Hajj visa distribution : റിയാദ്: ഈ വർഷത്തെ ഹജ്ജ് വിസകളുടെ വിതരണം ഞായറാഴ്ച (ഫെബ്രു. എട്ട്) മുതൽ ആരംഭിക്കുമെന്ന് സൗദി ഹജ്ജ്-ഉംറ മന്ത്രാലയം അറിയിച്ചു. തീർഥാടകർക്ക് മികച്ച സേവനങ്ങളും സുഗമമായ യാത്രയും ഉറപ്പാക്കുന്നതിനായി മുൻകൂട്ടി ആസൂത്രണം ചെയ്ത പദ്ധതികളുടെ ഭാഗമായാണ് നടപടി.

ഹജ്ജ് കർമങ്ങൾക്ക് നാല് മാസം മുമ്പ് തന്നെ വിസ നടപടികൾ ആരംഭിക്കുന്നത് സൗദി ‘വിഷൻ 2030’ ലക്ഷ്യങ്ങൾ മുൻനിർത്തിയാണ്. വിസ വിതരണത്തോടൊപ്പം ഹജ്ജുമായി ബന്ധപ്പെട്ട മറ്റ് സുപ്രധാന നടപടികളും പൂർത്തിയായിക്കഴിഞ്ഞു. പുണ്യസ്ഥലങ്ങളിലെ സേവനങ്ങൾ, താമസം, ഗതാഗതം എന്നിവയുമായി ബന്ധപ്പെട്ട കരാറുകൾക്ക് അന്തിമരൂപമായി.

തിരക്ക് ഒഴിവാക്കാനും സേവനങ്ങൾ കാര്യക്ഷമമാക്കാനും മക്കയിലെ ക്യാമ്പ് സൈറ്റുകൾ മുൻകൂട്ടി അനുവദിച്ചു. വിദേശ തീർഥാടകർക്കുള്ള സേവന കരാറുകൾ 100 ശതമാനം പൂർത്തിയായി. മക്കയിലെ താമസ സൗകര്യങ്ങൾ ‘നുസ്ക്’ പ്ലാറ്റ്‌ഫോം വഴി പൂർണമായും ഏകോപിപ്പിച്ചു. സീസൺ മുൻകൂട്ടി ആസൂത്രണം ചെയ്യുന്നതിലൂടെ ദശലക്ഷക്കണക്കിന് വരുന്ന തീർഥാടകർക്ക് മികച്ച അനുഭവം നൽകാൻ കഴിയുമെന്ന് മന്ത്രാലയം പ്രത്യാശ പ്രകടിപ്പിച്ചു. നിലവിലെ കണക്കുകൾ പ്രകാരം 7,50,000 തീർഥാടകർ ഹജ്ജിനായി രജിസ്റ്റർ ചെയ്തിട്ടുണ്ട്, കൂടാതെ 30,000 തീർഥാടകർ അവരുടെ മാതൃരാജ്യങ്ങളിൽ നിന്ന് നേരിട്ട് പാക്കേജുകൾ ബുക്ക് ചെയ്തു. വിദേശ തീർഥാടകർക്കായി പുണ്യസ്ഥലങ്ങളിൽ 485 ക്യാമ്പുകൾ അനുവദിച്ചിട്ടുണ്ട്. 73 ഹജ്ജ് കാര്യ ഓഫീസുകൾ അവരുടെ അടിസ്ഥാന കരാറുകൾക്ക് അന്തിമരൂപം നൽകിയതായും ഹജ്ജ് മന്ത്രാലയം പറഞ്ഞു.

