കുവൈറ്റിലെ വാർത്തകൾ അറിയാൻ ഇപ്പോൾ തന്നെ ഫോളോ ചെയ്യൂ

Kuwait New Year security കുവൈറ്റ് സിറ്റി: പുതുവത്സരാഘോഷങ്ങളോട് അനുബന്ധിച്ച് സുരക്ഷ ശക്തമാക്കിയതായി ആഭ്യന്തര മന്ത്രാലയം അറിയിച്ചു. ആഭ്യന്തര മന്ത്രാലയത്തിലെ സെൻട്രൽ ഓപ്പറേഷൻസ് സെക്ടറിലെ റിപ്പോർട്ട്സ് വിഭാഗം ഡയറക്ടർ കേണൽ അബ്ദുല്ല സാലിം അൽ-ലമീ പറഞ്ഞു.

പൗരന്മാരുടെയും പ്രവാസികളുടെയും സുരക്ഷ ഉറപ്പാക്കാനും രാജ്യത്തിന്റെ മൊത്തത്തിലുള്ള സുരക്ഷ ശക്തിപ്പെടുത്താനും ലക്ഷ്യമിട്ടുള്ള സമഗ്ര തയ്യാറെടുപ്പ് പദ്ധതിയാണ് നടപ്പാക്കുന്നതെന്ന് അദ്ദേഹം വ്യക്തമാക്കി. ഒരു ടെലിവിഷൻ അഭിമുഖത്തിലാണ് അദ്ദേഹം ഇതുസംബന്ധിച്ച വിശദാംശങ്ങൾ അറിയിച്ചത്.

മന്ത്രാലയത്തിലെ എല്ലാ വിഭാഗങ്ങളും ബന്ധപ്പെട്ട സർക്കാർ ഏജൻസികളുമായി ചേർന്ന് ഏകോപിപ്പിച്ചാണ് സുരക്ഷാ ക്രമീകരണങ്ങൾ ഒരുക്കിയിട്ടുള്ളത്. സുരക്ഷാ സംഭവങ്ങളും മാനവിക അടിയന്തര സാഹചര്യങ്ങളും വേഗത്തിൽ കൈകാര്യം ചെയ്യാൻ സംവിധാനങ്ങൾ സജ്ജമാണെന്നും അദ്ദേഹം പറഞ്ഞു.

112 എമർജൻസി ഹെൽപ്‌ലൈൻ വഴിയെത്തുന്ന എല്ലാ പരാതികളും അതീവ ഗൗരവത്തോടെ പരിഗണിക്കുമെന്ന് കേണൽ അൽ-ലമീ വ്യക്തമാക്കി. ഈ സേവനം വർഷം മുഴുവൻ 24 മണിക്കൂറും പ്രവർത്തിക്കുന്നതാണ്.

പ്രതീക്ഷിക്കുന്ന ജനക്കൂട്ടങ്ങൾ നിയന്ത്രിക്കുന്നതിനായി വിശദമായ പദ്ധതിയുടെ അടിസ്ഥാനത്തിൽ സുരക്ഷാ പട്രോളുകളും ട്രാഫിക് പട്രോളുകളും വിന്യസിച്ചിട്ടുണ്ടെന്ന് അദ്ദേഹം അറിയിച്ചു. ഇതിലൂടെ ഗതാഗതം സുതാര്യമാക്കാനും പൊതുസുരക്ഷയെ ബാധിക്കുന്ന സംഭവങ്ങൾ ഒഴിവാക്കാനും സാധിക്കും.

സെൻട്രൽ ഓപ്പറേഷൻസ് സെക്ടറിന് കീഴിലുള്ള റിപ്പോർട്ട്സ് വിഭാഗം അവധിയില്ലാതെ പ്രവർത്തിക്കുന്ന വിഭാഗമാണെന്നും വർഷംതോറും ഏകദേശം 3.6 ലക്ഷം സുരക്ഷാ, മാനവിക പരാതികൾ കൈകാര്യം ചെയ്യുന്നതായും അദ്ദേഹം പറഞ്ഞു. സുരക്ഷാ പ്രശ്നങ്ങൾ, സഹായ അഭ്യർത്ഥനകൾ, മെഡിക്കൽ അടിയന്തരാവസ്ഥകൾ എന്നിവ ഇതിൽ ഉൾപ്പെടുന്നു.

