സുരക്ഷാ മാനദണ്ഡങ്ങൾ കൂടുതൽ കർശനമാക്കിക്കൊണ്ട് യുഎഇയിലെ പുതിയ ഗതാഗത നിയമം പൂർണതോതിൽ നടപ്പിലായി. 2025 മാർച്ച് 29 മുതൽ പ്രാബല്യത്തിൽ വന്ന നിയമം ഡ്രൈവിങ് ലൈസൻസ് ലഭിക്കാനുള്ള പ്രായപരിധിയിൽ മാറ്റം വരുത്തിയതിനൊപ്പം നിയമലംഘനങ്ങൾക്ക് കടുത്ത ശിക്ഷാനടപടികളും ഉൾക്കൊള്ളുന്നുണ്ട്. ഗതാഗത നിയമങ്ങൾ ലംഘിക്കുന്നവർക്ക് തടവുശിക്ഷയ്ക്കൊപ്പം ഒരു ലക്ഷം ദിർഹം വരെ പിഴയും വിധിക്കാമെന്ന് നിയമം വ്യക്തമാക്കുന്നു.

17 വയസ്സ് പൂർത്തിയായാൽ ലൈസൻസ് അപേക്ഷിക്കാം

പുതിയ നിയമത്തിലെ പ്രധാന മാറ്റം ഡ്രൈവിങ് ലൈസൻസ് ലഭിക്കാനുള്ള പ്രായപരിധിയിലാണ്. ഇനി 17 വയസ്സ് പൂർത്തിയായാൽ ലൈസൻസിനായി അപേക്ഷിക്കാനാകും. എന്നാൽ ലൈസൻസിങ് അതോറിറ്റി നിർദേശിക്കുന്ന മെഡിക്കൽ പരിശോധനകളും നിർബന്ധിത ഡ്രൈവിങ് ടെസ്റ്റുകളും വിജയകരമായി പൂർത്തിയാക്കണം. വിവിധ വാഹന വിഭാഗങ്ങൾക്കായുള്ള ലൈസൻസുകളുടെ കാലാവധി, പുതുക്കൽ നടപടികൾ തുടങ്ങിയവയ്ക്കായി വ്യക്തമായ മാർഗനിർദ്ദേശങ്ങളും നിയമത്തിൽ ഉൾപ്പെടുത്തിയിട്ടുണ്ട്.

ലൈസൻസ് റദ്ദാക്കൽ, സസ്പെൻഷൻ നടപടികൾ കർശനം

ഗതാഗത സുരക്ഷ ഉറപ്പാക്കുന്നതിനായി ഡ്രൈവിങ് ലൈസൻസ് റദ്ദാക്കാനോ താൽക്കാലികമായി സസ്പെൻഡ് ചെയ്യാനോ അതോറിറ്റിക്ക് കൂടുതൽ അധികാരം നൽകിയിട്ടുണ്ട്. ഡ്രൈവർ ശാരീരികമായോ മാനസികമായോ വാഹനമോടിക്കാൻ അയോഗ്യനാണെന്ന് കണ്ടെത്തിയാൽ ലൈസൻസ് ഉടൻ റദ്ദാക്കും. പൊതുസുരക്ഷയ്ക്ക് ഭീഷണിയാണെന്ന് വിലയിരുത്തുന്ന സാഹചര്യങ്ങളിൽ പൊലീസിന് ലൈസൻസിങ് അതോറിറ്റിയുമായി സഹകരിച്ച് ലൈസൻസ് സസ്പെൻഡ് ചെയ്യാനും അധികാരമുണ്ട്. സസ്പെൻഡ് ചെയ്യപ്പെട്ട ഡ്രൈവർമാർക്ക് വീണ്ടും വാഹനമോടിക്കാൻ യോഗ്യത നേടുന്നതിനുള്ള പരിശീലന പരിപാടികളെയും നിയമം നിർദേശിക്കുന്നു.

വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

സഹോദരിയെ തിരമാലകളിൽ നിന്ന് രക്ഷിക്കുന്നതിനിടെ യുഎഇയിൽ 13-കാരൻ മരണപ്പെട്ടു

UAE April 19, 2026

റാസൽഖൈമ: ഏഴ് വയസ്സുകാരിയായ സഹോദരിയെ തിരമാലകളിൽ നിന്ന് രക്ഷിക്കുന്നതിനിടെ പതിമൂന്നുകാരനായ എമിറാത്തി ബാലൻ മുങ്ങിമരിച്ചു. ചൊവ്വാഴ്ച ഉച്ചതിരിഞ്ഞ് റാസൽഖൈമ തീരത്താണ് നാടിനെ കണ്ണീരിലാഴ്ത്തിയ ദാരുണ സംഭവം നടന്നത്. 

സഹോദരിക്ക് പുറമെ ഒപ്പമുണ്ടായിരുന്ന 8-ഉം 9-ഉം വയസ്സുള്ള രണ്ട് ബന്ധുക്കളെയും അപകടത്തിൽ നിന്ന് രക്ഷപ്പെടുത്താൻ ബാലന് കഴിഞ്ഞു. റാസൽഖൈമയിലെ ‘സഊദി ഇൻസ്റ്റിറ്റ്യൂട്ടിന്’ പിന്നിലുള്ള ഫ്ലെമിംഗോ ബീച്ചിലാണ് അപകടമുണ്ടായത്. 

രക്ഷപ്പെട്ട മൂന്ന് കുട്ടികളെയും അടിയന്തര സേവന വിഭാഗം ഉടൻ തന്നെ സഖർ ഗവൺമെൻ്റ് ആശുപത്രിയിൽ പ്രവേശിപ്പിച്ചു. പ്രഥമശുശ്രൂഷയ്ക്കും വിദഗ്ധ ചികിത്സയ്ക്കും ശേഷം ഇവരുടെ ആരോഗ്യനില തൃപ്തികരമായതിനെ തുടർന്ന് പിറ്റേന്ന് തന്നെ ആശുപത്രിയിൽ നിന്ന് ഡിസ്ചാർജ് ചെയ്തു.

13 കാരനെ സഖർ ആശുപത്രിയിൽ എത്തിക്കുന്നതിന് മുൻപ് തന്നെ മരണം സംഭവിച്ചിരുന്നതായി മെഡിക്കൽ അധികൃതർ സ്ഥിരീകരിച്ചു. തുടർനടപടികൾ പൂർത്തിയാക്കി മൃതദേഹം കുടുംബത്തിന് വിട്ടുനൽകി. 

ഷെയ്ഖ് റാഷിദ് ബിൻ സയീദ് പള്ളിയിൽ വെച്ച് മയ്യിത്ത് നമസ്കാരം നടന്നു. തുടർന്ന് റാസൽഖൈമയിലെ അൽ സൽഹിയ ഖബർസ്ഥാനിൽ മയ്യിത്ത് മറവുചെയ്തു. ദുഃഖാർത്തരായ കുടുംബത്തെ ആശ്വസിപ്പിക്കാനും അന്തിമോപചാരം അർപ്പിക്കാനുമായി വൻ ജനാവലിയാണ് ചടങ്ങുകളിൽ പങ്കെടുത്തത്.

പഠനത്തിൽ മിടുക്കനായിരുന്ന മകൻ എല്ലാവർക്കും പ്രിയങ്കരനായിരുന്നുവെന്ന് പിതാവ് പറഞ്ഞു. അടുത്തിടെ മികച്ച മാർക്ക് ലഭിച്ചതിൻ്റെ റിപ്പോർട്ട് കാർഡുമായി അഭിമാനത്തോടെ വീട്ടിലെത്തിയ അവൻ, തൻ്റെ നേട്ടത്തിനുള്ള സമ്മാനമായി ഒരു ‘ഐഫോൺ 17’ ആവശ്യപ്പെട്ടിരുന്നുവെന്നും പിതാവ് വേദനയോടെ ഓർത്തു.