 സ്വർണ്ണം ഒക്കെ ഇനി അങ്ങ് മാറി നിൽക്ക്,,ഇനി താരം, വെള്ളി! ദുബായിൽ വെള്ളി വാങ്ങാൻ പ്രവാസികളുടെ തിരക്ക്

UAE Nazia Staff Editor — February 6, 2026 · 0 Comment

യുഎഇയിലെ നിക്ഷേപ വിപണിയിൽ സ്വർണ്ണത്തെ വെല്ലുന്ന കുതിപ്പുമായി വെള്ളി മുന്നേറുന്നു. ആഗോള വിപണിയിൽ സ്വർണ്ണവില റെക്കോർഡുകൾ ഭേദിച്ച് കുതിക്കുന്ന സാഹചര്യത്തിൽ, മികച്ചൊരു ബദൽ നിക്ഷേപമെന്ന നിലയിൽ പ്രവാസികൾ വെള്ളിയെ നെഞ്ചിലേറ്റുകയാണ്. ദുബായിലെ വിപണികളിൽ വെള്ളിയുടെ ആവശ്യം ക്രമാതീതമായി വർദ്ധിച്ചതോടെ പലയിടത്തും സ്റ്റോക്കുകൾ തീർന്നുപോയതായാണ് റിപ്പോർട്ടുകൾ സൂചിപ്പിക്കുന്നത്.

വെള്ളി കിട്ടാക്കനിയാകുന്നു
സാധാരണയായി സ്വർണ്ണ വില കൂടുമ്പോൾ ആളുകൾ വെള്ളിയെ ഒരു താൽക്കാലിക ആശ്രയമായി കാണാറുണ്ട്. എന്നാൽ നിലവിലെ സാഹചര്യം വ്യത്യസ്തമാണ്. വിപണി വിലയേക്കാൾ കൂടുതൽ പണം നൽകി വെള്ളി വാങ്ങാൻ പോലും നിക്ഷേപകർ തയ്യാറാകുന്നു എന്നതാണ് പുതിയ കാഴ്ച. കിലോയ്ക്ക് 1,500 മുതൽ 2,000 ദിർഹം വരെ പ്രീമിയം (അധിക തുക) നൽകാൻ പോലും ആളുകൾ മടിക്കുന്നില്ല. ദുബായ് വിപണിയിൽ വെള്ളി കിട്ടാനില്ലാത്ത അവസ്ഥയാണെന്ന് ഖലീജ് ടൈംസ് ഉൾപ്പെടെയുള്ള മാധ്യമങ്ങൾ റിപ്പോർട്ട് ചെയ്യുന്നു.

വിലയിലെ വൻ കുതിപ്പ്
വെള്ളിയുടെ മൂല്യത്തിലുണ്ടായ വർദ്ധന നിക്ഷേപകരെ ആവേശം കൊള്ളിക്കുന്നതാണ്. ഒരു കാലത്ത് കിലോയ്ക്ക് 9,000 ദിർഹത്തിനടുത്തായിരുന്ന വെള്ളിയുടെ വില ഇപ്പോൾ 15,500 ദിർഹത്തിന് മുകളിലേക്ക് കുതിച്ചിരിക്കുകയാണ്. ഈ വലിയ വിലക്കയറ്റം ദീർഘകാലാടിസ്ഥാനത്തിൽ ലാഭം തരുമെന്ന പ്രതീക്ഷയാണ് സാധാരണക്കാരായ പ്രവാസികളെയും യുവാക്കളെയും വെള്ളിയിലേക്ക് ആകർഷിക്കുന്നത്.

