ഇന്ത്യൻ ഡ്രൈവിംഗ് ലൈസൻസ് ഉപയോഗിച്ച് വിദേശരാജ്യങ്ങളിൽ വാഹനം ഓടിക്കുന്നതിനുള്ള സാധ്യതകളെക്കുറിച്ചാണ് ലേഖനം വിശദീകരിക്കുന്നത്. അന്താരാഷ്ട്ര ഡ്രൈവിംഗ് പെർമിറ്റിൻ്റെ ആവശ്യം കൂടാതെ, യുകെ, ഓസ്ട്രേലിയ, ന്യൂസിലാൻഡ്, അമേരിക്ക, കാനഡ തുടങ്ങിയ രാജ്യങ്ങളിൽ സാധുവായ ഇംഗ്ലീഷ് ഡ്രൈവിംഗ് ലൈസൻസ് ഉണ്ടെങ്കിൽ പരിമിതമായ കാലയളവിലേക്ക് വാഹനം ഓടിക്കാൻ സാധിക്കും. യുകെയിൽ 12 മാസവും ന്യൂസിലാൻഡിൽ യാത്രാവശ്യങ്ങൾക്ക് 18 മാസവും വരെ ലൈസൻസ് ഉപയോഗിക്കാം. ഓസ്ട്രേലിയ, അമേരിക്ക, കാനഡ എന്നിവിടങ്ങളിൽ ഇത് സാധാരണയായി 3 മാസം മുതൽ 90 ദിവസം വരെയാണ്. ഡ്രൈവിംഗ് നിയമങ്ങൾ ഓരോ രാജ്യത്തും വ്യത്യസ്തമാണെന്നും, കാർ വാടകയ്ക്ക് എടുക്കുന്നതിനും സുഗമമായ യാത്രയ്ക്കും അന്താരാഷ്ട്ര ഡ്രൈവിംഗ് പെർമിറ്റ് കരുതുന്നത് നല്ലതാണെന്നും ലേഖനം ഓർമ്മിപ്പിക്കുന്നു. യുകെ, ഓസ്ട്രേലിയ, ന്യൂസിലാൻഡ് എന്നിവിടങ്ങളിൽ ഇന്ത്യയിലേതുപോലെ ഇടതുവശത്താണ് ഡ്രൈവിംഗ്, എന്നാൽ അമേരിക്കയിലും കാനഡയിലും വലതുവശത്താണ്.
വിദേശത്തൊരു അവധിക്കാലം ആഘോഷിക്കാൻ പോകുമ്പോൾ സ്വന്തമായി ഒരു കാറെടുത്ത് അവിടുത്തെ റോഡുകളിലൂടെ കറങ്ങാൻ ആഗ്രഹമില്ലാത്തവർ ചുരുക്കമായിരിക്കും. എന്നാൽ ഇതിനായി രാജ്യാന്തര ഡ്രൈവിങ് പെർമിറ്റ് അഥവാ ഐഡിപി എടുക്കാനുള്ള ബുദ്ധിമുട്ടുകൾ ഓർത്ത് പലരും ഈ മോഹം ഉപേക്ഷിക്കാറാണ് പതിവ്. എന്നാൽ നിങ്ങളുടെ കയ്യിലുള്ള സാധുവായ ഇന്ത്യൻ ഡ്രൈവിങ് ലൈസൻസ് ഉപയോഗിച്ച് ലോകത്തിലെ മികച്ച ചില രാജ്യങ്ങളിൽ നിങ്ങൾക്ക് വാഹനം ഓടിക്കാൻ സാധിക്കുമെന്ന് എത്രപേർക്കറിയാം?
ഇംഗ്ലീഷിലുള്ള ഇന്ത്യൻ ലൈസൻസും ഒപ്പം ചില നിബന്ധനകളും പാലിച്ചാൽ ഈ അഞ്ച് രാജ്യങ്ങളിൽ നിങ്ങൾക്ക് ധൈര്യമായി റോഡ് ട്രിപ്പ് നടത്താം. ആ രാജ്യങ്ങൾ ഏതൊക്കെയാണെന്ന് നോക്കാം.
