യുഎഇ: പ്രവാസികളുടെ സ്വപ്നഭൂമിയായ യുഎഇയിൽ ജീവിക്കാൻ മാസം എത്ര ദിർഹം വേണ്ടിവരും? ഈ സാഹചര്യത്തിൽ പ്രവാസികൾക്കിടയിൽ ഉയരുന്ന ചോദ്യമാണിത്. ശമ്പളത്തിലെ വലിയ മാറ്റവും വർധിച്ചു വരുന്ന ജീവിതച്ചെലവും പ്രവാസികളുടെ ബജറ്റുകളെ സാരമായി ബാധിക്കുന്നുണ്ടെന്നാണ് പുതിയ കണക്കുകൾ സൂചിപ്പിക്കുന്നത്.ഒരു ഫിനാൻസ് മേധാവിക്ക് മാസം 90,000 ദിർഹം ലഭിക്കുമ്പോൾ, ഒരു വെയിറ്റർക്കോ സാധാരണ തൊഴിലാളിക്കോ ലഭിക്കുന്നത് 1,500 മുതൽ 4,000 ദിർഹം വരെയാണ്. അതിനാൽ എത്ര ശമ്പളം ലഭിക്കുന്നു അത് എങ്ങനെ ചെലവഴിക്കുന്നു എന്നതിലാണ് പ്രവാസി ജീവിതത്തിന്റെ വിജയം ഇരിക്കുന്നത് എന്നാണ് വിദഗ്ദ്ധരും അഭിപ്രായപ്പെടുന്നത്.

ഒരു പ്രവാസിയുടെ വരുമാനത്തിൽ ഏറ്റവും വലിയ പങ്ക് പോകുന്നത് വീട്ടു വാടകയിലാണ്. യുഎഇയിൽ 1,000 ദിർഹം മുതൽ 20,000 ദിർഹം വരെ മാസവാടകയുള്ള താമസസ്ഥലങ്ങളുണ്ട്. ദുബായ് പോലുള്ള നഗരങ്ങളിൽ സ്റ്റുഡിയോ അപ്പാർട്ട്മെന്റുകൾക്ക് പോലും മാസം 4,000 ദിർഹത്തിന് മുകളിൽ വാടക വരാം. എന്നാൽ ഷെയറിംഗ് റൂമുകളിൽ താമസിച്ചുകൊണ്ട് ഈ ചെലവ് 700 ദിർഹത്തിലേക്ക് ചുരുക്കുന്നവരും ഏറെയാണ്.

പക്ഷേ നിയമപരമായ എജാരി ഇല്ലാതെ ബെഡ്‌സ്‌പെയ്‌സുകളോ പാർട്ടീഷൻ മുറികളോ വാടകയ്‌ക്കെടുക്കുന്നത് യുഎഇയിൽ നിയമവിരുദ്ധമാണ് എന്ന കാര്യം കൂടെ ഓർക്കണം. അതുകൊണ്ട് താമസം തിരഞ്ഞെടുക്കുമ്പോൾ കുറഞ്ഞ വാടകയോടൊപ്പം നിയമപരമായ സുരക്ഷിതത്വം കൂടി പ്രവാസികൾ ഉറപ്പാക്കേണ്ടത് അത്യാവശ്യമാണ്. കാരണം യുഎഇയിൽ നിയമങ്ങൾ വളരെ കർശനമാണ്.

രണ്ടാമത്തെ ചിലവുകൾ എന്നത് ഭക്ഷണവും ഗതാഗതവുമാണ്. ബാച്ചിലർ ആയി താമസിക്കുന്ന ഒരാൾക്ക് പലചരക്ക് സാധനങ്ങൾക്കായി 500 ദിർഹവും മെട്രോ പോലുള്ള പൊതുഗതാഗതത്തിന് 300 ദിർഹത്തിൽ താഴെയുമാണ് മാസം ചെലവ് വരുന്നത് അതിനാൽ തന്നെ ബജറ്റ് നിയന്ത്രിക്കാൻ ബാച്ചിലർ ആയി താമസിക്കുന്നത് വഴി സാധിക്കും.