യുവാക്കളുടെ ഇഷ്ടം വെള്ളിയിലേക്ക്
പുതിയ കാലത്തെ നിക്ഷേപകർക്കിടയിൽ, പ്രത്യേകിച്ച് യുവാക്കൾക്കിടയിൽ വെള്ളിക്ക് വലിയ സ്വീകാര്യതയാണ് ലഭിക്കുന്നത്. ലൈറ്റ് വെയിറ്റ് ആഭരണങ്ങളോടുള്ള പ്രിയവും സ്റ്റൈലിഷായ ലുക്കും വെള്ളിയെ ട്രെൻഡായി മാറ്റുന്നു. കുറഞ്ഞ നിക്ഷേപത്തിൽ വലിയ ലാഭം കൊയ്യാമെന്ന തിരിച്ചറിവാണ് സ്വർണ്ണത്തേക്കാൾ വെള്ളിയെ പ്രിയപ്പെട്ടതാക്കുന്നത്. ചെറിയ തുക സേവ് ചെയ്യുന്ന പ്രവാസികൾ പോലും തങ്ങളുടെ സമ്പാദ്യത്തിന്റെ ഒരു ഭാഗം വെള്ളിയായി സൂക്ഷിക്കാൻ ആഗ്രഹിക്കുന്നു.

ഡിമാൻഡ് വർദ്ധിച്ചതോടെ വ്യാപാരികൾ പുതിയ സ്റ്റോക്കിനായി വലിയ കാത്തിരിപ്പിലാണ്. എന്നാൽ വിതരണ ശൃംഖലയിലെ തടസ്സങ്ങളും ആഗോള വിപണിയിലെ ഡിമാൻഡും കാരണം സ്റ്റോക്ക് എത്തുന്ന നിമിഷം തന്നെ വിറ്റുതീരുന്ന സാഹചര്യമാണ്. വെള്ളി ഇപ്പോൾ വെറുമൊരു ലോഹമല്ല, മറിച്ച് പ്രവാസികളുടെ ഭാവി സുരക്ഷിതമാക്കാനുള്ള ഒരു വലിയ നിക്ഷേപ മാർഗ്ഗമായി മാറിയിരിക്കുന്നു.

വിദഗ്ദ്ധരുടെ അഭിപ്രായം
സ്വർണ്ണവില സാധാരണക്കാരന്റെ കൈപ്പിടിയിൽ ഒതുങ്ങാത്ത ഉയരങ്ങളിലേക്ക് പോകുമ്പോൾ, വെള്ളി മികച്ചൊരു സുരക്ഷിത നിക്ഷേപമാണെന്ന് സാമ്പത്തിക വിദഗ്ദ്ധർ വിലയിരുത്തുന്നു. എന്നാൽ വിപണിയിലെ ഏറ്റക്കുറച്ചിലുകൾ ശ്രദ്ധാപൂർവ്വം നിരീക്ഷിച്ച ശേഷം മാത്രമേ വലിയ നിക്ഷേപങ്ങൾ നടത്താവൂ എന്നും അവർ മുന്നറിയിപ്പ് നൽകുന്നു. യുഎഇയിലെ മലയാളികൾക്കിടയിലും ഈ പുതിയ നിക്ഷേപ രീതി വലിയ ചലനങ്ങൾ സൃഷ്ടിച്ചു കഴിഞ്ഞു.

Expat malayali dead: മലയാളി ദുബായിൽ മരണപ്പെട്ടു: വിടപറഞ്ഞത് കോട്ടയം സ്വദേശിനി

Expat malayali dead: ദുബായ് ∙ കോട്ടയം താഴത്തങ്ങാടിയിൽ കൊച്ചേട്ട് അമ്പാട്ടുതറ കുടുംബാംഗമായ അന്ന ജോൺ (ജീന, 50) ദുബായിൽ അന്തരിച്ചു. പരേതരായ ജോൺ സി.അമ്പാട്ടിന്റെയും ജോളിയുടെയും മകളാണ്.  പത്തനംതിട്ട പൂവത്തൂർ തെങ്ങുംതറയിൽ പീസ് കോട്ടേജിൽ മാത്യൂസ് വർഗീസിന്റെ ഭാര്യയാണ്. മകൾ: സാറ (ദ് പെന്തകോസ്ത് മിഷൻ ശുശ്രൂഷക ചെന്നൈ). സംസ്കാരം ദുബായ് ജബൽഅലി ക്രിസ്ത്യൻ സെമിത്തേരിയിൽ. 