യുകെയിലെ റോഡുകളിലൂടെ പറക്കാം
വിനോദസഞ്ചാരികൾക്ക് സ്വന്തമായി വാഹനം ഓടിക്കാൻ ഏറ്റവും അനുകൂലമായ നിയമങ്ങളുള്ള രാജ്യമാണ് യുകെ. ഇംഗ്ലീഷിലുള്ള ഒരു ഇന്ത്യൻ ഡ്രൈവിങ് ലൈസൻസ് നിങ്ങളുടെ കയ്യിലുണ്ടെങ്കിൽ, രാജ്യത്ത് പ്രവേശിച്ച ദിവസം മുതൽ 12 മാസം വരെ നിങ്ങൾക്ക് അവിടെ വാഹനം ഓടിക്കാൻ സാധിക്കും. ഇതിനായി മിക്കവാറും അവസരങ്ങളിൽ ഇന്റർനാഷണൽ ഡ്രൈവിങ് പെർമിറ്റിന്റെ ആവശ്യമില്ല എന്നത് സഞ്ചാരികൾക്ക് വലിയൊരു ആശ്വാസമാണ്.
വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക
എന്നാൽ 12 മാസത്തിന് ശേഷം അവിടെ തുടരുകയാണെങ്കിൽ യുകെയിലെ ഔദ്യോഗിക ലൈസൻസ് എടുക്കേണ്ടി വരും. ഇന്ത്യയിലേത് പോലെ തന്നെ റോഡിന്റെ ഇടതുവശത്തുകൂടി വാഹനം ഓടിക്കുന്ന രീതിയായതിനാൽ ഇന്ത്യക്കാർക്ക് യുകെയിൽ ഡ്രൈവ് ചെയ്യാൻ വളരെ എളുപ്പമാണ് എന്നത് ഇതിലെ മറ്റൊരു വലിയ പ്രത്യേകതയാണ്.
∙ഓസ്ട്രേലിയയിൽ ശ്രദ്ധിക്കേണ്ട കാര്യങ്ങൾ
വിനോദസഞ്ചാരികൾക്ക് മികച്ച റോഡ് ട്രിപ്പ് അനുഭവങ്ങൾ സമ്മാനിക്കുന്ന രാജ്യമാണ് ഓസ്ട്രേലിയ എങ്കിലും അവിടുത്തെ എല്ലാ സംസ്ഥാനങ്ങളിലും ഡ്രൈവിങ് നിയമങ്ങൾ ഒരുപോലെയല്ല. മിക്കവാറും പ്രവിശ്യകളിൽ വിനോദസഞ്ചാരികൾക്ക് അവരുടെ ഇംഗ്ലീഷിലുള്ള ഇന്ത്യൻ ലൈസൻസ് ഉപയോഗിച്ച് മൂന്നുമാസം വരെ വാഹനം ഓടിക്കാൻ അനുമതിയുണ്ട്. എന്നാല് ഈ 3 മാസത്തെ കാലാവധി എല്ലാ സംസ്ഥാനങ്ങൾക്കും ഒരുപോലെ ബാധകമല്ല.
അതിനായി, ലൈസൻസിൽ ഏത് തരം വാഹനമാണ് ഓടിക്കാൻ അനുമതിയുള്ളത് എന്ന് വ്യക്തമായി രേഖപ്പെടുത്തിയിരിക്കണം. വിനോദസഞ്ചാരികൾ കാർ വാടകയ്ക്ക് എടുക്കാനും മറ്റും ഇന്റർനാഷണൽ ഡ്രൈവിങ് പെർമിറ്റ് കയ്യിൽ കരുതുന്നത് എപ്പോഴും നല്ലതാണ്. ഇന്ത്യയെപ്പോലെ ഓസ്ട്രേലിയയിലും ഇടതുവശത്തുകൂടിയാണ് ഡ്രൈവിങ് എന്നതിനാൽ ട്രാഫിക് നിയമങ്ങൾ മനസ്സിലാക്കാൻ കൂടുതൽ എളുപ്പമായിരിക്കും.
ന്യൂസീലൻഡിലെ മനോഹരമായ കാഴ്ചകളിലേക്ക്
ഇംഗ്ലീഷിലുള്ള സാധുവായ ഇന്ത്യൻ ഡ്രൈവിങ് ലൈസൻസ് ഉണ്ടെങ്കിൽ വിനോദസഞ്ചാരികൾക്ക് ഇവിടെ വാഹനം ഓടിക്കാൻ അനുമതിയുണ്ട്. ന്യൂസീലൻഡ് ട്രാൻസ്പോർട്ട് ഏജൻസിയുടെ പുതിയ നിയമപ്രകാരം, വിനോദസഞ്ചാരികൾക്ക് കാർ ഓടിക്കാൻ അവരുടെ വിദേശ ലൈസൻസ് 18 മാസം വരെ ഉപയോഗിക്കാം. എന്നാൽ ഇരുചക്രവാഹനങ്ങൾക്ക് ഇപ്പോഴും 12 മാസം തന്നെയാണ് കാലാവധി.
