ക്

UAE May 14, 2026

‌ദുബൈ: അൽ യലായിസ് സ്ട്രീറ്റിൽ തൊഴിലാളികൾ സഞ്ചരിച്ചിരുന്ന ബസും ട്രക്കും കൂട്ടിയിടിച്ചുണ്ടായ അപകടത്തിൽപ്പെട്ട് ഒരു തൊഴിലാളി മരിച്ചു. 19 പേർക്ക് പരുക്കേറ്റതായും ഇതിൽ എട്ടുപേരുടെ നില ഗുരുതരമാണെന്നും ദുബൈ പൊലിസ് അറിയിച്ചു. ഇന്ന് ഉച്ചയോടെ എമിറേറ്റ്‌സ് റോഡിലേക്കുള്ള ദിശയിൽ ശൈഖ് സായിദ് ബിൻ ഹംദാൻ പാലത്തിന് സമീപമായിരുന്നു അപകടം.

സാങ്കേതിക തകരാർ മൂലം ബസ് റോഡിന് നടുവിൽ പെട്ടെന്ന് നിർത്തിയതാണ് അപകടത്തിന് കാരണമായത്. പുറകിൽ വന്ന ട്രക്ക് സുരക്ഷിതമായ അകലം പാലിക്കാത്തതിനാലും ഡ്രൈവറുടെ അശ്രദ്ധ മൂലവുമാണ് ബസിലേക്ക് ഇടിച്ചുകയറിയതെന്ന് പ്രാഥമിക അന്വേഷണത്തിൽ വ്യക്തമായി.

പരുക്കേറ്റവരെ ഉടൻ തന്നെ വിദഗ്ധ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. അപകടത്തെത്തുടർന്ന് ഗതാഗത തടസ്സം ഒഴിവാക്കാൻ പൊലിസ് വാഹനങ്ങൾ വഴിതിരിച്ചുവിട്ടു.

കർശന മുന്നറിയിപ്പുമായി പൊലിസ്

റോഡിന്റെ മധ്യത്തിൽ വാഹനങ്ങൾ നിർത്തുന്നത് വലിയ ദുരന്തങ്ങൾക്ക് കാരണമാകുമെന്ന് ദുബൈ പൊലിസിലെ ജനറൽ ഡിപ്പാർട്ട്‌മെന്റ് ഓഫ് ട്രാഫിക് ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ മുന്നറിയിപ്പ് നൽകി.

“വാഹനങ്ങൾ തകരാറിലായാൽ റോഡിൽ നിന്ന് സുരക്ഷിതമായി മാറ്റാൻ കഴിയുന്നില്ലെങ്കിൽ ഉടൻ പൊലിസിനെ വിവരമറിയിക്കണം. ഹസാർഡ് ലൈറ്റുകൾ തെളിക്കാനും മുന്നറിയിപ്പ് ത്രികോണങ്ങൾ സ്ഥാപിക്കാനും ഡ്രൈവർമാർ ശ്രദ്ധിക്കണം.” ബ്രിഗേഡിയർ ബിൻ സുവൈദാൻ വ്യക്തമാക്കി.

പിഴയും നടപടികളും

റോഡിലെ സുരക്ഷാ നിയമങ്ങൾ ലംഘിക്കുന്നവർക്കെതിരെ കടുത്ത നടപടി ഉണ്ടാകുമെന്ന് പൊലിസ് ഓർമ്മിപ്പിച്ചു. റോഡിന് നടുവിൽ വാഹനം നിർത്തിയാൽ 1,000 ദിർഹം പിഴയും 6 ബ്ലാക്ക് പോയിന്റുകളും ചുമത്തും.

യാത്ര തുടങ്ങുന്നതിന് മുമ്പ് വാഹനങ്ങളുടെ സാങ്കേതികക്ഷമത ഉറപ്പാക്കണമെന്നും, ടെയിൽഗേറ്റിംഗ് (മുന്നിലുള്ള വാഹനത്തോട് കൃത്യമായ അകലം പാലിക്കാതിരിക്കൽ) പോലുള്ള നിയമലംഘനങ്ങൾ ഒഴിവാക്കണമെന്നും അധികൃതർ കർശന നിർദ്ദേശം നൽകി. കഴിഞ്ഞ വർഷം യുഎഇയിൽ നടന്ന 849 അപകടങ്ങൾക്കും കാരണം ഇത്തരം അശ്രദ്ധകളാണെന്ന് ഔദ്യോഗിക കണക്കുകൾ സൂചിപ്പിക്കുന്നു