UAE Ramadan 2026:യുഎഇയിൽ ഇത്തവണ നോമ്പ് സമയം കുറവായിരിക്കും; റമദാൻ 2026 സമയക്രമം ഇങ്ങനെ

ദുബായ്: 2026-ലെ റമദാനിൽ യുഎഇയിലെ വിശ്വാസികൾക്ക് നോമ്പ് സമയം മുൻവർഷത്തെ അപേക്ഷിച്ച് കുറവായിരിക്കുമെന്ന് റിപ്പോർട്ട്. ഫെബ്രുവരി 19-നോ (അല്ലെങ്കിൽ ചാന്ദ്രപ്പിറവി അനുസരിച്ച് 18-നോ) റമദാൻ ആരംഭിക്കുമെന്നാണ് കണക്കുകൂട്ടൽ.വാർത്തകളും ജോലി ഒഴിവുകളും തത്സമയം അറിയുവാൻ വാട്സ്ആപ്പ് ഗ്രൂപ്പിൽ അംഗമാകുക

കഴിഞ്ഞ വർഷത്തെ അപേക്ഷിച്ച് നോമ്പ് സമയത്തിൽ ഏകദേശം 30 മിനിറ്റിന്റെ കുറവുണ്ടാകുന്നത് വിശ്വാസികൾക്ക് ആശ്വാസമാകും. ഹിജ്റ കലണ്ടർ അനുസരിച്ച് ഓരോ വർഷവും റമദാൻ 10-12 ദിവസം നേരത്തെ എത്തുന്നതാണ് ഇതിന് കാരണം.

ആഴ്ച തിരിച്ചുള്ള സമയക്രമം (ഏകദേശ കണക്കുകൾ):

• ആദ്യ ആഴ്ച: റമദാൻ മാസത്തിലെ ഏറ്റവും ചുരുങ്ങിയ നോമ്പ് സമയമാണിത്. 12 മണിക്കൂറും 46 മിനിറ്റും ആയിരിക്കും ദൈർഘ്യം. (ഫജർ: 5.33 am, മഗ്രിബ്: 6.19 pm).
• രണ്ടാം ആഴ്ച: നോമ്പ് സമയം 13 മണിക്കൂർ കടക്കും. (ഫജർ: 5.24 am, മഗ്രിബ്: 6.25 pm).
• മൂന്നാം ആഴ്ച: റമദാൻ പകുതിയാകുമ്പോൾ നോമ്പ് സമയം 13 മണിക്കൂർ 5 മിനിറ്റായി വർദ്ധിക്കും.
• അവസാന ആഴ്ച: മാസത്തിലെ ഏറ്റവും ദൈർഘ്യമേറിയ നോമ്പ് അവസാന ദിവസങ്ങളിലായിരിക്കും. ഏകദേശം 13 മണിക്കൂർ 27 മിനിറ്റ്. (ഫജർ: 5.06 am, മഗ്രിബ്: 6.33 pm).

ഏറ്റവും കൂടിയ സമയം പോലും 2025-ലെ നോമ്പ് സമയത്തേക്കാൾ (ഏകദേശം 14 മണിക്കൂർ) കുറവാണെന്നത് ശ്രദ്ധേയമാണ്

Dubai Loop;അറിഞ്ഞോ???20 മിനിറ്റ് യാത്രയൊക്കെ ഇനി വെറും 3 മിനുറ്റ് മാത്രം;എങ്ങനെയെന്നല്ലേ?? അറിയാം