പണം നൽകിയാൽ സുരക്ഷിത യാത്ര; ഹോർമുസ് കടലിടുക്കിൽ പുതിയ നിബന്ധനയുമായി ഇറാൻ

Latest April 19, 2026

ടെഹ്റാൻ: ലോകത്തെ ഏറ്റവും പ്രധാനപ്പെട്ട എണ്ണക്കടത്തു പാതകളിലൊന്നായ ഹോർമുസ് കടലിടുക്കിലൂടെയുള്ള ഗതാഗതത്തിന് പുതിയ സാമ്പത്തിക നിബന്ധനകളുമായി ഇറാൻ. കടലിടുക്കിലൂടെ കടന്നുപോകുന്ന കപ്പലുകളിൽ നിന്ന് പ്രത്യേക ‘സുരക്ഷാ-സംരക്ഷണ’ ഫീസ് ഈടാക്കാനാണ് ഇറാന്റെ തീരുമാനം. പണം നൽകുന്ന കപ്പലുകൾക്ക് മാത്രമേ ഇനി മുതൽ മുൻഗണനാടിസ്ഥാനത്തിൽ കടന്നുപോകാൻ അനുമതി നൽകൂ എന്ന് മുതിർന്ന ഇറാനിയൻ ഉദ്യോഗസ്ഥൻ വ്യക്തമാക്കി.

സുരക്ഷാ സേവനങ്ങൾക്കായി നിശ്ചയിച്ചിട്ടുള്ള തുക വേഗത്തിൽ അടയ്ക്കുന്ന കപ്പലുകളെ കടലിടുക്ക് കടക്കാൻ ആദ്യം അനുവദിക്കും.ഫീസ് നൽകാത്ത കപ്പലുകളുടെ യാത്ര അനിശ്ചിതമായി നീട്ടിവെക്കാനാണ് അധികൃതരുടെ തീരുമാനം.അമേരിക്കയുമായുള്ള വെടിനിർത്തൽ കരാറിൽ യുഎസ് വിശ്വാസവഞ്ചന കാണിച്ചുവെന്ന് ആരോപിച്ചാണ് ശനിയാഴ്ച മുതൽ നിയന്ത്രണങ്ങൾ കർശനമാക്കിയത്.

ആഗോള വിപണിയിൽ ആശങ്ക

സിഎൻഎന്നിന് നൽകിയ അഭിമുഖത്തിലാണ് ഇറാൻ ഈ പുതിയ നയം വെളിപ്പെടുത്തിയത്. കടലിടുക്കിലൂടെ കടന്നുപോകുന്ന കപ്പലുകളുടെ എണ്ണത്തിൽ നിയന്ത്രണമുണ്ടാകുമെന്നും പുതിയ പ്രോട്ടോക്കോൾ കർശനമായി നടപ്പിലാക്കുമെന്നും അധികൃതർ അറിയിച്ചു.

ലോകത്തെ ഇന്ധന വിതരണത്തിന്റെ വലിയൊരു ഭാഗം ആശ്രയിക്കുന്ന ഹോർമുസ് കടലിടുക്കിലെ ഈ സാമ്പത്തിക നിയന്ത്രണം അന്താരാഷ്ട്ര വിപണിയിൽ വലിയ ചലനങ്ങളുണ്ടാക്കുമെന്നാണ് സാമ്പത്തിക വിദഗ്ധർ വിലയിരുത്തുന്നത്. കപ്പൽ ഗതാഗതം വൈകുന്നത് ആഗോള തലത്തിൽ ഇന്ധന വില വർദ്ധനവിനും വിതരണ ശൃംഖലയിലെ തടസ്സങ്ങൾക്കും കാരണമായേക്കാം.