UAE social media laws:ദുബായ്: സോഷ്യൽ മീഡിയയിൽ എന്തും എഴുതിവിടാമെന്ന് കരുതുന്നവർ ജാഗ്രത പാലിക്കുക. വ്യക്തികളുടെയോ സ്ഥാപനങ്ങളുടെയോ സൽപ്പേരിന് മനഃപൂർവം കോട്ടം വരുത്തുന്ന തരത്തിലുള്ള കമന്റുകളും വ്യാജ റിവ്യൂകളും നിയമനടപടികൾക്ക് കാരണമാകുമെന്ന് ദുബായ് പൊലീസ് മുന്നറിയിപ്പ് നൽകി. അഭിപ്രായസ്വാതന്ത്ര്യം എല്ലാവർക്കുമുണ്ടെങ്കിലും മറ്റുള്ളവരെ അപമാനിക്കാനോ അപകീർത്തിപ്പെടുത്താനോ ഡിജിറ്റൽ പ്ലാറ്റ്‌ഫോമുകൾ ഉപയോഗിക്കുന്നത് അനുവദിക്കാനാവില്ലെന്ന് അധികൃതർ വ്യക്തമാക്കി.
ദുബായ് പൊലീസിലെ സോഷ്യൽ മീഡിയ ക്രൈംസ് വിഭാഗം മേധാവി മേജർ യാസർ ജുമ മുഹമ്മദ് ആണ് ഇക്കാര്യം അറിയിച്ചത്. ദുബായ് പൊലീസ് പോഡ്‌കാസ്റ്റിൽ സംസാരിക്കവെ, ഓൺലൈനിൽ അഭിപ്രായങ്ങൾ രേഖപ്പെടുത്തുന്നതിനും വിമർശനങ്ങൾ ഉന്നയിക്കുന്നതിനും നിയമപരമായ പരിധികളുണ്ടെന്ന് അദ്ദേഹം ചൂണ്ടിക്കാട്ടി.
ഗൂഗിൾ മാപ്‌സിൽ വ്യാജ റിവ്യൂ; പ്രതികൾ അറസ്റ്റിൽ
ഒരു സ്ഥാപനത്തിന്റെ സൽപ്പേരിന് കളങ്കമുണ്ടാക്കുന്നതിനായി ഗൂഗിൾ മാപ്‌സിൽ വ്യാജ നെഗറ്റീവ് റിവ്യൂകൾ പോസ്റ്റ് ചെയ്ത സംഭവവും പൊലീസ് വെളിപ്പെടുത്തി. സ്ഥാപനം സന്ദർശിക്കുക പോലും ചെയ്യാത്ത ചിലർ കൂട്ടമായി ചേർന്ന് സ്ഥാപനത്തിനെതിരെ മോശം അഭിപ്രായങ്ങൾ രേഖപ്പെടുത്തിയെന്നാണ് അന്വേഷണത്തിൽ കണ്ടെത്തിയത്.
വ്യാജ റിവ്യൂകൾ ബിസിനസിനെ പ്രതികൂലമായി ബാധിക്കുകയും സാമ്പത്തിക നഷ്ടമുണ്ടാക്കുകയും ചെയ്തതിനെ തുടർന്ന് സ്ഥാപനത്തിന്റെ അധികൃതർ പരാതി നൽകുകയായിരുന്നു. തുടർന്ന് ദുബായ് പൊലീസ് പ്രത്യേക അന്വേഷണസംഘത്തെ നിയോഗിച്ച് വ്യാജ അക്കൗണ്ടുകൾക്ക് പിന്നിലുള്ളവരെ കണ്ടെത്തുകയും പ്രതികളെ അറസ്റ്റ് ചെയ്ത് പബ്ലിക് പ്രോസിക്യൂഷന് കൈമാറുകയും ചെയ്തു.
ഓൺലൈൻ പ്ലാറ്റ്‌ഫോമുകളിലെ കമന്റുകൾ ഒരു വ്യക്തിയുടെയോ സ്ഥാപനത്തിന്റെയോ പ്രശസ്തിക്കും സാമ്പത്തിക താൽപര്യങ്ങൾക്കും ദോഷം വരുത്തുന്ന രീതിയിൽ ഉപയോഗിച്ചാൽ നിയമനടപടികൾ നേരിടേണ്ടിവരുമെന്നതിന്റെ ഉദാഹരണമാണ് ഈ സംഭവം.
വിമർശിക്കാം, പക്ഷേ അപമാനിക്കരുത്
സോഷ്യൽ മീഡിയയിൽ അഭിപ്രായങ്ങൾ പ്രകടിപ്പിക്കുന്നതിനും സേവനങ്ങളെക്കുറിച്ച് വിമർശനങ്ങൾ ഉന്നയിക്കുന്നതിനും വിലക്കില്ല. എന്നാൽ അഭിപ്രായപ്രകടനം മറ്റൊരാളെ അപമാനിക്കുന്നതിലേക്കോ അപകീർത്തിപ്പെടുത്തുന്നതിലേക്കോ കടന്നാൽ നിയമപരമായ ഉത്തരവാദിത്തം നേരിടേണ്ടിവരാം.