Dubai Loop ദുബായ്: നഗരത്തിലെ ഗതാഗതക്കുരുക്കിന് പരിഹാരമായി അത്യാധുനിക ഭൂഗർഭ യാത്രാ സംവിധാനമായ ‘ദുബായ് ലൂപ്’ വരുന്നു. അമേരിക്കയിലെ ലാസ് വേഗസിന് ശേഷം ഇത്തരമൊരു സാങ്കേതികവിദ്യ നടപ്പിലാക്കുന്ന ലോകത്തിലെ രണ്ടാമത്തെ നഗരമായി ദുബായ് മാറും. ഇലോൺ മസ്കിന്റെ ‘ദ് ബോറിങ് കമ്പനി’യുമായി സഹകരിച്ചാണ് ആർടിഎ (RTA) ഈ പദ്ധതി നടപ്പിലാക്കുന്നത്. സാധാരണ റോഡ് മാർഗം 20 മിനിറ്റെടുക്കുന്ന ദൂരം വെറും 3 മിനിറ്റുകൊണ്ട് പിന്നിടാം. ഭൂഗർഭ ടണലുകളിലൂടെ മണിക്കൂറിൽ 160 കിലോമീറ്റർ വേഗതയിൽ സഞ്ചരിക്കുന്ന ഇലക്ട്രിക് വാഹനങ്ങളാണ് ഇതിനായി ഉപയോഗിക്കുന്നത്. ദുബായ് ഇന്റർനാഷനൽ ഫിനാൻഷ്യൽ സെന്ററിനെ (DIFC) ദുബായ് മാളുമായി ബന്ധിപ്പിക്കുന്ന 6.4 കിലോമീറ്റർ പാതയാണ് ആദ്യഘട്ടത്തിൽ നിർമ്മിക്കുന്നത്. ആകെ 250 കോടി ദിർഹം പ്രതീക്ഷിക്കുന്ന പദ്ധതിയുടെ ഒന്നാം ഘട്ടത്തിന് 60 കോടി ദിർഹമാണ് ചെലവ് കണക്കാക്കുന്നത്. 

ആദ്യഘട്ടം ഒരു വർഷത്തിനുള്ളിൽ പൂർത്തിയാക്കും. 19 സ്റ്റേഷനുകളുള്ള 24 കിലോമീറ്റർ ദൈർഘ്യമുള്ള പൂർണ്ണരൂപം മൂന്ന് വർഷത്തിനുള്ളിൽ സജ്ജമാകും. പദ്ധതി പൂർത്തിയാകുന്നതോടെ ബിസിനസ് ബേ, ഡിഐഎഫ്സി, ദുബായ് മാൾ മേഖലകളിലായി പ്രതിദിനം 13,000 പേർക്ക് ഈ സേവനം ഉപയോഗപ്പെടുത്താം. ദുബായിൽ നടക്കുന്ന ലോക സർക്കാർ ഉച്ചകോടിയിൽ നിർമ്മിത ബുദ്ധി (AI), ആഗോള സമ്പദ്‌വ്യവസ്ഥ തുടങ്ങിയ വിഷയങ്ങളിലും സുപ്രധാന ചർച്ചകൾ നടന്നു. സാമ്പത്തിക വെല്ലുവിളികൾ നേരിടാൻ ഡിജിറ്റൽ പരിവർത്തനവും സുതാര്യതയും അനിവാര്യമാണെന്ന് ഐഎംഎഫ് മേധാവി ക്രിസ്റ്റലീന ജോർജിയേവ പറഞ്ഞു. ഭരണപരമായ പ്രശ്നങ്ങൾക്ക് ശാസ്ത്രീയ പരിഹാരം കാണാൻ ലക്ഷ്യമിട്ടുള്ള ഉച്ചകോടിയിൽ എൺപതിലേറെ നൊബേൽ സമ്മാന ജേതാക്കൾ പങ്കെടുത്തു

influenza cases rise in uae:യുഎഇയിൽ ഇൻഫ്ലുവൻസ വ്യാപിക്കുന്നു; പനിയിൽ നിന്ന് രക്ഷനേടാൻ ഇക്കാര്യങ്ങൾ ശ്രദ്ധിക്കണമെന്ന് ഡോക്ടർമാർ‌