എന്നാൽ റോഡ് സുരക്ഷയുടെ കാര്യത്തിൽ വളരെ കർശനമായ നിയമങ്ങളുള്ള രാജ്യമാണിത്. അതിനാൽ അവിടുത്തെ ട്രാഫിക് നിയമങ്ങൾ കൃത്യമായി പാലിക്കാൻ സഞ്ചാരികൾ പ്രത്യേകം ശ്രദ്ധിക്കേണ്ടതുണ്ട്. ഇന്ത്യയിലേതു പോലെ ഇടതുവശം ചേർന്ന് ഡ്രൈവ് ചെയ്യാവുന്ന ന്യൂസീലൻഡിലെ മികച്ച റോഡുകൾ സഞ്ചാരികൾക്ക് മറക്കാനാവാത്ത യാത്രാനുഭവങ്ങൾ സമ്മാനിക്കും.
∙അമേരിക്കൻ റോഡുകളിലിറങ്ങുമ്പോൾ
ഇന്ത്യൻ ലൈസൻസ് ഉപയോഗിച്ച് അമേരിക്കയിൽ വാഹനം ഓടിക്കാൻ സാധിക്കുമെങ്കിലും അവിടുത്തെ നിയമങ്ങൾ അല്പം സങ്കീർണമാണ്. രാജ്യത്തൊട്ടാകെ ഒരൊറ്റ നിയമമല്ല, മറിച്ച് ഓരോ സംസ്ഥാനങ്ങൾക്കും അവരുടേതായ ഡ്രൈവിങ് നിയമങ്ങളാണുള്ളത്. പല സംസ്ഥാനങ്ങളിലും ഇന്ത്യൻ വിനോദസഞ്ചാരികൾക്ക് ഇംഗ്ലീഷിലുള്ള ലൈസൻസ് ഉപയോഗിച്ച് പരമാവധി മൂന്നുമാസം വരെ ഡ്രൈവ് ചെയ്യാൻ അനുമതി നൽകാറുണ്ട്.
ഔദ്യോഗിക USAGov സൈറ്റിലെ വിവരങ്ങൾ പ്രകാരം മിക്ക സംസ്ഥാനങ്ങളിലും ടൂറിസ്റ്റുകൾക്ക് തങ്ങളുടെ രാജ്യത്തെ ലൈസൻസ് ഉപയോഗിക്കാമെങ്കിലും അമേരിക്കയിൽ കാർ വാടകയ്ക്കെടുക്കാൻ റെന്റൽ കമ്പനികൾ പലപ്പോഴും ഐഡിപി നിർബന്ധമായി ചോദിക്കാറുണ്ട്. അതിനാൽ പെർമിറ്റ് മുൻകൂട്ടി എടുക്കുന്നത് യാത്ര സുഗമമാക്കും. ഇന്ത്യയിൽ നിന്ന് വ്യത്യസ്തമായി വലതുവശത്തുകൂടിയുള്ള ഡ്രൈവിങ് ആയതിനാൽ അമേരിക്കയിൽ വാഹനം ഓടിക്കുമ്പോൾ തുടക്കത്തിൽ കൂടുതൽ ശ്രദ്ധ ആവശ്യമാണ്.
∙കാനഡയിലെ പ്രവിശ്യകളും നിയമങ്ങളും
അമേരിക്കയിലേതിന് സമാനമായി കാനഡയിലും ഓരോ പ്രവിശ്യകൾക്കും വ്യത്യസ്തമായ ഡ്രൈവിങ് നിയമങ്ങളാണുള്ളത്. ഒന്റാറിയോ, ബ്രിട്ടിഷ് കൊളംബിയ തുടങ്ങിയ മിക്ക പ്രവിശ്യകളിലും വിനോദസഞ്ചാരികൾക്ക് ഇന്ത്യൻ ലൈസൻസ് ഉപയോഗിച്ച് 60 മുതൽ 90 ദിവസം വരെ വാഹനം ഓടിക്കാൻ സാധിക്കും. ലൈസൻസ് പൂർണമായും ഇംഗ്ലീഷിലായിരിക്കണം എന്നത് ഇവിടെയും നിർബന്ധമാണ്. കാർ വാടകയ്ക്ക് എടുക്കുന്നതിനും സുഗമമായ യാത്രയ്ക്കും ഇന്റർനാഷണൽ ഡ്രൈവിങ് പെർമിറ്റ് കയ്യിൽ വയ്ക്കുന്നത് പല പ്രതിസന്ധികളും ഒഴിവാക്കാൻ സഹായിക്കും.