സോഷ്യൽ മീഡിയയിലൂടെയും മറ്റ് ഡിജിറ്റൽ പ്ലാറ്റ്‌ഫോമുകളിലൂടെയും നടത്തുന്ന അപമാനിക്കൽ, ഭീഷണിപ്പെടുത്തൽ, അപവാദപ്രചാരണം, ഇലക്ട്രോണിക് തട്ടിപ്പ്, അക്കൗണ്ടുകൾ ഹാക്ക് ചെയ്യൽ തുടങ്ങിയവ സാഹചര്യങ്ങൾക്കനുസരിച്ച് സൈബർ കുറ്റകൃത്യങ്ങളുടെ പരിധിയിൽ വരാം.
വ്യാജ അക്കൗണ്ടുകൾ ഉപയോഗിച്ചാൽ നിയമനടപടികളിൽനിന്ന് രക്ഷപ്പെടാമെന്ന് കരുതരുതെന്നും പൊലീസ് മുന്നറിയിപ്പ് നൽകി. ഇത്തരം അക്കൗണ്ടുകൾക്ക് പിന്നിലുള്ളവരെ കണ്ടെത്താൻ ആവശ്യമായ അന്വേഷണ സംവിധാനങ്ങളും പരിശീലനം ലഭിച്ച ഉദ്യോഗസ്ഥരും പൊലീസിനുണ്ടെന്നും അധികൃതർ വ്യക്തമാക്കി.
പഴയ വിവരങ്ങൾ പങ്കുവയ്ക്കുമ്പോഴും ജാഗ്രത വേണം
സോഷ്യൽ മീഡിയയിൽ ഒരു വാർത്തയോ ചിത്രമോ വീഡിയോയോ പങ്കുവയ്ക്കുന്നതിന് മുമ്പ് അതിന്റെ വിശ്വാസ്യത ഉറപ്പാക്കണം. തെറ്റായ വിവരങ്ങളും സ്ഥിരീകരിക്കാത്ത വാർത്തകളും പ്രചരിപ്പിക്കുന്നത് മറ്റുള്ളവരുടെ സുരക്ഷയെയും പൊതുതാൽപര്യങ്ങളെയും ബാധിച്ചേക്കാം.
അപകീർത്തികരമായ ഉള്ളടക്കം ആദ്യം പ്രസിദ്ധീകരിക്കുന്നവർ മാത്രമല്ല, അത് വീണ്ടും പങ്കുവയ്ക്കുന്നവരും സാഹചര്യങ്ങൾക്കനുസരിച്ച് നിയമപരമായ ഉത്തരവാദിത്തം നേരിടേണ്ടിവരാമെന്ന് പൊലീസ് ഓർമിപ്പിച്ചു.
സർക്കാർ അധികൃതർ മുമ്പ് പ്രസിദ്ധീകരിച്ച അറിയിപ്പുകൾ പോലും സാഹചര്യങ്ങളിലോ നിയമങ്ങളിലോ മാറ്റമുണ്ടാകുമ്പോൾ കാലഹരണപ്പെട്ടേക്കാം. അതിനാൽ പഴയ വിവരങ്ങൾ വീണ്ടും പങ്കുവയ്ക്കുന്നതിന് മുമ്പ് അവ ഇപ്പോഴും പ്രസക്തമാണോയെന്ന് പരിശോധിക്കണമെന്നും അധികൃതർ നിർദേശിച്ചു.
പ്രതിസന്ധികളുടെയും അടിയന്തര സാഹചര്യങ്ങളുടെയും സമയത്ത് ഔദ്യോഗിക നിർദേശങ്ങൾ പാലിക്കണം. പൊതുസുരക്ഷയെ ബാധിക്കാനിടയുള്ള സ്ഥിരീകരിക്കാത്ത ചിത്രങ്ങളും വീഡിയോകളും പ്രചരിപ്പിക്കുന്നത് ഒഴിവാക്കണമെന്നും പൊലീസ് വ്യക്തമാക്കി.
ഡിജിറ്റൽ സുരക്ഷയ്ക്കായി ഇ-ക്രൈം ഹബ്
പുതിയ തട്ടിപ്പുകളെയും ഡിജിറ്റൽ സുരക്ഷാ ഭീഷണികളെയും കുറിച്ച് അറിയാൻ ദുബായ് പൊലീസിന്റെ eCrime Hub എന്ന ബോധവത്കരണ പ്ലാറ്റ്‌ഫോം പ്രയോജനപ്പെടുത്താം.
സോഷ്യൽ മീഡിയ ഉപയോഗിക്കുമ്പോൾ മറ്റുള്ളവരുടെ അവകാശങ്ങളും സ്വകാര്യതയും മാനിക്കണം. എന്തെങ്കിലും കമന്റോ പോസ്റ്റോ പ്രസിദ്ധീകരിക്കുന്നതിന് മുമ്പ് അത് മറ്റുള്ളവരിൽ ഉണ്ടാക്കാവുന്ന പ്രത്യാഘാതങ്ങളെക്കുറിച്ച് ചിന്തിക്കണമെന്നും നിയമലംഘനങ്ങൾക്ക് ഇടയാക്കുന്ന ഉള്ളടക്കങ്ങൾ പങ്കുവയ്ക്കാതിരിക്കണമെന്നും ദുബായ് പൊലീസ് പൊതുജനങ്ങളോട് അഭ്യർഥിച്ചു.