ദുബൈ: യുഎഇയിൽ കാലാവസ്ഥാ വ്യതിയാനത്തെത്തുടർന്ന് ഇൻഫ്ലുവൻസ (പനി) കേസുകൾ ഗണ്യമായി വർദ്ധിക്കുന്നതായി ആരോഗ്യ വിദഗ്ധർ. ഋതുമാറ്റങ്ങൾ വൈറസ് പടരാൻ അനുകൂല സാഹചര്യം ഒരുക്കുന്നതിനാൽ പ്രവാസികളും സ്വദേശികളും ജാഗ്രത പാലിക്കണമെന്ന് ഡോക്ടർമാർ മുന്നറിയിപ്പ് നൽകുന്നു. വെറും ജലദോഷമായി പനിയെ കാണരുതെന്നും ശ്വാസകോശ സംബന്ധമായ ഗുരുതര പ്രശ്നങ്ങൾക്ക് ഇത് കാരണമായേക്കാമെന്നും വിദഗ്ധർ ചൂണ്ടിക്കാട്ടി.

കടുത്ത പനി, വിറയൽ, വിട്ടുമാറാത്ത ചുമ, തൊണ്ടവേദന, അമിതമായ ക്ഷീണം എന്നിവയാണ് പ്രധാന ലക്ഷണങ്ങൾ. കുട്ടികൾ, പ്രായമായവർ, പ്രതിരോധശേഷി കുറഞ്ഞവർ എന്നിവരിൽ ഇൻഫ്ലുവൻസ ന്യുമോണിയ പോലുള്ള സങ്കീർണ്ണതകളിലേക്ക് നയിക്കാൻ സാധ്യതയുണ്ടെന്ന് ആസ്റ്റർ ക്ലിനിക്കിലെ പൾമണോളജിസ്റ്റ് ഡോ. റൈസ ഹമീദ് വ്യക്തമാക്കി.

പനിയെ പ്രതിരോധിക്കാനുള്ള ഏറ്റവും ഫലപ്രദമായ മാർഗ്ഗം വാർഷിക ഫ്ലൂ വാക്സിൻ എടുക്കുക എന്നതാണ്. ഒക്ടോബർ മുതൽ ഡിസംബർ വരെയുള്ള സമയമാണ് ഇതിന് ഏറ്റവും അനുയോജ്യം. കുത്തിവയ്പ്പ് ഭയമുള്ളവർക്ക് നാസൽ സ്പ്രേ രൂപത്തിലുള്ള വാക്സിനും ലഭ്യമാണ്.

സോപ്പും വെള്ളവും ഉപയോഗിച്ച് 20 സെക്കൻഡ് നേരമെങ്കിലും കൈകൾ കഴുകുകയോ സാനിറ്റൈസർ ഉപയോഗിക്കുകയോ ചെയ്യണം. വൈറസിന്റെ പ്രവേശന കവാടങ്ങളായ കണ്ണ്, മൂക്ക്, വായ എന്നിവിടങ്ങളിൽ അനാവശ്യമായി സ്പർശിക്കുന്നത് ഒഴിവാക്കുക. രോഗലക്ഷണങ്ങൾ ഉള്ളവരുമായി അകലം പാലിക്കുക. തിരക്കുള്ള ഇടങ്ങളിൽ മാസ്ക് ധരിക്കുന്നത് വൈറസ് ബാധ തടയാൻ സഹായിക്കും.

പനിയുള്ളവർ വീട്ടിൽ തന്നെ വിശ്രമിക്കാനും മറ്റുള്ളവരുമായുള്ള സമ്പർക്കം ഒഴിവാക്കാനും ശ്രദ്ധിക്കണം. പനി കുറഞ്ഞാലും 24 മണിക്കൂർ കൂടി നിരീക്ഷണത്തിൽ തുടരണം. വീടുകൾക്കുള്ളിൽ വായുസഞ്ചാരം ഉറപ്പാക്കുന്നത് വൈറസ് സാന്ദ്രത കുറയ്ക്കാൻ സഹായിക്കുമെന്ന് മെഡ്കെയർ ഹോസ്പിറ്റലിലെ ഡോ. ഷഫീക്ക് പറഞ്ഞു.