അമേരിക്കയിലെ പോലെ തന്നെ ഇവിടെയും വലതുവശത്തുകൂടിയാണ് ഡ്രൈവിങ്. മഞ്ഞുവീഴ്ചയുള്ള സമയങ്ങളിൽ കാനഡയിലെ മനോഹരമായ റോഡുകളിലൂടെ ഡ്രൈവ് ചെയ്യുമ്പോൾ സഞ്ചാരികൾ കാലാവസ്ഥാ മുന്നറിയിപ്പുകൾ കൃത്യമായി ശ്രദ്ധിക്കാൻ മറക്കരുത്.
Big ticket lucky winners:ഒറ്റരാത്രികൊണ്ട് കോടീശ്വരന്മാരായ പ്രവാസി മലയാളികൾ പറയുന്നു:ഇത് 8 വർഷത്തെ കാത്തിരിപ്പിന്റെ ഫലം!കൂട്ടുകാരന് ലഭിച്ച ഒന്നര കോടി പ്രചോദനമായി ;2കോടി നേടാൻ നിങ്ങൾക്കും അവസരം
UAE May 8, 2026
Big ticket lucky winners:അബുദാബി ∙ ഭാഗ്യദേവത കനിഞ്ഞപ്പോൾ ഒറ്റരാത്രികൊണ്ട് കോടീശ്വരന്മാരായി അഞ്ച് പ്രവാസികൾ. അബുദാബി ബിഗ് ടിക്കറ്റിന്റെ സീരീസ് 286 നറുക്കെടുപ്പിൽ സാന്ത്വന സമ്മാനമായി 10 ലക്ഷം ദിർഹം (രണ്ടര കോടിയിലേറെ രൂപ) വീതമാണ് അഞ്ച് ഇന്ത്യക്കാർക്ക് ലഭിച്ചത്. ഇതിൽ ഒമാനിൽ ജോലി ചെയ്യുന്ന മുരളി വാഴയിൽ, അജ്മാനിൽ അക്കൗണ്ട് മാനേജരായ ലിയോ ലോറൻസ് എന്നീ രണ്ട് മലയാളികളും ഉൾപ്പെടുന്നു.
എട്ടു വർഷത്തെ കാത്തിരിപ്പിന് ഫലമെന്ന് മുരളി വാഴയിൽ
ഒമാനിൽ സൂപ്പർവൈസറായി ജോലി ചെയ്യുന്ന 50-കാരനായ മുരളി വാഴയിൽ കഴിഞ്ഞ എട്ടു വർഷമായി ബിഗ് ടിക്കറ്റിൽ ഭാഗ്യം പരീക്ഷിക്കുന്നുണ്ട്. 20 പേരടങ്ങുന്ന നാല് വ്യത്യസ്ത ഗ്രൂപ്പുകളിലായാണ് അദ്ദേഹം ടിക്കറ്റെടുക്കാറുള്ളത്. കഴിഞ്ഞ വർഷം തന്റെ സുഹൃത്തും സഹപ്രവർത്തകനുമായ രാജേഷിന് 1.5 കോടി ദിർഹത്തിന്റെ ബമ്പർ സമ്മാനം ലഭിച്ചത് കണ്ടതാണ് മുരളിക്ക് പ്രചോദനമായത്.
സ്വന്തം പേരിൽ ടിക്കറ്റെടുക്കാൻ തുടങ്ങിയിട്ട് ഒൻപത് മാസമേ ആയുള്ളൂ. ഇപ്പോൾ ലഭിച്ച സമ്മാനത്തുക 20 പേർക്കുമായി വീതിച്ചു നൽകും. ഈ തുക ഞങ്ങളുടെയും കുടുംബങ്ങളുടെയും വലിയ സ്വപ്നങ്ങൾ സാക്ഷാത്കരിക്കാൻ സഹായിക്കും- അദ്ദേഹം പറഞ്ഞു.