2024-ൽ മാത്രം 112 ഹെൽപ്‌ലൈൻ വഴി 32 ലക്ഷം കോളുകൾ ലഭിച്ചതായും കേണൽ അൽ-ലമീ വ്യക്തമാക്കി. എല്ലാവരും സുരക്ഷാ ഏജൻസികളുമായി സഹകരിക്കണമെന്നും, സുരക്ഷാ-ട്രാഫിക് ഉദ്യോഗസ്ഥരുടെ നിർദ്ദേശങ്ങൾ പാലിക്കണമെന്നും, അടിയന്തര സാഹചര്യം ഉണ്ടാകുമ്പോൾ മടിക്കാതെ 112-നെ ബന്ധപ്പെടണമെന്നും അദ്ദേഹം അഭ്യർത്ഥിച്ചു.

കുവൈറ്റിൽ ഇനി കുറച്ച് നാൾ വൈകിയെ നേരം വെളുക്കൂ, പകലുകൾക്ക് നീളം കുറയും, പോരാത്തതിന് കൊടും തണുപ്പും

Kuwait Greeshma Staff Editor — December 30, 2025 · 0 Comment

കുവൈറ്റിലെ വാർത്തകൾ അറിയാൻ ഇപ്പോൾ തന്നെ ഫോളോ ചെയ്യൂ

Kuwait cold weather കുവൈറ്റ് സിറ്റി: കുവൈറ്റിൽ കടുത്ത തണുപ്പ് ശക്തമാകുന്നതിന്റെ സൂചനയായി അൽ-മുറബ്ബാനിയ സീസണിലെ മൂന്നാമത്തെയും അവസാനത്തെയും നക്ഷത്രമായ ‘അൽ-ഷുല’ ഉദിച്ചതായി അൽ-ഉജൈരി സയന്റിഫിക് സെന്റർ അറിയിച്ചു. ഇതോടെ വരും ദിവസങ്ങളിൽ താപനില ഇനിയും താഴുമെന്നും രാത്രികൾ കൂടുതൽ നീളുമെന്നും അധികൃതർ വ്യക്തമാക്കി.

ജനുവരി 2 മുതൽ ആരംഭിക്കുന്ന അൽ-ഷുല കാലഘട്ടം 13 ദിവസം തുടരും. ഈ സമയത്ത് വർഷത്തിലെ ഏറ്റവും വൈകിയ സൂര്യോദയമാണ് ഉണ്ടാകുക. ജനുവരി ആദ്യവാരം രാവിലെ 6.43ന് സൂര്യൻ ഉദിക്കുകയും വൈകുന്നേരം 5.01ന് തന്നെ അസ്തമിക്കുകയും ചെയ്യും. ഇതോടെ രാത്രി സമയം ഏകദേശം 13 മണിക്കൂർ 42 മിനിറ്റ് ആയി വർധിക്കും.

‘ജ്വാല’ എന്നർത്ഥമുള്ള അൽ-ഷുല എന്ന പേര് വൃശ്ചിക രാശിയിലെ തേളിന്റെ വാലിനോട് സാമ്യമുള്ള രണ്ട് പ്രകാശമുള്ള നക്ഷത്രങ്ങളെ സൂചിപ്പിക്കുന്നതാണ്.

മരുഭൂമി പ്രദേശങ്ങളിൽ താപനില കൂടുതൽ താഴാൻ സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. പുലർച്ചെ സമയങ്ങളിൽ മഞ്ഞുവീഴ്ചയും പുകമഞ്ഞും അനുഭവപ്പെടാം. അൽ-ഷുല കാലഘട്ടം അവസാനിക്കുന്നതോടെ അൽ-മുറബ്ബാനിയ സീസൺ പൂർത്തിയാകുകയും കുവൈറ്റ് ശൈത്യകാലത്തിന്റെ അടുത്ത ഘട്ടത്തിലേക്ക് കടക്കുകയും ചെയ്യും.