പോഷകസമൃദ്ധമായ ആഹാരം, കൃത്യമായ ഉറക്കം, വ്യായാമം, ധാരാളം വെള്ളം കുടിക്കുക എന്നിവയിലൂടെ ശരീരത്തിന്റെ സ്വാഭാവിക പ്രതിരോധശേഷി നിലനിർത്താം. പനിക്കാലം അസുഖങ്ങളുടേതാകാതിരിക്കാൻ വ്യക്തിശുചിത്വത്തിലും വാക്സിനേഷനിലും വിട്ടുവീഴ്ച ചെയ്യരുതെന്ന് ആരോഗ്യ വകുപ്പ് അധികൃതർ ഓർമ്മിപ്പിച്ചു.

Uae rent:പ്രവാസികൾക്ക് ഇരുട്ടടി; അബുദബിയിൽ വാടകനിരക്ക് ഇരട്ടിയായി, കുറഞ്ഞ വാടക നൽകുന്നവരെ കുടിയൊഴിപ്പിക്കൽ കറന്റ്‌ കട്ട്‌

Uae rent; അബുദബി: വില്ലകളുടെ വാടക ഇരട്ടിയിലേരെ വർധിപ്പിക്കാനൊരുങ്ങി കെട്ടിടം നടത്തിപ്പുകാർ. ഇത്തരത്തിൽ വാടക വർധിപ്പിക്കാൻ ഒരുങ്ങുമ്പോൾ വലിയ പ്രയാസത്തിലായിരിക്കുകയാണ് പ്രവാസികൾ. മിക്കവർക്കും വരുമാനം മുഴുവനായും വാടകയ്ക്ക് നൽകേണ്ടുന്ന അവസ്ഥയാണുള്ളത്. 

ഇതിന് കഴിയാത്തവരെ പല മാർഗങ്ങളിലൂടെ ഒഴിപ്പിച്ച ശേഷം പുതിയ ആളുകൾക്ക് വില്ലകൾ കൂടിയ വിലയ്ക്ക് നൽകുകയാണ് ഇവർ ചെയ്യുന്നത്. കുറഞ്ഞ ദിവസങ്ങൾക്കുള്ളിൽ മറ്റൊരിടം കണ്ടെത്തി അവിടേക്ക് മാറുന്നത് പ്രയാസകരമാണെന്ന് പലരും പറയുന്നു. പുതിയതായി എമിറേറ്റിലെ വില്ലകൾ തേടി എത്തുന്നവരാകട്ടെ വാടകയായി വൻതുക നൽകേണ്ടുന്ന ഗതികേടിലാണ്. 

തങ്ങൾക്ക് താങ്ങാനാകുന്ന വിലയിലൊരു താമസസ്ഥലം തേടി അലയുകയാണ് പല കുടുംബങ്ങളും. രാജ്യത്ത് ഒരു വില്ലയിൽ ഒന്നിലേറെ കുടുംബങ്ങൾ താമസിക്കാൻ പാടില്ലെന്നാമ് നിയമം. അക്കാരണത്താൽ തന്നെ പെട്ടെന്നിങ്ങനെയൊരു ആവശ്യം മുന്നോട്ടുവയ്ക്കപ്പെടുമ്പോൾ അധികമാരും പരാതിപ്പെടാറില്ല.