സ്വപ്നഭവനത്തിന്റെ ഭാരം കുറയ്ക്കാൻ ലിയോ ലോറൻസ്
2014 മുതൽ അജ്മാനിൽ കുടുംബത്തോടൊപ്പം താമസിക്കുന്ന ലിയോ ലോറൻസിന് ഇതൊരു ‘നിമിത്തം’ പോലെയായിരുന്നു. ടിക്കറ്റ് നറുക്കെടുക്കുന്ന ദിവസം രാവിലെ തനിക്ക് എന്തോ നല്ലത് സംഭവിക്കാൻ പോകുന്നുണ്ടെന്ന് ലിയോ ഭാര്യയോട് പറഞ്ഞിരുന്നു. മകളെ ഡോക്ടറെ കാണിക്കാൻ പോകുന്നതിനിടെയാണ് ലിയോയെ തേടി ഭാഗ്യവിവരമെത്തിയത്.
10 സഹപ്രവർത്തകർ ചേർന്നാണ് ലിയോ ടിക്കറ്റെടുത്തത്. അടുത്തിടെ സ്വന്തമായി ഒരു വില്ല വാങ്ങിയ ലിയോയ്ക്ക് സമ്മാനത്തുകയിലെ തന്റെ വിഹിതം ലോൺ തിരിച്ചടയ്ക്കാൻ വലിയ സഹായമാകും.
വിജയികളിൽ 2 പേർ കർണാടക, തമിഴ്നാട് സ്വദേശികൾ
മലയാളികൾക്ക് പുറമെ തമിഴ്നാട് സ്വദേശിയായ സോഫ്റ്റ്വെയർ എൻജിനീയർ ചൈതന്യ കുമാരി, ബംഗളൂരു സ്വദേശി രജത് ഉപാധ്യായ, മംഗളൂരു സ്വദേശി റിതേഷ് ലോബോ എന്നിവർക്കും 10 ലക്ഷം ദിർഹം വീതം സമ്മാനം ലഭിച്ചു.
ചൈതന്യ കുമാരി: 14 വർഷമായി യുഎഇയിലുള്ള ചൈതന്യ ആറാം തവണ എടുത്ത ടിക്കറ്റിലൂടെയാണ് ഭാഗ്യവതിയായത്. തമിഴ്നാട്ടിലായിരുന്നപ്പോൾ സമ്മാനവിവരം അറിയിച്ചുകൊണ്ടുള്ള ഫോൺ കോൾ അവർക്ക് അറ്റൻഡ് ചെയ്യാൻ കഴിഞ്ഞിരുന്നില്ല. സുഹൃത്ത് വാർത്തയുടെ സ്ക്രീൻഷോട്ട് അയച്ചു നൽകിയപ്പോഴാണ് താൻ കോടീശ്വരയായ വിവരം ചൈതന്യ അറിഞ്ഞത്.
ദുബായിൽ അക്കൗണ്ട്സ് വിഭാഗത്തിൽ ജോലി ചെയ്യുന്ന രജത് അഞ്ച് സുഹൃത്തുക്കൾക്കൊപ്പമാണ് ടിക്കറ്റെടുത്തത്. ആദ്യം ഇതൊരു തമാശയാണെന്ന് കരുതിയെങ്കിലും ഓൺലൈനിൽ ഫലം പരിശോധിച്ചതോടെ സന്തോഷത്തിലായി. നാട്ടിലെ ബാധ്യതകൾ തീർക്കാൻ ഈ തുക ഉപയോഗിക്കാനാണ് രജതിന്റെ തീരുമാനം.
കർണാടക മംഗളൂരു സ്വദേശിയായ റിതേഷ് 2002 മുതൽ ദുബായിലുണ്ട്. 2013 മുതൽ ടിക്കറ്റെടുക്കുന്ന ഇദ്ദേഹം ജോത്സ്യ ആപ്പുകളുടെ സഹായത്തോടെയാണ് നമ്പറുകൾ തിരഞ്ഞെടുക്കാറുള്ളത്. 10 വർഷത്തെ പരിശ്രമത്തിന് ഒടുവിലാണ് ഭാഗ്യം തേടിയെത്തിയത്.
മേയിൽ 2 കോടി ദിർഹം
വിജയികൾക്ക് അഭിനന്ദനങ്ങൾ അറിയിച്ച ബിഗ് ടിക്കറ്റ് അധികൃതർ മേയിലെ പുതിയ സമ്മാനവിവരങ്ങളും പുറത്തുവിട്ടു. ജൂൺ 3-ന് നടക്കുന്ന നറുക്കെടുപ്പിൽ ഒന്നാം സമ്മാനം 2 കോടി ദിർഹമാണ് (ഏകദേശം 45 കോടി രൂപ). ഇതിനുപുറമെ ആഴ്ചതോറുമുള്ള നറുക്കെടുപ്പുകളിൽ ലക്ഷക്കണക്കിന് ദിർഹവും റേഞ്ച് റോവർ വെലാർ, ബിഎംഡബ്ല്യു X6 തുടങ്ങിയ ആഡംബര കാറുകളും സ്വന്തമാക്കാൻ അവസരമുണ്ട്.