കുവൈത്തിൽ മരുന്നുകളുടെ വിലയിൽ വൻ കുറവ്: 1,654 മരുന്നുകൾക്ക് ഇളവ്, ജിസിസിയിൽ ഏറ്റവും കുറഞ്ഞ നിരക്ക്

Kuwait Greeshma Staff Editor — December 30, 2025 · 0 Comment

Kuwait medicine price reduction : കുവൈത്ത് സിറ്റി: കുവൈത്തിലെ ആരോഗ്യമേഖലയിൽ വലിയ മാറ്റങ്ങൾ വരുത്തി മരുന്നുകളുടെ വിലയിൽ വൻ കുറവ് പ്രഖ്യാപിച്ചു. 2024 മെയ് മുതൽ 2025 ഡിസംബർ വരെ രാജ്യത്ത് 1,654 മരുന്നുകളുടെയും ഫാർമസ്യൂട്ടിക്കൽ ഉൽപ്പന്നങ്ങളുടെയും വില കുവൈത്ത് ആരോഗ്യ മന്ത്രാലയം കുറച്ചതായി അധികൃതർ അറിയിച്ചു. ഇതോടെ ജിസിസി രാജ്യങ്ങളിൽ ഏറ്റവും കുറഞ്ഞ നിരക്കിൽ മരുന്നുകൾ ലഭിക്കുന്ന രാജ്യമായി കുവൈത്ത് മാറി.

കാൻസർ, പ്രമേഹം, രക്തസമ്മർദ്ദം, കൊളസ്ട്രോൾ, ആസ്ത്മ തുടങ്ങിയ ദീർഘകാല രോഗങ്ങൾക്കുള്ള മരുന്നുകൾ, ആന്റിബയോട്ടിക്കുകൾ എന്നിവയും വിലകുറച്ച പട്ടികയിൽ ഉൾപ്പെടുന്നു. മന്ത്രാലയത്തിന്റെ പുതിയ തീരുമാനമനുസരിച്ച് ചില മരുന്നുകൾക്ക് 78.5 ശതമാനം വരെ വിലക്കുറവ് ലഭിച്ചിട്ടുണ്ട്.

സ്വദേശികൾക്കും പ്രവാസികൾക്കും കുറഞ്ഞ ചെലവിൽ മികച്ച ചികിത്സാ സൗകര്യങ്ങൾ ഉറപ്പാക്കുകയാണ് സർക്കാർ ഇതിലൂടെ ലക്ഷ്യമിടുന്നത്. മരുന്നുകളുടെ ഗുണനിലവാരം നിലനിർത്തുന്നതിനൊപ്പം വില നിയന്ത്രിക്കാൻ ഡ്രഗ് പ്രൈസിംഗ് കമ്മിറ്റിയുടെ തുടർച്ചയായ മേൽനോട്ടം ഉണ്ടാകുമെന്നും ആരോഗ്യ മന്ത്രാലയം വ്യക്തമാക്കി.

പുതിയ വിലകൾ സ്വകാര്യ ഫാർമസികളിലും പ്രാബല്യത്തിൽ വരുന്നതോടെ ആയിരക്കണക്കിന് സാധാരണക്കാരായ ജനങ്ങൾക്കും പ്രവാസികൾക്കും ഇത് വലിയ ആശ്വാസമാകും.