നംബിയോ പോലുള്ള ഡാറ്റകൾ സൂചിപ്പിക്കുന്നത് ദുബായ് പോലുള്ള നഗരങ്ങളിൽ വാടക ഒഴികെ ഒരു വ്യക്തിക്ക് സുഖമായി ജീവിക്കാൻ ഏകദേശം 4,200 ദിർഹം വേണമെന്നാണ്. വാടക കൂടി കൂട്ടുമ്പോൾ അത് എണ്ണായിരത്തിന് മുകളിൽ പോകും. കൂടാതെ ലോണുകൾക്ക് ശേഷം കയ്യിൽ കുറഞ്ഞത് 13,000 ദിർഹമെങ്കിലും ഉണ്ടെങ്കിൽ മാത്രമേ ഒരു വ്യക്തിക്ക് അവിടെ സമ്പാദ്യത്തെക്കുറിച്ച് ചിന്തിക്കാൻ സാധിക്കൂകയുള്ളു.

കൂടാതെ കുടുംബത്തോടൊപ്പം താമസിക്കുന്ന പ്രവാസികൾക്ക് ജീവിതം കുറച്ചുകൂടി വെല്ലുവിളികൾ എറിയതാണ്. അതായത് നാലംഗ കുടുംബത്തിന് ദുബായിൽ വാടകയില്ലാതെ തന്നെ ഏകദേശം 14,000 ദിർഹത്തിന് മുകളിൽ ചെലവ് വരാം. മക്കളുടെ സ്കൂൾ ഫീസും വാഹനത്തിന്റെ ചെലവും കൂടി ചേരുമ്പോൾ കുടുംബ വരുമാനം 25,000 ദിർഹമെങ്കിലും ഉണ്ടെങ്കിലേ മെച്ചപ്പെട്ട രീതിയിൽ മുന്നോട്ട് പോകാൻ സാധിക്കുകയുള്ളു.

അതുകൊണ്ടാണ് പലരും ദുബായിൽ ജോലി ചെയ്യുകയും അജ്മാൻ പോലുള്ള എമിറേറ്റുകളിൽ താമസിക്കുന്നത് പതിവാണ്. ഇത് വാടകയിൽ വലിയ ലാഭം നൽകുമെങ്കിലും ദിവസേനയുള്ള ദീർഘദൂര യാത്രയും ഇന്ധനച്ചെലവും നമ്മൾ കണക്കിൽ ഉൾപ്പെടുത്തണം. അതേസമയം വെറുതെ പണിയെടുക്കുക മാത്രമല്ല, ഒരു ഘട്ടം കഴിഞ്ഞാൽ സമ്പാദ്യവും പ്രവാസികൾക്ക് പ്രധാനമാണ്. കുറച്ച് ആഡംബരങ്ങൾ ഒക്കെ ഒഴിവാക്കി നമുക്ക് ഉള്ളത് പോലെ ജീവിച്ചാൽ ചെറിയ ഒരു തുക നമ്മുക്ക് മാറ്റി വയ്ക്കാൻ സാധിക്കും.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

പ്രവാസികളെ… ഗൾഫിൽ ജീവിത ചെലവ് കൂടുന്നുണ്ടോ?; നിങ്ങളുടെ പണം ലാഭിക്കാൻ ഇതാ 5 വഴികൾ

UAE April 25, 2026

ആഗോള സാമ്പത്തിക പ്രതിസന്ധിയും ജീവിതച്ചെലവിലെ വർദ്ധനവും യുഎഇയിലെ പ്രവാസി കുടുംബങ്ങളെ കുറച്ചൊന്നുമല്ല വലയ്ക്കുന്നത്. വരുമാനത്തിന്റെ വലിയൊരു ഭാഗം വാടകയ്ക്കും മറ്റ് നിത്യച്ചെലവുകൾക്കുമായി നീക്കിവെക്കേണ്ടി വരുമ്പോൾ സമ്പാദ്യം എന്നത് പലർക്കും ബാലികേറാമലയായി മാറുന്നു. എന്നാൽ കൃത്യമായ പ്ലാനിംഗും ചെറിയ ചില മാറ്റങ്ങളും ഉണ്ടെങ്കിൽ ഈ പ്രതിസന്ധിക്കാലത്തും യുഎഇയിൽ പണം ലാഭിക്കാനും സാമ്പത്തിക അടിത്തറ ഭദ്രമാക്കാനും സാധിക്കും. കുടുംബ ബജറ്റിൽ മാറ്റങ്ങൾ വരുത്തി എങ്ങനെ കടബാധ്യതകളില്ലാതെ മുന്നോട്ട് പോകാമെന്ന് നോക്കാം.സാമ്പത്തിക അച്ചടക്കത്തിന് ’50/30/20′ ഫോർമുല