അബുദാബി സായിദ് രാജ്യാന്തര വിമാനത്താവളത്തിലെ കൗണ്ടറുകൾ വഴിയോ വെബ്സൈറ്റ് വഴിയോ ടിക്കറ്റുകൾ സ്വന്തമാക്കാവുന്നതാണ്. ഭാഗ്യം പരീക്ഷിക്കാനായി കാത്തിരിക്കുന്ന പ്രവാസികൾക്ക് ഈ വിജയികളുടെ കഥകൾ വലിയ ആത്മവിശ്വാസമാണ് നൽകുന്നത്
Eid al-Adha;ബലിപെരുന്നാൾ കളറാകും! യുഎഇയിൽ നീണ്ട പെരുന്നാൾ അവധിക്ക് സാധ്യത, ആകാംക്ഷയോടെ പ്രവാസികൾ
Eid al-Adha അബുദാബി: ബലിപെരുന്നാളിനോടനുബന്ധിച്ച് യുഎഇയിൽ ഇത്തവണ നീണ്ട അവധിയക്ക് സാധ്യത. എമിറേറ്റ്സ് അസ്ട്രോണമി സൊസൈറ്റിയുടെ കണക്കുകൂട്ടലുകൾ പ്രകാരം ഈ മാസം 27 ന് ബലിപെരുന്നാൾ ആരംഭിക്കാനാണ് സാധ്യത. ഇതനുസരിച്ച് ഹജ് കർമ്മത്തിലെ ഏറ്റവും പ്രധാനപ്പെട്ട അറഫാ ദിനം 26 നായിരിക്കും. ചന്ദ്രദർശനത്തിന്റെ അടിസ്ഥാനത്തിൽ അധികൃതർ ഔദ്യോഗിക പ്രഖ്യാപനം നടത്തുമെങ്കിലും നിലവിലെ ശാസ്ത്രീയ നിഗമനങ്ങൾ പ്രകാരം മെയ് അവസാന വാരം യുഎഇ പെരുന്നാൾ ആഘോഷങ്ങളിലേക്ക് കടക്കും. പൊതു-സ്വകാര്യ മേഖലകളിലെ ജീവനക്കാർക്ക് ഇത്തവണ ആറോളം ദിവസത്തെ അവധി ലഭിക്കാനാണ് സാധ്യതയുണ്ടെന്നാണ് പുറത്തു വരുന്ന റിപ്പോർട്ടുകൾ.
ശനി, ഞായർ ദിവസങ്ങളിലെ ആഴ്ചാവസാന അവധി കൂടി കണക്കിലെടുക്കുമ്പോൾ ആകെ ആറ് ദിവസത്തെ വിശ്രമം താമസക്കാർക്ക് ലഭിക്കും. 25ന് കൂടി വാർഷിക അവധിയിൽ നിന്ന് എടുക്കുന്നവർക്ക് 23 മുതൽ 31 വരെ നീളുന്ന ഒൻപത് ദിവസത്തെ ദീർഘമായ പെരുന്നാൾ അവധിക്കാലം ആസ്വദിക്കാൻ കഴിയും. അതേസമയം, വിദ്യാഭ്യാസ മേഖലയിലുള്ളവർക്കും ഏറെ സന്തോഷം നൽകുന്നതാണ് ഇത്തവണത്തെ കലണ്ടർ. മൂന്നാം അധ്യയന പാദത്തിലെ ഇടവേള (മിഡ്-ടേം ബ്രേക്ക്) പെരുന്നാൾ അവധിയോട് അനുബന്ധിച്ചാണ് വിദ്യാഭ്യാസ മന്ത്രാലയം നിശ്ചയിച്ചിരിക്കുന്നത്. 25 മുതൽ 29 വരെ സ്കൂളുകൾക്ക് അവധിയായിരിക്കും. ഇതോടെ അധ്യാപകർക്കും വിദ്യാർഥികൾക്കും രണ്ട് ആഴ്ചാവസാന അവധികൾ ഉൾപ്പെടെ തുടർച്ചയായി ഒൻപത് ദിവസത്തെ അവധി ലഭിക്കും