കുവൈറ്റിൽ കടുത്ത തണുപ്പ്: താപനില 2 ഡിഗ്രിവരെ താഴുന്നു , 50 കിലോ മീറ്റർ വരെ വേ​ഗത്തിൽ ശക്തമായ കാറ്റ് ; മുന്നറിയിപ്പ് അവ​ഗണിക്കരുതേ

Kuwait Greeshma Staff Editor — December 30, 2025 · 0 Comment

Kuwait Weather Alert: കുവൈറ്റ് സിറ്റി, ഡിസംബർ 30: ഇന്ന് മുതൽ കുവൈറ്റിൽ താപനിലയിൽ ഗണ്യമായ കുറവ് അനുഭവപ്പെടുമെന്ന് കാലാവസ്ഥാ വകുപ്പ് അറിയിച്ചു. കുറഞ്ഞ താപനില 2 മുതൽ 5 ഡിഗ്രി സെൽഷ്യസ് വരെ താഴെയാകാനാണ് സാധ്യത.

കാലാവസ്ഥാ വകുപ്പിന്റെ ആക്ടിംഗ് ഡയറക്ടർ ദറാർ അൽ അലി പറഞ്ഞു, ശക്തമായ വടക്കുപടിഞ്ഞാറൻ കാറ്റിനൊപ്പം തണുത്ത വായുമാസ്സ് രാജ്യത്തെ ബാധിക്കുകയാണ്. മണിക്കൂറിൽ 50 കിലോമീറ്ററിലധികം വേഗതയിൽ കാറ്റ് വീശാൻ സാധ്യതയുണ്ടെന്നും ഇതു മൂലം പൊടിക്കാറ്റ് ഉയർന്ന് ചില പ്രദേശങ്ങളിൽ കാഴ്ച ദൂരം കുറയാമെന്നും അദ്ദേഹം വ്യക്തമാക്കി. ബുധനാഴ്ച പുലർച്ചെ മഞ്ഞുവീഴ്ചയ്ക്കും സാധ്യതയുണ്ട്.

ഇന്ന് പരമാവധി താപനില 16 മുതൽ 18 ഡിഗ്രി സെൽഷ്യസ് വരെയായിരിക്കും. ബുധനാഴ്ച പുലർച്ചെ കുറഞ്ഞ താപനില 2 മുതൽ 5 ഡിഗ്രി വരെ താഴെയാകും. ബുധനാഴ്ച പകൽ സമയത്ത് 13 മുതൽ 15 ഡിഗ്രി വരെ മാത്രമാണ് താപനില പ്രതീക്ഷിക്കുന്നത്. പുലർച്ചെ സമയം വീണ്ടും മഞ്ഞുവീഴ്ച ഉണ്ടാകാനുള്ള സാധ്യത തുടരുന്നുണ്ട്.

കടലിൽ തിരമാലകൾ ആറടി കവിയാൻ സാധ്യതയുള്ളതിനാൽ കടൽ അതിരൂക്ഷമായിരിക്കും. പകൽ സമയം തണുപ്പും രാത്രിയിൽ കടുത്ത തണുപ്പും അനുഭവപ്പെടുമെന്ന് മുന്നറിയിപ്പുണ്ട്.

ആഡംബര വാഹനങ്ങളിൽ അപകടകരമായ ഡ്രൈവിംഗ്: ജലീബിൽ മലയാളി വിദ്യാർത്ഥികളെ കുവൈത്ത് സുരക്ഷാ ഉദ്യോഗസ്ഥർ പിടികൂടി