യുഎഇയിൽ ജീവിക്കുമ്പോൾ ആദ്യം വേണ്ടത് കൃത്യമായ ഒരു ബജറ്റിംഗാണ്. ഇതിനായി ലോകപ്രശസ്തമായ 50/30/20 നിയമം പിന്തുടരാവുന്നതാണ്. നിങ്ങളുടെ വരുമാനത്തിന്റെ 50 ശതമാനം വാടക, സ്കൂൾ ഫീസ്, ഇലക്ട്രിസിറ്റി തുടങ്ങിയ അവശ്യകാര്യങ്ങൾക്കായി മാറ്റിവെക്കുക. 30 ശതമാനം വിനോദങ്ങൾക്കും യാത്രകൾക്കുമായി ഉപയോഗിക്കാം. എന്നാൽ ബാക്കി വരുന്ന 20 ശതമാനം നിർബന്ധമായും സമ്പാദ്യത്തിലേക്കോ നിക്ഷേപങ്ങളിലേക്കോ മാറ്റുക. മാസാവസാനം മിച്ചം പിടിക്കാം എന്ന് കരുതുന്നതിന് പകരം ശമ്പളം കിട്ടുമ്പോൾ തന്നെ ഈ 20 ശതമാനം മാറ്റി വെക്കുന്നത് ശീലമാക്കുക.സ്മാർട്ട് ഷോപ്പിംഗിലൂടെ വലിയ ലാഭം

യുഎഇയിലെ ഹൈപ്പർമാർക്കറ്റുകൾ തമ്മിലുള്ള മത്സരം ഉപഭോക്താക്കൾക്ക് വലിയ ലാഭം നൽകുന്ന ഒന്നാണ്. പലചരക്ക് സാധനങ്ങൾ വാങ്ങുമ്പോൾ പ്രമുഖ ബ്രാൻഡുകൾക്ക് പകരം ‘സ്റ്റോർ ബ്രാൻഡുകൾ’ (ഉദാഹരണത്തിന് ലുലു, യൂണിയൻ കോപ് ലേബലുകൾ) തിരഞ്ഞെടുക്കുന്നത് ഗുണമേന്മ കുറയാതെ തന്നെ പണം ലാഭിക്കാൻ സഹായിക്കും. പ്രമോഷനുകളും ഓഫറുകളും ഉള്ള സമയത്ത് മാസത്തേക്കാവശ്യമായ സാധനങ്ങൾ ‘ബൾക്ക്’ ആയി വാങ്ങുന്നത് വഴി 20 മുതൽ 30 ശതമാനം വരെ ചെലവ് കുറയ്ക്കാം. വാരാന്ത്യങ്ങളിലെ വലിയ ഷോപ്പിംഗുകൾ ഒഴിവാക്കി കൃത്യമായ ലിസ്റ്റ് തയ്യാറാക്കി മാത്രം കടയിൽ പോകുന്നത് അനാവശ്യ വാങ്ങലുകൾ തടയും.

സ്മാർട്ട് ഷോപ്പിംഗിലൂടെ വലിയ ലാഭം

ക്രെഡിറ്റ് കാർഡ് കെണികൾ ഒഴിവാക്കുക

യുഎഇയിലെ പല പ്രവാസികളെയും കടക്കെണിയിലാക്കുന്നത് ക്രെഡിറ്റ് കാർഡുകളുടെ അനിയന്ത്രിതമായ ഉപയോഗമാണ്. കാർഡുകൾ വഴി ലഭിക്കുന്ന റിവാർഡുകളും ഓഫറുകളും നല്ലതാണെങ്കിലും കൃത്യസമയത്ത് തിരിച്ചടയ്ക്കാൻ സാധിച്ചില്ലെങ്കിൽ പലിശ നിരക്ക് നിങ്ങളുടെ സമ്പാദ്യത്തെ കാർന്നുതിന്നും. ഉയർന്ന പലിശയുള്ള കടങ്ങൾ ആദ്യം വീട്ടാൻ ശ്രമിക്കുക. അത്യാവശ്യ ഘട്ടങ്ങളിൽ മാത്രം ക്രെഡിറ്റ് കാർഡ് ഉപയോഗിക്കുകയും ഡെബിറ്റ് കാർഡുകൾക്കോ പണത്തിനോ മുൻഗണന നൽകുകയും ചെയ്യുന്നത് കടബാധ്യത കുറയ്ക്കാൻ സഹായിക്കും.യൂട്ടിലിറ്റി ബില്ലുകളിലെ നിയന്ത്രണം