പ്രവാസികള്‍ക്ക് കോളടിച്ചു, സൗജന്യ ഇന്റര്‍നെറ്റ് മുതല്‍ കുടിക്കാന്‍ തണുത്ത വെള്ളം വരെയായി താമസ സൗകര്യം

ദുബായ്: പ്രവാസി തൊഴിലാളികള്‍ക്ക് മെച്ചപ്പെട്ട താമസസൗകര്യം ഒരുക്കണമെന്ന് യുഎഇ മാനവശേഷി, സ്വദേശിവല്‍ക്കരണ മന്ത്രാലയം. വേനല്‍ച്ചൂട് കടുക്കുന്നതിന് മുന്നോടിയായിട്ടാണ് രാജ്യത്തെ തൊഴിലാളികളുടെ താമസസൗകര്യം മെച്ചപ്പെടുത്തണമെന്ന നിര്‍ദേശം. തൊഴിലാളികള്‍ക്ക് അന്തസ്സുള്ള താമസസൗകര്യം ഒരുക്കുക എന്നത് തൊഴിലുടമയുടെ ഔദാര്യമല്ല, മറിച്ച് നിയമപരമായ ബാദ്ധ്യതയാണെന്ന് മന്ത്രാലയം ഓര്‍മിപ്പിച്ചു.

നിര്‍ദേശം പാലിക്കാത്ത കമ്പനികള്‍ക്കെതിരെ കര്‍ശനമായ നടപടിക്കും മന്ത്രാലയം ശുപാര്‍ശ ചെയ്യുന്നുണ്ട്. മെച്ചപ്പെട്ട താമസ സൗകര്യം, സൗജന്യ ഇന്റര്‍നെറ്റ്, കുടിക്കാന്‍ തണുത്ത വെള്ളം എന്നിവ ഒരുക്കണമെന്നാണ് മന്ത്രാലയത്തിന്റെ നിര്‍ദേശത്തില്‍ പ്രധാനമായും പറയുന്നത്. ‘അന്തസ്സുള്ള താമസം, സുസ്ഥിര തൊഴില്‍ സാഹചര്യം’ എന്ന പ്രമേയത്തില്‍ രാജ്യവ്യാപക ബോധവല്‍ക്കരണ ക്യാംപെയിനും തുടക്കമിട്ടു. തൊഴിലാളികളുടെ ആവശ്യങ്ങള്‍ കേള്‍ക്കാനും പ്രശ്‌നങ്ങള്‍ പരിഹരിക്കാനും പ്രത്യേക സൂപ്പര്‍വൈസര്‍മാരെ നിയമിക്കണമെന്നും മന്ത്രാലയം നിര്‍ദേശിച്ചു.

വസ്ത്രങ്ങളും മറ്റ് വസ്തുക്കളും സൂക്ഷിക്കാന്‍ ലോക്കറുകള്‍, വാര്‍ത്താവിനിമയത്തിനായി ഇന്റര്‍നെറ്റ് സൗകര്യം എന്നിവയും നിര്‍ബന്ധം. ഇതില്‍ വീഴ്ച വരുത്തുന്നവര്‍ രാജ്യത്തിന്റെ ലേബര്‍ വെല്‍ഫെയര്‍ മാനദണ്ഡങ്ങള്‍ ലംഘിക്കുന്നവരായാണ് കണക്കാക്കുകയെന്നും ഇവര്‍ക്കെതിരെ കടുത്ത നിയമനടപടി സ്വീകരിക്കുമെന്നും മന്ത്രാലയം വ്യക്തമാക്കുന്നു. അതോടൊപ്പം തന്നെ സുരക്ഷ വര്‍ദ്ധിപ്പിക്കുന്നതിന്റെ ഭാഗമായി ലേബര്‍ ക്യാമ്പുകളില്‍ സുരക്ഷാ ജീവനക്കാരെ നിയമിക്കുകയും ക്യാമറകള്‍ സ്ഥാപിക്കുകയും വേണമെന്നും ഉത്തരവില്‍ പറയുന്നു.