Kuwait Greeshma Staff Editor — December 30, 2025 · 0 Comment

കുവൈറ്റിലെ വാർത്തകൾ അറിയാൻ ഇപ്പോൾ തന്നെ ഫോളോ ചെയ്യൂ

luxury car reckless driving : കുവൈത്ത് സിറ്റി: ജലീബ് അൽ ഷുയൂഖ് മേഖലയിലെ അബ്ബാസിയയിൽ ആഡംബര വാഹനങ്ങൾ ഉപയോഗിച്ച് റോഡിൽ അഭ്യാസപ്രകടനം നടത്തിയ മലയാളി വിദ്യാർത്ഥികളെ കുവൈത്ത് സുരക്ഷാ ഉദ്യോഗസ്ഥർ പിടികൂടി. വാഹനം ഓടിച്ചവരെ അറസ്റ്റ് ചെയ്യുകയും വാഹനങ്ങൾ കണ്ടുകെട്ടുകയും ചെയ്തു. സമൂഹമാധ്യമങ്ങളിൽ പ്രചരിച്ച വീഡിയോ ദൃശ്യങ്ങളുടെ അടിസ്ഥാനത്തിൽ ആഭ്യന്തര മന്ത്രാലയം നടത്തിയ അന്വേഷണത്തിലാണ് നടപടി. റോഡിൽ അശ്രദ്ധമായും അപകടകരമായും വാഹനമോടിച്ച് പൊതുജനങ്ങളുടെ ജീവന് ഭീഷണിയുയർത്തിയതിനാണ് ഇവർക്കെതിരെ കേസെടുത്തത്.

ജലീബിലെ ഒരു സ്വകാര്യ സ്കൂളിന് സമീപം ആഡംബര കാറുകൾ ഉപയോഗിച്ച് ഒരു കൂട്ടം യുവതി യുവാക്കൾ അഭ്യാസപ്രകടനം നടത്തുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു. ഇത് ശ്രദ്ധയിൽപ്പെട്ട സുരക്ഷാ വിഭാഗം ഉടൻ തന്നെ അന്വേഷണം ആരംഭിച്ചു.ഫർവാനിയ സെക്യൂരിറ്റി ഡയറക്ടറേറ്റിന് കീഴിലുള്ള ജലീബ് ഏരിയ കമാൻഡ് നടത്തിയ പരിശോധനയിൽ, സ്കൂളിലെ ഒന്നാം സെമസ്റ്റർ പരീക്ഷകൾ അവസാനിച്ചതിന്റെ ആഘോഷത്തിന്റെ ഭാഗമായാണ് വിദ്യാർത്ഥികൾ ഒത്തുചേർന്നതെന്ന് കണ്ടെത്തി.

ആഘോഷത്തിന്റെ മറവിൽ ട്രാഫിക് നിയമങ്ങൾ ലംഘിക്കുകയും അഭ്യാസപ്രകടനങ്ങൾ നടത്തുകയും ചെയ്തവരെ തിരിച്ചറിയുകയും അവർക്കെതിരെ നിയമനടപടികൾ സ്വീകരിക്കുകയും ചെയ്തു. റോഡ് സുരക്ഷയിൽ വീഴ്ച വരുത്തുന്ന ഇത്തരം പ്രവർത്തികൾ ഒരുതരത്തിലും അനുവദിക്കില്ലെന്ന് ആഭ്യന്തര മന്ത്രാലയം വ്യക്തമാക്കി

കുവൈറ്റിൽ പുതിയ താമസ നിയമ ചട്ടങ്ങൾ പ്രാബല്യത്തിൽ: ഓവർസ്റ്റേയും റസിഡൻസി ലംഘനങ്ങൾക്കും കർശന പിഴകൾ

Kuwait Greeshma Staff Editor — December 30, 2025 · 0 Comment

Kuwait residency fines : കുവൈറ്റ് സിറ്റി: താമസവുമായി ബന്ധപ്പെട്ട നിയമലംഘനങ്ങൾക്ക് ചുമത്തുന്ന പിഴകൾ വ്യക്തമാക്കുന്ന 2025 ലെ 2249-ാം നമ്പർ വിദേശികളുടെ താമസ നിയമത്തിന്റെ എക്സിക്യൂട്ടീവ് ചട്ടങ്ങൾ ആഭ്യന്തര മന്ത്രാലയം ഡിസംബർ 23 മുതൽ പ്രാബല്യത്തിൽ വരുത്തി. പുതിയ ചട്ടങ്ങൾ പിഴയുടെ നിരക്കുകളും പരമാവധി തുകയും വ്യക്തമായി നിശ്ചയിക്കുന്നു.