അതുകൊണ്ടുതന്നെ എമിറേറ്റിൽ മുന്നറിയിപ്പില്ലാതെയുള്ള കുടിയൊഴിപ്പിക്കൽ തുടരുകയാണ്. ഒന്നിൽ കൂടുതൽ കുടുംബങ്ങൾ ഒരുമിച്ച് താമസിക്കരുതെന്ന് നിയമമുണ്ടെങ്കിലും വാടക താങ്ങാനാകാതെ പലരും കാലങ്ങളായി ഇങ്ങനെത്തന്നെയാണ് താമസിച്ചുവരുന്നത്.

സ്റ്റുഡിയോ വില്ലയ്ക്ക് 40,000 ദിർഹമാണ് വാടക. മുമ്പിത് വെറും 24,000 ദിർഹമായിരുന്നു. വില്ല വൺ ബെഡ് റൂമിന് 55,000 ദിർഹവും വില്ല ടു ബെഡ് റൂമിന് 65,000 ദിർഹവുമാണ് നിലവിലെ നിരക്ക്.

വില്ലകളിലെ താമസം സംബന്ധിച്ച നിയന്ത്രണങ്ങൾ ഭയന്ന് ഫ്ലാറ്റുകളിലേക്ക് മാറാൻ ആഗ്രഹിക്കുന്ന പ്രവാസികൾക്ക് കനത്ത തിരിച്ചടിയായി അബുദബിയിലെ വാടക വർദ്ധനവ് മാറിയിരിക്കുകയാണ്. മുസഫ ഷാബിയ മേഖലയിലെ ഫ്ലാറ്റുകൾക്ക് റെക്കോർഡ് വാടകയാണ് ഇപ്പോൾ ഈടാക്കുന്നത്.

മുസഫ ഷാബിയ 9-ൽ രണ്ട് കിടപ്പുമുറികളുള്ള (2 BHK) ഫ്ലാറ്റിന് നിലവിൽ 90,000 ദിർഹം വരെയാണ് വാടക ആവശ്യപ്പെടുന്നത്. നേരത്തെ 55,000 ദിർഹത്തിന് ലഭ്യമായിരുന്ന ഫ്ലാറ്റുകൾക്കാണ് ഈ വാടകനിരക്ക്. വൺ ബെഡ്‌റൂം ഫ്ലാറ്റുകളുടെ വാടകയാകട്ടെ 55,000 ദിർഹമായി ഉയർന്നു.

അബുദബിയിൽ ഇത്തിഹാദ് പാസഞ്ചർ റെയിൽ സർവീസ് ഈ വർഷം ആരംഭിക്കാനിരിക്കുന്നതാണ് മുസഫ ഷാബിയ പോലുള്ള പ്രധാന കേന്ദ്രങ്ങളിലെ റിയൽ എസ്റ്റേറ്റ് മൂല്യം വർദ്ധിപ്പിച്ചത്. നേരത്തെ സ്റ്റുഡിയോ എന്ന പേരിൽ നൽകിയിരുന്ന വലിയ മുറികൾ വൺ ബെഡ്റൂം ഫ്ലാറ്റുകളാക്കി മാറ്റി ഉടമകൾ വാടക കുത്തനെ കൂട്ടിയിട്ടുണ്ട്. അനധികൃത വില്ല താമസത്തിനെതിരെയുള്ള പരിശോധനകൾ കർശനമാക്കിയതോടെ പലരും സുരക്ഷിതമായ ഫ്ലാറ്റുകളിലേക്ക് മാറാൻ ശ്രമിക്കുന്നത് ഡിമാൻഡ് വർദ്ധിക്കാൻ കാരണമായി.

കുറഞ്ഞ വരുമാനക്കാരായ പ്രവാസികളെ സംബന്ധിച്ചിടത്തോളം താങ്ങാനാവുന്നതിലും അപ്പുറമാണ് നിലവിലെ ഈ നിരക്കുകൾ. താമസ മേഖലയിലെ ഈ അപ്രതീക്ഷിത മാറ്റം പല കുടുംബങ്ങളെയും പ്രതിസന്ധിയിലാക്കിയിരിക്കുകയാണ്.