അബുദബി: യുഎഇയിലെ അബുദബിയിലുണ്ടായ ദാരുണമായ വാഹനാപകടത്തിൽ അമ്മയ്ക്കും 15 വയസ്സുള്ള മകനും ജീവൻ നഷ്ടമായി. ബംഗ്ലാദേശി സ്വദേശികളായ ഒഷിമയും മകൻ ഒറിട്രോയുമാണ് മരിച്ചത്. അപകടത്തിൽ ഗുരുതരമായി പരുക്കേറ്റ പിതാവ് സ്വരൂപ് കാന്തി ബിശ്വാസ് ചികിത്സയ്ക്കുശേഷം ആശുപത്രി വിട്ടു.

അൽ വത്ബ പാലത്തിന് സമീപം അപകടം

തിങ്കളാഴ്ച രാത്രി ഒൻപത് മണിയോടെ അൽ വത്ബ പാലത്തിന് സമീപമായിരുന്നു അപകടം. ഒരു പരിപാടിയിൽ പങ്കെടുക്കുന്നതിനായി കുടുംബം കാറിൽ യാത്ര ചെയ്യുകയായിരുന്നു. ഇതിനിടെ പിന്നിൽനിന്ന് അമിതവേഗത്തിലെത്തിയ മറ്റൊരു വാഹനം ഇവരുടെ കാറിൽ ഇടിക്കുകയായിരുന്നു.

ഇടിയുടെ ആഘാതത്തിൽ നിയന്ത്രണം നഷ്ടപ്പെട്ട കാർ റോഡരികിലേക്ക് ഇടിച്ചുകയറി. അപകടത്തിന്റെ തീവ്രതയിൽ ഒഷിമയും മകൻ ഒറിട്രോയും സംഭവസ്ഥലത്തുതന്നെ മരിച്ചു.

പിതാവ് ആശുപത്രി വിട്ടു

അപകടത്തിൽ ഗുരുതരമായി പരുക്കേറ്റ പിതാവ് സ്വരൂപ് കാന്തി ബിശ്വാസിനെ ഉടൻ ആശുപത്രിയിൽ പ്രവേശിപ്പിച്ചു. ചൊവ്വാഴ്ച രാവിലെ അദ്ദേഹത്തെ ആശുപത്രിയിൽനിന്ന് ഡിസ്ചാർജ് ചെയ്തതായി അബുദബിയിലെ ബംഗ്ലാദേശ് എംബസി അധികൃതർ അറിയിച്ചു.

മൃതദേഹങ്ങൾ നാട്ടിലെത്തിക്കാൻ നടപടി

മരിച്ച അമ്മയുടെയും മകന്റെയും മൃതദേഹങ്ങൾ അബുദബിയിലെ ബനിയാസിലുള്ള സെൻട്രൽ മോർച്ചറിയിൽ സൂക്ഷിച്ചിരിക്കുകയാണ്. മൃതദേഹങ്ങൾ ബംഗ്ലാദേശിലേക്ക് കൊണ്ടുപോകുന്നതിനുള്ള നിയമനടപടികൾ പൂർത്തിയാക്കാൻ കുടുംബസുഹൃത്തുക്കളും പ്രാദേശിക ബംഗ്ലാദേശി സമൂഹവും എംബസിയുമായി സഹകരിച്ച് പ്രവർത്തിക്കുന്നുണ്ട്.

ബംഗ്ലാദേശിലെ ചാറ്റോഗ്രാം സ്വദേശികളാണ് കുടുംബം.

പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