പുതിയ നിയമപ്രകാരം, അനുരഞ്ജനം അനുവദിക്കാവുന്ന ലംഘനങ്ങൾ വ്യക്തമാക്കിയിട്ടുണ്ട്. താമസത്തിന്റെ തരം, വിസയുടെ നില, ഓവർസ്റ്റേ അല്ലെങ്കിൽ കാലതാമസ ദൈർഘ്യം എന്നിവയെ അടിസ്ഥാനമാക്കിയാകും പിഴ കണക്കാക്കുക.

റസിഡൻസി നേടുകയോ പുതുക്കുകയോ ചെയ്യാത്തവർക്ക് പിഴ:
നിയമപരമായി നിശ്ചയിച്ച സമയത്തിനുള്ളിൽ റസിഡൻസ് പെർമിറ്റ് നേടാൻ പരാജയപ്പെട്ടാൽ, ആദ്യ മാസത്തിൽ പ്രതിദിനം 2 ദിനാർ പിഴയും, പിന്നീട് പ്രതിദിനം 4 ദിനാർ പിഴയും ചുമത്തും. പരമാവധി പിഴ 1,200 ദിനാറാണ്.
ഗാർഹിക തൊഴിലാളികൾക്ക് പ്രതിദിനം 2 ദിനാർ എന്ന നിലയിൽ പരമാവധി 600 ദിനാർ വരെ മാത്രമാണ് പിഴ.

ഓവർസ്റ്റേ ലംഘനങ്ങൾ:
വിസിറ്റ് വിസ കൈവശമുള്ളവർ, ട്രാൻസ്‌പോർട്ട് വാഹന ഡ്രൈവർമാർ, അടിയന്തര എൻട്രി പെർമിറ്റിൽ എത്തിയവർ എന്നിവർ അനുവദനീയമായ താമസ കാലാവധി കഴിഞ്ഞാൽ പ്രതിദിനം 10 ദിനാർ പിഴ അടയ്ക്കണം.

താൽക്കാലിക താമസ പെർമിറ്റ് കാലാവധി കഴിഞ്ഞിട്ടും തുടരുന്നവർ:
ആദ്യ മാസത്തിൽ പ്രതിദിനം 2 ദിനാർ, തുടർന്ന് പ്രതിദിനം 4 ദിനാർ എന്നതാണ് പിഴ. പരമാവധി 1,200 ദിനാർ. ഗാർഹിക തൊഴിലാളികൾക്ക് പരമാവധി 600 ദിനാർ.

ജോലി ഉപേക്ഷിക്കൽ കേസുകൾ:
ജോലി ഉപേക്ഷിച്ചതിനെ തുടർന്ന് റസിഡൻസ് റദ്ദാക്കി പിന്നീട് പുതുക്കിയാൽ, ആദ്യ മാസത്തിന് പ്രതിദിനം 2 ദിനാർ, തുടർന്ന് പ്രതിദിനം 4 ദിനാർ എന്ന നിലയിൽ പിഴ ചുമത്തും. പരമാവധി 1,200 ദിനാർ വരെ പിഴ ഈടാക്കും.

പ്രവാസി കുട്ടികളുടെ ജനന രജിസ്ട്രേഷൻ:
വിദേശത്ത് ജനിച്ച കുട്ടിയുടെ ജനനം നാല് മാസത്തിനുള്ളിൽ രജിസ്റ്റർ ചെയ്യാത്തപക്ഷം, ആദ്യ മാസത്തിന് ശേഷം പ്രതിദിനം 2 ദിനാർ പിഴ ചുമത്തും. പരമാവധി പിഴ 2,000 ദിനാറാണ്.

പുതിയ ചട്ടങ്ങൾ വഴി താമസ നിയമലംഘനങ്ങൾ നിയന്ത്രിക്കുകയും നിയമാനുസൃതമായ താമസം ഉറപ്പാക്കുകയും ചെയ്യുകയാണ് ലക്ഷ്യമെന്ന് ആഭ്യന്തര മന്ത്രാലയം അറിയിച്ചു.