വൈദ്യുതി, വെള്ളം ബില്ലുകളിൽ ചെറിയ മാറ്റങ്ങൾ വരുത്തുന്നത് വഴി വലിയ തുക ലാഭിക്കാം. എസിയുടെ താപനില 24 ഡിഗ്രി സെൽഷ്യസിൽ സ്ഥിരമായി നിലനിർത്തുന്നത് എനർജി ബില്ലുകൾ കുറയ്ക്കാൻ സഹായിക്കും. സ്മാർട്ട് ഹോം ഉപകരണങ്ങൾ ഉപയോഗിക്കുന്നതും എനർജി എഫിഷ്യന്റ് ആയ ലൈറ്റുകൾ സ്ഥാപിക്കുന്നതും ദീർഘകാലാടിസ്ഥാനത്തിൽ ഗുണകരമാണ്. കൂടാതെ നിങ്ങളുടെ മൊബൈൽ, ഇന്റർനെറ്റ് പ്ലാനുകൾ ആവശ്യത്തിന് മാത്രമുള്ളതാണെന്ന് ഉറപ്പുവരുത്തുക. ഇത്തിസലാത്ത് (Etisalat), ഡു (du) എന്നിവ നൽകുന്ന ഫാമിലി പാക്കേജുകൾ ശ്രദ്ധിക്കുന്നത് നല്ലതാണ്.എമർജൻസി ഫണ്ട് എന്ന കരുതൽ

അപ്രതീക്ഷിതമായി ജോലി നഷ്ടപ്പെടുകയോ ആരോഗ്യപ്രശ്നങ്ങൾ വരികയോ ചെയ്താൽ പകച്ചുപോകാതിരിക്കാൻ ഒരു എമർജൻസി ഫണ്ട് അത്യാവശ്യമാണ്. കുറഞ്ഞത് 6 മാസത്തെ ചെലവിനുള്ള തുക ലിക്വിഡ് ക്യാഷ് ആയി കരുതിയാൽ സാമ്പത്തിക അനിശ്ചിതത്വങ്ങളെ ധൈര്യപൂർവ്വം നേരിടാം.

ചെറിയ ലാഭങ്ങൾ വലിയ സമ്പാദ്യത്തിലേക്ക് നയിക്കുമെന്ന തിരിച്ചറിവാണ് യുഎഇയിലെ ഓരോ പ്രവാസിക്കും ഉണ്ടാകേണ്ടത്. ആഡംബരങ്ങൾ പരിമിതപ്പെടുത്തി അത്യാവശ്യങ്ങൾക്കായി പണം മാറ്റിവെച്ചാൽ ഈ മണലാരണ്യത്തിൽ നിങ്ങൾക്ക് വിജയകരമായി മുന്നേറാം

Emirates latest flight schedule;യുദ്ധത്തിൽ നിന്ന് കരകയറ്ററി വിമാന സർവീസു കൾ;പുതിയ സമയക്രമവും യാത്രാ നിബന്ധനകളും പ്രഖ്യാപിച്ച് എമിറേറ്റ്സ്

UAE April 25, 2026

Emirates latest flight schedule; തടസ്സപ്പെട്ട വിമാന സർവീസുകൾ പഴയപടിയാക്കാൻ ലക്ഷ്യമിട്ട് പുതിയ വിമാന സമയക്രമം പ്രഖ്യാപിച്ച് എമിറേറ്റ്സ് എയർലൈൻ. യുഎഇ വ്യോമപാത ഭാഗികമായി തുറന്നതോടെ ദുബായ് അന്താരാഷ്ട്ര വിമാനത്താവളത്തിൽ (DXB) നിന്നുള്ള സർവീസുകളുടെ എണ്ണം വർധിപ്പിക്കാനാണ് കമ്പനിയുടെ തീരുമാനം. നിലവിൽ ആകെ ശേഷിയുടെ 65 ശതമാനം സർവീസുകളാണ് എമിറേറ്റ്സ് നടത്തുന്നത്. മുമ്പ് 140 നഗരങ്ങളിലേക്ക് സർവീസ് നടത്തിയിരുന്ന എമിറേറ്റ്സ് ഇപ്പോൾ 100-ലധികം ലക്ഷ്യസ്ഥാനങ്ങളിലേക്ക് വിമാനങ്ങൾ അയക്കുന്നുണ്ട്. യാത്രാ ആവശ്യകത ശക്തമായി തുടരുന്നതിനാൽ ബിസിനസ് മോഡലിൽ മാറ്റം വരുത്താതെ തന്നെ പഴയ പ്രതാപത്തിലേക്ക് വേഗത്തിൽ തിരിച്ചെത്താൻ സാധിക്കുമെന്ന് എമിറേറ്റ്സ് പ്രസിഡന്റ് ടിം ക്ലാർക്ക് പറഞ്ഞു

ഇന്ത്യൻ നഗരങ്ങളിലേക്കുള്ള സർവീസുകൾ

കേരളമുൾപ്പെടെ ഇന്ത്യയിലെ വിവിധ നഗരങ്ങളിലേക്ക് എമിറേറ്റ്സ് നേരിട്ട് സർവീസ് നടത്തുന്നുണ്ട്. താഴെ പറയുന്ന നഗരങ്ങളിലേക്ക് ദുബായിൽ നിന്ന് നേരിട്ട് വിമാനങ്ങളുണ്ടാകും:

കൊച്ചി
തിരുവനന്തപുരം
മുംബൈ
ഡൽഹി
ബെംഗളൂരു
ചെന്നൈ
അഹമ്മദാബാദ്
ഹൈദരാബാദ്
കൊൽക്കത്ത

യൂറോപ്പ്, അമേരിക്ക, ആഫ്രിക്ക, ഫാർ ഈസ്റ്റ് രാജ്യങ്ങൾ എന്നിവിടങ്ങളിലെ നൂറോളം നഗരങ്ങളിലേക്കും നിലവിൽ സർവീസ് ലഭ്യമാണ്.
യാത്രക്കാർ അറിയേണ്ട കാര്യങ്ങൾ

യാത്രക്കാർക്കായി പ്രത്യേക റീബുക്കിംഗ്, റീഫണ്ട് നയങ്ങളും എമിറേറ്റ്സ് പ്രഖ്യാപിച്ചു

റീബുക്കിംഗ് സൗകര്യം: ഫെബ്രുവരി 28 മുതൽ മെയ് 31 വരെ യാത്ര ബുക്ക് ചെയ്തവർക്ക്, ജൂൺ 15-നോ അതിനുമുമ്പോ ഉള്ള മറ്റൊരു തീയതിയിലേക്ക് ടിക്കറ്റ് മാറ്റിയെടുക്കാം.

പണം തിരികെ നൽകൽ (Refund): യാത്ര ഒഴിവാക്കാൻ ആഗ്രഹിക്കുന്നവർക്ക് എമിറേറ്റ്സിന്റെ വെബ്സൈറ്റിലെ റീഫണ്ട് ഫോം പൂരിപ്പിച്ച് തുക തിരികെ ആവശ്യപ്പെടാം. ട്രാവൽ ഏജന്റ് വഴിയാണ് ടിക്കറ്റ് എടുത്തതെങ്കിൽ അവരെ സമീപിക്കണം.

സൗജന്യ തീയതി മാറ്റം: ഏപ്രിൽ 2 മുതൽ ടിക്കറ്റ് ബുക്ക് ചെയ്തവർക്ക് ഒരു തവണ തീയതി സൗജന്യമായി മാറ്റാൻ അനുവാദമുണ്ട്.

സാഹചര്യങ്ങൾ മാറുന്നതിനനുസരിച്ച് വിമാനങ്ങളുടെ സമയക്രമത്തിൽ മാറ്റം വരാൻ സാധ്യതയുള്ളതിനാൽ, യാത്ര പുറപ്പെടുന്നതിന് മുമ്പ് എമിറേറ്റ്സ് വെബ്സൈറ്റിലെ ‘ഓപ്പറേഷണൽ അപ്ഡേറ്റുകൾ’ പരിശോധിക്കണമെന്ന് അധികൃതർ നിർദ്ദേശിച്ചു.